| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
3. உப்பலஹத்தி²யத்தே²ரஅபதா³னவண்ணனா
3. Uppalahatthiyattheraapadānavaṇṇanā
திவராயங் நிவாஸீஹந்திஆதி³கங் ஆயஸ்மதோ உப்பலஹத்த²கத்தே²ரஸ்ஸ அபதா³னங். அயம்பி புரிமஜினவரேஸு கதகுஸலோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ ஸித்³த⁴த்த²ஸ்ஸ ப⁴க³வதோ காலே மாலாகாரகுலே நிப்³ப³த்தோ வுத்³தி⁴மன்வாய மாலாகாரகம்மேன அனேகானி புப்பா²னி விக்கிணந்தோ ஜீவதி. அதே²கதி³வஸங் புப்பா²னி க³ஹெத்வா சரந்தோ ப⁴க³வந்தங் ரதனக்³கி⁴கமிவ சரமானங் தி³ஸ்வா ரத்துப்பலகலாபேன பூஜேஸி. ஸோ ததோ சுதோ தேனேவ புஞ்ஞேன ஸுக³தீஸு புஞ்ஞமனுப⁴வித்வா இமஸ்மிங் பு³த்³து⁴ப்பாதே³ குலகே³ஹே நிப்³ப³த்தோ வுத்³தி⁴மன்வாய ஸத்³தா⁴ஜாதோ பப்³ப³ஜித்வா நசிரஸ்ஸேவ அரஹா அஹோஸி.
Tivarāyaṃ nivāsīhantiādikaṃ āyasmato uppalahatthakattherassa apadānaṃ. Ayampi purimajinavaresu katakusalo tattha tattha bhave vivaṭṭūpanissayāni puññāni upacinanto siddhatthassa bhagavato kāle mālākārakule nibbatto vuddhimanvāya mālākārakammena anekāni pupphāni vikkiṇanto jīvati. Athekadivasaṃ pupphāni gahetvā caranto bhagavantaṃ ratanagghikamiva caramānaṃ disvā rattuppalakalāpena pūjesi. So tato cuto teneva puññena sugatīsu puññamanubhavitvā imasmiṃ buddhuppāde kulagehe nibbatto vuddhimanvāya saddhājāto pabbajitvā nacirasseva arahā ahosi.
13. ஸோ அபரபா⁴கே³ அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ திவராயங் நிவாஸீஹந்திஆதி³மாஹ. தத்த² திவராதி தீஹி வாரேஹி காரிதங் ஸஞ்சரிதங் படிச்ச²ன்னங் நக³ரங், தஸ்ஸங் திவராயங் நிவாஸீ, வஸனஸீலோ நிவாஸனட்டா²னகே³ஹே வா வஸந்தோ அஹந்தி அத்தோ². அஹோஸிங் மாலிகோ ததா³தி ததா³ நிப்³பா³னத்தா²ய புஞ்ஞஸம்பா⁴ரகரணஸமயே மாலிகோ மாலாகாரோவ புப்பா²னி கயவிக்கயங் கத்வா ஜீவந்தோ அஹோஸிந்தி அத்தோ².
13. So aparabhāge attano pubbakammaṃ saritvā somanassajāto pubbacaritāpadānaṃ pakāsento tivarāyaṃ nivāsīhantiādimāha. Tattha tivarāti tīhi vārehi kāritaṃ sañcaritaṃ paṭicchannaṃ nagaraṃ, tassaṃ tivarāyaṃ nivāsī, vasanasīlo nivāsanaṭṭhānagehe vā vasanto ahanti attho. Ahosiṃ māliko tadāti tadā nibbānatthāya puññasambhārakaraṇasamaye māliko mālākārova pupphāni kayavikkayaṃ katvā jīvanto ahosinti attho.
14. புப்ப²ஹத்த²மதா³ஸஹந்தி ஸித்³த⁴த்த²ங் ப⁴க³வந்தங் தி³ஸ்வா உப்பலகலாபங் அதா³ஸிங் பூஜேஸிந்தி அத்தோ². ஸேஸங் ஸப்³ப³த்த² உத்தானத்த²மேவாதி.
14.Pupphahatthamadāsahanti siddhatthaṃ bhagavantaṃ disvā uppalakalāpaṃ adāsiṃ pūjesinti attho. Sesaṃ sabbattha uttānatthamevāti.
உப்பலஹத்த²கத்தே²ரஅபதா³னவண்ணனா ஸமத்தா.
Uppalahatthakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 3. உப்பலஹத்தி²யத்தே²ரஅபதா³னங் • 3. Uppalahatthiyattheraapadānaṃ
