| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
உருவேலபாடிஹாரியகதா²வண்ணனா
Uruvelapāṭihāriyakathāvaṇṇanā
37-38. பாளியங் அக³ரூதி பா⁴ரியங் ந ஸியாதி அத்தோ². உபி⁴ன்னங் ஸஜோதிபூ⁴தானந்தி உபோ⁴ஸு ஸஜோதிபூ⁴தேஸு. பத்தே பக்கி²பீதி தங் நாக³ங் நிஹததேஜங் த⁴ம்மதே³ஸனாய ஸந்தப்பெத்வா ஸரணஸீலானி த³த்வா ஸகலரத்திங் ப⁴க³வந்தங் பயிருபாஸித்வா டி²தங் ஜடிலானங் த³ஸ்ஸனத்த²ங் பத்தே பக்கி²பி, ந அஹிதுண்டி³கோ விய ப³லக்காரேனாதி வேதி³தப்³ப³ங். யத்ர ஹி நாமாதி யோ நாம.
37-38. Pāḷiyaṃ agarūti bhāriyaṃ na siyāti attho. Ubhinnaṃ sajotibhūtānanti ubhosu sajotibhūtesu. Patte pakkhipīti taṃ nāgaṃ nihatatejaṃ dhammadesanāya santappetvā saraṇasīlāni datvā sakalarattiṃ bhagavantaṃ payirupāsitvā ṭhitaṃ jaṭilānaṃ dassanatthaṃ patte pakkhipi, na ahituṇḍiko viya balakkārenāti veditabbaṃ. Yatra hi nāmāti yo nāma.
39. அஜ்ஜண்ஹோதி அஜ்ஜ ஏகதி³வஸங். அக்³கி³ஸாலம்ஹீதி அக்³யாகா³ரே. ஸுமனானங் பு³த்³தா⁴னங் மனஸா ஸதி³ஸோ மனோ அஸ்ஸாதி ஸுமனமனஸோ. அதி⁴சித்தோதி மஹாகருணாதீ³ஹி அதி⁴சித்தோ. உதி³ச்ச²ரேதி உல்லோகேஸுங், பரிவாரேஸுந்தி அத்தோ². அனேகவண்ணா அச்சியோதி ச²ப்³ப³ண்ணரங்ஸியோ வுத்தா. அஹங் தே து⁴வப⁴த்தேன படிமானநங் கரிஸ்ஸாமீதி ஸேஸோ.
39.Ajjaṇhoti ajja ekadivasaṃ. Aggisālamhīti agyāgāre. Sumanānaṃ buddhānaṃ manasā sadiso mano assāti sumanamanaso. Adhicittoti mahākaruṇādīhi adhicitto. Udicchareti ullokesuṃ, parivāresunti attho. Anekavaṇṇā acciyoti chabbaṇṇaraṃsiyo vuttā. Ahaṃ te dhuvabhattena paṭimānanaṃ karissāmīti seso.
40. அபி⁴க்கந்தாய ரத்தியாதி பரிக்கீ²ணாய ரத்தியா, மஜ்ஜ²ரத்திஸமயேதி அத்தோ². அபி⁴க்கந்தவண்ணாதி அபி⁴ரூபச்ச²விவண்ணா. கேவலகப்பந்தி எத்த² கேவல-ஸத்³த³ஸ்ஸ அனவஸேஸத்தோ², கப்ப-ஸத்³த³ஸ்ஸ ஸமந்தபா⁴வோ, தஸ்மா அனவஸேஸங் ஸமந்ததோ வனஸண்ட³ந்தி அத்தோ². சதுத்³தி³ஸாதி சதூஸு தி³ஸாஸு. யத்ர ஹி நாமாதி யங் நாம.
40.Abhikkantāyarattiyāti parikkhīṇāya rattiyā, majjharattisamayeti attho. Abhikkantavaṇṇāti abhirūpacchavivaṇṇā. Kevalakappanti ettha kevala-saddassa anavasesattho, kappa-saddassa samantabhāvo, tasmā anavasesaṃ samantato vanasaṇḍanti attho. Catuddisāti catūsu disāsu. Yatra hi nāmāti yaṃ nāma.
43. அங்க³மக³தா⁴தி அங்க³மக³த⁴ரட்ட²வாஸினோ. இத்³தி⁴பாடிஹாரியந்தி அபி⁴ஞ்ஞித்³தி⁴யேவ படிபக்கா²னங் தித்தி²யானங், வேனெய்யஸத்தக³ததோ³ஸானஞ்ச ஹரணதோ அபனயனதோ பாடிஹாரியங், தங் தங் வா ஸத்தஹிதங் படிச்ச ஹரிதப்³ப³ங் பவத்தேதப்³ப³ந்தி படிஹாரியங், ததே³வ பாடிஹாரியங். இத்³தி⁴ ஏவ பாடிஹாரியங் இத்³தி⁴பாடிஹாரியங்.
43.Aṅgamagadhāti aṅgamagadharaṭṭhavāsino. Iddhipāṭihāriyanti abhiññiddhiyeva paṭipakkhānaṃ titthiyānaṃ, veneyyasattagatadosānañca haraṇato apanayanato pāṭihāriyaṃ, taṃ taṃ vā sattahitaṃ paṭicca haritabbaṃ pavattetabbanti paṭihāriyaṃ, tadeva pāṭihāriyaṃ. Iddhi eva pāṭihāriyaṃ iddhipāṭihāriyaṃ.
44. பங்ஸுகூலங் உப்பன்னங் ஹோதீதி புண்ணாய தா³ஸியா ஸரீரங் பரிக்கி²பித்வா ச²ட்³டி³தங் ஸாணமயங் கிமிகுலாகுலங் பரியேஸனவஸேன உப்பன்னங் ஹோதி, யங் ப⁴க³வா பூ⁴மிங் கம்பெந்தோ பாருபித்வா பச்சா² மஹாகஸ்ஸபத்தே²ரஸ்ஸ அதா³ஸி, தங் ஸந்தா⁴யேதங் வுத்தந்தி வத³ந்தி. கத்த² நு கோ²திஆதி³பரிவிதக்கோ ஜடிலானங் விவித⁴பாடிஹாரியத³ஸ்ஸனத்த²ங் கதோ. பாணினா க²ணந்தோ விய இத்³தி⁴யா மத்திகங் அபனெத்வா தி³ன்னத்தா வுத்தங் ‘‘பாணினா பொக்க²ரணிங் க²ணித்வா’’தி.
44.Paṃsukūlaṃ uppannaṃ hotīti puṇṇāya dāsiyā sarīraṃ parikkhipitvā chaḍḍitaṃ sāṇamayaṃ kimikulākulaṃ pariyesanavasena uppannaṃ hoti, yaṃ bhagavā bhūmiṃ kampento pārupitvā pacchā mahākassapattherassa adāsi, taṃ sandhāyetaṃ vuttanti vadanti. Kattha nu khotiādiparivitakko jaṭilānaṃ vividhapāṭihāriyadassanatthaṃ kato. Pāṇinā khaṇanto viya iddhiyā mattikaṃ apanetvā dinnattā vuttaṃ ‘‘pāṇinā pokkharaṇiṃ khaṇitvā’’ti.
46. பா²லியந்து, கஸ்ஸப, கட்டா²னீதி உருவேலகஸ்ஸபேன நிவேதி³தே ஏவமவோசாதி த³ட்ட²ப்³ப³ங். ஏவங் ஸேஸேஸுபி.
46.Phāliyantu, kassapa, kaṭṭhānīti uruvelakassapena nivedite evamavocāti daṭṭhabbaṃ. Evaṃ sesesupi.
49. அந்தரட்ட²காஸு ஹிமபாதஸமயேதி எத்த² மாக⁴மாஸஸ்ஸ அவஸானே சதஸ்ஸோ, ப²க்³கு³ணமாஸஸ்ஸ ஆதி³ம்ஹி சதஸ்ஸோதி ஏவங் உபி⁴ன்னங் மாஸானங் அந்தரே அட்ட²ரத்தியோ அந்தரட்ட²கா நாம. தாஸு அந்தரட்ட²காஸு ரத்தீஸு ஹிமபாதகாலே. உம்முஜ்ஜனநிமுஜ்ஜனம்பி ஸஹஸா தது³ப⁴யகரணவஸேன வுத்தங்.
49.Antaraṭṭhakāsuhimapātasamayeti ettha māghamāsassa avasāne catasso, phagguṇamāsassa ādimhi catassoti evaṃ ubhinnaṃ māsānaṃ antare aṭṭharattiyo antaraṭṭhakā nāma. Tāsu antaraṭṭhakāsu rattīsu himapātakāle. Ummujjananimujjanampi sahasā tadubhayakaraṇavasena vuttaṃ.
50. உத³கவாஹகோதி உத³கோகோ⁴. ரேணுஹதாயாதி ரஜோகிண்ணாய, அதிந்தாயாதி அத்தோ². நாவாயாதி குல்லேன. இத³ங் நு த்வங் மஹாஸமணாதி இத⁴ நு த்வங். த⁴-காரஸ்ஸ த³-காரங், அனுஸாரஞ்ச கத்வா ‘‘இத³ங் நூ’’தி வுத்தங் ‘‘ஏகமிதா³ஹ’’ந்திஆதீ³ஸு (தீ³॰ நி॰ 1.165, 265) விய. ‘‘இமஸ்மிங் பதே³ஸே த்வங் நு கோ² டி²தோஸீ’’தி புச்சி². அயமஹமஸ்மீதி அயமஹங் இத⁴ டி²தொஸ்மீதி அத்தோ².
50.Udakavāhakoti udakogho. Reṇuhatāyāti rajokiṇṇāya, atintāyāti attho. Nāvāyāti kullena. Idaṃ nu tvaṃ mahāsamaṇāti idha nu tvaṃ. Dha-kārassa da-kāraṃ, anusārañca katvā ‘‘idaṃ nū’’ti vuttaṃ ‘‘ekamidāha’’ntiādīsu (dī. ni. 1.165, 265) viya. ‘‘Imasmiṃ padese tvaṃ nu kho ṭhitosī’’ti pucchi. Ayamahamasmīti ayamahaṃ idha ṭhitosmīti attho.
51. சிரபடிகாதி சிரகாலதோ பட்டா²ய. கேஸமிஸ்ஸங் ஸப்³ப³ங் பரிக்கா²ரங் உத³கே பவாஹெத்வாதிபி யோஜேதப்³ப³ங். அரணிகமண்ட³லுஆதி³கா தாபஸபரிக்கா²ரா கா²ரீ நாம, தங்ஹரணககாஜங் கா²ரிகாஜங் நாம. அக்³கி³ஹுதமிஸ்ஸந்தி அக்³கி³பூஜோபகரணஸஹிதங்.
51.Cirapaṭikāti cirakālato paṭṭhāya. Kesamissaṃ sabbaṃ parikkhāraṃ udake pavāhetvātipi yojetabbaṃ. Araṇikamaṇḍaluādikā tāpasaparikkhārā khārī nāma, taṃharaṇakakājaṃ khārikājaṃ nāma. Aggihutamissanti aggipūjopakaraṇasahitaṃ.
52-3. உபஸக்³கோ³தி உபத்³த³வோ. ‘‘அட்³டு⁴ட்³டா⁴னி பாடிஹாரியஸஹஸ்ஸானீ’’தி இத³ங் நாக³த³மனாதீ³னி பன்னரஸ பாடிஹாரியானி வஜ்ஜெத்வா வுத்தங் அப்பகமதி⁴கங் க³ணனூபக³ங் ந ஹோதீதி.
52-3.Upasaggoti upaddavo. ‘‘Aḍḍhuḍḍhāni pāṭihāriyasahassānī’’ti idaṃ nāgadamanādīni pannarasa pāṭihāriyāni vajjetvā vuttaṃ appakamadhikaṃ gaṇanūpagaṃ na hotīti.
54. க³யாயந்தி க³யானாமிகாய நதி³யா அதூ³ரப⁴வத்தா கா³மோ இத்தி²லிங்க³வஸேன க³யா நாம ஜாதோ, தஸ்ஸங். க³யாஸீஸேதி ஏவங்னாமகே பிட்டி²பாஸாணே.
54.Gayāyanti gayānāmikāya nadiyā adūrabhavattā gāmo itthiliṅgavasena gayā nāma jāto, tassaṃ. Gayāsīseti evaṃnāmake piṭṭhipāsāṇe.
‘‘யமித³ங் சக்கு²ஸம்ப²ஸ்ஸபச்சயா…பே॰… ஸுக²ங் வா’’திஆதி³னா சக்கு²விஞ்ஞாணவீதி²சித்தேஸு ஸோமனஸ்ஸதோ³மனஸ்ஸஉபெக்கா²வேத³னாமுகே²ன ஸேஸாரூபக்க²ந்தா⁴னம்பி ஆதி³த்ததங் த³ஸ்ஸேதி. ஏஸ நயோ ஸேஸேஸுபி. மனோதி ப⁴வங்க³சித்தங் மனொத்³வாரஸ்ஸ அதி⁴ப்பேதத்தா. மனோவிஞ்ஞாணந்தி மனொத்³வாரவீதி²பஅயாபன்னமேவ க³ஹிதங்.
‘‘Yamidaṃ cakkhusamphassapaccayā…pe… sukhaṃ vā’’tiādinā cakkhuviññāṇavīthicittesu somanassadomanassaupekkhāvedanāmukhena sesārūpakkhandhānampi ādittataṃ dasseti. Esa nayo sesesupi. Manoti bhavaṅgacittaṃ manodvārassa adhippetattā. Manoviññāṇanti manodvāravīthipaayāpannameva gahitaṃ.
உருவேலபாடிஹாரியகதா²வண்ணனா நிட்டி²தா.
Uruvelapāṭihāriyakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 12. உருவேலபாடிஹாரியகதா² • 12. Uruvelapāṭihāriyakathā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / உருவேலபாடிஹாரியகதா² • Uruvelapāṭihāriyakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā
உருவேலபாடிஹாரியகதா²வண்ணனா • Uruvelapāṭihāriyakathāvaṇṇanā
ஆதி³த்தபரியாயஸுத்தவண்ணனா • Ādittapariyāyasuttavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / உருவேலபாடிஹாரியகதா²வண்ணனா • Uruvelapāṭihāriyakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 12. உருவேலபாடிஹாரியகதா² • 12. Uruvelapāṭihāriyakathā
