| Library / Tipiṭaka / តិបិដក • Tipiṭaka / សម្មោហវិនោទនី-អដ្ឋកថា • Sammohavinodanī-aṭṭhakathā |
២. ឧប្បត្តានុប្បត្តិវារវណ្ណនា
2. Uppattānuppattivāravaṇṇanā
៩៩១. ទុតិយវារេ យេ ធម្មា កាមភវេ កាមធាតុសម្ភូតានញ្ច សត្តានំ ឧប្បជ្ជន្តិ – កាមធាតុយំ បរិយាបន្នា វា អបរិយាបន្នា វា – តេ សព្ពេ សង្គហេត្វា កាមធាតុយា បញ្ចក្ខន្ធាតិអាទិ វុត្តំ។ រូបធាតុអាទីសុបិ ឯសេវ នយោ។ យស្មា បន រូបធាតុបរិយាបន្នានំ សត្តានំ ឃានាយតនាទីនំ អភាវេន គន្ធាយតនាទីនិ អាយតនាទិកិច្ចំ ន ករោន្តិ, តស្មា រូបធាតុយា ឆ អាយតនានិ, នវ ធាតុយោតិអាទិ វុត្តំ ។ យស្មា ច ឱកាសវសេន វា សត្តុប្បត្តិវសេន វា អបរិយាបន្នធាតុ នាម នត្ថិ, តស្មា អបរិយាបន្នធាតុយាតិ អវត្វា យំ យំ អបរិយាបន្នំ តំ តទេវ ទស្សេតុំ អបរិយាបន្នេ កតិ ខន្ធាតិអាទិ វុត្តំ។
991. Dutiyavāre ye dhammā kāmabhave kāmadhātusambhūtānañca sattānaṃ uppajjanti – kāmadhātuyaṃ pariyāpannā vā apariyāpannā vā – te sabbe saṅgahetvā kāmadhātuyā pañcakkhandhātiādi vuttaṃ. Rūpadhātuādīsupi eseva nayo. Yasmā pana rūpadhātupariyāpannānaṃ sattānaṃ ghānāyatanādīnaṃ abhāvena gandhāyatanādīni āyatanādikiccaṃ na karonti, tasmā rūpadhātuyā cha āyatanāni, nava dhātuyotiādi vuttaṃ . Yasmā ca okāsavasena vā sattuppattivasena vā apariyāpannadhātu nāma natthi, tasmā apariyāpannadhātuyāti avatvā yaṃ yaṃ apariyāpannaṃ taṃ tadeva dassetuṃ apariyāpanne kati khandhātiādi vuttaṃ.
Related texts:
តិបិដក (មូល) • Tipiṭaka (Mūla) / អភិធម្មបិដក • Abhidhammapiṭaka / វិភង្គបាឡិ • Vibhaṅgapāḷi / ១៨. ធម្មហទយវិភង្គោ • 18. Dhammahadayavibhaṅgo
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / វិភង្គ-មូលដីកា • Vibhaṅga-mūlaṭīkā / ១៨. ធម្មហទយវិភង្គោ • 18. Dhammahadayavibhaṅgo
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / វិភង្គ-អនុដីកា • Vibhaṅga-anuṭīkā / ១៨. ធម្មហទយវិភង្គោ • 18. Dhammahadayavibhaṅgo
