| Library / Tipiṭaka / তিপিটক • Tipiṭaka / থেরীগাথাপাল়ি • Therīgāthāpāḷi |
৭. সত্তকনিপাতো
7. Sattakanipāto
১. উত্তরাথেরীগাথা
1. Uttarātherīgāthā
১৭৫.
175.
‘‘‘মুসলানি গহেত্ৰান, ধঞ্ঞং কোট্টেন্তি মাণৰা।
‘‘‘Musalāni gahetvāna, dhaññaṃ koṭṭenti māṇavā;
পুত্তদারানি পোসেন্তা, ধনং ৰিন্দন্তি মাণৰা॥
Puttadārāni posentā, dhanaṃ vindanti māṇavā.
১৭৬.
176.
‘‘‘ঘটেথ বুদ্ধসাসনে, যং কত্ৰা নানুতপ্পতি।
‘‘‘Ghaṭetha buddhasāsane, yaṃ katvā nānutappati;
খিপ্পং পাদানি ধোৰিত্ৰা, একমন্তং নিসীদথ॥
Khippaṃ pādāni dhovitvā, ekamantaṃ nisīdatha.
১৭৭.
177.
‘‘‘চিত্তং উপট্ঠপেত্ৰান, একগ্গং সুসমাহিতং।
‘‘‘Cittaṃ upaṭṭhapetvāna, ekaggaṃ susamāhitaṃ;
পচ্চৰেক্খথ সঙ্খারে, পরতো নো চ অত্ততো’॥
Paccavekkhatha saṅkhāre, parato no ca attato’.
১৭৮.
178.
‘‘তস্সাহং ৰচনং সুত্ৰা, পটাচারানুসাসনিং।
‘‘Tassāhaṃ vacanaṃ sutvā, paṭācārānusāsaniṃ;
পাদে পক্খালযিত্ৰান, একমন্তে উপাৰিসিং॥
Pāde pakkhālayitvāna, ekamante upāvisiṃ.
১৭৯.
179.
‘‘রত্তিযা পুরিমে যামে, পুব্বজাতিমনুস্সরিং।
‘‘Rattiyā purime yāme, pubbajātimanussariṃ;
রত্তিযা মজ্ঝিমে যামে, দিব্বচক্খুং ৰিসোধযিং॥
Rattiyā majjhime yāme, dibbacakkhuṃ visodhayiṃ.
১৮০.
180.
‘‘রত্তিযা পচ্ছিমে যামে, তমোক্খন্ধং পদালযিং।
‘‘Rattiyā pacchime yāme, tamokkhandhaṃ padālayiṃ;
তেৰিজ্জা অথ ৰুট্ঠাসিং, কতা তে অনুসাসনী॥
Tevijjā atha vuṭṭhāsiṃ, katā te anusāsanī.
১৮১.
181.
‘‘সক্কংৰ দেৰা তিদসা, সঙ্গামে অপরাজিতং।
‘‘Sakkaṃva devā tidasā, saṅgāme aparājitaṃ;
পুরক্খত্ৰা ৰিহস্সামি, তেৰিজ্জাম্হি অনাসৰা’’॥
Purakkhatvā vihassāmi, tevijjāmhi anāsavā’’.
… উত্তরা থেরী…।
… Uttarā therī….
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / থেরীগাথা-অট্ঠকথা • Therīgāthā-aṭṭhakathā / ১. উত্তরাথেরীগাথাৰণ্ণনা • 1. Uttarātherīgāthāvaṇṇanā
