| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
10. உப்படிபாடிகஸுத்தவண்ணனா
10. Uppaṭipāṭikasuttavaṇṇanā
510. த³ஸமங் யதா²த⁴ம்மரஸேன படிபாடியா வுத்தம்பி இமஸ்மிங் இந்த்³ரியவிப⁴ங்கே³ ஸேஸஸுத்தானி விய அதே³ஸிதத்தா உப்படிபாடிகஸுத்தங் நாமாதி வேதி³தப்³ப³ங். தத்த² நிமித்தந்திஆதீ³னி ஸப்³பா³னி பச்சயவேவசனானேவ. து³க்கி²ந்த்³ரியஞ்ச பஜானாதீதி து³க்க²ஸச்சவஸேனேவ பஜானாதி. து³க்கி²ந்த்³ரியஸமுத³யந்தி கண்டகேன வா வித்³த⁴ஸ்ஸ மங்குலேன வா த³ட்ட²ஸ்ஸ பச்சத்த²ரணே வா வலியா பு²ட்ட²ஸ்ஸ து³க்க²ஸஹக³தங் காயவிஞ்ஞாணங் உப்பஜ்ஜதி, தங் ஏதஸ்ஸ ஸமுத³யோதி பஜானாதி.
510. Dasamaṃ yathādhammarasena paṭipāṭiyā vuttampi imasmiṃ indriyavibhaṅge sesasuttāni viya adesitattā uppaṭipāṭikasuttaṃ nāmāti veditabbaṃ. Tattha nimittantiādīni sabbāni paccayavevacanāneva. Dukkhindriyañca pajānātīti dukkhasaccavaseneva pajānāti. Dukkhindriyasamudayanti kaṇṭakena vā viddhassa maṅkulena vā daṭṭhassa paccattharaṇe vā valiyā phuṭṭhassa dukkhasahagataṃ kāyaviññāṇaṃ uppajjati, taṃ etassa samudayoti pajānāti.
பரதோ தோ³மனஸ்ஸிந்த்³ரியஸமுத³யந்திஆதீ³ஸுபி தேஸங் தேஸங் காரணவஸேனேவ ஸமுத³யோ வேதி³தப்³போ³. பத்தசீவராதீ³னங் வா ஹி ஸங்கா²ரானங் ஸத்³தி⁴விஹாரிகாதீ³னங் வா ஸத்தானங் வினாஸேன தோ³மனஸ்ஸிந்த்³ரியங் உப்பஜ்ஜதீதி தேஸங் வினாஸங் தஸ்ஸ ஸமுத³யோதி பஜானாதி. ஸுபோ⁴ஜனங் பு⁴ஞ்ஜித்வா வரஸயனே நிபன்னஸ்ஸ ஹத்த²பாத³ஸம்பா³ஹனதாலவண்டவாதாதி³ஸம்ப²ஸ்ஸேன ஸுகி²ந்த்³ரியங் உப்பஜ்ஜதி, தங் ப²ஸ்ஸங் தஸ்ஸ ஸமுத³யோதி பஜானாதி. வுத்தப்பகாரானங் பன ஸத்தஸங்கா²ரானங் மனாபானங் படிலாப⁴வஸேன ஸோமனஸ்ஸிந்த்³ரியங் உப்பஜ்ஜதி, தங் படிலாப⁴ங் தஸ்ஸ ஸமுத³யோதி பஜானாதி. மஜ்ஜ²த்தாகாரேன பன உபெக்கி²ந்த்³ரியங் உப்பஜ்ஜதி, தங் ஸத்தஸங்கா²ரேஸு மஜ்ஜ²த்தாகாரங் தஸ்ஸ ஸமுத³யோதி பஜானாதி.
Parato domanassindriyasamudayantiādīsupi tesaṃ tesaṃ kāraṇavaseneva samudayo veditabbo. Pattacīvarādīnaṃ vā hi saṅkhārānaṃ saddhivihārikādīnaṃ vā sattānaṃ vināsena domanassindriyaṃ uppajjatīti tesaṃ vināsaṃ tassa samudayoti pajānāti. Subhojanaṃ bhuñjitvā varasayane nipannassa hatthapādasambāhanatālavaṇṭavātādisamphassena sukhindriyaṃ uppajjati, taṃ phassaṃ tassa samudayoti pajānāti. Vuttappakārānaṃ pana sattasaṅkhārānaṃ manāpānaṃ paṭilābhavasena somanassindriyaṃ uppajjati, taṃ paṭilābhaṃ tassa samudayoti pajānāti. Majjhattākārena pana upekkhindriyaṃ uppajjati, taṃ sattasaṅkhāresu majjhattākāraṃ tassa samudayoti pajānāti.
கத்த² சுப்பன்னங் து³க்கி²ந்த்³ரியங் அபரிஸேஸங் நிருஜ்ஜ²தி, இத⁴, பி⁴க்க²வே, பி⁴க்கு² விவிச்சேவ காமேஹீதிஆதீ³ஸு பன அயங் ஏகதோவ வினிச்ச²யகதா² – து³க்கி²ந்த்³ரியஞ்ஹி பட²மஜ்ஜா²னஸ்ஸ உபசாரக்க²ணேயேவ நிருஜ்ஜ²தி பஹீனங் ஹோதி, தோ³மனஸ்ஸாதீ³னி து³தியஜ்ஜா²னாதீ³னங். ஏவங் ஸந்தேபி தேஸங் அதிஸயனிரோத⁴த்தா அயங் ஜா²னேஸுயேவ நிரோதோ⁴ வுத்தோ. அதிஸயனிரோதோ⁴ ஹி தேஸங் பட²மஜ்ஜா²னாதீ³ஸு, ந நிரோதோ⁴யேவ, நிரோதோ⁴யேவ பன உபசாரக்க²ணே, நாதிஸயனிரோதோ⁴. ததா² ஹி நானாவஜ்ஜனே பட²மஜ்ஜா²னுபசாரே நிருத்³த⁴ஸ்ஸாபி து³க்கி²ந்த்³ரியஸ்ஸ ட³ங்ஸமகஸாதி³ஸம்ப²ஸ்ஸேன வா விஸமாஸனுபதாபேன வா ஸியா உப்பத்தி, ந த்வேவ அந்தோஅப்பனாயங். உபசாரே வா நிருத்³த⁴ம்பேதங் ந ஸுட்டு² நிருத்³த⁴ங் ஹோதி படிபக்கே²ன அவிஹதத்தா. அந்தோஅப்பனாயங் பன பீதிப²ரணேன ஸப்³போ³ காயோ ஸுகோ²க்கந்தோ ஹோதி, ஸுகோ²க்கந்தகாயஸ்ஸ ச ஸுட்டு² நிருத்³த⁴ங் ஹோதி து³க்கி²ந்த்³ரியங் படிபக்கே²ன விஹதத்தா. நானாவஜ்ஜனேயேவ ச து³தியஜ்ஜா²னுபசாரே பஹீனஸ்ஸ தோ³மனஸ்ஸிந்த்³ரியஸ்ஸ யஸ்மா ஏதங் விதக்கவிசாரபச்சயேபி காயகிலமதே² சித்துபகா⁴தே ச ஸதி உப்பஜ்ஜதி, விதக்கவிசாராபா⁴வே நேவ உப்பஜ்ஜதி. யத்த² பன உப்பஜ்ஜதி, தத்த² விதக்கவிசாரபா⁴வே, அப்பஹீனா ஏவ ச து³தியஜ்ஜா²னுபசாரே விதக்கவிசாராதி தத்த²ஸ்ஸ ஸியா உப்பத்தி. ந த்வேவ து³தியஜ்ஜா²னே பஹீனபச்சயத்தா. ததா² ததியஜ்ஜா²னுபசாரே பஹீனஸ்ஸாபி ஸுகி²ந்த்³ரியஸ்ஸ பீதிஸமுட்டா²னபணீதரூபபு²ட்ட²காயஸ்ஸ ஸியா உப்பத்தி, ந த்வேவ ததியஜ்ஜா²னே. ததியஜ்ஜா²னே ஹி ஸுக²ஸ்ஸ பச்சயபூ⁴தா பீதி ஸப்³ப³ஸோ நிருத்³தா⁴. ததா² சதுத்த²ஜ்ஜா²னுபசாரே பஹீனஸ்ஸாபி ஸோமனஸ்ஸிந்த்³ரியஸ்ஸ ஆஸன்னத்தா அப்பனாப்பத்தாய உபெக்கா²ய அபா⁴வேன ஸம்மா அனதிக்கந்தத்தா ச ஸியா உப்பத்தி, ந த்வேவ சதுத்த²ஜ்ஜா²னே. தஸ்மா ‘‘எத்த² சுப்பன்னங் து³க்கி²ந்த்³ரியங் அபரிஸேஸங் நிருஜ்ஜ²தீ’’தி தத்த² தத்த² அபரிஸேஸக்³க³ஹணங் கதங்.
Kattha cuppannaṃ dukkhindriyaṃ aparisesaṃ nirujjhati, idha, bhikkhave, bhikkhu vivicceva kāmehītiādīsu pana ayaṃ ekatova vinicchayakathā – dukkhindriyañhi paṭhamajjhānassa upacārakkhaṇeyeva nirujjhati pahīnaṃ hoti, domanassādīni dutiyajjhānādīnaṃ. Evaṃ santepi tesaṃ atisayanirodhattā ayaṃ jhānesuyeva nirodho vutto. Atisayanirodho hi tesaṃ paṭhamajjhānādīsu, na nirodhoyeva, nirodhoyeva pana upacārakkhaṇe, nātisayanirodho. Tathā hi nānāvajjane paṭhamajjhānupacāre niruddhassāpi dukkhindriyassa ḍaṃsamakasādisamphassena vā visamāsanupatāpena vā siyā uppatti, na tveva antoappanāyaṃ. Upacāre vā niruddhampetaṃ na suṭṭhu niruddhaṃ hoti paṭipakkhena avihatattā. Antoappanāyaṃ pana pītipharaṇena sabbo kāyo sukhokkanto hoti, sukhokkantakāyassa ca suṭṭhu niruddhaṃ hoti dukkhindriyaṃ paṭipakkhena vihatattā. Nānāvajjaneyeva ca dutiyajjhānupacāre pahīnassa domanassindriyassa yasmā etaṃ vitakkavicārapaccayepi kāyakilamathe cittupaghāte ca sati uppajjati, vitakkavicārābhāve neva uppajjati. Yattha pana uppajjati, tattha vitakkavicārabhāve, appahīnā eva ca dutiyajjhānupacāre vitakkavicārāti tatthassa siyā uppatti. Na tveva dutiyajjhāne pahīnapaccayattā. Tathā tatiyajjhānupacāre pahīnassāpi sukhindriyassa pītisamuṭṭhānapaṇītarūpaphuṭṭhakāyassa siyā uppatti, na tveva tatiyajjhāne. Tatiyajjhāne hi sukhassa paccayabhūtā pīti sabbaso niruddhā. Tathā catutthajjhānupacāre pahīnassāpi somanassindriyassa āsannattā appanāppattāya upekkhāya abhāvena sammā anatikkantattā ca siyā uppatti, na tveva catutthajjhāne. Tasmā ‘‘ettha cuppannaṃ dukkhindriyaṃ aparisesaṃ nirujjhatī’’ti tattha tattha aparisesaggahaṇaṃ kataṃ.
யங் பனெத்த² தத³த்தா²ய சித்தங் உபஸங்ஹரதீதி வுத்தங், தத்த² அலாபீ⁴ ஸமானோ உப்பாத³னத்தா²ய சித்தங் உபஸங்ஹரதி, லாபீ⁴ ஸமானோ ஸமாபஜ்ஜனத்தா²யாதி ஏவமத்தோ² வேதி³தப்³போ³. இமேஸு த்³வீஸுபி ஸுத்தேஸு ஸம்மஸனவாரோவ கதி²தோதி.
Yaṃ panettha tadatthāya cittaṃ upasaṃharatīti vuttaṃ, tattha alābhī samāno uppādanatthāya cittaṃ upasaṃharati, lābhī samāno samāpajjanatthāyāti evamattho veditabbo. Imesu dvīsupi suttesu sammasanavārova kathitoti.
ஸுகி²ந்த்³ரியவக்³கோ³ சதுத்தோ².
Sukhindriyavaggo catuttho.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 10. உப்படிபாடிகஸுத்தங் • 10. Uppaṭipāṭikasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 10. உப்படிபாடிகஸுத்தவண்ணனா • 10. Uppaṭipāṭikasuttavaṇṇanā
