| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၄. ဥပ္ပာဒာသုတ္တဝဏ္ဏနာ
4. Uppādāsuttavaṇṇanā
၁၃၇. စတုတ္ထေ ဥပ္ပာဒာ ဝာ တထာဂတာနန္တိ တထာဂတာနံ ဥပ္ပာဒေပိ ဝေနေယ္ယပုဂ္ဂလာနံ မဂ္ဂဖလုပ္ပတ္တိ ဝိယ သင္ခာရာနံ အနိစ္စာဒိသဘာဝော န တထာဂတုပ္ပာဒာယတ္တော, အထ ခော တထာဂတာနံ ဥပ္ပာဒေပိ အနုပ္ပာဒေပိ ဟောတိမေဝာတိ ဝုတ္တံ ဟောတိ။ ဌိတာဝ သာ ဓာတူတိ ဌိတော ဧဝ သော အနိစ္စသဘာဝော ဗ္ယဘိစာရာဘာဝတော န ကဒာစိ သင္ခာရာ အနိစ္စာ န ဟောတိ။ ကာမံ အသင္ခတာ ဝိယ ဓာတု န နိစ္စော သော သဘာဝော, တထာပိ သဗ္ဗကာလိကောယေဝာတိ အဓိပ္ပာယော။
137. Catutthe uppādā vā tathāgatānanti tathāgatānaṃ uppādepi veneyyapuggalānaṃ maggaphaluppatti viya saṅkhārānaṃ aniccādisabhāvo na tathāgatuppādāyatto, atha kho tathāgatānaṃ uppādepi anuppādepi hotimevāti vuttaṃ hoti. Ṭhitāva sā dhātūti ṭhito eva so aniccasabhāvo byabhicārābhāvato na kadāci saṅkhārā aniccā na hoti. Kāmaṃ asaṅkhatā viya dhātu na nicco so sabhāvo, tathāpi sabbakālikoyevāti adhippāyo.
အပရော နယော – ဌိတာဝ သာ ဓာတူတိ ‘‘သဗ္ဗေ သင္ခာရာ အနိစ္စာ’’တိ ဧသာ ဓာတု ဧသ သဘာဝော တထာဂတာနံ ဥပ္ပာဒတော ပုဗ္ဗေ ဥဒ္ဓဉ္စ အပ္ပဋိဝိဇ္ဈိယမာနော န တထာဂတေဟိ ဥပ္ပာဒိတော, အထ ခော သဗ္ဗကာလံ သဗ္ဗေ သင္ခာရာ အနိစ္စာ, ဌိတာဝ သာ ဓာတု, ကေဝလံ ပန သယမ္ဘုဉာဏေန အဘိသမ္ဗုဇ္ဈနတော ‘‘အယံ ဓမ္မော တထာဂတေန အဘိသမ္ဗုဒ္ဓော’’တိ ပဝေဒနတော စ တထာဂတော ဓမ္မသ္သာမီတိ ဝုစ္စတိ အပုဗ္ဗသ္သ တသ္သ ဥပ္ပာဒနတော။ တေန ဝုတ္တံ ‘‘ဌိတာဝ သာ ဓာတူ’’တိ။
Aparo nayo – ṭhitāva sā dhātūti ‘‘sabbe saṅkhārā aniccā’’ti esā dhātu esa sabhāvo tathāgatānaṃ uppādato pubbe uddhañca appaṭivijjhiyamāno na tathāgatehi uppādito, atha kho sabbakālaṃ sabbe saṅkhārā aniccā, ṭhitāva sā dhātu, kevalaṃ pana sayambhuñāṇena abhisambujjhanato ‘‘ayaṃ dhammo tathāgatena abhisambuddho’’ti pavedanato ca tathāgato dhammassāmīti vuccati apubbassa tassa uppādanato. Tena vuttaṃ ‘‘ṭhitāva sā dhātū’’ti.
အဘိသမ္ဗုဇ္ဈတီတိ ဉာဏေန အဘိသမ္ဗုဇ္ဈတိ။ အဘိသမေတီတိ ဉာဏေန အဘိသမာဂစ္ဆတိ။ အာစိက္ခတီတိ ကထေတိ။ ဒေသေတီတိ ဒသ္သေတိ။ ပညာပေတီတိ ဇာနာပေတိ။ ပဋ္ဌပေတီတိ ဉာဏမုခေ ဌပေတိ။ ဝိဝရတီတိ ဝိဝရိတ္ဝာ ဒသ္သေတိ။ ဝိဘဇတီတိ ဝိဘာဂတော ဒသ္သေတိ။ ဥတ္တာနီကရောတီတိ ပာကဋံ ကရောတိ။
Abhisambujjhatīti ñāṇena abhisambujjhati. Abhisametīti ñāṇena abhisamāgacchati. Ācikkhatīti katheti. Desetīti dasseti. Paññāpetīti jānāpeti. Paṭṭhapetīti ñāṇamukhe ṭhapeti. Vivaratīti vivaritvā dasseti. Vibhajatīti vibhāgato dasseti. Uttānīkarotīti pākaṭaṃ karoti.
အထ ဝာ အဘိသမ္ဗုဇ္ဈတီတိ ပစ္စက္ခကရဏေန အဘိမုခံ ဗုဇ္ဈတိ, ယာထာဝတော ပဋိဝိဇ္ဈတိ။ တတော ဧဝ အဘိသမေတိ အဘိမုခံ သမာဂစ္ဆတိ။ အာဒိတော ကထေန္တော အာစိက္ခတိ, ဥဒ္ဒိသတီတိ အတ္ထော။ တမေဝ ဥဒ္ဒေသံ ပရိယောသာပေန္တော ဒေသေတိ။ ယထာဥဒ္ဒိဋ္ဌမတ္ထံ နိဒသ္သနဝသေန ပကာရေဟိ ဉာပေန္တော ပညာပေတိ။ ပကာရေဟိ ဧတမတ္ထံ ပတိဋ္ဌပေန္တော ပဋ္ဌပေတိ။ ယထာဥဒ္ဒိဋ္ဌံ ပဋိနိဒသ္သနဝသေန ဝိဝရတိ ဝိဘဇတိ။ ဝိဝဋံ ဝိဘတ္တဉ္စ အတ္ထံ ဟေတူဒာဟရဏဒသ္သနေဟိ ပာကဋံ ကရောန္တော ဥတ္တာနီကရောတိ။
Atha vā abhisambujjhatīti paccakkhakaraṇena abhimukhaṃ bujjhati, yāthāvato paṭivijjhati. Tato eva abhisameti abhimukhaṃ samāgacchati. Ādito kathento ācikkhati, uddisatīti attho. Tameva uddesaṃ pariyosāpento deseti. Yathāuddiṭṭhamatthaṃ nidassanavasena pakārehi ñāpento paññāpeti. Pakārehi etamatthaṃ patiṭṭhapento paṭṭhapeti. Yathāuddiṭṭhaṃ paṭinidassanavasena vivarati vibhajati. Vivaṭaṃ vibhattañca atthaṃ hetūdāharaṇadassanehi pākaṭaṃ karonto uttānīkaroti.
ဥပ္ပာဒာသုတ္တဝဏ္ဏနာ နိဋ္ဌိတာ။
Uppādāsuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၄. ဥပ္ပာဒာသုတ္တံ • 4. Uppādāsuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၄. ဥပ္ပာဒာသုတ္တဝဏ္ဏနာ • 4. Uppādāsuttavaṇṇanā
