| Library / Tipiṭaka / திபிடக • Tipiṭaka / ஸம்மோஹவினோத³னீ-அட்ட²கதா² • Sammohavinodanī-aṭṭhakathā |
6. உப்பாத³ககம்மஆயுப்பமாணவாரவண்ணனா
6. Uppādakakammaāyuppamāṇavāravaṇṇanā
(1.) உப்பாத³ககம்மங்
(1.) Uppādakakammaṃ
1021. ச²ட்ட²வாரே பஞ்சஹி காமகு³ணேஹி நானப்பகாரேஹி வா இத்³தி⁴விஸேஸேஹி தி³ப்³ப³ந்தீதி தே³வா. ஸம்முதிதே³வாதி ‘தே³வோ, தே³வீ’தி ஏவங் லோகஸம்முதியா தே³வா. உபபத்திதே³வாதி தே³வலோகே உப்பன்னத்தா உபபத்தியா தே³வா. விஸுத்³தி⁴தே³வாதி ஸப்³பே³ஸங் தே³வானங் பூஜாரஹா ஸப்³ப³கிலேஸவிஸுத்³தி⁴யா தே³வா. ராஜானோதி முத்³தா⁴பி⁴ஸித்தக²த்தியா. தே³வியோதி தேஸங் மஹேஸியோ. குமாராதி அபி⁴ஸித்தராஜூனங் அபி⁴ஸித்ததே³வியா குச்சி²ஸ்மிங் உப்பன்னகுமாரா.
1021. Chaṭṭhavāre pañcahi kāmaguṇehi nānappakārehi vā iddhivisesehi dibbantīti devā. Sammutidevāti ‘devo, devī’ti evaṃ lokasammutiyā devā. Upapattidevāti devaloke uppannattā upapattiyā devā. Visuddhidevāti sabbesaṃ devānaṃ pūjārahā sabbakilesavisuddhiyā devā. Rājānoti muddhābhisittakhattiyā. Deviyoti tesaṃ mahesiyo. Kumārāti abhisittarājūnaṃ abhisittadeviyā kucchismiṃ uppannakumārā.
உபோஸத²கம்மங் கத்வாதி சாதுத்³த³ஸாதீ³ஸு அட்ட²ங்க³ஸமன்னாக³தங் உபோஸத²ங் உபவஸித்வா. இதா³னி யஸ்மா பரித்ததா³னாதி³புஞ்ஞகம்மங் மனுஸ்ஸஸோப⁴க்³யதாய பச்சயோ, மத்தஸோ கதங் மனுஸ்ஸஸோப⁴க்³யதாய அதி⁴மத்தங், அதி⁴மத்தபா⁴வேபி நானப்பகாரபே⁴த³தோ நானப்பகாரஸ்ஸ க²த்தியமஹாஸாலாதி³பா⁴வஸ்ஸ பச்சயோ, தஸ்மா தஸ்ஸ வஸேன உபபத்திபே⁴த³ங் த³ஸ்ஸெந்தோ அப்பேகச்சே க³ஹபதிமஹாஸாலானந்திஆதி³மாஹ. தத்த² மஹாஸாரோ ஏதேஸந்தி மஹாஸாரா; ர-காரஸ்ஸ பன ல-காரங் கத்வா மஹாஸாலாதி வுத்தங். க³ஹபதியோவ மஹாஸாலா, க³ஹபதீஸு வா மஹாஸாலாதி க³ஹபதிமஹாஸாலா. ஸேஸேஸுபி ஏஸேவ நயோ. தத்த² யஸ்ஸ கே³ஹே பச்சி²மந்தேன சத்தாலீஸகோடித⁴னங் நிதா⁴னக³தங் ஹோதி, கஹாபணானஞ்ச பஞ்ச அம்ப³ணானி தி³வஸவளஞ்ஜோ நிக்க²மதி – அயங் க³ஹபதிமஹாஸாலோ நாம. யஸ்ஸ பன கே³ஹே பச்சி²மந்தேன அஸீதிகோடித⁴னங் நிதா⁴னக³தங் ஹோதி, கஹாபணானஞ்ச த³ஸஅம்ப³ணானி தி³வஸவளஞ்ஜோ நிக்க²மதி – அயங் ப்³ராஹ்மணமஹாஸாலோ நாம. யஸ்ஸ பன கே³ஹே பச்சி²மந்தேன கோடிஸதத⁴னங் நிதா⁴னக³தங் ஹோதி, கஹாபணானஞ்ச வீஸதி அம்ப³ணானி தி³வஸவளஞ்ஜோ நிக்க²மதி – அயங் க²த்தியமஹாஸாலோ நாம.
Uposathakammaṃkatvāti cātuddasādīsu aṭṭhaṅgasamannāgataṃ uposathaṃ upavasitvā. Idāni yasmā parittadānādipuññakammaṃ manussasobhagyatāya paccayo, mattaso kataṃ manussasobhagyatāya adhimattaṃ, adhimattabhāvepi nānappakārabhedato nānappakārassa khattiyamahāsālādibhāvassa paccayo, tasmā tassa vasena upapattibhedaṃ dassento appekacce gahapatimahāsālānantiādimāha. Tattha mahāsāro etesanti mahāsārā; ra-kārassa pana la-kāraṃ katvā mahāsālāti vuttaṃ. Gahapatiyova mahāsālā, gahapatīsu vā mahāsālāti gahapatimahāsālā. Sesesupi eseva nayo. Tattha yassa gehe pacchimantena cattālīsakoṭidhanaṃ nidhānagataṃ hoti, kahāpaṇānañca pañca ambaṇāni divasavaḷañjo nikkhamati – ayaṃ gahapatimahāsālo nāma. Yassa pana gehe pacchimantena asītikoṭidhanaṃ nidhānagataṃ hoti, kahāpaṇānañca dasaambaṇāni divasavaḷañjo nikkhamati – ayaṃ brāhmaṇamahāsālo nāma. Yassa pana gehe pacchimantena koṭisatadhanaṃ nidhānagataṃ hoti, kahāpaṇānañca vīsati ambaṇāni divasavaḷañjo nikkhamati – ayaṃ khattiyamahāsālo nāma.
ஸஹப்³யதந்தி ஸஹபா⁴வங்; ஸபா⁴கா³ ஹுத்வா நிப்³ப³த்தந்தீதி அத்தோ². சாதுமஹாராஜிகானந்திஆதீ³ஸு சாதுமஹாராஜிகா நாம ஸினேருபப்³ப³தஸ்ஸ வேமஜ்ஜே² ஹொந்தி. தேஸு பப்³ப³தட்ட²காபி அத்தி², ஆகாஸட்டா²பி; தேஸங் பரம்பரா சக்கவாளபப்³ப³தங் பத்தா. கி²ட்³டா³பதோ³ஸிகா, மனோபதோ³ஸிகா, ஸீதவலாஹகா, உண்ஹவலாஹகா, சந்தி³மா தே³வபுத்தோ, ஸூரியோ தே³வபுத்தோதி ஏதே ஸப்³பே³பி சாதுமஹாராஜிகதே³வலோகட்ட²கா ஏவ.
Sahabyatanti sahabhāvaṃ; sabhāgā hutvā nibbattantīti attho. Cātumahārājikānantiādīsu cātumahārājikā nāma sinerupabbatassa vemajjhe honti. Tesu pabbataṭṭhakāpi atthi, ākāsaṭṭhāpi; tesaṃ paramparā cakkavāḷapabbataṃ pattā. Khiḍḍāpadosikā, manopadosikā, sītavalāhakā, uṇhavalāhakā, candimā devaputto, sūriyo devaputtoti ete sabbepi cātumahārājikadevalokaṭṭhakā eva.
தெத்திங்ஸ ஜனா தத்த² உபபன்னாதி தாவதிங்ஸா. அபிச தாவதிங்ஸாதி தேஸங் தே³வானங் நாமமேவாதி வுத்தங். தேபி அத்தி² பப்³ப³தட்ட²கா, அத்தி² ஆகாஸட்ட²கா. தேஸங் பரம்பரா சக்கவாளபப்³ப³தங் பத்தா. ததா² யாமாதீ³னங். ஏகதே³வலோகேபி ஹி தே³வானங் பரம்பரா சக்கவாளபப்³ப³தங் அப்பத்தா நாம நத்தி². தத்த² தி³ப்³ப³ங் ஸுக²ங் யாதா பயாதா ஸம்பத்தாதி யாமா. துட்டா² பஹட்டா²தி துஸிதா. பகதிபடியத்தாரம்மணதோ அதிரேகேன ரமிதுகாமகாலே யதா²ருசிதே போ⁴கே³ நிம்மினித்வா ரமந்தீதி நிம்மானரதீ. சித்தாசாரங் ஞத்வா பரேஹி நிம்மிதேஸு போ⁴கே³ஸு வஸங் வத்தெந்தீதி பரனிம்மிதவஸவத்தீ.
Tettiṃsa janā tattha upapannāti tāvatiṃsā. Apica tāvatiṃsāti tesaṃ devānaṃ nāmamevāti vuttaṃ. Tepi atthi pabbataṭṭhakā, atthi ākāsaṭṭhakā. Tesaṃ paramparā cakkavāḷapabbataṃ pattā. Tathā yāmādīnaṃ. Ekadevalokepi hi devānaṃ paramparā cakkavāḷapabbataṃ appattā nāma natthi. Tattha dibbaṃ sukhaṃ yātā payātā sampattāti yāmā. Tuṭṭhā pahaṭṭhāti tusitā. Pakatipaṭiyattārammaṇato atirekena ramitukāmakāle yathārucite bhoge nimminitvā ramantīti nimmānaratī. Cittācāraṃ ñatvā parehi nimmitesu bhogesu vasaṃ vattentīti paranimmitavasavattī.
(2.) ஆயுப்பமாணங்
(2.) Āyuppamāṇaṃ
1022. அப்பங் வா பி⁴ய்யோதி து³தியங் வஸ்ஸஸதங் அப்பத்வா வீஸாய வா திங்ஸாய வா சத்தாலீஸாய வா பஞ்ஞாஸாய வா ஸட்டி²யா வா வஸ்ஸேஹி அதி⁴கம்பி வஸ்ஸஸதந்தி அத்தோ². ஸப்³ப³ம்பி ஹேதங் து³தியங் வஸ்ஸஸதங் அப்பத்தத்தா அப்பந்தி வுத்தங்.
1022. Appaṃvā bhiyyoti dutiyaṃ vassasataṃ appatvā vīsāya vā tiṃsāya vā cattālīsāya vā paññāsāya vā saṭṭhiyā vā vassehi adhikampi vassasatanti attho. Sabbampi hetaṃ dutiyaṃ vassasataṃ appattattā appanti vuttaṃ.
1024. ப்³ரஹ்மபாரிஸஜ்ஜாதீ³ஸு மஹாப்³ரஹ்மானங் பாரிஸஜ்ஜா பரிசாரிகாதி ப்³ரஹ்மபாரிஸஜ்ஜா. தேஸங் புரோஹிதபா⁴வே டி²தாதி ப்³ரஹ்மபுரோஹிதா. வண்ணவந்ததாய சேவ தீ³கா⁴யுகதாய ச மஹந்தோ ப்³ரஹ்மாதி மஹாப்³ரஹ்மா, தேஸங் மஹாப்³ரஹ்மானங். இமே தயோபி ஜனா பட²மஜ்ஜா²னபூ⁴மியங் ஏகதலே வஸந்தி; ஆயுஅந்தரங் பன நேஸங் நானா.
1024. Brahmapārisajjādīsu mahābrahmānaṃ pārisajjā paricārikāti brahmapārisajjā. Tesaṃ purohitabhāve ṭhitāti brahmapurohitā. Vaṇṇavantatāya ceva dīghāyukatāya ca mahanto brahmāti mahābrahmā, tesaṃ mahābrahmānaṃ. Ime tayopi janā paṭhamajjhānabhūmiyaṃ ekatale vasanti; āyuantaraṃ pana nesaṃ nānā.
1025. பரித்தா ஆபா⁴ ஏதேஸந்தி பரித்தாபா⁴. அப்பமாணா ஆபா⁴ ஏதேஸந்தி அப்பமாணாபா⁴. த³ண்ட³தீ³பிகாய அச்சி விய ஏதேஸங் ஸரீரதோ ஆபா⁴ சி²ஜ்ஜித்வா சி²ஜ்ஜித்வா பதந்தீ விய ஸரதி விஸரதீதி ஆப⁴ஸ்ஸரா. இமேபி தயோ ஜனா து³தியஜ்ஜா²னபூ⁴மியங் ஏகதலே வஸந்தி; ஆயுஅந்தரங் பன நேஸங் நானா.
1025. Parittā ābhā etesanti parittābhā. Appamāṇā ābhā etesanti appamāṇābhā. Daṇḍadīpikāya acci viya etesaṃ sarīrato ābhā chijjitvā chijjitvā patantī viya sarati visaratīti ābhassarā. Imepi tayo janā dutiyajjhānabhūmiyaṃ ekatale vasanti; āyuantaraṃ pana nesaṃ nānā.
1026. பரித்தா ஸுபா⁴ ஏதேஸந்தி பரித்தஸுபா⁴. அப்பமாணா ஸுபா⁴ ஏதேஸந்தி அப்பமாணஸுபா⁴. ஸுபே⁴ன ஓகிண்ணா விகிண்ணா, ஸுபே⁴ன ஸரீரப்பபா⁴வண்ணேன ஏகக்³க⁴னா, ஸுவண்ணமஞ்ஜுஸாய ட²பிதஸம்பஜ்ஜலிதகஞ்சனபிண்ட³ஸஸ்ஸிரீகாதி ஸுப⁴கிண்ஹா. இமேபி தயோ ஜனா ததியஜ்ஜா²னபூ⁴மியங் ஏகதலே வஸந்தி; ஆயுஅந்தரங் பன நேஸங் நானா.
1026. Parittā subhā etesanti parittasubhā. Appamāṇā subhā etesanti appamāṇasubhā. Subhena okiṇṇā vikiṇṇā, subhena sarīrappabhāvaṇṇena ekagghanā, suvaṇṇamañjusāya ṭhapitasampajjalitakañcanapiṇḍasassirīkāti subhakiṇhā. Imepi tayo janā tatiyajjhānabhūmiyaṃ ekatale vasanti; āyuantaraṃ pana nesaṃ nānā.
1027. ஆரம்மணனானத்ததாதி ஆரம்மணஸ்ஸ நானத்தபா⁴வோ. மனஸிகாரனானத்ததாதீ³ஸுபி ஏஸேவ நயோ. எத்த² ஏகஸ்ஸ பத²வீகஸிணங் ஆரம்மணங் ஹோதி…பே॰… ஏகஸ்ஸ ஓதா³தகஸிணந்தி இத³ங் ஆரம்மணனானத்தங். ஏகோ பத²வீகஸிணங் மனஸி கரோதி…பே॰… ஏகோ ஓதா³தகஸிணந்தி இத³ங் மனஸிகாரனானத்தங். ஏகஸ்ஸ பத²வீகஸிணே ச²ந்தோ³ ஹோதி…பே॰… ஏகஸ்ஸ ஓதா³தகஸிணேதி இத³ங் ச²ந்த³னானத்தங். ஏகோ பத²வீகஸிணே பத்த²னங் கரோதி…பே॰… ஏகோ ஓதா³தகஸிணேதி இத³ங் பணிதி⁴னானத்தங். ஏகோ பத²வீகஸிணவஸேன அதி⁴முச்சதி…பே॰… ஏகோ ஓதா³தகஸிணவஸேனாதி இத³ங் அதி⁴மொக்க²னானத்தங். ஏகோ பத²வீகஸிணவஸேன சித்தங் அபி⁴னீஹரதி…பே॰… ஏகோ ஓதா³தகஸிணவஸேனாதி இத³ங் அபி⁴னீஹாரனானத்தங். ஏகஸ்ஸ பத²வீகஸிணபரிச்சி²ந்த³னகபஞ்ஞா ஹோதி…பே॰… ஏகஸ்ஸ ஓதா³தகஸிணபரிச்சி²ந்த³னகபஞ்ஞாதி இத³ங் பஞ்ஞானானத்தங். தத்த² ஆரம்மணமனஸிகாரா புப்³ப³பா⁴கே³ன கதி²தா. ச²ந்த³பணிதி⁴அதி⁴மொக்கா²பி⁴னீஹாரா அப்பனாயபி வத்தந்தி உபசாரேபி. பஞ்ஞா பன லோகியலோகுத்தரமிஸ்ஸகா கதி²தா.
1027. Ārammaṇanānattatāti ārammaṇassa nānattabhāvo. Manasikāranānattatādīsupi eseva nayo. Ettha ekassa pathavīkasiṇaṃ ārammaṇaṃ hoti…pe… ekassa odātakasiṇanti idaṃ ārammaṇanānattaṃ. Eko pathavīkasiṇaṃ manasi karoti…pe… eko odātakasiṇanti idaṃ manasikāranānattaṃ. Ekassa pathavīkasiṇe chando hoti…pe… ekassa odātakasiṇeti idaṃ chandanānattaṃ. Eko pathavīkasiṇe patthanaṃ karoti…pe… eko odātakasiṇeti idaṃ paṇidhinānattaṃ. Eko pathavīkasiṇavasena adhimuccati…pe… eko odātakasiṇavasenāti idaṃ adhimokkhanānattaṃ. Eko pathavīkasiṇavasena cittaṃ abhinīharati…pe… eko odātakasiṇavasenāti idaṃ abhinīhāranānattaṃ. Ekassa pathavīkasiṇaparicchindanakapaññā hoti…pe… ekassa odātakasiṇaparicchindanakapaññāti idaṃ paññānānattaṃ. Tattha ārammaṇamanasikārā pubbabhāgena kathitā. Chandapaṇidhiadhimokkhābhinīhārā appanāyapi vattanti upacārepi. Paññā pana lokiyalokuttaramissakā kathitā.
அஸஞ்ஞஸத்தானந்தி ஸஞ்ஞாவிரஹிதானங் ஸத்தானங். ஏகச்சே ஹி தித்தா²யதனே பப்³ப³ஜித்வா ‘சித்தங் நிஸ்ஸாய ரஜ்ஜனது³ஸ்ஸனமுய்ஹனானி நாம ஹொந்தீ’தி சித்தே தோ³ஸங் தி³ஸ்வா ‘அசித்தகபா⁴வோ நாம ஸோப⁴னோ, தி³ட்ட²த⁴ம்மனிப்³பா³னமேத’ந்தி ஸஞ்ஞாவிராக³ங் ஜனெத்வா தத்ரூபக³ங் பஞ்சமங் ஸமாபத்திங் பா⁴வெத்வா தத்த² நிப்³ப³த்தந்தி. தேஸங் உபபத்திக்க²ணே ஏகோ ரூபக்க²ந்தோ⁴யேவ நிப்³ப³த்ததி. ட²த்வா நிப்³ப³த்தோ டி²தகோ ஏவ ஹோதி, நிஸீதி³த்வா நிப்³ப³த்தோ நிஸின்னகோவ நிபஜ்ஜித்வா நிப்³ப³த்தோ நிபன்னோவ. சித்தகம்மரூபகஸதி³ஸா ஹுத்வா பஞ்ச கப்பஸதானி திட்ட²ந்தி. தேஸங் பரியோஸானே ஸோ ரூபகாயோ அந்தரதா⁴யதி, காமாவசரஸஞ்ஞா உப்பஜ்ஜதி; தேன இத⁴ ஸஞ்ஞுப்பாதே³ன தே தே³வா தம்ஹா காயா சுதாதி பஞ்ஞாயந்தி.
Asaññasattānanti saññāvirahitānaṃ sattānaṃ. Ekacce hi titthāyatane pabbajitvā ‘cittaṃ nissāya rajjanadussanamuyhanāni nāma hontī’ti citte dosaṃ disvā ‘acittakabhāvo nāma sobhano, diṭṭhadhammanibbānameta’nti saññāvirāgaṃ janetvā tatrūpagaṃ pañcamaṃ samāpattiṃ bhāvetvā tattha nibbattanti. Tesaṃ upapattikkhaṇe eko rūpakkhandhoyeva nibbattati. Ṭhatvā nibbatto ṭhitako eva hoti, nisīditvā nibbatto nisinnakova nipajjitvā nibbatto nipannova. Cittakammarūpakasadisā hutvā pañca kappasatāni tiṭṭhanti. Tesaṃ pariyosāne so rūpakāyo antaradhāyati, kāmāvacarasaññā uppajjati; tena idha saññuppādena te devā tamhā kāyā cutāti paññāyanti.
விபுலா ப²லா ஏதேஸந்தி வேஹப்ப²லா. அத்தனோ ஸம்பத்தியா ந ஹாயந்தி ந விஹாயந்தீதி அவிஹா. ந கஞ்சி ஸத்தங் தப்பந்தீதி அதப்பா. ஸுந்த³ரா த³ஸ்ஸனா அபி⁴ரூபா பாஸாதி³காதி ஸுத³ஸ்ஸா. ஸுட்ட² பஸ்ஸந்தி, ஸுந்த³ரமேதேஸங் வா த³ஸ்ஸனந்தி ஸுத³ஸ்ஸீ. ஸப்³பே³ஹி ஏவ கு³ணேஹி ச ப⁴வஸம்பத்தியா ச ஜெட்டா², நத்தெ²த்த² கனிட்டா²தி அகனிட்டா².
Vipulā phalā etesanti vehapphalā. Attano sampattiyā na hāyanti na vihāyantīti avihā. Na kañci sattaṃ tappantīti atappā. Sundarā dassanā abhirūpā pāsādikāti sudassā. Suṭṭha passanti, sundarametesaṃ vā dassananti sudassī. Sabbehi eva guṇehi ca bhavasampattiyā ca jeṭṭhā, natthettha kaniṭṭhāti akaniṭṭhā.
1028. ஆகாஸானஞ்சாயதனங் உபக³தாதி ஆகாஸானஞ்சாயதனூபகா³. இதரேஸுபி ஏஸேவ நயோ . இதி ச² காமாவசரா, நவ ப்³ரஹ்மலோகா, பஞ்ச ஸுத்³தா⁴வாஸா, சத்தாரோ அரூபா அஸஞ்ஞஸத்தவேஹப்ப²லேஹி ஸத்³தி⁴ங் ச²ப்³பீ³ஸதி தே³வலோகா; மனுஸ்ஸலோகேன ஸத்³தி⁴ங் ஸத்தவீஸதி.
1028. Ākāsānañcāyatanaṃ upagatāti ākāsānañcāyatanūpagā. Itaresupi eseva nayo . Iti cha kāmāvacarā, nava brahmalokā, pañca suddhāvāsā, cattāro arūpā asaññasattavehapphalehi saddhiṃ chabbīsati devalokā; manussalokena saddhiṃ sattavīsati.
தத்த² ஸம்மாஸம்பு³த்³தே⁴ன மனுஸ்ஸானங் தே³வானஞ்ச ஆயுங் பரிச்சி²ந்த³மானேன சதூஸு அபாயேஸு பு⁴ம்மதே³வேஸு ச ஆயு பரிச்சி²ன்னங் தங் கஸ்மாதி? நிரயே தாவ கம்மமேவ பமாணங். யாவ கம்மங் ந கீ²யதி, ந தாவ சவந்தி. ததா² ஸேஸஅபாயேஸு. பு⁴ம்மதே³வானம்பி கம்மமேவ பமாணங். தத்த² நிப்³ப³த்தா ஹி கேசி ஸத்தாஹமத்தங் திட்ட²ந்தி, கேசி அத்³த⁴மாஸங், கேசி மாஸங், கப்பங் திட்ட²மானாபி அத்தி²யேவ.
Tattha sammāsambuddhena manussānaṃ devānañca āyuṃ paricchindamānena catūsu apāyesu bhummadevesu ca āyu paricchinnaṃ taṃ kasmāti? Niraye tāva kammameva pamāṇaṃ. Yāva kammaṃ na khīyati, na tāva cavanti. Tathā sesaapāyesu. Bhummadevānampi kammameva pamāṇaṃ. Tattha nibbattā hi keci sattāhamattaṃ tiṭṭhanti, keci addhamāsaṃ, keci māsaṃ, kappaṃ tiṭṭhamānāpi atthiyeva.
தத்த² மனுஸ்ஸேஸு கி³ஹிபா⁴வே டி²தாயேவ ஸோதாபன்னாபி ஹொந்தி, ஸகதா³கா³மிப²லம்பி அனாகா³மிப²லம்பி அரஹத்தப²லம்பி பாபுணந்தி. தேஸு ஸோதாபன்னாத³யோ யாவஜீவங் திட்ட²ந்தி. கீ²ணாஸவா பன பரினிப்³பா³யந்தி வா பப்³ப³ஜந்தி வா. கஸ்மா? அரஹத்தங் நாம ஸெட்ட²கு³ணோ, கி³ஹிலிங்க³ங் ஹீனங், தங் ஹீனதாய உத்தமங் கு³ணங் தா⁴ரேதுங் ந ஸக்கோதி. தஸ்மா தே பரினிப்³பா³துகாமா வா பப்³ப³ஜிதுகாமா வா ஹொந்தி.
Tattha manussesu gihibhāve ṭhitāyeva sotāpannāpi honti, sakadāgāmiphalampi anāgāmiphalampi arahattaphalampi pāpuṇanti. Tesu sotāpannādayo yāvajīvaṃ tiṭṭhanti. Khīṇāsavā pana parinibbāyanti vā pabbajanti vā. Kasmā? Arahattaṃ nāma seṭṭhaguṇo, gihiliṅgaṃ hīnaṃ, taṃ hīnatāya uttamaṃ guṇaṃ dhāretuṃ na sakkoti. Tasmā te parinibbātukāmā vā pabbajitukāmā vā honti.
பு⁴ம்மதே³வா பன அரஹத்தங் பத்வாபி யாவஜீவங் திட்ட²ந்தி. ச²ஸு காமாவசரதே³வேஸு ஸோதாபன்னஸகதா³கா³மினோ யாவஜீவங் திட்ட²ந்தி; அனாகா³மினா ரூபப⁴வங் க³ந்துங் வட்டதி, கீ²ணாஸவேன பரினிப்³பா³துங். கஸ்மா ? நிலீயனோகாஸஸ்ஸ அபா⁴வா. ரூபாவசராரூபாவசரேஸு ஸப்³பே³பி யாவஜீவங் திட்ட²ந்தி. தத்த² ரூபாவசரே நிப்³ப³த்தா ஸோதாபன்னஸகதா³கா³மினோ ந புன இதா⁴க³ச்ச²ந்தி, தத்தே²வ பரினிப்³பா³யந்தி. ஏதே ஹி ஜா²னஅனாகா³மினோ நாம.
Bhummadevā pana arahattaṃ patvāpi yāvajīvaṃ tiṭṭhanti. Chasu kāmāvacaradevesu sotāpannasakadāgāmino yāvajīvaṃ tiṭṭhanti; anāgāminā rūpabhavaṃ gantuṃ vaṭṭati, khīṇāsavena parinibbātuṃ. Kasmā ? Nilīyanokāsassa abhāvā. Rūpāvacarārūpāvacaresu sabbepi yāvajīvaṃ tiṭṭhanti. Tattha rūpāvacare nibbattā sotāpannasakadāgāmino na puna idhāgacchanti, tattheva parinibbāyanti. Ete hi jhānaanāgāmino nāma.
அட்ட²ஸமாபத்திலாபீ⁴னங் பன கிங் நியமேதி? பகு³ணஜ்ஜா²னங். யதே³வஸ்ஸ பகு³ணங் ஹோதி, தேன உப்பஜ்ஜதி. ஸப்³பே³ஸு பன பகு³ணேஸு கிங் நியமேதி? பத்த²னா. யத்த² உபபத்திங் பத்தே²தி தத்தே²வ உபபஜ்ஜதி. பத்த²னாய அஸதி கிங் நியமேதி? மரணஸமயே ஸமாபன்னா ஸமாபத்தி. மரணஸமயே ஸமாபன்னா நத்தி², கிங் நியமேதி? நேவஸஞ்ஞானாஸஞ்ஞாயதனஸமாபத்தி. ஏகங்ஸேன ஹி ஸோ நேவஸஞ்ஞானாஸஞ்ஞாயதனே உபபஜ்ஜதி. நவஸு ப்³ரஹ்மலோகேஸு நிப்³ப³த்தஅரியஸாவகானங் தத்ரூபபத்திபி ஹோதி உபரூபபத்திபி ந ஹெட்டூ²பபத்தி. புது²ஜ்ஜனானங் பன தத்ரூபபத்திபி ஹோதி உபரூபபத்திபி ஹெட்டூ²பபத்திபி. பஞ்சஸு ஸுத்³தா⁴வாஸேஸு சதூஸு ச அரூபேஸு அரியஸாவகானங் தத்ரூபபத்திபி ஹோதி உபரூபபத்திபி. பட²மஜ்ஜா²னபூ⁴மியங் நிப்³ப³த்தோ அனாகா³மீ நவ ப்³ரஹ்மலோகே ஸோதெ⁴த்வா மத்த²கே டி²தோ பரினிப்³பா³தி. வேஹப்ப²லா, அகனிட்டா², நேவஸஞ்ஞானாஸஞ்ஞாயதனந்தி இமே தயோ தே³வலோகா ஸெட்ட²ப⁴வா நாம. இமேஸு தீஸு டா²னேஸு நிப்³ப³த்தஅனாகா³மினோ நேவ உத்³த⁴ங் க³ச்ச²ந்தி, ந அதோ⁴, தத்த² தத்தே²வ பரினிப்³பா³யந்தீதி. இத³மெத்த² பகிண்ணகங்.
Aṭṭhasamāpattilābhīnaṃ pana kiṃ niyameti? Paguṇajjhānaṃ. Yadevassa paguṇaṃ hoti, tena uppajjati. Sabbesu pana paguṇesu kiṃ niyameti? Patthanā. Yattha upapattiṃ pattheti tattheva upapajjati. Patthanāya asati kiṃ niyameti? Maraṇasamaye samāpannā samāpatti. Maraṇasamaye samāpannā natthi, kiṃ niyameti? Nevasaññānāsaññāyatanasamāpatti. Ekaṃsena hi so nevasaññānāsaññāyatane upapajjati. Navasu brahmalokesu nibbattaariyasāvakānaṃ tatrūpapattipi hoti uparūpapattipi na heṭṭhūpapatti. Puthujjanānaṃ pana tatrūpapattipi hoti uparūpapattipi heṭṭhūpapattipi. Pañcasu suddhāvāsesu catūsu ca arūpesu ariyasāvakānaṃ tatrūpapattipi hoti uparūpapattipi. Paṭhamajjhānabhūmiyaṃ nibbatto anāgāmī nava brahmaloke sodhetvā matthake ṭhito parinibbāti. Vehapphalā, akaniṭṭhā, nevasaññānāsaññāyatananti ime tayo devalokā seṭṭhabhavā nāma. Imesu tīsu ṭhānesu nibbattaanāgāmino neva uddhaṃ gacchanti, na adho, tattha tattheva parinibbāyantīti. Idamettha pakiṇṇakaṃ.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / விப⁴ங்க³பாளி • Vibhaṅgapāḷi / 18. த⁴ம்மஹத³யவிப⁴ங்கோ³ • 18. Dhammahadayavibhaṅgo
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-மூலடீகா • Vibhaṅga-mūlaṭīkā / 18. த⁴ம்மஹத³யவிப⁴ங்கோ³ • 18. Dhammahadayavibhaṅgo
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-அனுடீகா • Vibhaṅga-anuṭīkā / 18. த⁴ம்மஹத³யவிப⁴ங்கோ³ • 18. Dhammahadayavibhaṅgo
