| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
4. உப்பாதா³ஸுத்தவண்ணனா
4. Uppādāsuttavaṇṇanā
137. சதுத்தே² உப்பாதா³ வா ததா²க³தானந்தி ததா²க³தானங் உப்பாதே³பி வேனெய்யபுக்³க³லானங் மக்³க³ப²லுப்பத்தி விய ஸங்கா²ரானங் அனிச்சாதி³ஸபா⁴வோ ந ததா²க³துப்பாதா³யத்தோ, அத² கோ² ததா²க³தானங் உப்பாதே³பி அனுப்பாதே³பி ஹோதிமேவாதி வுத்தங் ஹோதி. டி²தாவ ஸா தா⁴தூதி டி²தோ ஏவ ஸோ அனிச்சஸபா⁴வோ ப்³யபி⁴சாராபா⁴வதோ ந கதா³சி ஸங்கா²ரா அனிச்சா ந ஹோதி. காமங் அஸங்க²தா விய தா⁴து ந நிச்சோ ஸோ ஸபா⁴வோ, ததா²பி ஸப்³ப³காலிகோயேவாதி அதி⁴ப்பாயோ.
137. Catutthe uppādā vā tathāgatānanti tathāgatānaṃ uppādepi veneyyapuggalānaṃ maggaphaluppatti viya saṅkhārānaṃ aniccādisabhāvo na tathāgatuppādāyatto, atha kho tathāgatānaṃ uppādepi anuppādepi hotimevāti vuttaṃ hoti. Ṭhitāva sā dhātūti ṭhito eva so aniccasabhāvo byabhicārābhāvato na kadāci saṅkhārā aniccā na hoti. Kāmaṃ asaṅkhatā viya dhātu na nicco so sabhāvo, tathāpi sabbakālikoyevāti adhippāyo.
அபரோ நயோ – டி²தாவ ஸா தா⁴தூதி ‘‘ஸப்³பே³ ஸங்கா²ரா அனிச்சா’’தி ஏஸா தா⁴து ஏஸ ஸபா⁴வோ ததா²க³தானங் உப்பாத³தோ புப்³பே³ உத்³த⁴ஞ்ச அப்படிவிஜ்ஜி²யமானோ ந ததா²க³தேஹி உப்பாதி³தோ, அத² கோ² ஸப்³ப³காலங் ஸப்³பே³ ஸங்கா²ரா அனிச்சா, டி²தாவ ஸா தா⁴து, கேவலங் பன ஸயம்பு⁴ஞாணேன அபி⁴ஸம்பு³ஜ்ஜ²னதோ ‘‘அயங் த⁴ம்மோ ததா²க³தேன அபி⁴ஸம்பு³த்³தோ⁴’’தி பவேத³னதோ ச ததா²க³தோ த⁴ம்மஸ்ஸாமீதி வுச்சதி அபுப்³ப³ஸ்ஸ தஸ்ஸ உப்பாத³னதோ. தேன வுத்தங் ‘‘டி²தாவ ஸா தா⁴தூ’’தி.
Aparo nayo – ṭhitāva sā dhātūti ‘‘sabbe saṅkhārā aniccā’’ti esā dhātu esa sabhāvo tathāgatānaṃ uppādato pubbe uddhañca appaṭivijjhiyamāno na tathāgatehi uppādito, atha kho sabbakālaṃ sabbe saṅkhārā aniccā, ṭhitāva sā dhātu, kevalaṃ pana sayambhuñāṇena abhisambujjhanato ‘‘ayaṃ dhammo tathāgatena abhisambuddho’’ti pavedanato ca tathāgato dhammassāmīti vuccati apubbassa tassa uppādanato. Tena vuttaṃ ‘‘ṭhitāva sā dhātū’’ti.
அபி⁴ஸம்பு³ஜ்ஜ²தீதி ஞாணேன அபி⁴ஸம்பு³ஜ்ஜ²தி. அபி⁴ஸமேதீதி ஞாணேன அபி⁴ஸமாக³ச்ச²தி. ஆசிக்க²தீதி கதே²தி. தே³ஸேதீதி த³ஸ்ஸேதி. பஞ்ஞாபேதீதி ஜானாபேதி. பட்ட²பேதீதி ஞாணமுகே² ட²பேதி. விவரதீதி விவரித்வா த³ஸ்ஸேதி. விப⁴ஜதீதி விபா⁴க³தோ த³ஸ்ஸேதி. உத்தானீகரோதீதி பாகடங் கரோதி.
Abhisambujjhatīti ñāṇena abhisambujjhati. Abhisametīti ñāṇena abhisamāgacchati. Ācikkhatīti katheti. Desetīti dasseti. Paññāpetīti jānāpeti. Paṭṭhapetīti ñāṇamukhe ṭhapeti. Vivaratīti vivaritvā dasseti. Vibhajatīti vibhāgato dasseti. Uttānīkarotīti pākaṭaṃ karoti.
அத² வா அபி⁴ஸம்பு³ஜ்ஜ²தீதி பச்சக்க²கரணேன அபி⁴முக²ங் பு³ஜ்ஜ²தி, யாதா²வதோ படிவிஜ்ஜ²தி. ததோ ஏவ அபி⁴ஸமேதி அபி⁴முக²ங் ஸமாக³ச்ச²தி. ஆதி³தோ கதெ²ந்தோ ஆசிக்க²தி, உத்³தி³ஸதீதி அத்தோ². தமேவ உத்³தே³ஸங் பரியோஸாபெந்தோ தே³ஸேதி. யதா²உத்³தி³ட்ட²மத்த²ங் நித³ஸ்ஸனவஸேன பகாரேஹி ஞாபெந்தோ பஞ்ஞாபேதி. பகாரேஹி ஏதமத்த²ங் பதிட்ட²பெந்தோ பட்ட²பேதி. யதா²உத்³தி³ட்ட²ங் படினித³ஸ்ஸனவஸேன விவரதி விப⁴ஜதி. விவடங் விப⁴த்தஞ்ச அத்த²ங் ஹேதூதா³ஹரணத³ஸ்ஸனேஹி பாகடங் கரொந்தோ உத்தானீகரோதி.
Atha vā abhisambujjhatīti paccakkhakaraṇena abhimukhaṃ bujjhati, yāthāvato paṭivijjhati. Tato eva abhisameti abhimukhaṃ samāgacchati. Ādito kathento ācikkhati, uddisatīti attho. Tameva uddesaṃ pariyosāpento deseti. Yathāuddiṭṭhamatthaṃ nidassanavasena pakārehi ñāpento paññāpeti. Pakārehi etamatthaṃ patiṭṭhapento paṭṭhapeti. Yathāuddiṭṭhaṃ paṭinidassanavasena vivarati vibhajati. Vivaṭaṃ vibhattañca atthaṃ hetūdāharaṇadassanehi pākaṭaṃ karonto uttānīkaroti.
உப்பாதா³ஸுத்தவண்ணனா நிட்டி²தா.
Uppādāsuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 4. உப்பாதா³ஸுத்தங் • 4. Uppādāsuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 4. உப்பாதா³ஸுத்தவண்ணனா • 4. Uppādāsuttavaṇṇanā
