| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
9. උත්‌තරකුරුකාදිගමනපඤ්‌හො
9. Uttarakurukādigamanapañho
9. රාජා ආහ ‘‘භන්‌තෙ නාගසෙන, අත්‌ථි කොචි, යො ඉමිනා සරීරෙන උත්‌තරකුරුං වා ගච්‌ඡෙය්‍ය, බ්‍රහ්‌මලොකං වා, අඤ්‌ඤං වා පන දීප’’න්‌ති? ‘‘අත්‌ථි, මහාරාජ, යො ඉමිනා චාතුම්‌මහාභූතිකෙන කායෙන උත්‌තරකුරුං වා ගච්‌ඡෙය්‍ය, බ්‍රහ්‌මලොකං වා, අඤ්‌ඤං වා පන දීප’’න්‌ති.
9. Rājā āha ‘‘bhante nāgasena, atthi koci, yo iminā sarīrena uttarakuruṃ vā gaccheyya, brahmalokaṃ vā, aññaṃ vā pana dīpa’’nti? ‘‘Atthi, mahārāja, yo iminā cātummahābhūtikena kāyena uttarakuruṃ vā gaccheyya, brahmalokaṃ vā, aññaṃ vā pana dīpa’’nti.
‘‘කථං, භන්‌තෙ නාගසෙන, ඉමිනා චාතුම්‌මහාභූතිකෙන කායෙන උත්‌තරකුරුං වා ගච්‌ඡෙය්‍ය, බ්‍රහ්‌මලොකං වා, අඤ්‌ඤං වා පන දීප’’න්‌ති? ‘‘අභිජානාසි නු, ත්‌වං මහාරාජ, ඉමිස්‌සා පථවියා විදත්‌ථිං වා රතනං වා ලඞ්‌ඝිතා’’ති? ‘‘ආම, භන්‌තෙ, අභිජානාමි ‘අහං, භන්‌තෙ නාගසෙන, අට්‌ඨපි රතනියො ලඞ්‌ඝෙමී’’’ති. ‘‘කථං, ත්‌වං මහාරාජ, අට්‌ඨපි රතනියො ලඞ්‌ඝෙසී’’ති? ‘‘අහඤ්‌හි, භන්‌තෙ, චිත්‌තං උප්‌පාදෙමි ‘එත්‌ථ නිපතිස්‌සාමී’ති සහ චිත්‌තුප්‌පාදෙන කායො මෙ ලහුකො හොතී’’ති. ‘‘එවමෙව ඛො, මහාරාජ, ඉද්‌ධිමා භික්‌ඛු චෙතොවසිප්‌පත්‌තො කායං චිත්‌තෙ සමාරොපෙත්‌වා චිත්‌තවසෙන වෙහාසං ගච්‌ඡතී’’ති.
‘‘Kathaṃ, bhante nāgasena, iminā cātummahābhūtikena kāyena uttarakuruṃ vā gaccheyya, brahmalokaṃ vā, aññaṃ vā pana dīpa’’nti? ‘‘Abhijānāsi nu, tvaṃ mahārāja, imissā pathaviyā vidatthiṃ vā ratanaṃ vā laṅghitā’’ti? ‘‘Āma, bhante, abhijānāmi ‘ahaṃ, bhante nāgasena, aṭṭhapi rataniyo laṅghemī’’’ti. ‘‘Kathaṃ, tvaṃ mahārāja, aṭṭhapi rataniyo laṅghesī’’ti? ‘‘Ahañhi, bhante, cittaṃ uppādemi ‘ettha nipatissāmī’ti saha cittuppādena kāyo me lahuko hotī’’ti. ‘‘Evameva kho, mahārāja, iddhimā bhikkhu cetovasippatto kāyaṃ citte samāropetvā cittavasena vehāsaṃ gacchatī’’ti.
‘‘කල්‌ලොසි, භන්‌තෙ නාගසෙනා’’ති.
‘‘Kallosi, bhante nāgasenā’’ti.
උත්‌තරකුරුකාදිගමනපඤ්‌හො නවමො.
Uttarakurukādigamanapañho navamo.
