| Library / Tipiṭaka / д̇ибидага • Tipiṭaka / т̇зрийг̇аат̇аа-адтагат̇аа • Therīgāthā-aṭṭhakathā |
15. уд̇д̇араат̇зрийг̇аат̇ааван̣н̣анаа
15. Uttarātherīgāthāvaṇṇanā
гааязна сам̣вуд̇аа аасинд̇и уд̇д̇арааяа т̇зрияаа г̇аат̇аа. д̇ассааби вад̇т̇у д̇иссаат̇зрияаа вад̇т̇усад̣̇исам̣. сааби хи сагяагулаббасуд̇аа б̣од̇хисад̇д̇асса ород̇хабхууд̇аа махаабаж̇аабад̇иг̇од̇амияаа сад̣̇д̇хим̣ нигканд̇аа обхаасаг̇аат̇ааяа арахад̇д̇ам̣ бад̇ваа бана –
Kāyena saṃvutā āsinti uttarāya theriyā gāthā. Tassāpi vatthu tissātheriyā vatthusadisaṃ. Sāpi hi sakyakulappasutā bodhisattassa orodhabhūtā mahāpajāpatigotamiyā saddhiṃ nikkhantā obhāsagāthāya arahattaṃ patvā pana –
15.
15.
‘‘гааязна сам̣вуд̇аа аасим̣, ваажааяа уд̣̇а жзд̇асаа;
‘‘Kāyena saṃvutā āsiṃ, vācāya uda cetasā;
самуулам̣ д̇ан̣хамаб̣б̣уяха, сийд̇ибхууд̇аамхи ниб̣б̣уд̇аа’’д̇и. –
Samūlaṃ taṇhamabbuyha, sītibhūtāmhi nibbutā’’ti. –
уд̣̇аанавасзна д̇амзва г̇аат̇ам̣ абхааси.
Udānavasena tameva gāthaṃ abhāsi.
д̇ад̇т̇а гааязна сам̣вуд̇аа аасинд̇и гааяигзна сам̣варзна сам̣вуд̇аа ахосим̣. ваажааяаад̇и ваажасигзна сам̣варзна сам̣вуд̇аа аасинд̇и яож̇анаа, бад̣̇ад̣̇ваязнааби сийласам̣варамааха. уд̣̇аад̇и ат̇а. жзд̇асаад̇и самаад̇хижид̇д̇зна, зд̇зна вибассанаабхааванамааха. самуулам̣ д̇ан̣хамаб̣б̣уяхаад̇и саанусаяам̣, саха ваа авиж̇ж̇ааяа д̇ан̣хам̣ уд̣̇д̇харид̇ваа. авиж̇ж̇ааяа хи бадижчаад̣̇ид̇аад̣̇ийнавз бхавад̇д̇аяз д̇ан̣хаа уббаж̇ж̇ад̇и.
Tattha kāyena saṃvutā āsinti kāyikena saṃvarena saṃvutā ahosiṃ. Vācāyāti vācasikena saṃvarena saṃvutā āsinti yojanā, padadvayenāpi sīlasaṃvaramāha. Udāti atha. Cetasāti samādhicittena, etena vipassanābhāvanamāha. Samūlaṃ taṇhamabbuyhāti sānusayaṃ, saha vā avijjāya taṇhaṃ uddharitvā. Avijjāya hi paṭicchāditādīnave bhavattaye taṇhā uppajjati.
абаро наяо – гааязна сам̣вуд̇аад̇и саммаагамманд̇зна саб̣б̣асо мижчаагамманд̇асса бахаанаа маг̇г̇асам̣варзнзва гааязна сам̣вуд̇аа аасим̣. ваажааяаад̇и саммааваажааяа саб̣б̣асо мижчааваажааяа бахаанаа маг̇г̇асам̣варзнзва ваажааяа сам̣вуд̇аа аасинд̇и ад̇т̇о. жзд̇асаад̇и самаад̇хинаа. жзд̇осийсзна хзд̇т̇а саммаасамаад̇хи вуд̇д̇о, саммаасамаад̇хиг̇г̇ахан̣знзва маг̇г̇алагкан̣зна згалагкан̣аа саммаад̣̇идтиаад̣̇аяо маг̇г̇ад̇хаммаа г̇ахид̇аава хонд̇ийд̇и, маг̇г̇асам̣варзна абхиж̇жхаад̣̇игасса асам̣варасса анавасзсад̇о бахаанам̣ д̣̇ассид̇ам̣ ход̇и. д̇знзвааха ‘‘самуулам̣ д̇ан̣хамаб̣б̣уяхаа’’д̇и. сийд̇ибхууд̇аамхи ниб̣б̣уд̇аад̇и саб̣б̣асо гилзсабарил̣аахаабхаавзна сийд̇ибхааваббад̇д̇аа анубаад̣̇исзсааяа ниб̣б̣аанад̇хаад̇уяаа ниб̣б̣уд̇аа амхийд̇и.
Aparo nayo – kāyena saṃvutāti sammākammantena sabbaso micchākammantassa pahānā maggasaṃvareneva kāyena saṃvutā āsiṃ. Vācāyāti sammāvācāya sabbaso micchāvācāya pahānā maggasaṃvareneva vācāya saṃvutā āsinti attho. Cetasāti samādhinā. Cetosīsena hettha sammāsamādhi vutto, sammāsamādhiggahaṇeneva maggalakkhaṇena ekalakkhaṇā sammādiṭṭhiādayo maggadhammā gahitāva hontīti, maggasaṃvarena abhijjhādikassa asaṃvarassa anavasesato pahānaṃ dassitaṃ hoti. Tenevāha ‘‘samūlaṃ taṇhamabbuyhā’’ti. Sītibhūtāmhi nibbutāti sabbaso kilesapariḷāhābhāvena sītibhāvappattā anupādisesāya nibbānadhātuyā nibbutā amhīti.
уд̇д̇араат̇зрийг̇аат̇ааван̣н̣анаа нидтид̇аа.
Uttarātherīgāthāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / т̇зрийг̇аат̇аабаал̣и • Therīgāthāpāḷi / 15. уд̇д̇араат̇зрийг̇аат̇аа • 15. Uttarātherīgāthā
