| Library / Tipiṭaka / तिपिटक • Tipiṭaka / पेतवत्थुपाळि • Petavatthupāḷi |
१०. उत्तरमातुपेतिवत्थु
10. Uttaramātupetivatthu
३३१.
331.
दिवाविहारगतं भिक्खुं, गङ्गातीरे निसिन्नकं।
Divāvihāragataṃ bhikkhuṃ, gaṅgātīre nisinnakaṃ;
तं पेती उपसङ्कम्म, दुब्बण्णा भीरुदस्सना॥
Taṃ petī upasaṅkamma, dubbaṇṇā bhīrudassanā.
३३२.
332.
केसेहि सा पटिच्छन्ना, समणं एतदब्रवि॥
Kesehi sā paṭicchannā, samaṇaṃ etadabravi.
३३३.
333.
‘‘पञ्चपण्णासवस्सानि, यतो कालङ्कता अहं।
‘‘Pañcapaṇṇāsavassāni, yato kālaṅkatā ahaṃ;
नाभिजानामि भुत्तं वा, पीतं वा पन पानियं।
Nābhijānāmi bhuttaṃ vā, pītaṃ vā pana pāniyaṃ;
देहि त्वं पानियं भन्ते, तसिता पानियाय मे’’ति॥
Dehi tvaṃ pāniyaṃ bhante, tasitā pāniyāya me’’ti.
३३४.
334.
पिव एत्तो गहेत्वान, किं मं याचसि पानिय’’न्ति॥
Piva etto gahetvāna, kiṃ maṃ yācasi pāniya’’nti.
३३५.
335.
‘‘सचाहं भन्ते गङ्गाय, सयं गण्हामि पानियं।
‘‘Sacāhaṃ bhante gaṅgāya, sayaṃ gaṇhāmi pāniyaṃ;
लोहितं मे परिवत्तति, तस्मा याचामि पानिय’’न्ति॥
Lohitaṃ me parivattati, tasmā yācāmi pāniya’’nti.
३३६.
336.
‘‘किं नु कायेन वाचाय, मनसा दुक्कटं कतं।
‘‘Kiṃ nu kāyena vācāya, manasā dukkaṭaṃ kataṃ;
किस्स कम्मविपाकेन, गङ्गा ते होति लोहित’’न्ति॥
Kissa kammavipākena, gaṅgā te hoti lohita’’nti.
३३७.
337.
सो च मय्हं अकामाय, समणानं पवेच्छति॥
So ca mayhaṃ akāmāya, samaṇānaṃ pavecchati.
३३८.
338.
‘‘चीवरं पिण्डपातञ्च, पच्चयं सयनासनं।
‘‘Cīvaraṃ piṇḍapātañca, paccayaṃ sayanāsanaṃ;
तमहं परिभासामि, मच्छेरेन उपद्दुता॥
Tamahaṃ paribhāsāmi, maccherena upaddutā.
३३९.
339.
‘‘यं त्वं मय्हं अकामाय, समणानं पवेच्छसि।
‘‘Yaṃ tvaṃ mayhaṃ akāmāya, samaṇānaṃ pavecchasi;
चीवरं पिण्डपातञ्च, पच्चयं सयनासनं॥
Cīvaraṃ piṇḍapātañca, paccayaṃ sayanāsanaṃ.
३४०.
340.
‘‘एतं ते परलोकस्मिं, लोहितं होतु उत्तर।
‘‘Etaṃ te paralokasmiṃ, lohitaṃ hotu uttara;
तस्स कम्मस्स विपाकेन, गङ्गा मे होति लोहित’’न्ति॥
Tassa kammassa vipākena, gaṅgā me hoti lohita’’nti.
उत्तरमातुपेतिवत्थु दसमं।
Uttaramātupetivatthu dasamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / पेतवत्थु-अट्ठकथा • Petavatthu-aṭṭhakathā / १०. उत्तरमातुपेतिवत्थुवण्णना • 10. Uttaramātupetivatthuvaṇṇanā
