| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၉. ဥပ္ပဇ္ဇတိဇာနနပဉ္ဟော
9. Uppajjatijānanapañho
၉. ရာဇာ အာဟ ‘‘ဘန္တေ နာဂသေန, ယော ဥပ္ပဇ္ဇတိ, ဇာနာတိ သော ‘ဥပ္ပဇ္ဇိသ္သာမီ’’’တိ? ‘‘အာမ, မဟာရာဇ, ယော ဥပ္ပဇ္ဇတိ ဇာနာတိ သော ‘ဥပ္ပဇ္ဇိသ္သာမီ’’’တိ။ ‘‘ဩပမ္မံ ကရောဟီ’’တိ။ ‘‘ယထာ, မဟာရာဇ, ကသ္သကော ဂဟပတိကော ဗီဇာနိ ပထဝိယံ နိက္ခိပိတ္ဝာ သမ္မာ ဒေဝေ ဝသ္သန္တေ ဇာနာတိ ‘ဓညံ နိဗ္ဗတ္တိသ္သတီ’’’တိ? ‘‘အာမ, ဘန္တေ, ဇာနေယ္ယာ’’တိ။ ‘‘ဧဝမေဝ ခော, မဟာရာဇ, ယော ဥပ္ပဇ္ဇတိ, ဇာနာတိ သော ‘ဥပ္ပဇ္ဇိသ္သာမီ’’’တိ။
9. Rājā āha ‘‘bhante nāgasena, yo uppajjati, jānāti so ‘uppajjissāmī’’’ti? ‘‘Āma, mahārāja, yo uppajjati jānāti so ‘uppajjissāmī’’’ti. ‘‘Opammaṃ karohī’’ti. ‘‘Yathā, mahārāja, kassako gahapatiko bījāni pathaviyaṃ nikkhipitvā sammā deve vassante jānāti ‘dhaññaṃ nibbattissatī’’’ti? ‘‘Āma, bhante, jāneyyā’’ti. ‘‘Evameva kho, mahārāja, yo uppajjati, jānāti so ‘uppajjissāmī’’’ti.
‘‘ကလ္လောသိ, ဘန္တေ နာဂသေနာ’’တိ။
‘‘Kallosi, bhante nāgasenā’’ti.
ဥပ္ပဇ္ဇတိဇာနနပဉ္ဟော နဝမော။
Uppajjatijānanapañho navamo.
