| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
8. උස්‌සූරභත්‌තසුත්‌තං
8. Ussūrabhattasuttaṃ
228. ‘‘පඤ්‌චිමෙ , භික්‌ඛවෙ, ආදීනවා උස්‌සූරභත්‌තෙ කුලෙ. කතමෙ පඤ්‌ච? යෙ තෙ අතිථී පාහුනා, තෙ න කාලෙන පටිපූජෙන්‌ති; යා තා බලිපටිග්‌ගාහිකා දෙවතා, තා න කාලෙන පටිපූජෙන්‌ති; යෙ තෙ සමණබ්‍රාහ්‌මණා එකභත්‌තිකා රත්‌තූපරතා විරතා විකාලභොජනා, තෙ න කාලෙන පටිපූජෙන්‌ති; දාසකම්‌මකරපොරිසා විමුඛා කම්‌මං කරොන්‌ති; තාවතකංයෙව අසමයෙන භුත්‌තං අනොජවන්‌තං හොති. ඉමෙ ඛො, භික්‌ඛවෙ, පඤ්‌ච ආදීනවා උස්‌සූරභත්‌තෙ කුලෙ.
228. ‘‘Pañcime , bhikkhave, ādīnavā ussūrabhatte kule. Katame pañca? Ye te atithī pāhunā, te na kālena paṭipūjenti; yā tā balipaṭiggāhikā devatā, tā na kālena paṭipūjenti; ye te samaṇabrāhmaṇā ekabhattikā rattūparatā viratā vikālabhojanā, te na kālena paṭipūjenti; dāsakammakaraporisā vimukhā kammaṃ karonti; tāvatakaṃyeva asamayena bhuttaṃ anojavantaṃ hoti. Ime kho, bhikkhave, pañca ādīnavā ussūrabhatte kule.
‘‘පඤ්‌චිමෙ, භික්‌ඛවෙ, ආනිසංසා සමයභත්‌තෙ කුලෙ. කතමෙ පඤ්‌ච? යෙ තෙ අතිථී පාහුනා, තෙ කාලෙන පටිපූජෙන්‌ති; යා තා බලිපටිග්‌ගාහිකා දෙවතා, තා කාලෙන පටිපූජෙන්‌ති; යෙ තෙ සමණබ්‍රාහ්‌මණා එකභත්‌තිකා රත්‌තූපරතා විරතා විකාලභොජනා, තෙ කාලෙන පටිපූජෙන්‌ති; දාසකම්‌මකරපොරිසා අවිමුඛා කම්‌මං කරොන්‌ති; තාවතකංයෙව සමයෙන භුත්‌තං ඔජවන්‌තං හොති. ඉමෙ ඛො, භික්‌ඛවෙ, පඤ්‌ච ආනිසංසා සමයභත්‌තෙ කුලෙ’’ති. අට්‌ඨමං.
‘‘Pañcime, bhikkhave, ānisaṃsā samayabhatte kule. Katame pañca? Ye te atithī pāhunā, te kālena paṭipūjenti; yā tā balipaṭiggāhikā devatā, tā kālena paṭipūjenti; ye te samaṇabrāhmaṇā ekabhattikā rattūparatā viratā vikālabhojanā, te kālena paṭipūjenti; dāsakammakaraporisā avimukhā kammaṃ karonti; tāvatakaṃyeva samayena bhuttaṃ ojavantaṃ hoti. Ime kho, bhikkhave, pañca ānisaṃsā samayabhatte kule’’ti. Aṭṭhamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 8. උස්‌සූරභත්‌තසුත්‌තවණ්‌ණනා • 8. Ussūrabhattasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-10. පඨමදීඝචාරිකසුත්‌තාදිවණ්‌ණනා • 1-10. Paṭhamadīghacārikasuttādivaṇṇanā
