| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
உருவேலபாடிஹாரியகதா²வண்ணனா
Uruvelapāṭihāriyakathāvaṇṇanā
37-38. உருவேலகஸ்ஸபவத்து²ம்ஹி ஜடிலோதி ஜடாத⁴ரோ. ஜடா அஸ்ஸ அத்தீ²தி ஹி ஜடிலோ. நேதீதி நாயகோ, ஸாமங் வினேதி அத்தனோ லத்³தி⁴ங் ஸிக்கா²பேதீதி வினாயகோ. ஸசே தே கஸ்ஸப அக³ரூதி கஸ்ஸப ஸசே துய்ஹங் பா⁴ரியங் அபா²ஸுகங் கிஞ்சி நத்தி². அக்³யாகா³ரேதி அக்³கி³ஸாலாயங். உபி⁴ன்னங் ஸஜோதிபூ⁴தானந்தி உபோ⁴ஸு ஸஜோதிபூ⁴தேஸு பஜ்ஜலிதேஸு. யத்ர ஹி நாமாதி யோ நாம.
37-38. Uruvelakassapavatthumhi jaṭiloti jaṭādharo. Jaṭā assa atthīti hi jaṭilo. Netīti nāyako, sāmaṃ vineti attano laddhiṃ sikkhāpetīti vināyako. Sace te kassapa agarūti kassapa sace tuyhaṃ bhāriyaṃ aphāsukaṃ kiñci natthi. Agyāgāreti aggisālāyaṃ. Ubhinnaṃ sajotibhūtānanti ubhosu sajotibhūtesu pajjalitesu. Yatra hi nāmāti yo nāma.
39. அஜ்ஜண்ஹோதி அஜ்ஜ ஏகதி³வஸங். அக்³கி³ஸாலம்ஹீதி அக்³யாகா³ரே. ஸுமனமனஸோதி ஸுந்த³ரசித்தஸங்கா²தமனோ. தேஜோதா⁴தூஸு குஸலோதி தேஜோகஸிணஸமாபத்தீஸு குஸலோ. உதி³ச்ச²ரேதி உல்லோகேஸுங், பரிவாரேஸுந்தி வா அத்தோ². பத்தம்ஹி ஓத³ஹித்வாதி பத்தே பக்கி²பித்வா. து⁴வப⁴த்தேனாதி நிச்சப⁴த்தேன.
39.Ajjaṇhoti ajja ekadivasaṃ. Aggisālamhīti agyāgāre. Sumanamanasoti sundaracittasaṅkhātamano. Tejodhātūsu kusaloti tejokasiṇasamāpattīsu kusalo. Udicchareti ullokesuṃ, parivāresunti vā attho. Pattamhi odahitvāti patte pakkhipitvā. Dhuvabhattenāti niccabhattena.
40. அபி⁴க்கந்தாய ரத்தியாதி எத்த² அபி⁴க்கந்த-ஸத்³தோ³ க²யே வத்ததி, தேன பரிக்கீ²ணாயரத்தியாதி அத்தோ². ஏதே ஹி சத்தாரோ மஹாராஜானோ மஜ்ஜி²மயாமஸமனந்தரே ஆக³தா. நியாமோ கிரேஸ தே³வதானங், யதி³த³ங் பு³த்³தா⁴னங் வா பு³த்³த⁴ஸாவகானங் வா உபட்டா²னங் ஆக³ச்ச²ந்தா மஜ்ஜி²மயாமஸமனந்தரே ஆக³ச்ச²ந்தி. அபி⁴க்கந்தவண்ணாதி அபி⁴ரூபச²விவண்ணா, இட்ட²வண்ணா மனாபவண்ணாதி வுத்தங் ஹோதி. தே³வதா ஹி மனுஸ்ஸலோகங் ஆக³ச்ச²மானா பகதிவண்ணங் பகதிஇத்³தி⁴ங் ஜஹித்வா ஓளாரிகங் அத்தபா⁴வங் கத்வா அதிரேகவண்ணவத்தா²லங்காரகாயாதீ³ஹி ஓபா⁴ஸங் முஞ்சமானாதி³வஸேன ச தி³ப்³ப³ங் இத்³தா⁴னுபா⁴வஞ்ச நிம்மினித்வா நடஸமஜ்ஜாதீ³னி க³ச்ச²ந்தா மனுஸ்ஸா விய அபி⁴ஸங்க²தேன காயேன ஆக³ச்ச²ந்தி. தத்த² காமாவசரா அனபி⁴ஸங்க²தேனபி ஆக³ந்துங் ஸக்கொந்தி ஓளாரிகரூபத்தா. ததா² ஹி தே கப³ளீகாராஹாரப⁴க்கா², ரூபாவசரா பன அனபி⁴ஸங்க²தேன காயேன ஆக³ந்துங் ந ஸக்கொந்தி ஸுகு²மதரரூபத்தா. தேஸஞ்ஹி அதிஸுகு²மோவ அத்தபா⁴வோ, ந தேன இரியாபத²கப்பனங் ஹோதி. தஸ்மா ப்³ரஹ்மலோகேபி ப்³ரஹ்மானோ யேபு⁴ய்யேன நிம்மிதரூபேனேவ பவத்தந்தி. மூலபடிஸந்தி⁴ரூபஞ்ஹி நேஸங் அதிவிய ஸுகு²மமஹாரூபங், கேவலங் தங் சித்துப்பாத³ஸ்ஸ நிஸ்ஸயாதி⁴ட்டா²னபூ⁴தங் ஸண்டா²னவந்தங் ஹுத்வா திட்ட²தி.
40.Abhikkantāya rattiyāti ettha abhikkanta-saddo khaye vattati, tena parikkhīṇāyarattiyāti attho. Ete hi cattāro mahārājāno majjhimayāmasamanantare āgatā. Niyāmo kiresa devatānaṃ, yadidaṃ buddhānaṃ vā buddhasāvakānaṃ vā upaṭṭhānaṃ āgacchantā majjhimayāmasamanantare āgacchanti. Abhikkantavaṇṇāti abhirūpachavivaṇṇā, iṭṭhavaṇṇā manāpavaṇṇāti vuttaṃ hoti. Devatā hi manussalokaṃ āgacchamānā pakativaṇṇaṃ pakatiiddhiṃ jahitvā oḷārikaṃ attabhāvaṃ katvā atirekavaṇṇavatthālaṅkārakāyādīhi obhāsaṃ muñcamānādivasena ca dibbaṃ iddhānubhāvañca nimminitvā naṭasamajjādīni gacchantā manussā viya abhisaṅkhatena kāyena āgacchanti. Tattha kāmāvacarā anabhisaṅkhatenapi āgantuṃ sakkonti oḷārikarūpattā. Tathā hi te kabaḷīkārāhārabhakkhā, rūpāvacarā pana anabhisaṅkhatena kāyena āgantuṃ na sakkonti sukhumatararūpattā. Tesañhi atisukhumova attabhāvo, na tena iriyāpathakappanaṃ hoti. Tasmā brahmalokepi brahmāno yebhuyyena nimmitarūpeneva pavattanti. Mūlapaṭisandhirūpañhi nesaṃ ativiya sukhumamahārūpaṃ, kevalaṃ taṃ cittuppādassa nissayādhiṭṭhānabhūtaṃ saṇṭhānavantaṃ hutvā tiṭṭhati.
கேவலகப்பந்தி எத்த² கேவல-ஸத்³த³ஸ்ஸ அனவஸேஸத்தங் அத்தோ², கப்ப-ஸத்³த³ஸ்ஸ ஸமந்தபா⁴வோ, தஸ்மா கேவலகப்பங் வனஸண்ட³ந்தி அனவஸேஸங் ஸமந்ததோ வனஸண்ட³ந்தி அத்தோ². அனவஸேஸங் ப²ரிதுங் ஸமத்த²ஸ்ஸபி ஹி ஓபா⁴ஸஸ்ஸ கேனசி காரணேன ஏகதே³ஸப²ரணம்பி ஸியா, அயங் பன ஸப்³ப³ஸோ ப²ரதீதி த³ஸ்ஸேதுங் ஸமந்தத்தோ² கப்ப-ஸத்³தோ³ க³ஹிதோ. அத² வா ஈஸங் அஸமத்த²ங் கேவலகப்பங். ப⁴க³வதோ பபா⁴ய அனோபா⁴ஸிதமேவ ஹி பதே³ஸங் தே³வதா அத்தனோ பபா⁴ய ஓபா⁴ஸெந்தி. ந ஹி ப⁴க³வதோ பபா⁴ காயசி பபா⁴ய அபி⁴பூ⁴யதி, ஸூரியாதீ³னம்பி பன பப⁴ங் ஸா அபி⁴பு⁴ய்ய திட்ட²தீதி. ஓபா⁴ஸெத்வாதி வத்தா²லங்காரஸரீரஸமுட்டி²தாய ஆபா⁴ய ப²ரித்வா, சந்தோ³ விய ஸூரியோ விய ச ஏகோபா⁴ஸங் ஏகபஜ்ஜோதங் கரித்வாதி அத்தோ². தே³வதானஞ்ஹி ஸரீராபா⁴ த³ஸத்³வாத³ஸயோஜனமத்தட்டா²னங் ததோ பி⁴ய்யோபி ப²ரித்வா திட்ட²தி, ததா² வத்தா²ப⁴ரணாதீ³ஸு ஸமுட்டி²தா பபா⁴. சதுத்³தி³ஸாதி சதூஸு தி³ஸாஸு. யத்ர ஹி நாமாதி யங் நாம.
Kevalakappanti ettha kevala-saddassa anavasesattaṃ attho, kappa-saddassa samantabhāvo, tasmā kevalakappaṃ vanasaṇḍanti anavasesaṃ samantato vanasaṇḍanti attho. Anavasesaṃ pharituṃ samatthassapi hi obhāsassa kenaci kāraṇena ekadesapharaṇampi siyā, ayaṃ pana sabbaso pharatīti dassetuṃ samantattho kappa-saddo gahito. Atha vā īsaṃ asamatthaṃ kevalakappaṃ. Bhagavato pabhāya anobhāsitameva hi padesaṃ devatā attano pabhāya obhāsenti. Na hi bhagavato pabhā kāyaci pabhāya abhibhūyati, sūriyādīnampi pana pabhaṃ sā abhibhuyya tiṭṭhatīti. Obhāsetvāti vatthālaṅkārasarīrasamuṭṭhitāya ābhāya pharitvā, cando viya sūriyo viya ca ekobhāsaṃ ekapajjotaṃ karitvāti attho. Devatānañhi sarīrābhā dasadvādasayojanamattaṭṭhānaṃ tato bhiyyopi pharitvā tiṭṭhati, tathā vatthābharaṇādīsu samuṭṭhitā pabhā. Catuddisāti catūsu disāsu. Yatra hi nāmāti yaṃ nāma.
43. அங்க³மக³தா⁴தி உபோ⁴ அங்க³மக³த⁴ரட்ட²வாஸினோ. இத்³தி⁴பாடிஹாரியந்தி இத்³தி⁴பூ⁴தங் பாடிஹாரியங், ந ஆதே³ஸனானுஸாஸனீபாடிஹாரியந்தி அத்தோ². திவித⁴ஞ்ஹி பாடிஹாரியங் இத்³தி⁴பாடிஹாரியங் ஆதே³ஸனாபாடிஹாரியங் அனுஸாஸனீபாடிஹாரியந்தி. தத்த² ‘‘இத⁴ பி⁴க்கு² ஏகோபி ஹுத்வா ப³ஹுதா⁴ ஹோதி, ப³ஹுதா⁴பி ஹுத்வா ஏகோ ஹோதி ஆவிபா⁴வங் திரோபா⁴வ’’ந்திஆதி³னயப்பவத்தங் (தீ³॰ நி॰ 1.238-239; ம॰ நி॰ 1.147; ஸங்॰ நி॰ 2.70; 5.834) இத்³தி⁴வித⁴மேவ இத்³தி⁴பாடிஹாரியங். ‘‘இத⁴ பி⁴க்கு² பரஸத்தானங் பரபுக்³க³லானங் சித்தம்பி ஆதி³ஸதி, சேதஸிகம்பி ஆதி³ஸதி, விதக்கிதம்பி ஆதி³ஸதி, விசாரிதம்பி ஆதி³ஸதி ‘ஏவம்பி தே மனோ, இத்த²ம்பி தே மனோ’’’திஆதி³னயப்பவத்தங் (படி॰ ம॰ 3.30) பரஸ்ஸ சித்தங் ஞத்வா கத²னங் ஆதே³ஸனாபாடிஹாரியங். ‘‘இத⁴ பி⁴க்கு² ஏவமனுஸாஸதி ‘ஏவங் விதக்கேத², மா ஏவங் விதக்கயித்த², ஏவங் மனஸி கரோத², மா ஏவங் மானஸா கரித்த², இத³ங் பஜஹத², இத³ங் உபஸம்பஜ்ஜ விஹரதா²’’’தி (படி॰ ம॰ 3.30) ஏவமாதி³னயப்பவத்தா ஸாவகானங் பு³த்³தா⁴னஞ்ச ஸப்³ப³காலங் தே³ஸேதப்³ப³த⁴ம்மதே³ஸனா அனுஸாஸனீபாடிஹாரியங்.
43.Aṅgamagadhāti ubho aṅgamagadharaṭṭhavāsino. Iddhipāṭihāriyanti iddhibhūtaṃ pāṭihāriyaṃ, na ādesanānusāsanīpāṭihāriyanti attho. Tividhañhi pāṭihāriyaṃ iddhipāṭihāriyaṃ ādesanāpāṭihāriyaṃ anusāsanīpāṭihāriyanti. Tattha ‘‘idha bhikkhu ekopi hutvā bahudhā hoti, bahudhāpi hutvā eko hoti āvibhāvaṃ tirobhāva’’ntiādinayappavattaṃ (dī. ni. 1.238-239; ma. ni. 1.147; saṃ. ni. 2.70; 5.834) iddhividhameva iddhipāṭihāriyaṃ. ‘‘Idha bhikkhu parasattānaṃ parapuggalānaṃ cittampi ādisati, cetasikampi ādisati, vitakkitampi ādisati, vicāritampi ādisati ‘evampi te mano, itthampi te mano’’’tiādinayappavattaṃ (paṭi. ma. 3.30) parassa cittaṃ ñatvā kathanaṃ ādesanāpāṭihāriyaṃ. ‘‘Idha bhikkhu evamanusāsati ‘evaṃ vitakketha, mā evaṃ vitakkayittha, evaṃ manasi karotha, mā evaṃ mānasā karittha, idaṃ pajahatha, idaṃ upasampajja viharathā’’’ti (paṭi. ma. 3.30) evamādinayappavattā sāvakānaṃ buddhānañca sabbakālaṃ desetabbadhammadesanā anusāsanīpāṭihāriyaṃ.
தத்த² (உதா³॰ அட்ட²॰ 1) பாடிஹாரியபத³ஸ்ஸ வசனத்த²ங் படிபக்க²ஹரணதோ ராகா³தி³கிலேஸாபனயனதோ பாடிஹாரியந்தி வத³ந்தி. ப⁴க³வதோ பன படிபக்கா² ராகா³த³யோ ந ஸந்தி யே ஹரிதப்³பா³, புது²ஜ்ஜனானம்பி விக³தூபக்கிலேஸே அட்ட²கு³ணஸமன்னாக³தே சித்தே ஹதபடிபக்கே² இத்³தி⁴வித⁴ங் வத்ததி, தஸ்மா தத்த² பவத்தவோஹாரேன ச ந ஸக்கா இத⁴ பாடிஹாரியந்தி வத்துங். ஸசே பன மஹாகாருணிகஸ்ஸ ப⁴க³வதோ வேனெய்யக³தா ச கிலேஸா படிபக்கா², தேஸங் ஹரணதோ பாடிஹாரியந்தி வுத்தங், ஏவங் ஸதி யுத்தமேதங். அத² வா ப⁴க³வதோ ச ஸாஸனஸ்ஸ ச படிபக்கா² தித்தி²யா, தேஸங் ஹரணதோ பாடிஹாரியங். தே ஹி தி³ட்டி²ஹரணவஸேன தி³ட்டி²ப்பகாஸனே அஸமத்த²பா⁴வேன ச இத்³தி⁴ஆதே³ஸனானுஸாஸனீஹி ஹரிதா அபனீதா ஹொந்தீதி. படீதி வா அயங் ஸத்³தோ³ பச்சா²தி ஏதஸ்ஸ அத்த²ங் போ³தே⁴தி ‘‘தஸ்மிங் படிபவிட்ட²ம்ஹி, அஞ்ஞோ ஆக³ஞ்சி² ப்³ராஹ்மணோ’’திஆதீ³ஸு (சூளனி॰ வத்து²கா³தா² 4) விய, தஸ்மா ஸமாஹிதே சித்தே விக³தூபக்கிலேஸேன கதகிச்சேன பச்சா² ஹரிதப்³ப³ங் பவத்தேதப்³ப³ந்தி படிஹாரியங், அத்தனோ வா உபக்கிலேஸேஸு சதுத்த²ஜ்ஜா²னமக்³கே³ஹி ஹரிதேஸு பச்சா² ஹரணங் படிஹாரியங், இத்³தி⁴ஆதே³ஸனானுஸாஸனியோ ச விக³தூபக்கிலேஸேன கதகிச்சேன ஸத்தஹிதத்த²ங் புன பவத்தேதப்³பா³, ஹரிதேஸு ச அத்தனோ உபக்கிலேஸேஸு பரஸத்தானங் உபக்கிலேஸஹரணானி ஹொந்தீதி படிஹாரியானி ப⁴வந்தி, படிஹாரியமேவ பாடிஹாரியங். படிஹாரியே வா இத்³தி⁴ஆதே³ஸனானுஸாஸனீஸமுதா³யே ப⁴வங் ஏகேகங் பாடிஹாரியந்தி வுச்சதி. படிஹாரியங் வா சதுத்த²ஜ்ஜா²னங் மக்³கோ³ ச படிபக்க²ஹரணதோ, தத்த² ஜாதங் நிமித்தபூ⁴தே, ததோ வா ஆக³தந்தி பாடிஹாரியங். ஸ்வாதனாயாதி ஸ்வே தா³தப்³ப³ஸ்ஸ அத்தா²ய.
Tattha (udā. aṭṭha. 1) pāṭihāriyapadassa vacanatthaṃ paṭipakkhaharaṇato rāgādikilesāpanayanato pāṭihāriyanti vadanti. Bhagavato pana paṭipakkhā rāgādayo na santi ye haritabbā, puthujjanānampi vigatūpakkilese aṭṭhaguṇasamannāgate citte hatapaṭipakkhe iddhividhaṃ vattati, tasmā tattha pavattavohārena ca na sakkā idha pāṭihāriyanti vattuṃ. Sace pana mahākāruṇikassa bhagavato veneyyagatā ca kilesā paṭipakkhā, tesaṃ haraṇato pāṭihāriyanti vuttaṃ, evaṃ sati yuttametaṃ. Atha vā bhagavato ca sāsanassa ca paṭipakkhā titthiyā, tesaṃ haraṇato pāṭihāriyaṃ. Te hi diṭṭhiharaṇavasena diṭṭhippakāsane asamatthabhāvena ca iddhiādesanānusāsanīhi haritā apanītā hontīti. Paṭīti vā ayaṃ saddo pacchāti etassa atthaṃ bodheti ‘‘tasmiṃ paṭipaviṭṭhamhi, añño āgañchi brāhmaṇo’’tiādīsu (cūḷani. vatthugāthā 4) viya, tasmā samāhite citte vigatūpakkilesena katakiccena pacchā haritabbaṃ pavattetabbanti paṭihāriyaṃ, attano vā upakkilesesu catutthajjhānamaggehi haritesu pacchā haraṇaṃ paṭihāriyaṃ, iddhiādesanānusāsaniyo ca vigatūpakkilesena katakiccena sattahitatthaṃ puna pavattetabbā, haritesu ca attano upakkilesesu parasattānaṃ upakkilesaharaṇāni hontīti paṭihāriyāni bhavanti, paṭihāriyameva pāṭihāriyaṃ. Paṭihāriye vā iddhiādesanānusāsanīsamudāye bhavaṃ ekekaṃ pāṭihāriyanti vuccati. Paṭihāriyaṃ vā catutthajjhānaṃ maggo ca paṭipakkhaharaṇato, tattha jātaṃ nimittabhūte, tato vā āgatanti pāṭihāriyaṃ. Svātanāyāti sve dātabbassa atthāya.
44. பங்ஸுகூலங் உப்பன்னங் ஹோதீதி பரியேஸமானஸ்ஸ படிலாப⁴வஸேன உப்பன்னங் ஹோதி. விசித்தபாடிஹாரியத³ஸ்ஸனத்தா²வ ஸா பரியேஸனா. யஸ்மா பாணினா பு²ட்ட²மத்தே ஸா பொக்க²ரணீ நிம்மிதா அஹோஸி, தஸ்மா வுத்தங் ‘‘பாணினா பொக்க²ரணிங் க²ணித்வா’’தி.
44.Paṃsukūlaṃuppannaṃ hotīti pariyesamānassa paṭilābhavasena uppannaṃ hoti. Vicittapāṭihāriyadassanatthāva sā pariyesanā. Yasmā pāṇinā phuṭṭhamatte sā pokkharaṇī nimmitā ahosi, tasmā vuttaṃ ‘‘pāṇinā pokkharaṇiṃ khaṇitvā’’ti.
46-49. ஜடிலாதி தாபஸா. தே ஹி ஜடாதா⁴ரிதாய இத⁴ ‘‘ஜடிலா’’தி வுத்தா. அந்தரட்ட²காஸு ஹிமபாதஸமயேதி ஹேமந்தஸ்ஸ உதுனோ அப்³ப⁴ந்தரபூ⁴தே மாக⁴மாஸஸ்ஸ அவஸானே சதஸ்ஸோ, ப²க்³கு³ணமாஸஸ்ஸ ஆதி³ம்ஹி சதஸ்ஸோதி ஏவங் உபி⁴ன்னமந்தரே அட்ட²ரத்தீஸு ஹிமபதனகாலே. நேரஞ்ஜராய உம்முஜ்ஜந்தீதி கேசி தஸ்மிங் தித்த²ஸம்மதே உத³கே பட²மங் நிமுக்³க³ஸகலஸரீரா ததோ உம்முஜ்ஜந்தா வுட்ட²ஹந்தி உப்பிலவந்தி. நிமுஜ்ஜந்தீதி ஸஸீஸங் உத³கே ஓஸீத³ந்தி. உம்முஜ்ஜனநிமுஜ்ஜனம்பி கரொந்தீதி புனப்புனங் உம்முஜ்ஜனநிமுஜ்ஜனானிபி கரொந்தி. தத்த² ஹி கேசி ‘‘ஏகும்முஜ்ஜனேனேவ பாபஸுத்³தி⁴ ஹோதீ’’தி ஏவங்தி³ட்டி²கா, தே உம்முஜ்ஜனமேவ கத்வா க³ச்ச²ந்தி. உம்முஜ்ஜனங் பன நிமுஜ்ஜனமந்தரேன நத்தீ²தி அவினாபா⁴வதோ நிமுஜ்ஜனம்பி தே கரொந்தியேவ. யேபி ‘‘ஏகனிமுஜ்ஜனேனேவ பாபஸுத்³தி⁴ ஹோதீ’’தி ஏவங்தி³ட்டி²கா, தேபி ஏகவாரமேவ நிமுஜ்ஜித்வா வுத்தனயேனேவ அவினாபா⁴வதோ உம்முஜ்ஜனம்பி கத்வா பக்கமந்தி. அபரே ‘‘புனப்புனங் உம்முஜ்ஜனநிமுஜ்ஜனானி கத்வா நஹாதே பாபஸுத்³தி⁴ ஹோதீ’’தி ஏவங்தி³ட்டி²கா, தே காலேன காலங் உம்முஜ்ஜனநிமுஜ்ஜனானி கரொந்தி. தே ஸப்³பே³பி ஸந்தா⁴ய வுத்தங் ‘‘உம்முஜ்ஜந்திபி நிமுஜ்ஜந்திபி உம்முஜ்ஜனநிமுஜ்ஜனம்பி கரொந்தீ’’தி. எத்த² ச கிஞ்சாபி நிமுஜ்ஜனபுப்³ப³கங் உம்முஜ்ஜனங், நிமுஜ்ஜனமேவ பன கரொந்தா கதிபயா, உம்முஜ்ஜனங் தது³ப⁴யஞ்ச கரொந்தா ப³ஹூதி தேஸங் யேபு⁴ய்யபா⁴வத³ஸ்ஸனத்த²ங் உம்முஜ்ஜனங் பட²மங் வுத்தங்.
46-49.Jaṭilāti tāpasā. Te hi jaṭādhāritāya idha ‘‘jaṭilā’’ti vuttā. Antaraṭṭhakāsu himapātasamayeti hemantassa utuno abbhantarabhūte māghamāsassa avasāne catasso, phagguṇamāsassa ādimhi catassoti evaṃ ubhinnamantare aṭṭharattīsu himapatanakāle. Nerañjarāya ummujjantīti keci tasmiṃ titthasammate udake paṭhamaṃ nimuggasakalasarīrā tato ummujjantā vuṭṭhahanti uppilavanti. Nimujjantīti sasīsaṃ udake osīdanti. Ummujjananimujjanampi karontīti punappunaṃ ummujjananimujjanānipi karonti. Tattha hi keci ‘‘ekummujjaneneva pāpasuddhi hotī’’ti evaṃdiṭṭhikā, te ummujjanameva katvā gacchanti. Ummujjanaṃ pana nimujjanamantarena natthīti avinābhāvato nimujjanampi te karontiyeva. Yepi ‘‘ekanimujjaneneva pāpasuddhi hotī’’ti evaṃdiṭṭhikā, tepi ekavārameva nimujjitvā vuttanayeneva avinābhāvato ummujjanampi katvā pakkamanti. Apare ‘‘punappunaṃ ummujjananimujjanāni katvā nahāte pāpasuddhi hotī’’ti evaṃdiṭṭhikā, te kālena kālaṃ ummujjananimujjanāni karonti. Te sabbepi sandhāya vuttaṃ ‘‘ummujjantipi nimujjantipi ummujjananimujjanampi karontī’’ti. Ettha ca kiñcāpi nimujjanapubbakaṃ ummujjanaṃ, nimujjanameva pana karontā katipayā, ummujjanaṃ tadubhayañca karontā bahūti tesaṃ yebhuyyabhāvadassanatthaṃ ummujjanaṃ paṭhamaṃ vuttaṃ.
50-51. உத³கவாஹகோதி உத³கோகோ⁴. ரேணுஹதாயாதி ரஜோக³தாய, ரஜோகிண்ணாயாதி வுத்தங் ஹோதி. நேவ ச கோ² த்வங் கஸ்ஸப அரஹாதி ஏதேன ததா³ கஸ்ஸபஸ்ஸ அஸெக்க²பா⁴வங் படிக்கி²பதி, நாபி அரஹத்தமக்³க³ஸமாபன்னோதி ஏதேன ஸெக்க²பா⁴வங். உப⁴யேனபிஸ்ஸ அனரியபா⁴வமேவ தீ³பேதி. ஸாபி தே படிபதா³ நத்தி², யாய த்வங் அரஹா வா அஸ்ஸஸி அரஹத்தமக்³க³ங் வா ஸமாபன்னோதி இமினா பனஸ்ஸ கல்யாணபுது²ஜ்ஜனபா⁴வம்பி படிக்கி²பதி. தத்த² படிபதா³தி ஸீலவிஸுத்³தி⁴ஆத³யோ ச² விஸுத்³தி⁴யோ. படிபஜ்ஜதி ஏதாய அரியமக்³கோ³தி படிபதா³. அஸ்ஸஸீதி ப⁴வெய்யாஸி. சிரபடிகாதி சிரகாலதோ பட்டா²ய, நாக³த³மனதோ பட்டா²யாதி அத்தோ². கா²ரிகாஜமிஸ்ஸந்தி எத்த² கா²ரீதி அரணீகமண்ட³லுஸூசிஆத³யோ தாபஸபரிக்கா²ரா, தங் ஹரணகாஜங் கா²ரிகாஜங். அக்³கி³ஹுதமிஸ்ஸந்தி த³ப்³பி³ஆதி³அக்³கி³பூஜோபகரணங்.
50-51.Udakavāhakoti udakogho. Reṇuhatāyāti rajogatāya, rajokiṇṇāyāti vuttaṃ hoti. Neva ca kho tvaṃ kassapa arahāti etena tadā kassapassa asekkhabhāvaṃ paṭikkhipati, nāpi arahattamaggasamāpannoti etena sekkhabhāvaṃ. Ubhayenapissa anariyabhāvameva dīpeti. Sāpi te paṭipadā natthi, yāya tvaṃ arahā vā assasi arahattamaggaṃ vā samāpannoti iminā panassa kalyāṇaputhujjanabhāvampi paṭikkhipati. Tattha paṭipadāti sīlavisuddhiādayo cha visuddhiyo. Paṭipajjati etāya ariyamaggoti paṭipadā. Assasīti bhaveyyāsi. Cirapaṭikāti cirakālato paṭṭhāya, nāgadamanato paṭṭhāyāti attho. Khārikājamissanti ettha khārīti araṇīkamaṇḍalusūciādayo tāpasaparikkhārā, taṃ haraṇakājaṃ khārikājaṃ. Aggihutamissanti dabbiādiaggipūjopakaraṇaṃ.
52-53. உபஸக்³கோ³தி உபத்³த³வோ. இதா³னி அட்³டு⁴ட்³டா⁴னி பாடிஹாரியஸஹஸ்ஸானி ஏகதோ க³ணெத்வா த³ஸ்ஸேதுங் ‘‘ப⁴க³வதோ அதி⁴ட்டா²னேன பஞ்ச கட்ட²ஸதானி ந பா²லியிங்ஸூ’’திஆதி³ ஆரத்³த⁴ங். நாக³த³மனாதீ³னி பன ஸோளஸ பாடிஹாரியானி இத⁴ ந க³ணிதானி, தேஹி ஸத்³தி⁴ங் ஸோளஸாதிரேகஅட்³டு⁴ட்³ட⁴பாடிஹாரியஸஹஸ்ஸானீதி வேதி³தப்³ப³ங்.
52-53.Upasaggoti upaddavo. Idāni aḍḍhuḍḍhāni pāṭihāriyasahassāni ekato gaṇetvā dassetuṃ ‘‘bhagavato adhiṭṭhānena pañca kaṭṭhasatāni na phāliyiṃsū’’tiādi āraddhaṃ. Nāgadamanādīni pana soḷasa pāṭihāriyāni idha na gaṇitāni, tehi saddhiṃ soḷasātirekaaḍḍhuḍḍhapāṭihāriyasahassānīti veditabbaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 12. உருவேலபாடிஹாரியகதா² • 12. Uruvelapāṭihāriyakathā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / உருவேலபாடிஹாரியகதா² • Uruvelapāṭihāriyakathā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / உருவேலபாடிஹாரியகதா²வண்ணனா • Uruvelapāṭihāriyakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / உருவேலபாடிஹாரியகதா²வண்ணனா • Uruvelapāṭihāriyakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 12. உருவேலபாடிஹாரியகதா² • 12. Uruvelapāṭihāriyakathā
