| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
ஸங்கா⁴தி³ஸேஸகண்ட³ங்
Saṅghādisesakaṇḍaṃ
1. உஸ்ஸயவாதி³காஸிக்கா²பத³வண்ணனா
1. Ussayavādikāsikkhāpadavaṇṇanā
மானுஸ்ஸயவஸேன கோதூ⁴ஸ்ஸயவஸேனாதி பா³ஹுல்லனயேன வுத்தங். தேனேவ வக்க²தி ‘‘திசித்தங் திவேத³ன’’ந்தி. அட்³ட³கரணத்தா²யாதி எத்த² அட்³டோ³தி வோஹாரிகவினிச்ச²யோ வுச்சதி. யங் பப்³ப³ஜிதா ‘‘அதி⁴கரண’’ந்திபி வத³ந்தி, தஸ்ஸ கரணத்தா²ய வோஹாரிகவினிச்ச²யத்தா²யாதி வுத்தங் ஹோதி. வீதிக்கமக்க²ணேயேவாதி வத்து²ஜ்ஜா²சாரக்க²ணேயேவ, ந ததியாய ஸமனுபா⁴ஸனாயாதி அதி⁴ப்பாயோ. பி⁴க்கு²னிங் ஸங்க⁴தோ நிஸ்ஸாரேதீதி ஆபன்னங் பி⁴க்கு²னிங் பி⁴க்கு²னிஸங்க⁴ம்ஹா நிஸ்ஸாரேதி. ஹேதும்ஹி சாயங் கத்துவோஹாரோ ‘‘நிஸ்ஸாரணஹேதுபூ⁴தத⁴ம்மோ ‘நிஸ்ஸாரணீயோ’தி வுத்தோ’’தி கத்வா.
Mānussayavasenakodhūssayavasenāti bāhullanayena vuttaṃ. Teneva vakkhati ‘‘ticittaṃ tivedana’’nti. Aḍḍakaraṇatthāyāti ettha aḍḍoti vohārikavinicchayo vuccati. Yaṃ pabbajitā ‘‘adhikaraṇa’’ntipi vadanti, tassa karaṇatthāya vohārikavinicchayatthāyāti vuttaṃ hoti. Vītikkamakkhaṇeyevāti vatthujjhācārakkhaṇeyeva, na tatiyāya samanubhāsanāyāti adhippāyo. Bhikkhuniṃ saṅghato nissāretīti āpannaṃ bhikkhuniṃ bhikkhunisaṅghamhā nissāreti. Hetumhi cāyaṃ kattuvohāro ‘‘nissāraṇahetubhūtadhammo ‘nissāraṇīyo’ti vutto’’ti katvā.
யத்த² டி²தாயாதி உபஸ்ஸயபி⁴க்கா²சாரமக்³கா³தீ³ஸு யஸ்மிங் டா²னே டி²தாய. ததோ பட்டா²ய க³ச்ச²ந்தியாதி ததோ பட்டா²ய வோஹாரிகானங் ஸந்திகங் க³ச்ச²ந்தியா. து³தியேதி து³தியாரோசனே. தேனாதி உபாஸகேன. ஏவங் வுத்தாயாதி ‘‘மம ச தவ ச கத²ங் த்வங்யேவ ஆரோசேஹீ’’தி வுத்தாய. அஞ்ஞேன கதா²பேதீதி கப்பியகாரகேன கதா²பேதி. யதா² வா ததா² வா ஹி ஆரோசியமானேதி கப்பியகாரகோ வா பி⁴க்கு²னியா கத²ங் பட²மங் ஆரோசேது, இதரோ வா அத்தனோ கத²ங் (பாசி॰ அட்ட²॰ 679). கப்பியகாரகோ வா உபி⁴ன்னம்பி கத²ங், இதரோ வா உபி⁴ன்னம்பி கத²ங் ஆரோசேதூதி ஏவங் யதா² ததா² ஆரோசியமானே. உபி⁴ன்னம்பி பன கத²ங் ஸுத்வாதி யதா² ததா² வா ஆரோசிதங் பன உபி⁴ன்னம்பி கத²ங் ஸுத்வா.
Yattha ṭhitāyāti upassayabhikkhācāramaggādīsu yasmiṃ ṭhāne ṭhitāya. Tato paṭṭhāya gacchantiyāti tato paṭṭhāya vohārikānaṃ santikaṃ gacchantiyā. Dutiyeti dutiyārocane. Tenāti upāsakena. Evaṃ vuttāyāti ‘‘mama ca tava ca kathaṃ tvaṃyeva ārocehī’’ti vuttāya. Aññena kathāpetīti kappiyakārakena kathāpeti. Yathā vā tathā vā hi ārociyamāneti kappiyakārako vā bhikkhuniyā kathaṃ paṭhamaṃ ārocetu, itaro vā attano kathaṃ (pāci. aṭṭha. 679). Kappiyakārako vā ubhinnampi kathaṃ, itaro vā ubhinnampi kathaṃ ārocetūti evaṃ yathā tathā ārociyamāne. Ubhinnampi pana kathaṃ sutvāti yathā tathā vā ārocitaṃ pana ubhinnampi kathaṃ sutvā.
ஆகட்³டி⁴யமானா க³ச்ச²தீதி வுச்சமானா வோஹாரிகானங் ஸந்திகங் க³ச்ச²தி, இமஸ்ஸ ‘‘தஸ்ஸா அனாபத்தீ’’தி இமினா ஸம்ப³ந்தோ⁴. ஏவங் ஸேஸேஸுபி. ரக்க²ங் யாசதீதி த⁴ம்மிகங் ரக்க²ங் யாசதி. இதா³னி யதா² யாசிதா ரக்கா² த⁴ம்மிகா ஹோதி, தங் த³ஸ்ஸேதுங் ‘‘உபஸ்ஸயே அஞ்ஞேஹி கதங் அனாசாரங் அனோதி³ஸ்ஸ ஆசிக்க²ந்தீ’’தி வுத்தங். தத்த² அதீதங் ஆரப்³ப⁴ அத்தி² ஓதி³ஸ்ஸ ஆசிக்க²னா (பாசி॰ அட்ட²॰ 679), அத்தி² அனோதி³ஸ்ஸ ஆசிக்க²னா, அனாக³தங் ஆரப்³பா⁴பி அத்தி² ஓதி³ஸ்ஸ ஆசிக்க²னா, அத்தி² அனோதி³ஸ்ஸ ஆசிக்க²னா.
Ākaḍḍhiyamānā gacchatīti vuccamānā vohārikānaṃ santikaṃ gacchati, imassa ‘‘tassā anāpattī’’ti iminā sambandho. Evaṃ sesesupi. Rakkhaṃ yācatīti dhammikaṃ rakkhaṃ yācati. Idāni yathā yācitā rakkhā dhammikā hoti, taṃ dassetuṃ ‘‘upassaye aññehi kataṃ anācāraṃ anodissa ācikkhantī’’ti vuttaṃ. Tattha atītaṃ ārabbha atthi odissa ācikkhanā (pāci. aṭṭha. 679), atthi anodissa ācikkhanā, anāgataṃ ārabbhāpi atthi odissa ācikkhanā, atthi anodissa ācikkhanā.
கத²ங் அதீதங் ஆரப்³ப⁴ ஓதி³ஸ்ஸ ஆசிக்க²னா ஹோதி? பி⁴க்கு²னுபஸ்ஸயே கா³மதா³ரகா, து⁴த்தாத³யோ வா யே கேசி அனாசாரங் வா ஆசரந்தி, ருக்க²ங் வா சி²ந்த³ந்தி, ப²லாப²லங் வா ஹரந்தி, பரிக்கா²ரே வா அச்சி²ந்த³ந்தி. பி⁴க்கு²னீ வோஹாரிகே உபஸங்கமித்வா ‘‘அம்ஹாகங் உபஸ்ஸயே இத³ங் நாம கத’’ந்தி வத³தி. ‘‘கேனா’’தி வுத்தே ‘‘அஸுகேன ச அஸுகேன சா’’தி ஆசிக்க²தி. ஏவங் அதீதங் ஆரப்³ப⁴ ஓதி³ஸ்ஸ ஆசிக்க²னா ஹோதி, ஸா ந வட்டதி. தஞ்சே ஸுத்வா தே வோஹாரிகா தேஸங் த³ண்ட³ங் கரொந்தி, ஸப்³ப³ங் பி⁴க்கு²னியா கீ³வா ஹோதி. ‘‘த³ண்ட³ங் க³ண்ஹிஸ்ஸந்தீ’’தி அதி⁴ப்பாயேபி ஸதி கீ³வாயேவ ஹோதி. ஸசே பன தஸ்ஸ ‘‘த³ண்ட³ங் க³ண்ஹதா²’’தி வத³தி, பஞ்சமாஸகமத்தே க³ஹிதே பாராஜிகங் ஹோதி.
Kathaṃ atītaṃ ārabbha odissa ācikkhanā hoti? Bhikkhunupassaye gāmadārakā, dhuttādayo vā ye keci anācāraṃ vā ācaranti, rukkhaṃ vā chindanti, phalāphalaṃ vā haranti, parikkhāre vā acchindanti. Bhikkhunī vohārike upasaṅkamitvā ‘‘amhākaṃ upassaye idaṃ nāma kata’’nti vadati. ‘‘Kenā’’ti vutte ‘‘asukena ca asukena cā’’ti ācikkhati. Evaṃ atītaṃ ārabbha odissa ācikkhanā hoti, sā na vaṭṭati. Tañce sutvā te vohārikā tesaṃ daṇḍaṃ karonti, sabbaṃ bhikkhuniyā gīvā hoti. ‘‘Daṇḍaṃ gaṇhissantī’’ti adhippāyepi sati gīvāyeva hoti. Sace pana tassa ‘‘daṇḍaṃ gaṇhathā’’ti vadati, pañcamāsakamatte gahite pārājikaṃ hoti.
தேஹி ‘‘கேனா’’தி வுத்தே பன ‘‘அஸுகேனா’தி வத்துங் அம்ஹாகங் ந வட்டதி, தும்ஹேயேவ ஜானிஸ்ஸத². கேவலஞ்ஹி மயங் ரக்க²ங் யாசாம, தங் நோ தே³த², அவஹடப⁴ண்ட³ம்பி ஆஹராபேதா²’’தி வத்தப்³ப³ங். ஏவங் அனோதி³ஸ்ஸ ஆசிக்க²னா ஹோதி, ஸா வட்டதி. ஏவங் வுத்தே ஸசேபி தே வோஹாரிகா தே காரகே க³வேஸித்வா தேஸங் த³ண்ட³ங் கரொந்தி, ஸப்³ப³ங் ஸாபதெய்யம்பி க³ஹிதங், பி⁴க்கு²னியா நேவ கீ³வா, ந ஆபத்தி.
Tehi ‘‘kenā’’ti vutte pana ‘‘asukenā’ti vattuṃ amhākaṃ na vaṭṭati, tumheyeva jānissatha. Kevalañhi mayaṃ rakkhaṃ yācāma, taṃ no detha, avahaṭabhaṇḍampi āharāpethā’’ti vattabbaṃ. Evaṃ anodissa ācikkhanā hoti, sā vaṭṭati. Evaṃ vutte sacepi te vohārikā te kārake gavesitvā tesaṃ daṇḍaṃ karonti, sabbaṃ sāpateyyampi gahitaṃ, bhikkhuniyā neva gīvā, na āpatti.
பரிக்கா²ரங் ஹரந்தே தி³ஸ்வா தேஸங் அனத்த²காமதாய ‘‘சோரோ சோரோ’’தி வத்தும்பி ந வட்டதி. ஏவங் வுத்தேபி ஹி யங் தேஸங் த³ண்ட³ங் கரொந்தி, ஸப்³ப³ங் பி⁴க்கு²னியா கீ³வா ஹோதி. அத்தனோ வசனகரங் பன ‘‘இமினா மே பரிக்கா²ரோ க³ஹிதோ, தங் ஆஹராபேஹி, மா சஸ்ஸ த³ண்ட³ங் கரோதா²’’தி வத்துங் வட்டதி. தா³ஸதா³ஸிவாபிஆதீ³னங் அத்தா²ய அட்³ட³ங் கரொந்தி, அயங் அகப்பியஅட்³டோ³ நாம, ந வட்டதி.
Parikkhāraṃ harante disvā tesaṃ anatthakāmatāya ‘‘coro coro’’ti vattumpi na vaṭṭati. Evaṃ vuttepi hi yaṃ tesaṃ daṇḍaṃ karonti, sabbaṃ bhikkhuniyā gīvā hoti. Attano vacanakaraṃ pana ‘‘iminā me parikkhāro gahito, taṃ āharāpehi, mā cassa daṇḍaṃ karothā’’ti vattuṃ vaṭṭati. Dāsadāsivāpiādīnaṃ atthāya aḍḍaṃ karonti, ayaṃ akappiyaaḍḍo nāma, na vaṭṭati.
கத²ங் அனாக³தங் ஆரப்³ப⁴ ஓதி³ஸ்ஸ ஆசிக்க²னா ஹோதி? வுத்தனயேனேவ பரேஹி அனாசாராதீ³ஸு கதேஸு பி⁴க்கு²னீ வோஹாரிகே ஏவங் வத³தி ‘‘அம்ஹாகங் உபஸ்ஸயே இத³ஞ்சித³ஞ்ச கரொந்தி, ரக்க²ங் நோ தே³த² ஆயதிங் அகரணத்தா²யா’’தி. ‘‘கேன ஏவங் கத’’ந்தி வுத்தே ‘‘அஸுகேன ச அஸுகேன சா’’தி ஆசிக்க²தி. ஏவங் அனாக³தங் ஆரப்³ப⁴ ஓதி³ஸ்ஸ ஆசிக்க²னா ஹோதி, ஸாபி ந வட்டதி. தேஸஞ்ஹி த³ண்டே³ கதே புரிமனயேனேவ ஸப்³ப³ங் பி⁴க்கு²னியா கீ³வா. ஸேஸங் புரிமஸதி³ஸமேவ.
Kathaṃ anāgataṃ ārabbha odissa ācikkhanā hoti? Vuttanayeneva parehi anācārādīsu katesu bhikkhunī vohārike evaṃ vadati ‘‘amhākaṃ upassaye idañcidañca karonti, rakkhaṃ no detha āyatiṃ akaraṇatthāyā’’ti. ‘‘Kena evaṃ kata’’nti vutte ‘‘asukena ca asukena cā’’ti ācikkhati. Evaṃ anāgataṃ ārabbha odissa ācikkhanā hoti, sāpi na vaṭṭati. Tesañhi daṇḍe kate purimanayeneva sabbaṃ bhikkhuniyā gīvā. Sesaṃ purimasadisameva.
ஸசே பன வோஹாரிகா பி⁴க்கு²னுபஸ்ஸயே ஏவரூபங் அனாசாரங் கரொந்தானங் ‘‘இமங் நாம த³ண்ட³ங் கரோமா’’தி பே⁴ரிங் சராபெத்வா ஆணாய அதிட்ட²மானே பரியேஸித்வா த³ண்ட³ங் கரொந்தி, பி⁴க்கு²னியா நேவ கீ³வா, ந ஆபத்தி.
Sace pana vohārikā bhikkhunupassaye evarūpaṃ anācāraṃ karontānaṃ ‘‘imaṃ nāma daṇḍaṃ karomā’’ti bheriṃ carāpetvā āṇāya atiṭṭhamāne pariyesitvā daṇḍaṃ karonti, bhikkhuniyā neva gīvā, na āpatti.
யோ சாயங் பி⁴க்கு²னீனங் வுத்தோ, பி⁴க்கூ²னம்பி ஏஸேவ நயோ. பி⁴க்கு²னோபி ஹி ஓதி³ஸ்ஸ ஆசிக்க²னா ந வட்டதி, யங் ததா² ஆசிக்கி²தே தேஸங் த³ண்ட³ங் கரொந்தி, தங் ஸப்³ப³ங் கீ³வா ஹோதி. வுத்தனயேனேவ த³ண்ட³ங் க³ண்ஹாபெந்தஸ்ஸ பாராஜிகங். யோ பன ‘‘த³ண்ட³ங் கரிஸ்ஸந்தீ’’தி ஜானந்தோபி அனோதி³ஸ்ஸ கதே²தி, தே ச பரியேஸித்வா த³ண்ட³ங் கரொந்தியேவ, ந தோ³ஸோ. விஹாரஸீமாய ருக்கா²தீ³னி சி²ந்த³ந்தானங் வாஸிப²ரஸுஆதீ³னி க³ஹெத்வா பாஸாணே கொட்டெந்தி, ந வட்டதி. ஸசே தா⁴ரா பி⁴ஜ்ஜதி, காராபெத்வா தா³தப்³பா³. உபதா⁴வித்வா தேஸங் பரிக்கா²ரே க³ண்ஹந்தி, தம்பி ந காதப்³ப³ங். லஹுபரிவத்தஞ்ஹி சித்தங், தெ²ய்யசேதனாய உப்பன்னாய மூலச்சே²ஜ்ஜம்பி க³ச்செ²ய்ய.
Yo cāyaṃ bhikkhunīnaṃ vutto, bhikkhūnampi eseva nayo. Bhikkhunopi hi odissa ācikkhanā na vaṭṭati, yaṃ tathā ācikkhite tesaṃ daṇḍaṃ karonti, taṃ sabbaṃ gīvā hoti. Vuttanayeneva daṇḍaṃ gaṇhāpentassa pārājikaṃ. Yo pana ‘‘daṇḍaṃ karissantī’’ti jānantopi anodissa katheti, te ca pariyesitvā daṇḍaṃ karontiyeva, na doso. Vihārasīmāya rukkhādīni chindantānaṃ vāsipharasuādīni gahetvā pāsāṇe koṭṭenti, na vaṭṭati. Sace dhārā bhijjati, kārāpetvā dātabbā. Upadhāvitvā tesaṃ parikkhāre gaṇhanti, tampi na kātabbaṃ. Lahuparivattañhi cittaṃ, theyyacetanāya uppannāya mūlacchejjampi gaccheyya.
உஸ்ஸயவாதி³காஸிக்கா²பத³வண்ணனா நிட்டி²தா.
Ussayavādikāsikkhāpadavaṇṇanā niṭṭhitā.
