| Library / Tipiṭaka / तिपिटक • Tipiṭaka / अपदानपाळि • Apadānapāḷi |
९. उप्पलवण्णाथेरीअपदानं
9. Uppalavaṇṇātherīapadānaṃ
३८४.
384.
‘‘भिक्खुनी उप्पलवण्णा, इद्धिया पारमिं गता।
‘‘Bhikkhunī uppalavaṇṇā, iddhiyā pāramiṃ gatā;
वन्दित्वा सत्थुनो पादे, इदं वचनमब्रवि॥
Vanditvā satthuno pāde, idaṃ vacanamabravi.
३८५.
385.
सब्बदुक्खं मया खीणं, आरोचेमि महामुनि॥
Sabbadukkhaṃ mayā khīṇaṃ, ārocemi mahāmuni.
३८६.
386.
‘‘‘यावता परिसा अत्थि, पसन्ना जिनसासने।
‘‘‘Yāvatā parisā atthi, pasannā jinasāsane;
यस्सा च मेपराधोत्थि, खमन्तु जिनसम्मुखा॥
Yassā ca meparādhotthi, khamantu jinasammukhā.
३८७.
387.
३८८.
388.
‘‘‘इद्धिञ्चापि निदस्सेहि, मम सासनकारिके।
‘‘‘Iddhiñcāpi nidassehi, mama sāsanakārike;
चतस्सो परिसा अज्ज, कङ्खं छिन्दाहि यावता॥
Catasso parisā ajja, kaṅkhaṃ chindāhi yāvatā.
३८९.
389.
‘‘‘धीता तुय्हं महावीर, पञ्ञवन्त जुतिन्धर।
‘‘‘Dhītā tuyhaṃ mahāvīra, paññavanta jutindhara;
बहुञ्च दुक्करं कम्मं, कतं मे अतिदुक्करं॥
Bahuñca dukkaraṃ kammaṃ, kataṃ me atidukkaraṃ.
३९०.
390.
‘‘‘उप्पलस्सेव मे वण्णो, नामेनुप्पलनामिका।
‘‘‘Uppalasseva me vaṇṇo, nāmenuppalanāmikā;
साविका ते महावीर, पादे वन्दामि चक्खुम॥
Sāvikā te mahāvīra, pāde vandāmi cakkhuma.
३९१.
391.
‘‘‘राहुलो च अहञ्चेव, नेकजातिसते बहू।
‘‘‘Rāhulo ca ahañceva, nekajātisate bahū;
एकस्मिं सम्भवे जाता, समानछन्दमानसा॥
Ekasmiṃ sambhave jātā, samānachandamānasā.
३९२.
392.
पच्छिमे भवे सम्पत्ते, उभोपि नानासम्भवा॥
Pacchime bhave sampatte, ubhopi nānāsambhavā.
३९३.
393.
‘‘‘पुत्तो च राहुलो नाम, धीता उप्पलसव्हया।
‘‘‘Putto ca rāhulo nāma, dhītā uppalasavhayā;
पस्स वीर ममं इद्धिं, बलं दस्सेमि सत्थुनो॥
Passa vīra mamaṃ iddhiṃ, balaṃ dassemi satthuno.
३९४.
394.
‘‘‘महासमुद्दे चतुरो, पक्खिपि हत्थपातियं।
‘‘‘Mahāsamudde caturo, pakkhipi hatthapātiyaṃ;
३९५.
395.
‘‘‘उब्बत्तयित्वा पथविं, पक्खिपि हत्थपातियं।
‘‘‘Ubbattayitvā pathaviṃ, pakkhipi hatthapātiyaṃ;
चित्तं मुञ्जं यथा नाम, लुञ्चि कोमारको युवा॥
Cittaṃ muñjaṃ yathā nāma, luñci komārako yuvā.
३९६.
396.
‘‘‘चक्कवाळसमं पाणिं, छादयित्वान मत्थके।
‘‘‘Cakkavāḷasamaṃ pāṇiṃ, chādayitvāna matthake;
वस्सापेत्वान फुसितं, नानावण्णं पुनप्पुनं॥
Vassāpetvāna phusitaṃ, nānāvaṇṇaṃ punappunaṃ.
३९७.
397.
‘‘‘भूमिं उदुक्खलं कत्वा, धञ्ञं कत्वान सक्खरं।
‘‘‘Bhūmiṃ udukkhalaṃ katvā, dhaññaṃ katvāna sakkharaṃ;
सिनेरुं मुसलं कत्वा, मद्दि कोमारिका यथा॥
Sineruṃ musalaṃ katvā, maddi komārikā yathā.
३९८.
398.
‘‘‘धीताहं बुद्धसेट्ठस्स, नामेनुप्पलसव्हया।
‘‘‘Dhītāhaṃ buddhaseṭṭhassa, nāmenuppalasavhayā;
अभिञ्ञासु वसीभूता, तव सासनकारिका॥
Abhiññāsu vasībhūtā, tava sāsanakārikā.
३९९.
399.
‘‘‘नानाविकुब्बनं कत्वा, दस्सेत्वा लोकनायकं।
‘‘‘Nānāvikubbanaṃ katvā, dassetvā lokanāyakaṃ;
४००.
400.
‘‘‘इद्धीसु च वसी होमि, दिब्बाय सोतधातुया।
‘‘‘Iddhīsu ca vasī homi, dibbāya sotadhātuyā;
चेतोपरियञाणस्स, वसी होमि महामुने॥
Cetopariyañāṇassa, vasī homi mahāmune.
४०१.
401.
‘‘‘पुब्बेनिवासं जानामि, दिब्बचक्खु विसोधितं।
‘‘‘Pubbenivāsaṃ jānāmi, dibbacakkhu visodhitaṃ;
सब्बासवपरिक्खीणा, नत्थि दानि पुनब्भवो॥
Sabbāsavaparikkhīṇā, natthi dāni punabbhavo.
४०२.
402.
‘‘‘अत्थधम्मनिरुत्तीसु, पटिभाने तथेव च।
‘‘‘Atthadhammaniruttīsu, paṭibhāne tatheva ca;
४०३.
403.
अधिकारं बहुं मय्हं, तुय्हत्थाय महामुनि॥
Adhikāraṃ bahuṃ mayhaṃ, tuyhatthāya mahāmuni.
४०४.
404.
‘‘‘यं मया पूरितं कम्मं, कुसलं सर मे मुनि।
‘‘‘Yaṃ mayā pūritaṃ kammaṃ, kusalaṃ sara me muni;
तवत्थाय महावीर, पुञ्ञं उपचितं मया॥
Tavatthāya mahāvīra, puññaṃ upacitaṃ mayā.
४०५.
405.
तवत्थाय महावीर, चत्तं मे जीवितुत्तमं॥
Tavatthāya mahāvīra, cattaṃ me jīvituttamaṃ.
४०६.
406.
‘‘‘दसकोटिसहस्सानि , अदासिं मम जीवितं।
‘‘‘Dasakoṭisahassāni , adāsiṃ mama jīvitaṃ;
परिच्चत्ता च मे होमि, तवत्थाय महामुनि॥
Pariccattā ca me homi, tavatthāya mahāmuni.
४०७.
407.
‘‘‘तदातिविम्हिता सब्बा, सिरसाव कतञ्जली।
‘‘‘Tadātivimhitā sabbā, sirasāva katañjalī;
अवोचय्ये कथं आसि, अतुलिद्धिपरक्कमा’॥
Avocayye kathaṃ āsi, atuliddhiparakkamā’.
४०८.
408.
‘‘सतसहस्सितो कप्पे, नागकञ्ञा अहं तदा।
‘‘Satasahassito kappe, nāgakaññā ahaṃ tadā;
विमला नाम नामेन, कञ्ञानं साधुसम्मता॥
Vimalā nāma nāmena, kaññānaṃ sādhusammatā.
४०९.
409.
‘‘महोरगो महानागो, पसन्नो जिनसासने।
‘‘Mahorago mahānāgo, pasanno jinasāsane;
पदुमुत्तरं महातेजं, निमन्तेसि ससावकं॥
Padumuttaraṃ mahātejaṃ, nimantesi sasāvakaṃ.
४१०.
410.
‘‘रतनमयं मण्डपं, पल्लङ्कं रतनामयं।
‘‘Ratanamayaṃ maṇḍapaṃ, pallaṅkaṃ ratanāmayaṃ;
रतनं वालुकाकिण्णं, उपभोगं रतनामयं॥
Ratanaṃ vālukākiṇṇaṃ, upabhogaṃ ratanāmayaṃ.
४११.
411.
‘‘मग्गञ्च पटियादेसि, रतनद्धजभूसितं।
‘‘Maggañca paṭiyādesi, ratanaddhajabhūsitaṃ;
पच्चुग्गन्त्वान सम्बुद्धं, वज्जन्तो तूरियेहि सो॥
Paccuggantvāna sambuddhaṃ, vajjanto tūriyehi so.
४१२.
412.
महोरगस्स भवने, निसीदि परमासने॥
Mahoragassa bhavane, nisīdi paramāsane.
४१३.
413.
‘‘अन्नं पानं खादनीयं, भोजनञ्च महारहं।
‘‘Annaṃ pānaṃ khādanīyaṃ, bhojanañca mahārahaṃ;
वरं वरञ्च पादासि, नागराजा महायसं॥
Varaṃ varañca pādāsi, nāgarājā mahāyasaṃ.
४१४.
414.
‘‘भुञ्जित्वान सम्बुद्धो, पत्तं धोवित्वा योनिसो।
‘‘Bhuñjitvāna sambuddho, pattaṃ dhovitvā yoniso;
अनुमोदनीयंकासि, नागकञ्ञा महिद्धिका॥
Anumodanīyaṃkāsi, nāgakaññā mahiddhikā.
४१५.
415.
‘‘सब्बञ्ञुं फुल्लितं दिस्वा, नागकञ्ञा महायसं।
‘‘Sabbaññuṃ phullitaṃ disvā, nāgakaññā mahāyasaṃ;
पसन्नं सत्थुनो चित्तं, सुनिबन्धञ्च मानसं॥
Pasannaṃ satthuno cittaṃ, sunibandhañca mānasaṃ.
४१६.
416.
‘‘ममञ्च चित्तमञ्ञाय, जलजुत्तमनामको।
‘‘Mamañca cittamaññāya, jalajuttamanāmako;
तस्मिं खणे महावीरो, भिक्खुनिं दस्सयिद्धिया॥
Tasmiṃ khaṇe mahāvīro, bhikkhuniṃ dassayiddhiyā.
४१७.
417.
‘‘इद्धी अनेका दस्सेसि, भिक्खुनी सा विसारदा।
‘‘Iddhī anekā dassesi, bhikkhunī sā visāradā;
४१८.
418.
‘‘‘अद्दसाहं इमं इद्धिं, सुमनं इतरायपि।
‘‘‘Addasāhaṃ imaṃ iddhiṃ, sumanaṃ itarāyapi;
कथं अहोसि सा वीर, इद्धिया सुविसारदा’॥
Kathaṃ ahosi sā vīra, iddhiyā suvisāradā’.
४१९.
419.
‘‘‘ओरसा मुखतो जाता, धीता मम महिद्धिका।
‘‘‘Orasā mukhato jātā, dhītā mama mahiddhikā;
ममानुसासनिकरा, इद्धिया सुविसारदा’॥
Mamānusāsanikarā, iddhiyā suvisāradā’.
४२०.
420.
अहम्पि तादिसा होमि, इद्धिया सुविसारदा॥
Ahampi tādisā homi, iddhiyā suvisāradā.
४२१.
421.
अनागतम्हि अद्धाने, ईदिसा होमि नायक॥
Anāgatamhi addhāne, īdisā homi nāyaka.
४२२.
422.
‘‘मणिमयम्हि पल्लङ्के, मण्डपम्हि पभस्सरे।
‘‘Maṇimayamhi pallaṅke, maṇḍapamhi pabhassare;
अन्नपानेन तप्पेत्वा, ससङ्घं लोकनायकं॥
Annapānena tappetvā, sasaṅghaṃ lokanāyakaṃ.
४२३.
423.
‘‘नागानं पवरं पुप्फं, अरुणं नाम उप्पलं।
‘‘Nāgānaṃ pavaraṃ pupphaṃ, aruṇaṃ nāma uppalaṃ;
वण्णं मे ईदिसं होतु, पूजेसिं लोकनायकं॥
Vaṇṇaṃ me īdisaṃ hotu, pūjesiṃ lokanāyakaṃ.
४२४.
424.
‘‘तेन कम्मेन सुकतेन, चेतनापणिधीहि च।
‘‘Tena kammena sukatena, cetanāpaṇidhīhi ca;
जहित्वा मानुसं देहं, तावतिंसमगच्छहं॥
Jahitvā mānusaṃ dehaṃ, tāvatiṃsamagacchahaṃ.
४२५.
425.
‘‘ततो चुताहं मनुजे, उपपन्ना सयम्भुनो।
‘‘Tato cutāhaṃ manuje, upapannā sayambhuno;
उप्पलेहि पटिच्छन्नं, पिण्डपातमदासहं॥
Uppalehi paṭicchannaṃ, piṇḍapātamadāsahaṃ.
४२६.
426.
‘‘एकनवुतितो कप्पे, विपस्सी नाम नायको।
‘‘Ekanavutito kappe, vipassī nāma nāyako;
उप्पज्जि चारुदस्सनो, सब्बधम्मेसु चक्खुमा॥
Uppajji cārudassano, sabbadhammesu cakkhumā.
४२७.
427.
‘‘सेट्ठिधीता तदा हुत्वा, बाराणसिपुरुत्तमे।
‘‘Seṭṭhidhītā tadā hutvā, bārāṇasipuruttame;
निमन्तेत्वान सम्बुद्धं, ससङ्घं लोकनायकं॥
Nimantetvāna sambuddhaṃ, sasaṅghaṃ lokanāyakaṃ.
४२८.
428.
‘‘महादानं ददित्वान, उप्पलेहि विनायकं।
‘‘Mahādānaṃ daditvāna, uppalehi vināyakaṃ;
४२९.
429.
‘‘इमम्हि भद्दके कप्पे, ब्रह्मबन्धु महायसो।
‘‘Imamhi bhaddake kappe, brahmabandhu mahāyaso;
कस्सपो नाम गोत्तेन, उप्पज्जि वदतं वरो॥
Kassapo nāma gottena, uppajji vadataṃ varo.
४३०.
430.
‘‘उपट्ठाको महेसिस्स, तदा आसि नरिस्सरो।
‘‘Upaṭṭhāko mahesissa, tadā āsi narissaro;
कासिराजा किकी नाम, बाराणसिपुरुत्तमे॥
Kāsirājā kikī nāma, bārāṇasipuruttame.
४३१.
431.
‘‘तस्सासिं दुतिया धीता, समणगुत्तसव्हया।
‘‘Tassāsiṃ dutiyā dhītā, samaṇaguttasavhayā;
धम्मं सुत्वा जिनग्गस्स, पब्बज्जं समरोचयिं॥
Dhammaṃ sutvā jinaggassa, pabbajjaṃ samarocayiṃ.
४३२.
432.
‘‘अनुजानि न नो तातो, अगारेव तदा मयं।
‘‘Anujāni na no tāto, agāreva tadā mayaṃ;
वीसवस्ससहस्सानि, विचरिम्ह अतन्दिता॥
Vīsavassasahassāni, vicarimha atanditā.
४३३.
433.
‘‘कोमारिब्रह्मचरियं, राजकञ्ञा सुखेधिता।
‘‘Komāribrahmacariyaṃ, rājakaññā sukhedhitā;
बुद्धोपट्ठाननिरता, मुदिता सत्तधीतरो॥
Buddhopaṭṭhānaniratā, muditā sattadhītaro.
४३४.
434.
४३५.
435.
‘‘अहं खेमा च सप्पञ्ञा, पटाचारा च कुण्डला।
‘‘Ahaṃ khemā ca sappaññā, paṭācārā ca kuṇḍalā;
किसागोतमी धम्मदिन्ना, विसाखा होति सत्तमी॥
Kisāgotamī dhammadinnā, visākhā hoti sattamī.
४३६.
436.
‘‘तेहि कम्मेहि सुकतेहि, चेतनापणिधीहि च।
‘‘Tehi kammehi sukatehi, cetanāpaṇidhīhi ca;
जहित्वा मानुसं देहं, तावतिंसमगच्छहं॥
Jahitvā mānusaṃ dehaṃ, tāvatiṃsamagacchahaṃ.
४३७.
437.
‘‘ततो चुता मनुस्सेसु, उपपन्ना महाकुले।
‘‘Tato cutā manussesu, upapannā mahākule;
पीतं मट्ठं वरं दुस्सं, अदं अरहतो अहं॥
Pītaṃ maṭṭhaṃ varaṃ dussaṃ, adaṃ arahato ahaṃ.
४३८.
438.
‘‘ततो चुतारिट्ठपुरे, जाता विप्पकुले अहं।
‘‘Tato cutāriṭṭhapure, jātā vippakule ahaṃ;
धीता तिरिटिवच्छस्स, उम्मादन्ती मनोहरा॥
Dhītā tiriṭivacchassa, ummādantī manoharā.
४३९.
439.
‘‘ततो चुता जनपदे, कुले अञ्ञतरे अहं।
‘‘Tato cutā janapade, kule aññatare ahaṃ;
पसूता नातिफीतम्हि, सालिं गोपेमहं तदा॥
Pasūtā nātiphītamhi, sāliṃ gopemahaṃ tadā.
४४०.
440.
‘‘दिस्वा पच्चेकसम्बुद्धं, पञ्चलाजासतानिहं।
‘‘Disvā paccekasambuddhaṃ, pañcalājāsatānihaṃ;
दत्वा पदुमच्छन्नानि, पञ्च पुत्तसतानिहं॥
Datvā padumacchannāni, pañca puttasatānihaṃ.
४४१.
441.
‘‘पत्थयिं तेपि पत्थेसुं, मधुं दत्वा सयम्भुनो।
‘‘Patthayiṃ tepi patthesuṃ, madhuṃ datvā sayambhuno;
ततो चुता अरञ्ञेहं, अजायिं पदुमोदरे॥
Tato cutā araññehaṃ, ajāyiṃ padumodare.
४४२.
442.
‘‘कासिरञ्ञो महेसीहं, हुत्वा सक्कतपूजिता।
‘‘Kāsirañño mahesīhaṃ, hutvā sakkatapūjitā;
अजनिं राजपुत्तानं, अनूनं सतपञ्चकं॥
Ajaniṃ rājaputtānaṃ, anūnaṃ satapañcakaṃ.
४४३.
443.
‘‘यदा ते योब्बनप्पत्ता, कीळन्ता जलकीळितं।
‘‘Yadā te yobbanappattā, kīḷantā jalakīḷitaṃ;
दिस्वा ओपत्तपदुमं, आसुं पच्चेकनायका॥
Disvā opattapadumaṃ, āsuṃ paccekanāyakā.
४४४.
444.
चुता इसिगिलिपस्से, गामकम्हि अजायिहं॥
Cutā isigilipasse, gāmakamhi ajāyihaṃ.
४४५.
445.
यागुं आदाय गच्छन्ती, अट्ठ पच्चेकनायके॥
Yāguṃ ādāya gacchantī, aṭṭha paccekanāyake.
४४६.
446.
‘‘भिक्खाय गामं गच्छन्ते, दिस्वा पुत्ते अनुस्सरिं।
‘‘Bhikkhāya gāmaṃ gacchante, disvā putte anussariṃ;
खीरधारा विनिग्गच्छि, तदा मे पुत्तपेमसा॥
Khīradhārā viniggacchi, tadā me puttapemasā.
४४७.
447.
‘‘ततो तेसं अदं यागुं, पसन्ना सेहि पाणिभि।
‘‘Tato tesaṃ adaṃ yāguṃ, pasannā sehi pāṇibhi;
ततो चुताहं तिदसं, नन्दनं उपपज्जहं॥
Tato cutāhaṃ tidasaṃ, nandanaṃ upapajjahaṃ.
४४८.
448.
‘‘अनुभोत्वा सुखं दुक्खं, संसरित्वा भवाभवे।
‘‘Anubhotvā sukhaṃ dukkhaṃ, saṃsaritvā bhavābhave;
तवत्थाय महावीर, परिच्चत्तञ्च जीवितं॥
Tavatthāya mahāvīra, pariccattañca jīvitaṃ.
४४९.
449.
‘‘एवं बहुविधं दुक्खं, सम्पत्ती च बहुब्बिधा।
‘‘Evaṃ bahuvidhaṃ dukkhaṃ, sampattī ca bahubbidhā;
पच्छिमे भवे सम्पत्ते, जाता सावत्थियं पुरे॥
Pacchime bhave sampatte, jātā sāvatthiyaṃ pure.
४५०.
450.
‘‘महाधनसेट्ठिकुले, सुखिते सज्जिते तथा।
‘‘Mahādhanaseṭṭhikule, sukhite sajjite tathā;
नानारतनपज्जोते, सब्बकामसमिद्धिने॥
Nānāratanapajjote, sabbakāmasamiddhine.
४५१.
451.
‘‘सक्कता पूजिता चेव, मानितापचिता तथा।
‘‘Sakkatā pūjitā ceva, mānitāpacitā tathā;
४५२.
452.
‘‘अतीव पत्थिता चासिं, रूपभोगसिरीहि च।
‘‘Atīva patthitā cāsiṃ, rūpabhogasirīhi ca;
पत्थिता सेट्ठिपुत्तेहि, अनेकेहि सतेहिपि॥
Patthitā seṭṭhiputtehi, anekehi satehipi.
४५३.
453.
‘‘अगारं पजहित्वान, पब्बजिं अनगारियं।
‘‘Agāraṃ pajahitvāna, pabbajiṃ anagāriyaṃ;
अड्ढमासे असम्पत्ते, चतुसच्चमपापुणिं॥
Aḍḍhamāse asampatte, catusaccamapāpuṇiṃ.
४५४.
454.
‘‘इद्धिया अभिनिम्मित्वा, चतुरस्सं रथं अहं।
‘‘Iddhiyā abhinimmitvā, caturassaṃ rathaṃ ahaṃ;
बुद्धस्स पादे वन्दिस्सं, लोकनाथस्स तादिनो॥
Buddhassa pāde vandissaṃ, lokanāthassa tādino.
४५५.
455.
‘‘‘सुपुप्फितग्गं उपगम्म पादपं 43, एका तुवं तिट्ठसि सालमूले।
‘‘‘Supupphitaggaṃ upagamma pādapaṃ 44, ekā tuvaṃ tiṭṭhasi sālamūle;
न चापि ते दुतियो अत्थि कोचि 45, बाले न त्वं भायसि धुत्तकानं’॥
Na cāpi te dutiyo atthi koci 46, bāle na tvaṃ bhāyasi dhuttakānaṃ’.
४५६.
456.
‘‘‘सतं सहस्सानिपि धुत्तकानं 47, समागता एदिसका भवेय्युं।
‘‘‘Sataṃ sahassānipi dhuttakānaṃ 48, samāgatā edisakā bhaveyyuṃ;
लोमं न इञ्जे न सम्पवेधे, किं मे तुवं मार करिस्ससेको 49॥
Lomaṃ na iñje na sampavedhe, kiṃ me tuvaṃ māra karissaseko 50.
४५७.
457.
‘‘‘एसा अन्तरधायामि, कुच्छिं वा पविसामि ते।
‘‘‘Esā antaradhāyāmi, kucchiṃ vā pavisāmi te;
भमुकन्तरिकायम्पि, तिट्ठन्तिं मं न दक्खसि॥
Bhamukantarikāyampi, tiṭṭhantiṃ maṃ na dakkhasi.
४५८.
458.
‘‘‘चित्तस्मिं वसीभूताम्हि, इद्धिपादा सुभाविता।
‘‘‘Cittasmiṃ vasībhūtāmhi, iddhipādā subhāvitā;
सब्बबन्धनमुत्ताम्हि, न तं भायामि आवुसो॥
Sabbabandhanamuttāmhi, na taṃ bhāyāmi āvuso.
४५९.
459.
‘‘‘सत्तिसूलूपमा कामा, खन्धासं अधिकुट्टना।
‘‘‘Sattisūlūpamā kāmā, khandhāsaṃ adhikuṭṭanā;
यं त्वं कामरतिं ब्रूसि, अरती दानि सा मम॥
Yaṃ tvaṃ kāmaratiṃ brūsi, aratī dāni sā mama.
४६०.
460.
‘‘‘सब्बत्थ विहता नन्दी, तमोखन्धो पदालितो।
‘‘‘Sabbattha vihatā nandī, tamokhandho padālito;
एवं जानाहि पापिम, निहतो त्वमसि अन्तक’॥
Evaṃ jānāhi pāpima, nihato tvamasi antaka’.
४६१.
461.
‘‘जिनो तम्हि गुणे तुट्ठो, एतदग्गे ठपेसि मं।
‘‘Jino tamhi guṇe tuṭṭho, etadagge ṭhapesi maṃ;
अग्गा इद्धिमतीनन्ति, परिसासु विनायको॥
Aggā iddhimatīnanti, parisāsu vināyako.
४६२.
462.
‘‘परिचिण्णो मया सत्था, कतं बुद्धस्स सासनं।
‘‘Pariciṇṇo mayā satthā, kataṃ buddhassa sāsanaṃ;
ओहितो गरुको भारो, भवनेत्ति समूहता॥
Ohito garuko bhāro, bhavanetti samūhatā.
४६३.
463.
‘‘यस्सत्थाय पब्बजिता, अगारस्मानगारियं।
‘‘Yassatthāya pabbajitā, agārasmānagāriyaṃ;
सो मे अत्थो अनुप्पत्तो, सब्बसंयोजनक्खयो॥
So me attho anuppatto, sabbasaṃyojanakkhayo.
४६४.
464.
‘‘चीवरं पिण्डपातञ्च, पच्चयं सयनासनं।
‘‘Cīvaraṃ piṇḍapātañca, paccayaṃ sayanāsanaṃ;
खणेन उपनामेन्ति, सहस्सानि समन्ततो॥
Khaṇena upanāmenti, sahassāni samantato.
४६५.
465.
‘‘किलेसा झापिता मय्हं…पे॰… विहरामि अनासवा।
‘‘Kilesā jhāpitā mayhaṃ…pe… viharāmi anāsavā;
४६६.
466.
‘‘स्वागतं वत मे आसि…पे॰… कतं बुद्धस्स सासनं॥
‘‘Svāgataṃ vata me āsi…pe… kataṃ buddhassa sāsanaṃ.
४६७.
467.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं उप्पलवण्णा भिक्खुनी इमा गाथायो अभासित्थाति।
Itthaṃ sudaṃ uppalavaṇṇā bhikkhunī imā gāthāyo abhāsitthāti.
उप्पलवण्णाथेरियापदानं नवमं।
Uppalavaṇṇātheriyāpadānaṃ navamaṃ.
Footnotes:
