| Library / Tipiṭaka / д̇ибидага • Tipiṭaka / т̇зраг̇аат̇аа-адтагат̇аа • Theragāthā-aṭṭhakathā |
9. усабхад̇т̇зраг̇аат̇ааван̣н̣анаа
9. Usabhattheragāthāvaṇṇanā
амб̣абаллавасан̇гаасанд̇и ааяасмад̇о усабхад̇т̇зрасса г̇аат̇аа. гаа уббад̇д̇и? аяамби буримаб̣уд̣̇д̇хзсу гад̇аад̇хигааро д̇ад̇т̇а д̇ад̇т̇а бхавз бун̃н̃аани гаронд̇о сикисса бхаг̇авад̇о гаалз гулаг̇зхз ниб̣б̣ад̇д̇ид̇ваа вин̃н̃уд̇ам̣ бад̇д̇о згад̣̇ивасам̣ сад̇т̇аарам̣ бин̣д̣ааяа жаранд̇ам̣ д̣̇исваа басаннамаанасо госамб̣апалам̣ ад̣̇ааси. со д̇зна бун̃н̃агаммзна д̣̇звамануссзсу сам̣саранд̇о имасмим̣ б̣уд̣̇д̇хуббаад̣̇з габилавад̇т̇усмим̣ саагияарааж̇агулз ниб̣б̣ад̇д̇ид̇ваа усабход̇и лад̣̇д̇ханаамо ваяаббад̇д̇о сад̇т̇у н̃аад̇исамааг̇амз б̣уд̣̇д̇хаанубхаавам̣ д̣̇исваа бадилад̣̇д̇хасад̣̇д̇хо баб̣б̣аж̇и. со баб̣б̣аж̇ид̇агаалад̇о бадтааяа саман̣ад̇хаммам̣ агад̇ваа д̣̇иваа сан̇г̇ан̣игаараамо сагаларад̇д̇им̣ нид̣̇д̣̇ааяамаано вийд̇инаамзд̇и. со згад̣̇ивасам̣ мудтассад̇и асамбаж̇аано нид̣̇д̣̇ам̣ огганд̇о субинз гзсамассум̣ охаарзд̇ваа амб̣абаллававан̣н̣ам̣ жийварам̣ баарубид̇ваа хад̇т̇иг̇ийвааяам̣ нисийд̣̇ид̇ваа наг̇арам̣ бин̣д̣ааяа бавидтам̣ д̇ад̇т̇зва мануссз самбад̇д̇з д̣̇исваа лаж̇ж̇ааяа хад̇т̇игканд̇хад̇о оруяха ад̇д̇аанам̣ д̣̇исваа бадиб̣уд̣̇д̇хо, ‘‘ийд̣̇исам̣ наама субинам̣ мудтассад̇инаа асамбаж̇аанзна нид̣̇д̣̇ааяамаанзна маяаа д̣̇идта’’нд̇и уббаннасам̣взг̇о вибассанам̣ бадтабзд̇ваа нажирассзва арахад̇д̇ам̣ баабун̣и. д̇зна вуд̇д̇ам̣ абад̣̇аанз (аба. т̇зра 2.52.12-16) –
Ambapallavasaṅkāsanti āyasmato usabhattherassa gāthā. Kā uppatti? Ayampi purimabuddhesu katādhikāro tattha tattha bhave puññāni karonto sikhissa bhagavato kāle kulagehe nibbattitvā viññutaṃ patto ekadivasaṃ satthāraṃ piṇḍāya carantaṃ disvā pasannamānaso kosambaphalaṃ adāsi. So tena puññakammena devamanussesu saṃsaranto imasmiṃ buddhuppāde kapilavatthusmiṃ sākiyarājakule nibbattitvā usabhoti laddhanāmo vayappatto satthu ñātisamāgame buddhānubhāvaṃ disvā paṭiladdhasaddho pabbaji. So pabbajitakālato paṭṭhāya samaṇadhammaṃ akatvā divā saṅgaṇikārāmo sakalarattiṃ niddāyamāno vītināmeti. So ekadivasaṃ muṭṭhassati asampajāno niddaṃ okkanto supine kesamassuṃ ohāretvā ambapallavavaṇṇaṃ cīvaraṃ pārupitvā hatthigīvāyaṃ nisīditvā nagaraṃ piṇḍāya paviṭṭhaṃ tattheva manusse sampatte disvā lajjāya hatthikkhandhato oruyha attānaṃ disvā paṭibuddho, ‘‘īdisaṃ nāma supinaṃ muṭṭhassatinā asampajānena niddāyamānena mayā diṭṭha’’nti uppannasaṃvego vipassanaṃ paṭṭhapetvā nacirasseva arahattaṃ pāpuṇi. Tena vuttaṃ apadāne (apa. thera 2.52.12-16) –
‘‘гагуд̇хам̣ виласанд̇ам̣ва, д̣̇звад̣̇звам̣ нараасабхам̣;
‘‘Kakudhaṃ vilasantaṃva, devadevaṃ narāsabhaṃ;
рат̇ияам̣ бадибаж̇ж̇анд̇ам̣, госамб̣ам̣ ад̣̇ад̣̇им̣ д̇ад̣̇аа.
Rathiyaṃ paṭipajjantaṃ, kosambaṃ adadiṃ tadā.
‘‘згад̇им̣сз ид̇о габбз, яам̣ палам̣ ад̣̇ад̣̇им̣ д̇ад̣̇аа;
‘‘Ekatiṃse ito kappe, yaṃ phalaṃ adadiṃ tadā;
д̣̇уг̇г̇ад̇им̣ наабхиж̇аанаами, палад̣̇аанассид̣̇ам̣ палам̣.
Duggatiṃ nābhijānāmi, phaladānassidaṃ phalaṃ.
‘‘гилзсаа жхаабид̇аа маяхам̣…бз… гад̇ам̣ б̣уд̣̇д̇хасса саасана’’нд̇и.
‘‘Kilesā jhāpitā mayhaṃ…pe… kataṃ buddhassa sāsana’’nti.
ат̇а т̇зро яат̇аад̣̇идтам̣ субинам̣ ан̇гусам̣ гад̇ваа арахад̇д̇асса ад̇хиг̇ад̇ад̇д̇аа д̇ассзва субинасса гид̇д̇анавасзна ан̃н̃ам̣ б̣яаагаронд̇о –
Atha thero yathādiṭṭhaṃ supinaṃ aṅkusaṃ katvā arahattassa adhigatattā tasseva supinassa kittanavasena aññaṃ byākaronto –
197.
197.
‘‘амб̣абаллавасан̇гаасам̣, ам̣сз гад̇ваана жийварам̣;
‘‘Ambapallavasaṅkāsaṃ, aṃse katvāna cīvaraṃ;
нисинно хад̇т̇иг̇ийвааяам̣, г̇аамам̣ бин̣д̣ааяа баависим̣.
Nisinno hatthigīvāyaṃ, gāmaṃ piṇḍāya pāvisiṃ.
198.
198.
‘‘хад̇т̇игканд̇хад̇о оруяха, сам̣взг̇ам̣ алабхим̣ д̇ад̣̇аа;
‘‘Hatthikkhandhato oruyha, saṃvegaṃ alabhiṃ tadā;
сохам̣ д̣̇ид̇д̇о д̇ад̣̇аа санд̇о, бад̇д̇о мз аасавагкаяо’’д̇и. – г̇аат̇аад̣̇ваяамааха;
Sohaṃ ditto tadā santo, patto me āsavakkhayo’’ti. – gāthādvayamāha;
д̇ад̇т̇а амб̣абаллавасан̇гаасам̣, ам̣сз гад̇ваана жийваранд̇и амб̣абаллаваагаарам̣ баваал̣аван̣н̣ам̣ жийварам̣ канд̇хз гарид̇ваа уд̇д̇араасан̇г̇ам̣ гарид̇ваа. г̇ааманд̇и ад̇д̇ано рааж̇ад̇хааним̣ хад̇т̇игканд̇хз нисинно бин̣д̣ааяа баависим̣, бавидтамад̇д̇ова махааж̇анзна ологияамаано хад̇т̇игканд̇хад̇о оруяха тид̇о бадиб̣уж̇жхим̣, баб̣уд̣̇д̇хова сам̣взг̇ам̣ алабхим̣ д̇ад̣̇аа ‘‘мудтассад̇и асамбаж̇аано худ̇ваа нид̣̇д̣̇ааяоггаманзна зд̇ам̣ ж̇аад̇а’’нд̇и. абарз бана ‘‘рааж̇аава худ̇ваа рад̇д̇ибхааг̇з зваруубам̣ субинам̣ д̣̇исваа вибхаад̇ааяа рад̇д̇ияаа хад̇т̇игканд̇хам̣ ааруяха наг̇аравийт̇ияам̣ жаранд̇о д̇ам̣ субинам̣ сарид̇ваа хад̇т̇игканд̇хад̇о оруяха сам̣взг̇ам̣ лабхид̇ваа сад̇т̇у санд̇игз баб̣б̣аж̇ид̇ваа арахад̇д̇ам̣ бад̇ваа уд̣̇аанам̣ уд̣̇аанзнд̇о имаа г̇аат̇аа абхаасий’’д̇и вад̣̇анд̇и. д̣̇ид̇д̇од̇и д̇асмим̣ рааж̇агаалз ж̇аад̇имад̣̇абхог̇амад̣̇аад̣̇ибарид̣̇аббид̇о самаано сам̣взг̇амалабхинд̇и яож̇анаа.
Tattha ambapallavasaṅkāsaṃ, aṃse katvāna cīvaranti ambapallavākāraṃ pavāḷavaṇṇaṃ cīvaraṃ khandhe karitvā uttarāsaṅgaṃ karitvā. Gāmanti attano rājadhāniṃ hatthikkhandhe nisinno piṇḍāya pāvisiṃ, paviṭṭhamattova mahājanena olokiyamāno hatthikkhandhato oruyha ṭhito paṭibujjhiṃ, pabuddhova saṃvegaṃ alabhiṃ tadā ‘‘muṭṭhassati asampajāno hutvā niddāyokkamanena etaṃ jāta’’nti. Apare pana ‘‘rājāva hutvā rattibhāge evarūpaṃ supinaṃ disvā vibhātāya rattiyā hatthikkhandhaṃ āruyha nagaravīthiyaṃ caranto taṃ supinaṃ saritvā hatthikkhandhato oruyha saṃvegaṃ labhitvā satthu santike pabbajitvā arahattaṃ patvā udānaṃ udānento imā gāthā abhāsī’’ti vadanti. Dittoti tasmiṃ rājakāle jātimadabhogamadādiparidappito samāno saṃvegamalabhinti yojanā.
усабхад̇т̇зраг̇аат̇ааван̣н̣анаа нидтид̇аа.
Usabhattheragāthāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / т̇зраг̇аат̇аабаал̣и • Theragāthāpāḷi / 9. усабхад̇т̇зраг̇аат̇аа • 9. Usabhattheragāthā
