Library / Tipiṭaka / ติปิฎก • Tipiṭaka / อุทานปาฬิ • Udānapāḷi

๑๐. อุเตนสุตฺตํ

10. Utenasuttaṃ

๗๐. เอวํ เม สุตํ – เอกํ สมยํ ภควา โกสมฺพิยํ วิหรติ โฆสิตาราเมฯ เตน โข ปน สมเยน รโญฺญ อุเตนสฺส ¹ อุยฺยานคตสฺส อเนฺตปุรํ ทฑฺฒํ โหติ, ปญฺจ จ อิตฺถิสตานิ ² กาลงฺกตานิ โหนฺติ สามาวตีปมุขานิฯ

70. Evaṃ me sutaṃ – ekaṃ samayaṃ bhagavā kosambiyaṃ viharati ghositārāme. Tena kho pana samayena rañño utenassa ³ uyyānagatassa antepuraṃ daḍḍhaṃ hoti, pañca ca itthisatāni ⁴ kālaṅkatāni honti sāmāvatīpamukhāni.

อถ โข สมฺพหุลา ภิกฺขู ปุพฺพณฺหสมยํ นิวาเสตฺวา ปตฺตจีวรมาทาย โกสมฺพิํ ปิณฺฑาย ปาวิสิํสุฯ โกสมฺพิยํ ปิณฺฑาย จริตฺวา ปจฺฉาภตฺตํ ปิณฺฑปาตปฎิกฺกนฺตา เยน ภควา เตนุปสงฺกมิํสุ; อุปสงฺกมิตฺวา ภควนฺตํ อภิวาเทตฺวา เอกมนฺตํ นิสีทิํสุฯ เอกมนฺตํ นิสินฺนา โข เต ภิกฺขู ภควนฺตํ เอตทโวจุํ – ‘‘อิธ, ภเนฺต, รโญฺญ อุเตนสฺส อุยฺยานคตสฺส อเนฺตปุรํ ทฑฺฒํ, ปญฺจ จ อิตฺถิสตานิ กาลงฺกตานิ สามาวตีปมุขานิฯ ตาสํ, ภเนฺต, อุปาสิกานํ กา คติ โก อภิสมฺปราโย’’ติ?

Atha kho sambahulā bhikkhū pubbaṇhasamayaṃ nivāsetvā pattacīvaramādāya kosambiṃ piṇḍāya pāvisiṃsu. Kosambiyaṃ piṇḍāya caritvā pacchābhattaṃ piṇḍapātapaṭikkantā yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ – ‘‘idha, bhante, rañño utenassa uyyānagatassa antepuraṃ daḍḍhaṃ, pañca ca itthisatāni kālaṅkatāni sāmāvatīpamukhāni. Tāsaṃ, bhante, upāsikānaṃ kā gati ko abhisamparāyo’’ti?

‘‘สเนฺตตฺถ, ภิกฺขเว, อุปาสิกาโย โสตาปนฺนา, สนฺติ สกทาคามินิโย, สนฺติ อนาคามินิโยฯ สพฺพา ตา, ภิกฺขเว, อุปาสิกาโย อนิปฺผลา กาลงฺกตา’’ติฯ

‘‘Santettha, bhikkhave, upāsikāyo sotāpannā, santi sakadāgāminiyo, santi anāgāminiyo. Sabbā tā, bhikkhave, upāsikāyo anipphalā kālaṅkatā’’ti.

อถ โข ภควา เอตมตฺถํ วิทิตฺวา ตายํ เวลายํ อิมํ อุทานํ อุทาเนสิ –

Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –

‘‘โมหสมฺพนฺธโน โลโก, ภพฺพรูโปว ทิสฺสติ;

‘‘Mohasambandhano loko, bhabbarūpova dissati;

อุปธิพนฺธโน ⁵ พาโล, ตมสา ปริวาริโต;

Upadhibandhano ⁶ bālo, tamasā parivārito;

สสฺสโตริว ⁷ ขายติ, ปสฺสโต นตฺถิ กิญฺจน’’นฺติฯ ทสมํ;

Sassatoriva ⁸ khāyati, passato natthi kiñcana’’nti. dasamaṃ;

ตสฺสุทฺทานํ –

Tassuddānaṃ –

เทฺว ภทฺทิยา เทฺว จ สตฺตา, ลกุณฺฑโก ตณฺหาขโย;

Dve bhaddiyā dve ca sattā, lakuṇḍako taṇhākhayo;

ปปญฺจขโย จ กจฺจาโน, อุทปานญฺจ อุเตโนติฯ

Papañcakhayo ca kaccāno, udapānañca utenoti.

จูฬวโคฺค ⁹ สตฺตโม นิฎฺฐิโตฯ

Cūḷavaggo ¹⁰ sattamo niṭṭhito.

Next: ๘. ปาฎลิคามิยวโคฺค • 8. Pāṭaligāmiyavaggo

Footnotes:

1. อุเทนสฺส (สี. สฺยา. ปี.)

2. ปญฺจ อิตฺถิสตานิ (สี. สฺยา. ปี.)

3. udenassa (sī. syā. pī.)

4. pañca itthisatāni (sī. syā. pī.)

5. อุปธิสมฺพนฺธโน (ก. สี.)

6. upadhisambandhano (ka. sī.)

7. สสฺสติ วิย (ก. สี.)

8. sassati viya (ka. sī.)

9. จุลฺลวโคฺค (สี.), จูลวโคฺค (ปี.)

10. cullavaggo (sī.), cūlavaggo (pī.)

Related texts:

อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / อุทาน-อฎฺฐกถา • Udāna-aṭṭhakathā / ๑๐. อุเตนสุตฺตวณฺณนา • 10. Utenasuttavaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact