| Library / Tipiṭaka / තිපිටක • Tipiṭaka / උදානපාළි • Udānapāḷi |
10. උප්‌පජ්‌ජන්‌තිසුත්‌තං
10. Uppajjantisuttaṃ
60. එවං මෙ සුතං – එකං සමයං භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. අථ ඛො ආයස්‌මා ආනන්‌දො යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං නිසීදි. එකමන්‌තං නිසින්‌නො ඛො ආයස්‌මා ආනන්‌දො භගවන්‌තං එතදවොච –
60. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca –
‘‘යාවකීවඤ්‌ච, භන්‌තෙ, තථාගතා ලොකෙ නුප්‌පජ්‌ජන්‌ති අරහන්‌තො සම්‌මාසම්‌බුද්‌ධා තාව අඤ්‌ඤතිත්‌ථියා පරිබ්‌බාජකා සක්‌කතා හොන්‌ති ගරුකතා මානිතා පූජිතා අපචිතා ලාභිනො චීවරපිණ්‌ඩපාතසෙනාසනගිලානපච්‌චයභෙසජ්‌ජපරික්‌ඛාරානං. යතො ච ඛො, භන්‌තෙ, තථාගතා ලොකෙ උප්‌පජ්‌ජන්‌ති අරහන්‌තො සම්‌මාසම්‌බුද්‌ධා අථ අඤ්‌ඤතිත්‌ථියා පරිබ්‌බාජකා අසක්‌කතා හොන්‌ති අගරුකතා අමානිතා අපූජිතා අනපචිතා න ලාභිනො චීවරපිණ්‌ඩපාතසෙනාසනගිලානපච්‌චයභෙසජ්‌ජපරික්‌ඛාරානං. භගවා යෙව 1 දානි, භන්‌තෙ, සක්‌කතො හොති ගරුකතො මානිතො පූජිතො අපචිතො ලාභී චීවරපිණ්‌ඩපාතසෙනාසනගිලානපච්‌චයභෙසජ්‌ජපරික්‌ඛාරානං, භික්‌ඛුසඞ්‌ඝො චා’’ති.
‘‘Yāvakīvañca, bhante, tathāgatā loke nuppajjanti arahanto sammāsambuddhā tāva aññatitthiyā paribbājakā sakkatā honti garukatā mānitā pūjitā apacitā lābhino cīvarapiṇḍapātasenāsanagilānapaccayabhesajjaparikkhārānaṃ. Yato ca kho, bhante, tathāgatā loke uppajjanti arahanto sammāsambuddhā atha aññatitthiyā paribbājakā asakkatā honti agarukatā amānitā apūjitā anapacitā na lābhino cīvarapiṇḍapātasenāsanagilānapaccayabhesajjaparikkhārānaṃ. Bhagavā yeva 2 dāni, bhante, sakkato hoti garukato mānito pūjito apacito lābhī cīvarapiṇḍapātasenāsanagilānapaccayabhesajjaparikkhārānaṃ, bhikkhusaṅgho cā’’ti.
‘‘එවමෙතං , ආනන්‌ද, යාවකීවඤ්‌ච, ආනන්‌ද, තථාගතා ලොකෙ නුප්‌පජ්‌ජන්‌ති අරහන්‌තො සම්‌මාසම්‌බුද්‌ධා තාව අඤ්‌ඤතිත්‌ථියා පරිබ්‌බාජකා සක්‌කතා හොන්‌ති ගරුකතා මානිතා පූජිතා අපචිතා ලාභිනො චීවරපිණ්‌ඩපාතසෙනාසනගිලානපච්‌චයභෙසජ්‌ජපරික්‌ඛාරානං. යතො ච ඛො, ආනන්‌ද, තථාගතා ලොකෙ උප්‌පජ්‌ජන්‌ති අරහන්‌තො සම්‌මාසම්‌බුද්‌ධා අථ අඤ්‌ඤතිත්‌ථියා පරිබ්‌බාජකා අසක්‌කතා හොන්‌ති අගරුකතා අමානිතා අපූජිතා අනපචිතා න ලාභිනො චීවරපිණ්‌ඩපාතසෙනාසනගිලානපච්‌චයභෙසජ්‌ජපරික්‌ඛාරානං. තථාගතොව 3 දානි සක්‌කතො හොති ගරුකතො මානිතො පූජිතො අපචිතො ලාභී චීවරපිණ්‌ඩපාතසෙනාසනගිලානපච්‌චයභෙසජ්‌ජපරික්‌ඛාරානං, භික්‌ඛුසඞ්‌ඝො චා’’ති.
‘‘Evametaṃ , ānanda, yāvakīvañca, ānanda, tathāgatā loke nuppajjanti arahanto sammāsambuddhā tāva aññatitthiyā paribbājakā sakkatā honti garukatā mānitā pūjitā apacitā lābhino cīvarapiṇḍapātasenāsanagilānapaccayabhesajjaparikkhārānaṃ. Yato ca kho, ānanda, tathāgatā loke uppajjanti arahanto sammāsambuddhā atha aññatitthiyā paribbājakā asakkatā honti agarukatā amānitā apūjitā anapacitā na lābhino cīvarapiṇḍapātasenāsanagilānapaccayabhesajjaparikkhārānaṃ. Tathāgatova 4 dāni sakkato hoti garukato mānito pūjito apacito lābhī cīvarapiṇḍapātasenāsanagilānapaccayabhesajjaparikkhārānaṃ, bhikkhusaṅgho cā’’ti.
අථ ඛො භගවා එතමත්‌ථං විදිත්‌වා තායං වෙලායං ඉමං උදානං උදානෙසි –
Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –
‘‘ඔභාසති තාව සො කිමි,
‘‘Obhāsati tāva so kimi,
හතප්‌පභො හොති න චාපි භාසති.
Hatappabho hoti na cāpi bhāsati.
යාව සම්‌මාසම්‌බුද්‌ධා ලොකෙ නුප්‌පජ්‌ජන්‌ති;
Yāva sammāsambuddhā loke nuppajjanti;
න තක්‌කිකා සුජ්‌ඣන්‌ති න චාපි සාවකා,
Na takkikā sujjhanti na cāpi sāvakā,
දුද්‌දිට්‌ඨී න දුක්‌ඛා පමුච්‌චරෙ’’ති. දසමං;
Duddiṭṭhī na dukkhā pamuccare’’ti. dasamaṃ;
තස්‌සුද්‌දානං –
Tassuddānaṃ –
ආයුජටිලවෙක්‌ඛණා, තයො තිත්‌ථියා සුභූති;
Āyujaṭilavekkhaṇā, tayo titthiyā subhūti;
ගණිකා උපාති නවමො, උප්‌පජ්‌ජන්‌ති ච තෙ දසාති.
Gaṇikā upāti navamo, uppajjanti ca te dasāti.
ජච්‌චන්‌ධවග්‌ගො ඡට්‌ඨො නිට්‌ඨිතො.
Jaccandhavaggo chaṭṭho niṭṭhito.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / උදාන-අට්‌ඨකථා • Udāna-aṭṭhakathā / 10. උප්‌පජ්‌ජන්‌තිසුත්‌තවණ්‌ණනා • 10. Uppajjantisuttavaṇṇanā
