| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
8. உஸ்ஸூரப⁴த்தஸுத்தவண்ணனா
8. Ussūrabhattasuttavaṇṇanā
228. அட்ட²மே உஸ்ஸூரப⁴த்தேதி அதிதி³வாபசனப⁴த்தே. ந காலேன படிபூஜெந்தீதி யாகு³காலே யாகு³ங், க²ஜ்ஜககாலே க²ஜ்ஜகங் , போ⁴ஜனகாலே போ⁴ஜனங் அபசந்தா யுத்தப்பயுத்தகாலஸ்ஸ அதினாமிதத்தா ந காலேன படிபூஜெந்தி, அத்தனோ சித்தேனேவ தெ³ந்தி நாம. ததோ தேபி தேஸு அத்தனோ கே³ஹங் ஆக³தேஸு ததே²வ கரொந்தி. குலபவேணியா ஆக³தா ப³லிபடிக்³கா³ஹிகா தே³வதாபி யுத்தப்பயுத்தகாலேன லாப⁴ங் லப⁴மானாயேவ ரக்க²ந்தி கோ³பயந்தி பீளங் அகத்வா. அகாலே லப⁴மானா பன ‘‘இமே அம்ஹேஸு அனாத³ரா’’தி ஆரக்க²ங் ந கரொந்தி.
228. Aṭṭhame ussūrabhatteti atidivāpacanabhatte. Na kālena paṭipūjentīti yāgukāle yāguṃ, khajjakakāle khajjakaṃ , bhojanakāle bhojanaṃ apacantā yuttappayuttakālassa atināmitattā na kālena paṭipūjenti, attano citteneva denti nāma. Tato tepi tesu attano gehaṃ āgatesu tatheva karonti. Kulapaveṇiyā āgatā balipaṭiggāhikā devatāpi yuttappayuttakālena lābhaṃ labhamānāyeva rakkhanti gopayanti pīḷaṃ akatvā. Akāle labhamānā pana ‘‘ime amhesu anādarā’’ti ārakkhaṃ na karonti.
ஸமணப்³ராஹ்மணாபி ‘‘ஏதேஸங் கே³ஹே போ⁴ஜனவேலாய போ⁴ஜனங் ந ஹோதி, டி²தமஜ்ஜ²ன்ஹிகே தெ³ந்தீ’’தி மங்க³லாமங்க³லேஸு காதப்³ப³ங் ந கரொந்தி. விமுகா² கம்மங் கரொந்தீதி ‘‘பாதோ கிஞ்சி ந லபா⁴ம, கு²தா³ய படிபீளிதா கம்மங் காதுங் ந ஸக்கோமா’’தி கம்மங் விஸ்ஸஜ்ஜெத்வா நிஸீத³ந்தி. அனோஜவந்தங் ஹோதீதி அகாலே பு⁴த்தங் ஓஜங் ஹரிதுங் ந ஸக்கோதி. ஸுக்கபக்கோ² வுத்தவிபல்லாஸேன வேதி³தப்³போ³.
Samaṇabrāhmaṇāpi ‘‘etesaṃ gehe bhojanavelāya bhojanaṃ na hoti, ṭhitamajjhanhike dentī’’ti maṅgalāmaṅgalesu kātabbaṃ na karonti. Vimukhā kammaṃ karontīti ‘‘pāto kiñci na labhāma, khudāya paṭipīḷitā kammaṃ kātuṃ na sakkomā’’ti kammaṃ vissajjetvā nisīdanti. Anojavantaṃ hotīti akāle bhuttaṃ ojaṃ harituṃ na sakkoti. Sukkapakkho vuttavipallāsena veditabbo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 8. உஸ்ஸூரப⁴த்தஸுத்தங் • 8. Ussūrabhattasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-10. பட²மதீ³க⁴சாரிகஸுத்தாதி³வண்ணனா • 1-10. Paṭhamadīghacārikasuttādivaṇṇanā
