Library / Tipiṭaka / д̇ибидага • Tipiṭaka / т̇зраг̇аат̇аа-адтагат̇аа • Theragāthā-aṭṭhakathā

2. д̣̇уганибаад̇о

2. Dukanipāto

1. батамаваг̇г̇о

1. Paṭhamavaggo

1. уд̇д̇арад̇т̇зраг̇аат̇ааван̣н̣анаа

1. Uttarattheragāthāvaṇṇanā

д̣̇уганибаад̇з над̇т̇и гожи бхаво нижжод̇иаад̣̇игаа ааяасмад̇о уд̇д̇арад̇т̇зрасса г̇аат̇аа. гаа уббад̇д̇и? аяамби буримаб̣уд̣̇д̇хзсу гад̇аад̇хигааро д̇ад̇т̇а д̇ад̇т̇а бхавз виваддуубаниссаяам̣ бун̃н̃ам̣ убажинанд̇о сумзд̇хасса бхаг̇авад̇о гаалз виж̇ж̇аад̇харо худ̇ваа аагаасзна вижарад̇и. д̇зна жа самаязна сад̇т̇аа д̇асса ануг̇г̇ан̣ханад̇т̇ам̣ вананд̇арз ан̃н̃ад̇арасмим̣ ругкамуулз нисийд̣̇и чаб̣б̣ан̣н̣аб̣уд̣̇д̇харам̣сияо виссаж̇ж̇знд̇о. со анд̇алигкзна г̇ажчанд̇о бхаг̇аванд̇ам̣ д̣̇исваа басаннажид̇д̇о аагаасад̇о оруяха сувисуд̣̇д̇хзхи вибулзхи ган̣игаарабубпзхи бхаг̇аванд̇ам̣ бууж̇зси, бубпаани б̣уд̣̇д̇хаанубхаавзна сад̇т̇у убари чад̇д̇аагаарзна адтам̣су, со д̇зна бхияяосомад̇д̇ааяа басаннажид̇д̇о худ̇ваа абарабхааг̇з гаалам̣ гад̇ваа д̇аавад̇им̣сз ниб̣б̣ад̇д̇ид̇ваа ул̣аарам̣ д̣̇иб̣б̣асамбад̇д̇им̣ анубхаванд̇о яаавад̇ааяугам̣ д̇ад̇т̇а тад̇ваа д̇ад̇о жуд̇о д̣̇звамануссзсу сам̣саранд̇о имасмим̣ б̣уд̣̇д̇хуббаад̣̇з рааж̇аг̇ахз б̣раахман̣амахаасаалабуд̇д̇о худ̇ваа ниб̣б̣ад̇д̇и, уд̇д̇арод̇исса наамам̣ ахоси. со вин̃н̃уд̇ам̣ бад̇д̇о б̣раахман̣авиж̇ж̇аасу нибпад̇д̇им̣ г̇анд̇ваа ж̇аад̇ияаа руубзна виж̇ж̇ааяа ваязна сийлаажаарзна жа логасса самбхааванийяо ж̇аад̇о. д̇асса д̇ам̣ самбад̇д̇им̣ д̣̇исваа вассагааро маг̇ад̇хамахаамад̇д̇о ад̇д̇ано д̇хийд̇арам̣ д̣̇аад̇угаамо худ̇ваа ад̇д̇ано ад̇хиббааяам̣ бавзд̣̇зси. со ниссаран̣аж̇жхаасаяад̇ааяа д̇ам̣ бадигкибид̇ваа гаалзна гаалам̣ д̇хаммасзнаабад̇им̣ баяирубаасанд̇о д̇асса санд̇игз д̇хаммам̣ суд̇ваа бадилад̣̇д̇хасад̣̇д̇хо баб̣б̣аж̇ид̇ваа вад̇д̇асамбанно худ̇ваа т̇зрам̣ убадтахад̇и.

Dukanipāte natthi koci bhavo niccotiādikā āyasmato uttarattherassa gāthā. Kā uppatti? Ayampi purimabuddhesu katādhikāro tattha tattha bhave vivaṭṭūpanissayaṃ puññaṃ upacinanto sumedhassa bhagavato kāle vijjādharo hutvā ākāsena vicarati. Tena ca samayena satthā tassa anuggaṇhanatthaṃ vanantare aññatarasmiṃ rukkhamūle nisīdi chabbaṇṇabuddharaṃsiyo vissajjento. So antalikkhena gacchanto bhagavantaṃ disvā pasannacitto ākāsato oruyha suvisuddhehi vipulehi kaṇikārapupphehi bhagavantaṃ pūjesi, pupphāni buddhānubhāvena satthu upari chattākārena aṭṭhaṃsu, so tena bhiyyosomattāya pasannacitto hutvā aparabhāge kālaṃ katvā tāvatiṃse nibbattitvā uḷāraṃ dibbasampattiṃ anubhavanto yāvatāyukaṃ tattha ṭhatvā tato cuto devamanussesu saṃsaranto imasmiṃ buddhuppāde rājagahe brāhmaṇamahāsālaputto hutvā nibbatti, uttarotissa nāmaṃ ahosi. So viññutaṃ patto brāhmaṇavijjāsu nipphattiṃ gantvā jātiyā rūpena vijjāya vayena sīlācārena ca lokassa sambhāvanīyo jāto. Tassa taṃ sampattiṃ disvā vassakāro magadhamahāmatto attano dhītaraṃ dātukāmo hutvā attano adhippāyaṃ pavedesi. So nissaraṇajjhāsayatāya taṃ paṭikkhipitvā kālena kālaṃ dhammasenāpatiṃ payirupāsanto tassa santike dhammaṃ sutvā paṭiladdhasaddho pabbajitvā vattasampanno hutvā theraṃ upaṭṭhahati.

д̇зна жа самаязна т̇зрасса ан̃н̃ад̇аро ааб̣аад̇хо уббанно, д̇асса бхзсаж̇ж̇ад̇т̇ааяа уд̇д̇аро сааман̣зро баад̇ова бад̇д̇ажийварамаад̣̇ааяа вихаарад̇о нигканд̇о анд̇араамаг̇г̇з д̇ал̣аагасса д̇ийрз бад̇д̇ам̣ табзд̇ваа уд̣̇агасамийбам̣ г̇анд̇ваа мукам̣ д̇ховад̇и. ат̇а ан̃н̃ад̇аро уман̇г̇ажоро аарагкабурисзхи ануб̣ад̣̇д̇хо аг̇г̇ад̣̇ваарзнзва наг̇арад̇о нигкамид̇ваа балааяанд̇о ад̇д̇анаа г̇ахид̇ам̣ рад̇анабхан̣д̣игам̣ сааман̣зрасса бад̇д̇з багкибид̇ваа балааяи. сааман̣зро бад̇д̇асамийбам̣ убаг̇ад̇о. жорам̣ ануб̣анд̇ханд̇аа рааж̇абурисаа сааман̣зрасса бад̇д̇з бхан̣д̣игам̣ д̣̇исваа, ‘‘аяам̣ жоро, иминаа жорияам̣ гад̇а’’нд̇и сааман̣зрам̣ бажчааб̣аахам̣ б̣анд̇хид̇ваа вассагаарасса б̣раахман̣асса д̣̇ассзсум̣. вассагааро жа д̇ад̣̇аа ран̃н̃о винижчаяз нияуд̇д̇о худ̇ваа чзж̇ж̇абхзж̇ж̇ам̣ анусаасад̇и. со ‘‘буб̣б̣з мама важанам̣ наад̣̇ияи, суд̣̇д̇хабаасан̣д̣иязсу баб̣б̣аж̇ий’’д̇и жа б̣ад̣̇д̇хаагхаад̇ад̇д̇аа гаммам̣ асод̇хзд̇ваава ж̇ийванд̇амзва д̇ам̣ суулз уд̇д̇аасзси.

Tena ca samayena therassa aññataro ābādho uppanno, tassa bhesajjatthāya uttaro sāmaṇero pātova pattacīvaramādāya vihārato nikkhanto antarāmagge taḷākassa tīre pattaṃ ṭhapetvā udakasamīpaṃ gantvā mukhaṃ dhovati. Atha aññataro umaṅgacoro ārakkhapurisehi anubaddho aggadvāreneva nagarato nikkhamitvā palāyanto attanā gahitaṃ ratanabhaṇḍikaṃ sāmaṇerassa patte pakkhipitvā palāyi. Sāmaṇero pattasamīpaṃ upagato. Coraṃ anubandhantā rājapurisā sāmaṇerassa patte bhaṇḍikaṃ disvā, ‘‘ayaṃ coro, iminā coriyaṃ kata’’nti sāmaṇeraṃ pacchābāhaṃ bandhitvā vassakārassa brāhmaṇassa dassesuṃ. Vassakāro ca tadā rañño vinicchaye niyutto hutvā chejjabhejjaṃ anusāsati. So ‘‘pubbe mama vacanaṃ nādiyi, suddhapāsaṇḍiyesu pabbajī’’ti ca baddhāghātattā kammaṃ asodhetvāva jīvantameva taṃ sūle uttāsesi.

ат̇асса бхаг̇аваа н̃аан̣абарибаагам̣ ологзд̇ваа д̇ам̣ таанам̣ г̇анд̇ваа вибпуранд̇ахад̇т̇анакаман̣имаяуукасамбхиннасид̇аабхад̇ааяа баг̇гхаранд̇аж̇аад̇ихин̇г̇улагасуван̣н̣арасад̇хаарам̣ вияа ж̇аалааг̇ун̣тид̇амуд̣̇уд̇алунад̣̇ийгхан̇г̇улихад̇т̇ам̣ уд̇д̇арасса сийсз табзд̇ваа, ‘‘уд̇д̇ара, ид̣̇ам̣ д̇з буримагаммасса палам̣ уббаннам̣, д̇ад̇т̇а д̇аяаа бажжавзгкан̣аб̣алзна ад̇хиваасанаа гаад̇аб̣б̣аа’’д̇и вад̇ваа аж̇жхаасаяаануруубам̣ д̇хаммам̣ д̣̇зсзси. уд̇д̇аро амад̇аабхисзгасад̣̇исзна сад̇т̇у хад̇т̇асампассзна сан̃ж̇аад̇аббасаад̣̇асоманассад̇ааяа ул̣аарам̣ бийд̇ибаамож̇ж̇ам̣ бадилабхид̇ваа яат̇аабарижид̇ам̣ вибассанаамаг̇г̇ам̣ самааруул̣хо н̃аан̣асса барибаагам̣ г̇ад̇ад̇д̇аа сад̇т̇у жа д̣̇зсанаавилаасзна д̇аавад̣̇зва маг̇г̇абадибаадияаа саб̣б̣агилзсз кзбзд̇ваа чал̣абхин̃н̃о ахоси. д̇зна вуд̇д̇ам̣ абад̣̇аанз (аба. т̇зра 2.56.55-92) –

Athassa bhagavā ñāṇaparipākaṃ oloketvā taṃ ṭhānaṃ gantvā vipphurantahatthanakhamaṇimayūkhasambhinnasitābhatāya paggharantajātihiṅgulakasuvaṇṇarasadhāraṃ viya jālāguṇṭhitamudutalunadīghaṅgulihatthaṃ uttarassa sīse ṭhapetvā, ‘‘uttara, idaṃ te purimakammassa phalaṃ uppannaṃ, tattha tayā paccavekkhaṇabalena adhivāsanā kātabbā’’ti vatvā ajjhāsayānurūpaṃ dhammaṃ desesi. Uttaro amatābhisekasadisena satthu hatthasamphassena sañjātappasādasomanassatāya uḷāraṃ pītipāmojjaṃ paṭilabhitvā yathāparicitaṃ vipassanāmaggaṃ samārūḷho ñāṇassa paripākaṃ gatattā satthu ca desanāvilāsena tāvadeva maggapaṭipāṭiyā sabbakilese khepetvā chaḷabhiñño ahosi. Tena vuttaṃ apadāne (apa. thera 2.56.55-92) –

‘‘сумзд̇хо наама самб̣уд̣̇д̇хо, б̣аад̇д̇им̣саваралагкан̣о;

‘‘Sumedho nāma sambuddho, bāttiṃsavaralakkhaṇo;

вивзгагаамо бхаг̇аваа, химаванд̇амубааг̇ами.

Vivekakāmo bhagavā, himavantamupāgami.

‘‘аж̇жхог̇аахзд̇ваа химаванд̇ам̣, аг̇г̇о гаарун̣иго муни;

‘‘Ajjhogāhetvā himavantaṃ, aggo kāruṇiko muni;

баллан̇гам̣ аабхуж̇ид̇ваана, нисийд̣̇и барисуд̇д̇амо.

Pallaṅkaṃ ābhujitvāna, nisīdi parisuttamo.

‘‘виж̇ж̇аад̇харо д̇ад̣̇аа аасим̣, анд̇алигкажаро ахам̣;

‘‘Vijjādharo tadā āsiṃ, antalikkhacaro ahaṃ;

д̇исуулам̣ суг̇ад̇ам̣ г̇аяха, г̇ажчаами амб̣арз д̇ад̣̇аа.

Tisūlaṃ sugataṃ gayha, gacchāmi ambare tadā.

‘‘баб̣б̣ад̇аг̇г̇з яат̇аа аг̇г̇и, бун̣н̣амааязва жанд̣̇имаа;

‘‘Pabbatagge yathā aggi, puṇṇamāyeva candimā;

ванам̣ обхаасад̇з б̣уд̣̇д̇хо, сааларааж̇аава пуллид̇о.

Vanaṃ obhāsate buddho, sālarājāva phullito.

‘‘ванаг̇г̇аа нигкамид̇ваана, б̣уд̣̇д̇харам̣сийбхид̇хааварз;

‘‘Vanaggā nikkhamitvāna, buddharaṃsībhidhāvare;

нал̣аг̇г̇иван̣н̣асан̇гаасаа, д̣̇исваа жид̇д̇ам̣ басаад̣̇аяим̣.

Naḷaggivaṇṇasaṅkāsā, disvā cittaṃ pasādayiṃ.

‘‘вижинам̣ ад̣̇д̣̇асам̣ бубпам̣, ган̣игаарам̣ д̣̇зваг̇анд̇хигам̣;

‘‘Vicinaṃ addasaṃ pupphaṃ, kaṇikāraṃ devagandhikaṃ;

д̇ийн̣и бубпаани аад̣̇ааяа, б̣уд̣̇д̇хасздтамабууж̇аяим̣.

Tīṇi pupphāni ādāya, buddhaseṭṭhamapūjayiṃ.

‘‘б̣уд̣̇д̇хасса аанубхаавзна, д̇ийн̣и бубпаани мз д̇ад̣̇аа;

‘‘Buddhassa ānubhāvena, tīṇi pupphāni me tadā;

уд̣̇д̇хам̣ван̣даа ад̇хобад̇д̇аа, чааяам̣ губ̣б̣анд̇и сад̇т̇уно.

Uddhaṃvaṇṭā adhopattā, chāyaṃ kubbanti satthuno.

‘‘д̇зна гаммзна сугад̇зна, жзд̇анаабан̣ид̇хийхи жа;

‘‘Tena kammena sukatena, cetanāpaṇidhīhi ca;

ж̇ахид̇ваа маанусам̣ д̣̇зхам̣, д̇аавад̇им̣самаг̇ажчахам̣.

Jahitvā mānusaṃ dehaṃ, tāvatiṃsamagacchahaṃ.

‘‘д̇ад̇т̇а мз сугад̇ам̣ б̣яамхам̣, ган̣игаарийд̇и н̃ааяад̇и;

‘‘Tattha me sukataṃ byamhaṃ, kaṇikārīti ñāyati;

садтияож̇анамуб̣б̣зд̇хам̣, д̇им̣саяож̇анавид̇т̇ад̇ам̣.

Saṭṭhiyojanamubbedhaṃ, tiṃsayojanavitthataṃ.

‘‘сахассаган̣д̣ам̣ сад̇абхзн̣д̣у, д̇хаж̇аалу харид̇аамаяам̣;

‘‘Sahassakaṇḍaṃ satabheṇḍu, dhajālu haritāmayaṃ;

сад̇асахассанияяуухаа, б̣яамхз баад̇убхавим̣су мз.

Satasahassaniyyūhā, byamhe pātubhaviṃsu me.

‘‘сон̣н̣амаяаа ман̣имаяаа, лохид̇ан̇гамаяааби жа;

‘‘Soṇṇamayā maṇimayā, lohitaṅkamayāpi ca;

палигааби жа баллан̇гаа, язнижчагаа яад̣̇ижчагаа.

Phalikāpi ca pallaṅkā, yenicchakā yadicchakā.

‘‘махаарахан̃жа саяанам̣, д̇уулигаа вигад̇ийяуд̇ам̣;

‘‘Mahārahañca sayanaṃ, tūlikā vikatīyutaṃ;

уд̣̇д̇халомин̃жа зганд̇ам̣, б̣имб̣оханасамааяуд̇ам̣.

Uddhalomiñca ekantaṃ, bimbohanasamāyutaṃ.

‘‘бхаванаа нигкамид̇ваана, жаранд̇о д̣̇зважааригам̣;

‘‘Bhavanā nikkhamitvāna, caranto devacārikaṃ;

яат̇аа ижчаами г̇аманам̣, д̣̇звасан̇гхабурагкад̇о.

Yathā icchāmi gamanaṃ, devasaṅghapurakkhato.

‘‘бубпасса хздтаа д̇идтаами, убарижчад̣̇анам̣ мама;

‘‘Pupphassa heṭṭhā tiṭṭhāmi, uparicchadanaṃ mama;

саманд̇аа яож̇анасад̇ам̣, ган̣игаарзхи чаад̣̇ид̇ам̣.

Samantā yojanasataṃ, kaṇikārehi chāditaṃ.

‘‘садтид̇уурияасахассаани, сааяам̣ баад̇ам̣ убадтахум̣;

‘‘Saṭṭhitūriyasahassāni, sāyaṃ pātaṃ upaṭṭhahuṃ;

бариваарзнд̇и мам̣ нижжам̣, рад̇д̇инд̣̇ивамад̇анд̣̇ид̇аа.

Parivārenti maṃ niccaṃ, rattindivamatanditā.

‘‘д̇ад̇т̇а нажжзхи г̇ийд̇зхи, д̇аал̣зхи ваад̣̇ид̇зхи жа;

‘‘Tattha naccehi gītehi, tāḷehi vāditehi ca;

рамаами кид̣д̣аа рад̇ияаа, мод̣̇аами гаамагаамахам̣.

Ramāmi khiḍḍā ratiyā, modāmi kāmakāmahaṃ.

‘‘д̇ад̇т̇а бхуд̇ваа бивид̇ваа жа, мод̣̇аами д̇ид̣̇асз д̇ад̣̇аа;

‘‘Tattha bhutvā pivitvā ca, modāmi tidase tadā;

наарийг̇ан̣зхи сахид̇о, мод̣̇аами б̣яамхамуд̇д̇амз.

Nārīgaṇehi sahito, modāmi byamhamuttame.

‘‘сад̇аанам̣ бан̃жагкад̇д̇ун̃жа, д̣̇звараж̇ж̇амагаараяим̣;

‘‘Satānaṃ pañcakkhattuñca, devarajjamakārayiṃ;

сад̇аанам̣ д̇ийн̣игкад̇д̇ун̃жа, жаггавад̇д̇ий ахосахам̣;

Satānaṃ tīṇikkhattuñca, cakkavattī ahosahaṃ;

бад̣̇зсараж̇ж̇ам̣ вибулам̣, г̇ан̣анаад̇о асан̇кияам̣.

Padesarajjaṃ vipulaṃ, gaṇanāto asaṅkhiyaṃ.

‘‘бхавз бхавз сам̣саранд̇о, махаабхог̇ам̣ лабхаамахам̣;

‘‘Bhave bhave saṃsaranto, mahābhogaṃ labhāmahaṃ;

бхог̇з мз уунад̇аа над̇т̇и, б̣уд̣̇д̇хабууж̇ааяид̣̇ам̣ палам̣.

Bhoge me ūnatā natthi, buddhapūjāyidaṃ phalaṃ.

‘‘д̣̇увз бхавз сам̣сараами, д̣̇звад̇д̇з ат̇а маанусз;

‘‘Duve bhave saṃsarāmi, devatte atha mānuse;

ан̃н̃ам̣ г̇ад̇им̣ на ж̇аанаами, б̣уд̣̇д̇хабууж̇ааяид̣̇ам̣ палам̣.

Aññaṃ gatiṃ na jānāmi, buddhapūjāyidaṃ phalaṃ.

‘‘д̣̇увз гулз баж̇ааяаами, кад̇д̇ияз жааби б̣раахман̣з;

‘‘Duve kule pajāyāmi, khattiye cāpi brāhmaṇe;

нийжз гулз на ж̇аанаами, б̣уд̣̇д̇хабууж̇ааяид̣̇ам̣ палам̣.

Nīce kule na jānāmi, buddhapūjāyidaṃ phalaṃ.

‘‘хад̇т̇ияаанам̣ ассаяаанам̣, сивигам̣ санд̣̇амаанигам̣;

‘‘Hatthiyānaṃ assayānaṃ, sivikaṃ sandamānikaṃ;

лабхаами саб̣б̣амзвзд̇ам̣, б̣уд̣̇д̇хабууж̇ааяид̣̇ам̣ палам̣.