| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
9. උප්‌පජ්‌ජතිජානනපඤ්‌හො
9. Uppajjatijānanapañho
9. රාජා ආහ ‘‘භන්‌තෙ නාගසෙන, යො උප්‌පජ්‌ජති, ජානාති සො ‘උප්‌පජ්‌ජිස්‌සාමී’’’ති? ‘‘ආම, මහාරාජ, යො උප්‌පජ්‌ජති ජානාති සො ‘උප්‌පජ්‌ජිස්‌සාමී’’’ති. ‘‘ඔපම්‌මං කරොහී’’ති. ‘‘යථා, මහාරාජ, කස්‌සකො ගහපතිකො බීජානි පථවියං නික්‌ඛිපිත්‌වා සම්‌මා දෙවෙ වස්‌සන්‌තෙ ජානාති ‘ධඤ්‌ඤං නිබ්‌බත්‌තිස්‌සතී’’’ති? ‘‘ආම, භන්‌තෙ, ජානෙය්‍යා’’ති. ‘‘එවමෙව ඛො, මහාරාජ, යො උප්‌පජ්‌ජති, ජානාති සො ‘උප්‌පජ්‌ජිස්‌සාමී’’’ති.
9. Rājā āha ‘‘bhante nāgasena, yo uppajjati, jānāti so ‘uppajjissāmī’’’ti? ‘‘Āma, mahārāja, yo uppajjati jānāti so ‘uppajjissāmī’’’ti. ‘‘Opammaṃ karohī’’ti. ‘‘Yathā, mahārāja, kassako gahapatiko bījāni pathaviyaṃ nikkhipitvā sammā deve vassante jānāti ‘dhaññaṃ nibbattissatī’’’ti? ‘‘Āma, bhante, jāneyyā’’ti. ‘‘Evameva kho, mahārāja, yo uppajjati, jānāti so ‘uppajjissāmī’’’ti.
‘‘කල්‌ලොසි, භන්‌තෙ නාගසෙනා’’ති.
‘‘Kallosi, bhante nāgasenā’’ti.
උප්‌පජ්‌ජතිජානනපඤ්‌හො නවමො.
Uppajjatijānanapañho navamo.
