| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
৩. উপ্পলহত্থিযত্থেরঅপদানৰণ্ণনা
3. Uppalahatthiyattheraapadānavaṇṇanā
তিৰরাযং নিৰাসীহন্তিআদিকং আযস্মতো উপ্পলহত্থকত্থেরস্স অপদানং। অযম্পি পুরিমজিনৰরেসু কতকুসলো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো সিদ্ধত্থস্স ভগৰতো কালে মালাকারকুলে নিব্বত্তো ৰুদ্ধিমন্ৰায মালাকারকম্মেন অনেকানি পুপ্ফানি ৰিক্কিণন্তো জীৰতি। অথেকদিৰসং পুপ্ফানি গহেত্ৰা চরন্তো ভগৰন্তং রতনগ্ঘিকমিৰ চরমানং দিস্ৰা রত্তুপ্পলকলাপেন পূজেসি। সো ততো চুতো তেনেৰ পুঞ্ঞেন সুগতীসু পুঞ্ঞমনুভৰিত্ৰা ইমস্মিং বুদ্ধুপ্পাদে কুলগেহে নিব্বত্তো ৰুদ্ধিমন্ৰায সদ্ধাজাতো পব্বজিত্ৰা নচিরস্সেৰ অরহা অহোসি।
Tivarāyaṃ nivāsīhantiādikaṃ āyasmato uppalahatthakattherassa apadānaṃ. Ayampi purimajinavaresu katakusalo tattha tattha bhave vivaṭṭūpanissayāni puññāni upacinanto siddhatthassa bhagavato kāle mālākārakule nibbatto vuddhimanvāya mālākārakammena anekāni pupphāni vikkiṇanto jīvati. Athekadivasaṃ pupphāni gahetvā caranto bhagavantaṃ ratanagghikamiva caramānaṃ disvā rattuppalakalāpena pūjesi. So tato cuto teneva puññena sugatīsu puññamanubhavitvā imasmiṃ buddhuppāde kulagehe nibbatto vuddhimanvāya saddhājāto pabbajitvā nacirasseva arahā ahosi.
১৩. সো অপরভাগে অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো তিৰরাযং নিৰাসীহন্তিআদিমাহ। তত্থ তিৰরাতি তীহি ৰারেহি কারিতং সঞ্চরিতং পটিচ্ছন্নং নগরং, তস্সং তিৰরাযং নিৰাসী, ৰসনসীলো নিৰাসনট্ঠানগেহে ৰা ৰসন্তো অহন্তি অত্থো। অহোসিং মালিকো তদাতি তদা নিব্বানত্থায পুঞ্ঞসম্ভারকরণসমযে মালিকো মালাকারোৰ পুপ্ফানি কযৰিক্কযং কত্ৰা জীৰন্তো অহোসিন্তি অত্থো।
13. So aparabhāge attano pubbakammaṃ saritvā somanassajāto pubbacaritāpadānaṃ pakāsento tivarāyaṃ nivāsīhantiādimāha. Tattha tivarāti tīhi vārehi kāritaṃ sañcaritaṃ paṭicchannaṃ nagaraṃ, tassaṃ tivarāyaṃ nivāsī, vasanasīlo nivāsanaṭṭhānagehe vā vasanto ahanti attho. Ahosiṃ māliko tadāti tadā nibbānatthāya puññasambhārakaraṇasamaye māliko mālākārova pupphāni kayavikkayaṃ katvā jīvanto ahosinti attho.
১৪. পুপ্ফহত্থমদাসহন্তি সিদ্ধত্থং ভগৰন্তং দিস্ৰা উপ্পলকলাপং অদাসিং পূজেসিন্তি অত্থো। সেসং সব্বত্থ উত্তানত্থমেৰাতি।
14.Pupphahatthamadāsahanti siddhatthaṃ bhagavantaṃ disvā uppalakalāpaṃ adāsiṃ pūjesinti attho. Sesaṃ sabbattha uttānatthamevāti.
উপ্পলহত্থকত্থেরঅপদানৰণ্ণনা সমত্তা।
Uppalahatthakattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ৩. উপ্পলহত্থিযত্থেরঅপদানং • 3. Uppalahatthiyattheraapadānaṃ
