| Library / Tipiṭaka / ਤਿਪਿਟਕ • Tipiṭaka / ਥੇਰੀਗਾਥਾ-ਅਟ੍ਠਕਥਾ • Therīgāthā-aṭṭhakathā |
੧੫. ਉਤ੍ਤਰਾਥੇਰੀਗਾਥਾવਣ੍ਣਨਾ
15. Uttarātherīgāthāvaṇṇanā
ਕਾਯੇਨ ਸਂવੁਤਾ ਆਸਿਨ੍ਤਿ ਉਤ੍ਤਰਾਯ ਥੇਰਿਯਾ ਗਾਥਾ। ਤਸ੍ਸਾਪਿ વਤ੍ਥੁ ਤਿਸ੍ਸਾਥੇਰਿਯਾ વਤ੍ਥੁਸਦਿਸਂ। ਸਾਪਿ ਹਿ ਸਕ੍ਯਕੁਲਪ੍ਪਸੁਤਾ ਬੋਧਿਸਤ੍ਤਸ੍ਸ ਓਰੋਧਭੂਤਾ ਮਹਾਪਜਾਪਤਿਗੋਤਮਿਯਾ ਸਦ੍ਧਿਂ ਨਿਕ੍ਖਨ੍ਤਾ ਓਭਾਸਗਾਥਾਯ ਅਰਹਤ੍ਤਂ ਪਤ੍વਾ ਪਨ –
Kāyena saṃvutā āsinti uttarāya theriyā gāthā. Tassāpi vatthu tissātheriyā vatthusadisaṃ. Sāpi hi sakyakulappasutā bodhisattassa orodhabhūtā mahāpajāpatigotamiyā saddhiṃ nikkhantā obhāsagāthāya arahattaṃ patvā pana –
੧੫.
15.
‘‘ਕਾਯੇਨ ਸਂવੁਤਾ ਆਸਿਂ, વਾਚਾਯ ਉਦ ਚੇਤਸਾ।
‘‘Kāyena saṃvutā āsiṃ, vācāya uda cetasā;
ਸਮੂਲਂ ਤਣ੍ਹਮਬ੍ਬੁਯ੍ਹ, ਸੀਤਿਭੂਤਾਮ੍ਹਿ ਨਿਬ੍ਬੁਤਾ’’ਤਿ॥ –
Samūlaṃ taṇhamabbuyha, sītibhūtāmhi nibbutā’’ti. –
ਉਦਾਨવਸੇਨ ਤਮੇવ ਗਾਥਂ ਅਭਾਸਿ।
Udānavasena tameva gāthaṃ abhāsi.
ਤਤ੍ਥ ਕਾਯੇਨ ਸਂવੁਤਾ ਆਸਿਨ੍ਤਿ ਕਾਯਿਕੇਨ ਸਂવਰੇਨ ਸਂવੁਤਾ ਅਹੋਸਿਂ। વਾਚਾਯਾਤਿ વਾਚਸਿਕੇਨ ਸਂવਰੇਨ ਸਂવੁਤਾ ਆਸਿਨ੍ਤਿ ਯੋਜਨਾ, ਪਦਦ੍વਯੇਨਾਪਿ ਸੀਲਸਂવਰਮਾਹ। ਉਦਾਤਿ ਅਥ। ਚੇਤਸਾਤਿ ਸਮਾਧਿਚਿਤ੍ਤੇਨ, ਏਤੇਨ વਿਪਸ੍ਸਨਾਭਾવਨਮਾਹ। ਸਮੂਲਂ ਤਣ੍ਹਮਬ੍ਬੁਯ੍ਹਾਤਿ ਸਾਨੁਸਯਂ, ਸਹ વਾ ਅવਿਜ੍ਜਾਯ ਤਣ੍ਹਂ ਉਦ੍ਧਰਿਤ੍વਾ। ਅવਿਜ੍ਜਾਯ ਹਿ ਪਟਿਚ੍ਛਾਦਿਤਾਦੀਨવੇ ਭવਤ੍ਤਯੇ ਤਣ੍ਹਾ ਉਪ੍ਪਜ੍ਜਤਿ।
Tattha kāyena saṃvutā āsinti kāyikena saṃvarena saṃvutā ahosiṃ. Vācāyāti vācasikena saṃvarena saṃvutā āsinti yojanā, padadvayenāpi sīlasaṃvaramāha. Udāti atha. Cetasāti samādhicittena, etena vipassanābhāvanamāha. Samūlaṃ taṇhamabbuyhāti sānusayaṃ, saha vā avijjāya taṇhaṃ uddharitvā. Avijjāya hi paṭicchāditādīnave bhavattaye taṇhā uppajjati.
ਅਪਰੋ ਨਯੋ – ਕਾਯੇਨ ਸਂવੁਤਾਤਿ ਸਮ੍ਮਾਕਮ੍ਮਨ੍ਤੇਨ ਸਬ੍ਬਸੋ ਮਿਚ੍ਛਾਕਮ੍ਮਨ੍ਤਸ੍ਸ ਪਹਾਨਾ ਮਗ੍ਗਸਂવਰੇਨੇવ ਕਾਯੇਨ ਸਂવੁਤਾ ਆਸਿਂ। વਾਚਾਯਾਤਿ ਸਮ੍ਮਾવਾਚਾਯ ਸਬ੍ਬਸੋ ਮਿਚ੍ਛਾવਾਚਾਯ ਪਹਾਨਾ ਮਗ੍ਗਸਂવਰੇਨੇવ વਾਚਾਯ ਸਂવੁਤਾ ਆਸਿਨ੍ਤਿ ਅਤ੍ਥੋ। ਚੇਤਸਾਤਿ ਸਮਾਧਿਨਾ। ਚੇਤੋਸੀਸੇਨ ਹੇਤ੍ਥ ਸਮ੍ਮਾਸਮਾਧਿ વੁਤ੍ਤੋ, ਸਮ੍ਮਾਸਮਾਧਿਗ੍ਗਹਣੇਨੇવ ਮਗ੍ਗਲਕ੍ਖਣੇਨ ਏਕਲਕ੍ਖਣਾ ਸਮ੍ਮਾਦਿਟ੍ਠਿਆਦਯੋ ਮਗ੍ਗਧਮ੍ਮਾ ਗਹਿਤਾવ ਹੋਨ੍ਤੀਤਿ, ਮਗ੍ਗਸਂવਰੇਨ ਅਭਿਜ੍ਝਾਦਿਕਸ੍ਸ ਅਸਂવਰਸ੍ਸ ਅਨવਸੇਸਤੋ ਪਹਾਨਂ ਦਸ੍ਸਿਤਂ ਹੋਤਿ। ਤੇਨੇવਾਹ ‘‘ਸਮੂਲਂ ਤਣ੍ਹਮਬ੍ਬੁਯ੍ਹਾ’’ਤਿ। ਸੀਤਿਭੂਤਾਮ੍ਹਿ ਨਿਬ੍ਬੁਤਾਤਿ ਸਬ੍ਬਸੋ ਕਿਲੇਸਪਰਿਲ਼ਾਹਾਭਾવੇਨ ਸੀਤਿਭਾવਪ੍ਪਤ੍ਤਾ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਨਿਬ੍ਬੁਤਾ ਅਮ੍ਹੀਤਿ।
Aparo nayo – kāyena saṃvutāti sammākammantena sabbaso micchākammantassa pahānā maggasaṃvareneva kāyena saṃvutā āsiṃ. Vācāyāti sammāvācāya sabbaso micchāvācāya pahānā maggasaṃvareneva vācāya saṃvutā āsinti attho. Cetasāti samādhinā. Cetosīsena hettha sammāsamādhi vutto, sammāsamādhiggahaṇeneva maggalakkhaṇena ekalakkhaṇā sammādiṭṭhiādayo maggadhammā gahitāva hontīti, maggasaṃvarena abhijjhādikassa asaṃvarassa anavasesato pahānaṃ dassitaṃ hoti. Tenevāha ‘‘samūlaṃ taṇhamabbuyhā’’ti. Sītibhūtāmhi nibbutāti sabbaso kilesapariḷāhābhāvena sītibhāvappattā anupādisesāya nibbānadhātuyā nibbutā amhīti.
ਉਤ੍ਤਰਾਥੇਰੀਗਾਥਾવਣ੍ਣਨਾ ਨਿਟ੍ਠਿਤਾ।
Uttarātherīgāthāvaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਖੁਦ੍ਦਕਨਿਕਾਯ • Khuddakanikāya / ਥੇਰੀਗਾਥਾਪਾਲ਼ਿ • Therīgāthāpāḷi / ੧੫. ਉਤ੍ਤਰਾਥੇਰੀਗਾਥਾ • 15. Uttarātherīgāthā
