| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
உருவேலபாடிஹாரியகதா²வண்ணனா
Uruvelapāṭihāriyakathāvaṇṇanā
37-8. வஸெய்யாமாதி ‘‘த்வஞ்ச அஹஞ்ச வஸெய்யாமா’’தி பியவசனேன தஸ்ஸ ஸங்க³ண்ஹனத்த²ங் வுத்தங் கிர. தேஜஸா தேஜந்தி ஆனுபா⁴வேன ஆனுபா⁴வங். தேஜோதா⁴துயா வா தேஜோதா⁴துங். உபி⁴ன்னங் ஸஜோதிபூ⁴தானந்தி அனாத³ரத்தே² ஸாமிவசனங், பா⁴வஸத்தமீஅத்தே² வா. அக்³யாகா³ரமேவ ஆதி³த்தங், ந தத்த² வஸனகோ ஸத்தஜாதிகோ. அசிந்தெய்யோ ஹி இத்³தி⁴விஸயோ. கஸ்மா பன ப⁴க³வா அக்³யாகா³ரம்பி அனாதி³த்தங் நாதி⁴ட்டா²ஸீதி? அத்தனோ து³க்கு²ப்பாதா³பா⁴வஸ்ஸ அனதிவிம்ஹாதி³பா⁴வப்பஸங்க³தோ. கிமத்த²ங் பரஸந்தகங் மஹாஸம்பா⁴ரபவத்தங் தங் வினாஸேதீதி? புன யதா²போராணங் இத்³தா⁴னுபா⁴வேன கத்துகாமதாதி⁴ப்பாயதோ. பரியாதி³ன்னோதி க²யங் நீதோ. தேஜஸா தேஜந்தி ஆனுபா⁴வேன ஆனுபா⁴வங். அக்³யாகா³ரஸ்ஸ பரித்தத்தா இதரோ அத்தோ² ந ஸம்ப⁴வதி. அயமத்தோ² ‘‘மக்க²ங் அஸஹமானோ’’தி இமினா அதிவிய ஸமேதி. இத்³தா⁴னுபா⁴வமக்க²னஞ்ஹி தத்த² மக்கோ² நாம. பத்தேனாதி பது³மபத்தேனாதிபி போராணா. பது³மினிஸண்டே³ டி²தோ ஹி ப⁴க³வா தத்த² அஹோஸீதி தேஸங் மதி.
37-8.Vaseyyāmāti ‘‘tvañca ahañca vaseyyāmā’’ti piyavacanena tassa saṅgaṇhanatthaṃ vuttaṃ kira. Tejasā tejanti ānubhāvena ānubhāvaṃ. Tejodhātuyā vā tejodhātuṃ. Ubhinnaṃ sajotibhūtānanti anādaratthe sāmivacanaṃ, bhāvasattamīatthe vā. Agyāgārameva ādittaṃ, na tattha vasanako sattajātiko. Acinteyyo hi iddhivisayo. Kasmā pana bhagavā agyāgārampi anādittaṃ nādhiṭṭhāsīti? Attano dukkhuppādābhāvassa anativimhādibhāvappasaṅgato. Kimatthaṃ parasantakaṃ mahāsambhārapavattaṃ taṃ vināsetīti? Puna yathāporāṇaṃ iddhānubhāvena kattukāmatādhippāyato. Pariyādinnoti khayaṃ nīto. Tejasā tejanti ānubhāvena ānubhāvaṃ. Agyāgārassa parittattā itaro attho na sambhavati. Ayamattho ‘‘makkhaṃ asahamāno’’ti iminā ativiya sameti. Iddhānubhāvamakkhanañhi tattha makkho nāma. Pattenāti padumapattenātipi porāṇā. Paduminisaṇḍe ṭhito hi bhagavā tattha ahosīti tesaṃ mati.
39. தி³ன்னந்தி அனுமதிந்தி அத்தோ². அபீ⁴தோ நிப்³ப⁴யோ. கஸ்மா? யதோ ஸோ மக்³கே³ன ப⁴யமதீதோ. ‘‘ஸுமனமனஸோதி ஸுந்த³ரசித்தஸங்கா²தமனோ. ஸுமனோ ஏவ வா’’தி லிகி²தங். தேஜோவாதி அக்³கி³ விய. தா⁴துகுஸலோதி தேஜோதா⁴தும்ஹி குஸலோ. ‘‘ப்³யவஹிதா சே’’தி ஸத்³த³லக்க²ணத்தா ச உபஸக்³கோ³. தேஜோதா⁴துஸமாபத்தீஸு குஸலோ இச்சேவத்தோ². உதி³ச்ச²ரேதி உல்லோகேஸுங். ‘‘ஸங்பரிவாரேஸு’’ந்தி ச லிகி²தங். இதி ஏவங் ப⁴ணந்தீதி அத்தோ². ஹதாதி ஸமாதி அத்தோ², காளகாவ ஹொந்தீதி கிரெத்த² அதி⁴ப்பாயோ. ஈஸகம்பி ப்³யாபாரங் அகத்வா உபஸமானுரூபங் திட்ட²ந்தி. யே ச அனேகவண்ணா அச்சியோ ஹொந்தீதி தங் த³ஸ்ஸேதுங் ‘‘நீலா அத² லோஹிதிகா’’திஆதி³மாஹ.
39.Dinnanti anumatinti attho. Abhīto nibbhayo. Kasmā? Yato so maggena bhayamatīto. ‘‘Sumanamanasoti sundaracittasaṅkhātamano. Sumano eva vā’’ti likhitaṃ. Tejovāti aggi viya. Dhātukusaloti tejodhātumhi kusalo. ‘‘Byavahitā ce’’ti saddalakkhaṇattā ca upasaggo. Tejodhātusamāpattīsu kusalo iccevattho. Udicchareti ullokesuṃ. ‘‘Saṃparivāresu’’nti ca likhitaṃ. Iti evaṃ bhaṇantīti attho. Hatāti samāti attho, kāḷakāva hontīti kirettha adhippāyo. Īsakampi byāpāraṃ akatvā upasamānurūpaṃ tiṭṭhanti. Ye ca anekavaṇṇā acciyo hontīti taṃ dassetuṃ ‘‘nīlā atha lohitikā’’tiādimāha.
40. சதுத்³தி³ஸாதி சதூஸு தி³ஸாஸு.
40.Catuddisāti catūsu disāsu.
44. பங்ஸுகூலங் உப்பன்னந்தி பரியேஸமானஸ்ஸ படிலாப⁴வஸேன உப்பன்னங் ஹோதி. சித்தவிசித்தபாடிஹீரத³ஸ்ஸனத்தா²ய ச ஸா பரியேஸனா. ஸா அயங் ஸாயங் . தா இமா தயிமா. த்³வே ஏகதோ க³ஹெத்வா வத³தி. ஆயாமி அஹங் ஆயமஹங். ஏதந்தி ஏதஸ்ஸ. யதா² மயந்தி யஸ்மா மயங்.
44.Paṃsukūlaṃ uppannanti pariyesamānassa paṭilābhavasena uppannaṃ hoti. Cittavicittapāṭihīradassanatthāya ca sā pariyesanā. Sā ayaṃ sāyaṃ. Tā imā tayimā. Dve ekato gahetvā vadati. Āyāmi ahaṃ āyamahaṃ. Etanti etassa. Yathā mayanti yasmā mayaṃ.
50-51. உத³கவாஹகோதி உத³கோகோ⁴. உத³கஸோதோதி போராணா. ‘‘யாய த்வ’’ந்தி புப்³ப³பா⁴க³விபஸ்ஸனாபடிபத³ங் ஸந்தா⁴ய வுத்தங். சிரபடிகாதி சிரபபு⁴தி, நாக³த³மனதோ பட்டா²ய சிரபடிகா. ‘‘சிரபடிஸங்கா²’’திபி வத³ந்தி. கேஸமிஸ்ஸந்திஆதி³ம்ஹி அப்³போ³கிண்ணங் விஸுங் விஸுங் ப³ந்தி⁴த்வா பக்கி²த்தத்தா கேஸாத³யோவ கேஸமிஸ்ஸாதி போராணா. கா²ரிகாஜமிஸ்ஸந்தி எத்த² கா²ரீ வுச்சதி தாபஸபரிக்கா²ரோ. ஜடிலே பாஹேஸீதி த்³வே தயோ தாபஸே பாஹேஸி. ‘‘ஸோளஸாதிரேகஅட்³ட⁴உட்³டா⁴னி பாடிஹாரியஸஹஸ்ஸானீ’’தி வுத்தங்.
50-51.Udakavāhakoti udakogho. Udakasototi porāṇā. ‘‘Yāya tva’’nti pubbabhāgavipassanāpaṭipadaṃ sandhāya vuttaṃ. Cirapaṭikāti cirapabhuti, nāgadamanato paṭṭhāya cirapaṭikā. ‘‘Cirapaṭisaṅkhā’’tipi vadanti. Kesamissantiādimhi abbokiṇṇaṃ visuṃ visuṃ bandhitvā pakkhittattā kesādayova kesamissāti porāṇā. Khārikājamissanti ettha khārī vuccati tāpasaparikkhāro. Jaṭile pāhesīti dve tayo tāpase pāhesi. ‘‘Soḷasātirekaaḍḍhauḍḍhāni pāṭihāriyasahassānī’’ti vuttaṃ.
54. அக்³கி³ஹுத்தே கதபரிசயத்தா ப⁴க³வா தேஸங் ஆதி³த்தபரியாய-மபா⁴ஸி (ஸங்॰ நி॰ 4.28). தத்த² ஏகச்சங் ஆரம்மணவஸேன ஆதி³த்தங் சக்கா²தி³ ராக³க்³கி³னா, ஏகச்சங் ஸம்பயோக³வஸேன சக்கு²ஸம்ப²ஸ்ஸபச்சயா வேத³யிதாதி³கேனேவ, ஏகச்சங் அபி⁴பூ⁴தத்தே²ன சக்கா²தி³ ஏவ ஜாதிஆதி³னா , ஏகச்சங் பச்சயத்தே²ன, ததே³வ ஸோகாதி³னாதி யதா²ஸம்ப⁴வமெத்த² ஆதி³த்ததா வேதி³தப்³பா³. எத்த² கிஞ்சாபி து³க்க²லக்க²ணமேவேகங் பாகடங், தத³னுஸாரேன பன இதரங் லக்க²ணத்³வயம்பி தேஹி தி³ட்ட²ந்தி வேதி³தப்³ப³ங் து³க்கா²காரஸ்ஸ இதராகாரதீ³பனதோ. ஸந்தஸுக²தண்ஹாபி⁴னிவிட்ட²த்தா பனேஸங் து³க்க²லக்க²ணபுப்³ப³ங்க³மா தே³ஸனா கதாதி வேதி³தப்³பா³.
54. Aggihutte kataparicayattā bhagavā tesaṃ ādittapariyāya-mabhāsi (saṃ. ni. 4.28). Tattha ekaccaṃ ārammaṇavasena ādittaṃ cakkhādi rāgagginā, ekaccaṃ sampayogavasena cakkhusamphassapaccayā vedayitādikeneva, ekaccaṃ abhibhūtatthena cakkhādi eva jātiādinā , ekaccaṃ paccayatthena, tadeva sokādināti yathāsambhavamettha ādittatā veditabbā. Ettha kiñcāpi dukkhalakkhaṇamevekaṃ pākaṭaṃ, tadanusārena pana itaraṃ lakkhaṇadvayampi tehi diṭṭhanti veditabbaṃ dukkhākārassa itarākāradīpanato. Santasukhataṇhābhiniviṭṭhattā panesaṃ dukkhalakkhaṇapubbaṅgamā desanā katāti veditabbā.
உருவேலபாடிஹாரியகதா²வண்ணனா நிட்டி²தா.
Uruvelapāṭihāriyakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 12. உருவேலபாடிஹாரியகதா² • 12. Uruvelapāṭihāriyakathā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / உருவேலபாடிஹாரியகதா² • Uruvelapāṭihāriyakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā
உருவேலபாடிஹாரியகதா²வண்ணனா • Uruvelapāṭihāriyakathāvaṇṇanā
ஆதி³த்தபரியாயஸுத்தவண்ணனா • Ādittapariyāyasuttavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / உருவேலபாடிஹாரியகதா²வண்ணனா • Uruvelapāṭihāriyakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 12. உருவேலபாடிஹாரியகதா² • 12. Uruvelapāṭihāriyakathā
