| Library / Tipiṭaka / তিপিটক • Tipiṭaka / থেরীগাথা-অট্ঠকথা • Therīgāthā-aṭṭhakathā |
১৫. উত্তরাথেরীগাথাৰণ্ণনা
15. Uttarātherīgāthāvaṇṇanā
কাযেন সংৰুতা আসিন্তি উত্তরায থেরিযা গাথা। তস্সাপি ৰত্থু তিস্সাথেরিযা ৰত্থুসদিসং। সাপি হি সক্যকুলপ্পসুতা বোধিসত্তস্স ওরোধভূতা মহাপজাপতিগোতমিযা সদ্ধিং নিক্খন্তা ওভাসগাথায অরহত্তং পত্ৰা পন –
Kāyena saṃvutā āsinti uttarāya theriyā gāthā. Tassāpi vatthu tissātheriyā vatthusadisaṃ. Sāpi hi sakyakulappasutā bodhisattassa orodhabhūtā mahāpajāpatigotamiyā saddhiṃ nikkhantā obhāsagāthāya arahattaṃ patvā pana –
১৫.
15.
‘‘কাযেন সংৰুতা আসিং, ৰাচায উদ চেতসা।
‘‘Kāyena saṃvutā āsiṃ, vācāya uda cetasā;
সমূলং তণ্হমব্বুয্হ, সীতিভূতাম্হি নিব্বুতা’’তি॥ –
Samūlaṃ taṇhamabbuyha, sītibhūtāmhi nibbutā’’ti. –
উদানৰসেন তমেৰ গাথং অভাসি।
Udānavasena tameva gāthaṃ abhāsi.
তত্থ কাযেন সংৰুতা আসিন্তি কাযিকেন সংৰরেন সংৰুতা অহোসিং। ৰাচাযাতি ৰাচসিকেন সংৰরেন সংৰুতা আসিন্তি যোজনা, পদদ্ৰযেনাপি সীলসংৰরমাহ। উদাতি অথ। চেতসাতি সমাধিচিত্তেন, এতেন ৰিপস্সনাভাৰনমাহ। সমূলং তণ্হমব্বুয্হাতি সানুসযং, সহ ৰা অৰিজ্জায তণ্হং উদ্ধরিত্ৰা। অৰিজ্জায হি পটিচ্ছাদিতাদীনৰে ভৰত্তযে তণ্হা উপ্পজ্জতি।
Tattha kāyena saṃvutā āsinti kāyikena saṃvarena saṃvutā ahosiṃ. Vācāyāti vācasikena saṃvarena saṃvutā āsinti yojanā, padadvayenāpi sīlasaṃvaramāha. Udāti atha. Cetasāti samādhicittena, etena vipassanābhāvanamāha. Samūlaṃ taṇhamabbuyhāti sānusayaṃ, saha vā avijjāya taṇhaṃ uddharitvā. Avijjāya hi paṭicchāditādīnave bhavattaye taṇhā uppajjati.
অপরো নযো – কাযেন সংৰুতাতি সম্মাকম্মন্তেন সব্বসো মিচ্ছাকম্মন্তস্স পহানা মগ্গসংৰরেনেৰ কাযেন সংৰুতা আসিং। ৰাচাযাতি সম্মাৰাচায সব্বসো মিচ্ছাৰাচায পহানা মগ্গসংৰরেনেৰ ৰাচায সংৰুতা আসিন্তি অত্থো। চেতসাতি সমাধিনা। চেতোসীসেন হেত্থ সম্মাসমাধি ৰুত্তো, সম্মাসমাধিগ্গহণেনেৰ মগ্গলক্খণেন একলক্খণা সম্মাদিট্ঠিআদযো মগ্গধম্মা গহিতাৰ হোন্তীতি, মগ্গসংৰরেন অভিজ্ঝাদিকস্স অসংৰরস্স অনৰসেসতো পহানং দস্সিতং হোতি। তেনেৰাহ ‘‘সমূলং তণ্হমব্বুয্হা’’তি। সীতিভূতাম্হি নিব্বুতাতি সব্বসো কিলেসপরিল়াহাভাৰেন সীতিভাৰপ্পত্তা অনুপাদিসেসায নিব্বানধাতুযা নিব্বুতা অম্হীতি।
Aparo nayo – kāyena saṃvutāti sammākammantena sabbaso micchākammantassa pahānā maggasaṃvareneva kāyena saṃvutā āsiṃ. Vācāyāti sammāvācāya sabbaso micchāvācāya pahānā maggasaṃvareneva vācāya saṃvutā āsinti attho. Cetasāti samādhinā. Cetosīsena hettha sammāsamādhi vutto, sammāsamādhiggahaṇeneva maggalakkhaṇena ekalakkhaṇā sammādiṭṭhiādayo maggadhammā gahitāva hontīti, maggasaṃvarena abhijjhādikassa asaṃvarassa anavasesato pahānaṃ dassitaṃ hoti. Tenevāha ‘‘samūlaṃ taṇhamabbuyhā’’ti. Sītibhūtāmhi nibbutāti sabbaso kilesapariḷāhābhāvena sītibhāvappattā anupādisesāya nibbānadhātuyā nibbutā amhīti.
উত্তরাথেরীগাথাৰণ্ণনা নিট্ঠিতা।
Uttarātherīgāthāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / থেরীগাথাপাল়ি • Therīgāthāpāḷi / ১৫. উত্তরাথেরীগাথা • 15. Uttarātherīgāthā
