| Library / Tipiṭaka / ཏིཔིཊཀ • Tipiṭaka / ཝཛིརབུདྡྷི-ཊཱིཀཱ • Vajirabuddhi-ṭīkā |
ཨུརུཝེལཔཱཊིཧཱརིཡཀཐཱཝཎྞནཱ
Uruvelapāṭihāriyakathāvaṇṇanā
༣༧-༨. ཝསེཡྻཱམཱཏི ‘‘ཏྭཉྩ ཨཧཉྩ ཝསེཡྻཱམཱ’’ཏི པིཡཝཙནེན ཏསྶ སངྒཎྷནཏྠཾ ཝུཏྟཾ ཀིར། ཏེཛསཱ ཏེཛནྟི ཨཱནུབྷཱཝེན ཨཱནུབྷཱཝཾ། ཏེཛོདྷཱཏུཡཱ ཝཱ ཏེཛོདྷཱཏུཾ། ཨུབྷིནྣཾ སཛོཏིབྷཱུཏཱནནྟི ཨནཱདརཏྠེ སཱམིཝཙནཾ, བྷཱཝསཏྟམཱིཨཏྠེ ཝཱ། ཨགྱཱགཱརམེཝ ཨཱདིཏྟཾ, ན ཏཏྠ ཝསནཀོ སཏྟཛཱཏིཀོ། ཨཙིནྟེཡྻོ ཧི ཨིདྡྷིཝིསཡོ། ཀསྨཱ པན བྷགཝཱ ཨགྱཱགཱརམྤི ཨནཱདིཏྟཾ ནཱདྷིཊྛཱསཱིཏི? ཨཏྟནོ དུཀྑུཔྤཱདཱབྷཱཝསྶ ཨནཏིཝིམྷཱདིབྷཱཝཔྤསངྒཏོ། ཀིམཏྠཾ པརསནྟཀཾ མཧཱསམྦྷཱརཔཝཏྟཾ ཏཾ ཝིནཱསེཏཱིཏི? པུན ཡཐཱཔོརཱཎཾ ཨིདྡྷཱནུབྷཱཝེན ཀཏྟུཀཱམཏཱདྷིཔྤཱཡཏོ། པརིཡཱདིནྣོཏི ཁཡཾ ནཱིཏོ། ཏེཛསཱ ཏེཛནྟི ཨཱནུབྷཱཝེན ཨཱནུབྷཱཝཾ། ཨགྱཱགཱརསྶ པརིཏྟཏྟཱ ཨིཏརོ ཨཏྠོ ན སམྦྷཝཏི། ཨཡམཏྠོ ‘‘མཀྑཾ ཨསཧམཱནོ’’ཏི ཨིམིནཱ ཨཏིཝིཡ སམེཏི། ཨིདྡྷཱནུབྷཱཝམཀྑནཉྷི ཏཏྠ མཀྑོ ནཱམ། པཏྟེནཱཏི པདུམཔཏྟེནཱཏིཔི པོརཱཎཱ། པདུམིནིསཎྜེ ཋིཏོ ཧི བྷགཝཱ ཏཏྠ ཨཧོསཱིཏི ཏེསཾ མཏི།
37-8.Vaseyyāmāti ‘‘tvañca ahañca vaseyyāmā’’ti piyavacanena tassa saṅgaṇhanatthaṃ vuttaṃ kira. Tejasā tejanti ānubhāvena ānubhāvaṃ. Tejodhātuyā vā tejodhātuṃ. Ubhinnaṃ sajotibhūtānanti anādaratthe sāmivacanaṃ, bhāvasattamīatthe vā. Agyāgārameva ādittaṃ, na tattha vasanako sattajātiko. Acinteyyo hi iddhivisayo. Kasmā pana bhagavā agyāgārampi anādittaṃ nādhiṭṭhāsīti? Attano dukkhuppādābhāvassa anativimhādibhāvappasaṅgato. Kimatthaṃ parasantakaṃ mahāsambhārapavattaṃ taṃ vināsetīti? Puna yathāporāṇaṃ iddhānubhāvena kattukāmatādhippāyato. Pariyādinnoti khayaṃ nīto. Tejasā tejanti ānubhāvena ānubhāvaṃ. Agyāgārassa parittattā itaro attho na sambhavati. Ayamattho ‘‘makkhaṃ asahamāno’’ti iminā ativiya sameti. Iddhānubhāvamakkhanañhi tattha makkho nāma. Pattenāti padumapattenātipi porāṇā. Paduminisaṇḍe ṭhito hi bhagavā tattha ahosīti tesaṃ mati.
༣༩. དིནྣནྟི ཨནུམཏིནྟི ཨཏྠོ། ཨབྷཱིཏོ ནིབྦྷཡོ། ཀསྨཱ? ཡཏོ སོ མགྒེན བྷཡམཏཱིཏོ། ‘‘སུམནམནསོཏི སུནྡརཙིཏྟསངྑཱཏམནོ། སུམནོ ཨེཝ ཝཱ’’ཏི ལིཁིཏཾ། ཏེཛོཝཱཏི ཨགྒི ཝིཡ། དྷཱཏུཀུསལོཏི ཏེཛོདྷཱཏུམྷི ཀུསལོ། ‘‘བྱཝཧིཏཱ ཙེ’’ཏི སདྡལཀྑཎཏྟཱ ཙ ཨུཔསགྒོ། ཏེཛོདྷཱཏུསམཱཔཏྟཱིསུ ཀུསལོ ཨིཙྩེཝཏྠོ། ཨུདིཙྪརེཏི ཨུལློཀེསུཾ། ‘‘སཾཔརིཝཱརེསུ’’ནྟི ཙ ལིཁིཏཾ། ཨིཏི ཨེཝཾ བྷཎནྟཱིཏི ཨཏྠོ། ཧཏཱཏི སམཱཏི ཨཏྠོ, ཀཱལ༹ཀཱཝ ཧོནྟཱིཏི ཀིརེཏྠ ཨདྷིཔྤཱཡོ། ཨཱིསཀམྤི བྱཱཔཱརཾ ཨཀཏྭཱ ཨུཔསམཱནུརཱུཔཾ ཏིཊྛནྟི། ཡེ ཙ ཨནེཀཝཎྞཱ ཨཙྩིཡོ ཧོནྟཱིཏི ཏཾ དསྶེཏུཾ ‘‘ནཱིལཱ ཨཐ ལོཧིཏིཀཱ’’ཏིཨཱདིམཱཧ།
39.Dinnanti anumatinti attho. Abhīto nibbhayo. Kasmā? Yato so maggena bhayamatīto. ‘‘Sumanamanasoti sundaracittasaṅkhātamano. Sumano eva vā’’ti likhitaṃ. Tejovāti aggi viya. Dhātukusaloti tejodhātumhi kusalo. ‘‘Byavahitā ce’’ti saddalakkhaṇattā ca upasaggo. Tejodhātusamāpattīsu kusalo iccevattho. Udicchareti ullokesuṃ. ‘‘Saṃparivāresu’’nti ca likhitaṃ. Iti evaṃ bhaṇantīti attho. Hatāti samāti attho, kāḷakāva hontīti kirettha adhippāyo. Īsakampi byāpāraṃ akatvā upasamānurūpaṃ tiṭṭhanti. Ye ca anekavaṇṇā acciyo hontīti taṃ dassetuṃ ‘‘nīlā atha lohitikā’’tiādimāha.
༤༠. ཙཏུདྡིསཱཏི ཙཏཱུསུ དིསཱསུ།
40.Catuddisāti catūsu disāsu.
༤༤. པཾསུཀཱུལཾ ཨུཔྤནྣནྟི པརིཡེསམཱནསྶ པཊིལཱབྷཝསེན ཨུཔྤནྣཾ ཧོཏི། ཙིཏྟཝིཙིཏྟཔཱཊིཧཱིརདསྶནཏྠཱཡ ཙ སཱ པརིཡེསནཱ། སཱ ཨཡཾ སཱཡཾ ། ཏཱ ཨིམཱ ཏཡིམཱ། དྭེ ཨེཀཏོ གཧེཏྭཱ ཝདཏི། ཨཱཡཱམི ཨཧཾ ཨཱཡམཧཾ། ཨེཏནྟི ཨེཏསྶ། ཡཐཱ མཡནྟི ཡསྨཱ མཡཾ།
44.Paṃsukūlaṃ uppannanti pariyesamānassa paṭilābhavasena uppannaṃ hoti. Cittavicittapāṭihīradassanatthāya ca sā pariyesanā. Sā ayaṃ sāyaṃ. Tā imā tayimā. Dve ekato gahetvā vadati. Āyāmi ahaṃ āyamahaṃ. Etanti etassa. Yathā mayanti yasmā mayaṃ.
༥༠-༥༡. ཨུདཀཝཱཧཀོཏི ཨུདཀོགྷོ། ཨུདཀསོཏོཏི པོརཱཎཱ། ‘‘ཡཱཡ ཏྭ’’ནྟི པུབྦབྷཱགཝིཔསྶནཱཔཊིཔདཾ སནྡྷཱཡ ཝུཏྟཾ། ཙིརཔཊིཀཱཏི ཙིརཔབྷུཏི, ནཱགདམནཏོ པཊྛཱཡ ཙིརཔཊིཀཱ། ‘‘ཙིརཔཊིསངྑཱ’’ཏིཔི ཝདནྟི། ཀེསམིསྶནྟིཨཱདིམྷི ཨབྦོཀིཎྞཾ ཝིསུཾ ཝིསུཾ བནྡྷིཏྭཱ པཀྑིཏྟཏྟཱ ཀེསཱདཡོཝ ཀེསམིསྶཱཏི པོརཱཎཱ། ཁཱརིཀཱཛམིསྶནྟི ཨེཏྠ ཁཱརཱི ཝུཙྩཏི ཏཱཔསཔརིཀྑཱརོ། ཛཊིལེ པཱཧེསཱིཏི དྭེ ཏཡོ ཏཱཔསེ པཱཧེསི། ‘‘སོལ༹སཱཏིརེཀཨཌྜྷཨུཌྜྷཱནི པཱཊིཧཱརིཡསཧསྶཱནཱི’’ཏི ཝུཏྟཾ།
50-51.Udakavāhakoti udakogho. Udakasototi porāṇā. ‘‘Yāya tva’’nti pubbabhāgavipassanāpaṭipadaṃ sandhāya vuttaṃ. Cirapaṭikāti cirapabhuti, nāgadamanato paṭṭhāya cirapaṭikā. ‘‘Cirapaṭisaṅkhā’’tipi vadanti. Kesamissantiādimhi abbokiṇṇaṃ visuṃ visuṃ bandhitvā pakkhittattā kesādayova kesamissāti porāṇā. Khārikājamissanti ettha khārī vuccati tāpasaparikkhāro. Jaṭile pāhesīti dve tayo tāpase pāhesi. ‘‘Soḷasātirekaaḍḍhauḍḍhāni pāṭihāriyasahassānī’’ti vuttaṃ.
༥༤. ཨགྒིཧུཏྟེ ཀཏཔརིཙཡཏྟཱ བྷགཝཱ ཏེསཾ ཨཱདིཏྟཔརིཡཱཡ-མབྷཱསི (སཾ॰ ནི॰ ༤.༢༨)། ཏཏྠ ཨེཀཙྩཾ ཨཱརམྨཎཝསེན ཨཱདིཏྟཾ ཙཀྑཱདི རཱགགྒིནཱ, ཨེཀཙྩཾ སམྤཡོགཝསེན ཙཀྑུསམྥསྶཔཙྩཡཱ ཝེདཡིཏཱདིཀེནེཝ, ཨེཀཙྩཾ ཨབྷིབྷཱུཏཏྠེན ཙཀྑཱདི ཨེཝ ཛཱཏིཨཱདིནཱ , ཨེཀཙྩཾ པཙྩཡཏྠེན, ཏདེཝ སོཀཱདིནཱཏི ཡཐཱསམྦྷཝམེཏྠ ཨཱདིཏྟཏཱ ཝེདིཏབྦཱ། ཨེཏྠ ཀིཉྩཱཔི དུཀྑལཀྑཎམེཝེཀཾ པཱཀཊཾ, ཏདནུསཱརེན པན ཨིཏརཾ ལཀྑཎདྭཡམྤི ཏེཧི དིཊྛནྟི ཝེདིཏབྦཾ དུཀྑཱཀཱརསྶ ཨིཏརཱཀཱརདཱིཔནཏོ། སནྟསུཁཏཎྷཱབྷིནིཝིཊྛཏྟཱ པནེསཾ དུཀྑལཀྑཎཔུབྦངྒམཱ དེསནཱ ཀཏཱཏི ཝེདིཏབྦཱ།
54. Aggihutte kataparicayattā bhagavā tesaṃ ādittapariyāya-mabhāsi (saṃ. ni. 4.28). Tattha ekaccaṃ ārammaṇavasena ādittaṃ cakkhādi rāgagginā, ekaccaṃ sampayogavasena cakkhusamphassapaccayā vedayitādikeneva, ekaccaṃ abhibhūtatthena cakkhādi eva jātiādinā , ekaccaṃ paccayatthena, tadeva sokādināti yathāsambhavamettha ādittatā veditabbā. Ettha kiñcāpi dukkhalakkhaṇamevekaṃ pākaṭaṃ, tadanusārena pana itaraṃ lakkhaṇadvayampi tehi diṭṭhanti veditabbaṃ dukkhākārassa itarākāradīpanato. Santasukhataṇhābhiniviṭṭhattā panesaṃ dukkhalakkhaṇapubbaṅgamā desanā katāti veditabbā.
ཨུརུཝེལཔཱཊིཧཱརིཡཀཐཱཝཎྞནཱ ནིཊྛིཏཱ།
Uruvelapāṭihāriyakathāvaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / མཧཱཝགྒཔཱལི༹ • Mahāvaggapāḷi / ༡༢. ཨུརུཝེལཔཱཊིཧཱརིཡཀཐཱ • 12. Uruvelapāṭihāriyakathā
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝགྒ-ཨཊྛཀཐཱ • Mahāvagga-aṭṭhakathā / ཨུརུཝེལཔཱཊིཧཱརིཡཀཐཱ • Uruvelapāṭihāriyakathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā
ཨུརུཝེལཔཱཊིཧཱརིཡཀཐཱཝཎྞནཱ • Uruvelapāṭihāriyakathāvaṇṇanā
ཨཱདིཏྟཔརིཡཱཡསུཏྟཝཎྞནཱ • Ādittapariyāyasuttavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ཨུརུཝེལཔཱཊིཧཱརིཡཀཐཱཝཎྞནཱ • Uruvelapāṭihāriyakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༡༢. ཨུརུཝེལཔཱཊིཧཱརིཡཀཐཱ • 12. Uruvelapāṭihāriyakathā
