| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
উরুৰেলপাটিহারিযকথাৰণ্ণনা
Uruvelapāṭihāriyakathāvaṇṇanā
৩৭-৩৮. পাল়িযং অগরূতি ভারিযং ন সিযাতি অত্থো। উভিন্নং সজোতিভূতানন্তি উভোসু সজোতিভূতেসু। পত্তে পক্খিপীতি তং নাগং নিহততেজং ধম্মদেসনায সন্তপ্পেত্ৰা সরণসীলানি দত্ৰা সকলরত্তিং ভগৰন্তং পযিরুপাসিত্ৰা ঠিতং জটিলানং দস্সনত্থং পত্তে পক্খিপি, ন অহিতুণ্ডিকো ৰিয বলক্কারেনাতি ৰেদিতব্বং। যত্র হি নামাতি যো নাম।
37-38. Pāḷiyaṃ agarūti bhāriyaṃ na siyāti attho. Ubhinnaṃ sajotibhūtānanti ubhosu sajotibhūtesu. Patte pakkhipīti taṃ nāgaṃ nihatatejaṃ dhammadesanāya santappetvā saraṇasīlāni datvā sakalarattiṃ bhagavantaṃ payirupāsitvā ṭhitaṃ jaṭilānaṃ dassanatthaṃ patte pakkhipi, na ahituṇḍiko viya balakkārenāti veditabbaṃ. Yatra hi nāmāti yo nāma.
৩৯. অজ্জণ্হোতি অজ্জ একদিৰসং। অগ্গিসালম্হীতি অগ্যাগারে। সুমনানং বুদ্ধানং মনসা সদিসো মনো অস্সাতি সুমনমনসো। অধিচিত্তোতি মহাকরুণাদীহি অধিচিত্তো। উদিচ্ছরেতি উল্লোকেসুং, পরিৰারেসুন্তি অত্থো। অনেকৰণ্ণা অচ্চিযোতি ছব্বণ্ণরংসিযো ৰুত্তা। অহং তে ধুৰভত্তেন পটিমাননং করিস্সামীতি সেসো।
39.Ajjaṇhoti ajja ekadivasaṃ. Aggisālamhīti agyāgāre. Sumanānaṃ buddhānaṃ manasā sadiso mano assāti sumanamanaso. Adhicittoti mahākaruṇādīhi adhicitto. Udicchareti ullokesuṃ, parivāresunti attho. Anekavaṇṇā acciyoti chabbaṇṇaraṃsiyo vuttā. Ahaṃ te dhuvabhattena paṭimānanaṃ karissāmīti seso.
৪০. অভিক্কন্তায রত্তিযাতি পরিক্খীণায রত্তিযা, মজ্ঝরত্তিসমযেতি অত্থো। অভিক্কন্তৰণ্ণাতি অভিরূপচ্ছৰিৰণ্ণা। কেৰলকপ্পন্তি এত্থ কেৰল-সদ্দস্স অনৰসেসত্থো, কপ্প-সদ্দস্স সমন্তভাৰো, তস্মা অনৰসেসং সমন্ততো ৰনসণ্ডন্তি অত্থো। চতুদ্দিসাতি চতূসু দিসাসু। যত্র হি নামাতি যং নাম।
40.Abhikkantāyarattiyāti parikkhīṇāya rattiyā, majjharattisamayeti attho. Abhikkantavaṇṇāti abhirūpacchavivaṇṇā. Kevalakappanti ettha kevala-saddassa anavasesattho, kappa-saddassa samantabhāvo, tasmā anavasesaṃ samantato vanasaṇḍanti attho. Catuddisāti catūsu disāsu. Yatra hi nāmāti yaṃ nāma.
৪৩. অঙ্গমগধাতি অঙ্গমগধরট্ঠৰাসিনো। ইদ্ধিপাটিহারিযন্তি অভিঞ্ঞিদ্ধিযেৰ পটিপক্খানং তিত্থিযানং, ৰেনেয্যসত্তগতদোসানঞ্চ হরণতো অপনযনতো পাটিহারিযং, তং তং ৰা সত্তহিতং পটিচ্চ হরিতব্বং পৰত্তেতব্বন্তি পটিহারিযং, তদেৰ পাটিহারিযং। ইদ্ধি এৰ পাটিহারিযং ইদ্ধিপাটিহারিযং।
43.Aṅgamagadhāti aṅgamagadharaṭṭhavāsino. Iddhipāṭihāriyanti abhiññiddhiyeva paṭipakkhānaṃ titthiyānaṃ, veneyyasattagatadosānañca haraṇato apanayanato pāṭihāriyaṃ, taṃ taṃ vā sattahitaṃ paṭicca haritabbaṃ pavattetabbanti paṭihāriyaṃ, tadeva pāṭihāriyaṃ. Iddhi eva pāṭihāriyaṃ iddhipāṭihāriyaṃ.
৪৪. পংসুকূলং উপ্পন্নং হোতীতি পুণ্ণায দাসিযা সরীরং পরিক্খিপিত্ৰা ছড্ডিতং সাণমযং কিমিকুলাকুলং পরিযেসনৰসেন উপ্পন্নং হোতি, যং ভগৰা ভূমিং কম্পেন্তো পারুপিত্ৰা পচ্ছা মহাকস্সপত্থেরস্স অদাসি, তং সন্ধাযেতং ৰুত্তন্তি ৰদন্তি। কত্থ নু খোতিআদিপরিৰিতক্কো জটিলানং ৰিৰিধপাটিহারিযদস্সনত্থং কতো। পাণিনা খণন্তো ৰিয ইদ্ধিযা মত্তিকং অপনেত্ৰা দিন্নত্তা ৰুত্তং ‘‘পাণিনা পোক্খরণিং খণিত্ৰা’’তি।
44.Paṃsukūlaṃ uppannaṃ hotīti puṇṇāya dāsiyā sarīraṃ parikkhipitvā chaḍḍitaṃ sāṇamayaṃ kimikulākulaṃ pariyesanavasena uppannaṃ hoti, yaṃ bhagavā bhūmiṃ kampento pārupitvā pacchā mahākassapattherassa adāsi, taṃ sandhāyetaṃ vuttanti vadanti. Kattha nu khotiādiparivitakko jaṭilānaṃ vividhapāṭihāriyadassanatthaṃ kato. Pāṇinā khaṇanto viya iddhiyā mattikaṃ apanetvā dinnattā vuttaṃ ‘‘pāṇinā pokkharaṇiṃ khaṇitvā’’ti.
৪৬. ফালিযন্তু, কস্সপ, কট্ঠানীতি উরুৰেলকস্সপেন নিৰেদিতে এৰমৰোচাতি দট্ঠব্বং। এৰং সেসেসুপি।
46.Phāliyantu, kassapa, kaṭṭhānīti uruvelakassapena nivedite evamavocāti daṭṭhabbaṃ. Evaṃ sesesupi.
৪৯. অন্তরট্ঠকাসু হিমপাতসমযেতি এত্থ মাঘমাসস্স অৰসানে চতস্সো, ফগ্গুণমাসস্স আদিম্হি চতস্সোতি এৰং উভিন্নং মাসানং অন্তরে অট্ঠরত্তিযো অন্তরট্ঠকা নাম। তাসু অন্তরট্ঠকাসু রত্তীসু হিমপাতকালে। উম্মুজ্জননিমুজ্জনম্পি সহসা তদুভযকরণৰসেন ৰুত্তং।
49.Antaraṭṭhakāsuhimapātasamayeti ettha māghamāsassa avasāne catasso, phagguṇamāsassa ādimhi catassoti evaṃ ubhinnaṃ māsānaṃ antare aṭṭharattiyo antaraṭṭhakā nāma. Tāsu antaraṭṭhakāsu rattīsu himapātakāle. Ummujjananimujjanampi sahasā tadubhayakaraṇavasena vuttaṃ.
৫০. উদকৰাহকোতি উদকোঘো। রেণুহতাযাতি রজোকিণ্ণায, অতিন্তাযাতি অত্থো। নাৰাযাতি কুল্লেন। ইদং নু ত্ৰং মহাসমণাতি ইধ নু ত্ৰং। ধ-কারস্স দ-কারং, অনুসারঞ্চ কত্ৰা ‘‘ইদং নূ’’তি ৰুত্তং ‘‘একমিদাহ’’ন্তিআদীসু (দী॰ নি॰ ১.১৬৫, ২৬৫) ৰিয। ‘‘ইমস্মিং পদেসে ত্ৰং নু খো ঠিতোসী’’তি পুচ্ছি। অযমহমস্মীতি অযমহং ইধ ঠিতোস্মীতি অত্থো।
50.Udakavāhakoti udakogho. Reṇuhatāyāti rajokiṇṇāya, atintāyāti attho. Nāvāyāti kullena. Idaṃ nu tvaṃ mahāsamaṇāti idha nu tvaṃ. Dha-kārassa da-kāraṃ, anusārañca katvā ‘‘idaṃ nū’’ti vuttaṃ ‘‘ekamidāha’’ntiādīsu (dī. ni. 1.165, 265) viya. ‘‘Imasmiṃ padese tvaṃ nu kho ṭhitosī’’ti pucchi. Ayamahamasmīti ayamahaṃ idha ṭhitosmīti attho.
৫১. চিরপটিকাতি চিরকালতো পট্ঠায। কেসমিস্সং সব্বং পরিক্খারং উদকে পৰাহেত্ৰাতিপি যোজেতব্বং। অরণিকমণ্ডলুআদিকা তাপসপরিক্খারা খারী নাম, তংহরণককাজং খারিকাজং নাম। অগ্গিহুতমিস্সন্তি অগ্গিপূজোপকরণসহিতং।
51.Cirapaṭikāti cirakālato paṭṭhāya. Kesamissaṃ sabbaṃ parikkhāraṃ udake pavāhetvātipi yojetabbaṃ. Araṇikamaṇḍaluādikā tāpasaparikkhārā khārī nāma, taṃharaṇakakājaṃ khārikājaṃ nāma. Aggihutamissanti aggipūjopakaraṇasahitaṃ.
৫২-৩. উপসগ্গোতি উপদ্দৰো। ‘‘অড্ঢুড্ঢানি পাটিহারিযসহস্সানী’’তি ইদং নাগদমনাদীনি পন্নরস পাটিহারিযানি ৰজ্জেত্ৰা ৰুত্তং অপ্পকমধিকং গণনূপগং ন হোতীতি।
52-3.Upasaggoti upaddavo. ‘‘Aḍḍhuḍḍhāni pāṭihāriyasahassānī’’ti idaṃ nāgadamanādīni pannarasa pāṭihāriyāni vajjetvā vuttaṃ appakamadhikaṃ gaṇanūpagaṃ na hotīti.
৫৪. গযাযন্তি গযানামিকায নদিযা অদূরভৰত্তা গামো ইত্থিলিঙ্গৰসেন গযা নাম জাতো, তস্সং। গযাসীসেতি এৰংনামকে পিট্ঠিপাসাণে।
54.Gayāyanti gayānāmikāya nadiyā adūrabhavattā gāmo itthiliṅgavasena gayā nāma jāto, tassaṃ. Gayāsīseti evaṃnāmake piṭṭhipāsāṇe.
‘‘যমিদং চক্খুসম্ফস্সপচ্চযা…পে॰… সুখং ৰা’’তিআদিনা চক্খুৰিঞ্ঞাণৰীথিচিত্তেসু সোমনস্সদোমনস্সউপেক্খাৰেদনামুখেন সেসারূপক্খন্ধানম্পি আদিত্ততং দস্সেতি। এস নযো সেসেসুপি। মনোতি ভৰঙ্গচিত্তং মনোদ্ৰারস্স অধিপ্পেতত্তা। মনোৰিঞ্ঞাণন্তি মনোদ্ৰারৰীথিপঅযাপন্নমেৰ গহিতং।
‘‘Yamidaṃ cakkhusamphassapaccayā…pe… sukhaṃ vā’’tiādinā cakkhuviññāṇavīthicittesu somanassadomanassaupekkhāvedanāmukhena sesārūpakkhandhānampi ādittataṃ dasseti. Esa nayo sesesupi. Manoti bhavaṅgacittaṃ manodvārassa adhippetattā. Manoviññāṇanti manodvāravīthipaayāpannameva gahitaṃ.
উরুৰেলপাটিহারিযকথাৰণ্ণনা নিট্ঠিতা।
Uruvelapāṭihāriyakathāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ১২. উরুৰেলপাটিহারিযকথা • 12. Uruvelapāṭihāriyakathā
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / উরুৰেলপাটিহারিযকথা • Uruvelapāṭihāriyakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā
উরুৰেলপাটিহারিযকথাৰণ্ণনা • Uruvelapāṭihāriyakathāvaṇṇanā
আদিত্তপরিযাযসুত্তৰণ্ণনা • Ādittapariyāyasuttavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / উরুৰেলপাটিহারিযকথাৰণ্ণনা • Uruvelapāṭihāriyakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১২. উরুৰেলপাটিহারিযকথা • 12. Uruvelapāṭihāriyakathā
