| Library / Tipiṭaka / д̇ибидага • Tipiṭaka / вимаанавад̇т̇у-адтагат̇аа • Vimānavatthu-aṭṭhakathā |
15. уд̇д̇араавимаанаван̣н̣анаа
15. Uttarāvimānavaṇṇanā
абхигганд̇зна ван̣н̣знаад̇и уд̇д̇араавимаанам̣. д̇асса гаа уббад̇д̇и? бхаг̇аваа рааж̇аг̇ахз вихарад̇и взл̣уванз галанд̣̇аганиваабз. д̇зна жа самаязна бун̣н̣о наама д̣̇уг̇г̇ад̇абурисо рааж̇аг̇ахасздтим̣ убаниссааяа ж̇ийвад̇и, д̇асса бхарияаа уд̇д̇араа, уд̇д̇араа жа наама д̇хийд̇аад̇и д̣̇вз зва г̇зхамаанусагаа. ат̇згад̣̇ивасам̣ рааж̇аг̇ахз ‘‘махааж̇анзна сад̇д̇аахам̣ нагкад̇д̇ам̣ гийл̣ид̇аб̣б̣а’’нд̇и гхосанам̣ гарим̣су. д̇ам̣ суд̇ваа сздти баад̇ова ааг̇ад̇ам̣ бун̣н̣ам̣ ‘‘д̇аад̇а, амхаагам̣ бариж̇ано нагкад̇д̇ам̣ гийл̣ид̇угаамо, д̇вам̣ гим̣ нагкад̇д̇ам̣ гийл̣иссаси, уд̣̇ааху бхад̇им̣ гариссасий’’д̇и ааха. ‘‘саами, нагкад̇д̇ам̣ наама сад̇ханаанам̣ ход̇и, мама бана г̇зхз сваад̇анааяа яааг̇уд̇ан̣д̣улааниби над̇т̇и, гим̣ мз нагкад̇д̇зна? г̇он̣з лабханд̇о гасид̇ум̣ г̇амиссаамий’д̇и. ‘‘д̇зна хи г̇он̣з г̇ан̣хассуу’’д̇и. со б̣алаваг̇он̣з жа бхад̣̇д̣̇анан̇г̇алан̃жа г̇ахзд̇ваа ‘‘бхад̣̇д̣̇з, нааг̇араа нагкад̇д̇ам̣ гийл̣анд̇и, ахам̣ д̣̇алид̣̇д̣̇ад̇ааяа бхад̇им̣ гаад̇ум̣ г̇амиссаами, маяхамби д̇аава аж̇ж̇а д̣̇иг̇ун̣ам̣ ниваабам̣ бажид̇ваа бхад̇д̇ам̣ аахарзяяаасий’’д̇и бхарияам̣ вад̇ваа кзд̇д̇ам̣ аг̇амааси.
Abhikkantena vaṇṇenāti uttarāvimānaṃ. Tassa kā uppatti? Bhagavā rājagahe viharati veḷuvane kalandakanivāpe. Tena ca samayena puṇṇo nāma duggatapuriso rājagahaseṭṭhiṃ upanissāya jīvati, tassa bhariyā uttarā, uttarā ca nāma dhītāti dve eva gehamānusakā. Athekadivasaṃ rājagahe ‘‘mahājanena sattāhaṃ nakkhattaṃ kīḷitabba’’nti ghosanaṃ kariṃsu. Taṃ sutvā seṭṭhi pātova āgataṃ puṇṇaṃ ‘‘tāta, amhākaṃ parijano nakkhattaṃ kīḷitukāmo, tvaṃ kiṃ nakkhattaṃ kīḷissasi, udāhu bhatiṃ karissasī’’ti āha. ‘‘Sāmi, nakkhattaṃ nāma sadhanānaṃ hoti, mama pana gehe svātanāya yāgutaṇḍulānipi natthi, kiṃ me nakkhattena? Goṇe labhanto kasituṃ gamissāmī’ti. ‘‘Tena hi goṇe gaṇhassū’’ti. So balavagoṇe ca bhaddanaṅgalañca gahetvā ‘‘bhadde, nāgarā nakkhattaṃ kīḷanti, ahaṃ daliddatāya bhatiṃ kātuṃ gamissāmi, mayhampi tāva ajja diguṇaṃ nivāpaṃ pacitvā bhattaṃ āhareyyāsī’’ti bhariyaṃ vatvā khettaṃ agamāsi.
саарибуд̇д̇ад̇т̇зроби сад̇д̇аахам̣ нирод̇хасамаабанно д̇ад̇о вудтааяа ‘‘гасса ну ко аж̇ж̇а маяаа сан̇г̇ахам̣ гаад̇ум̣ ваддад̇ий’’д̇и ологзнд̇о бун̣н̣ам̣ ад̇д̇ано н̃аан̣аж̇ааласса анд̇о бавидтам̣ д̣̇исваа ‘‘сад̣̇д̇хо ну ко зса, сагкиссад̇и ваа мз сан̇г̇ахам̣ гаад̇у’’нд̇и ологзнд̇о д̇асса сад̣̇д̇хабхааван̃жа сан̇г̇ахам̣ гаад̇ум̣ самад̇т̇абхааван̃жа д̇аббажжаяаа жа д̇асса махаасамбад̇д̇ибадилаабхам̣ н̃ад̇ваа бад̇д̇ажийварам̣ аад̣̇ааяа д̇асса гасанадтаанам̣ г̇анд̇ваа ааваадад̇ийрз згам̣ г̇умб̣ам̣ ологзнд̇о адтааси. бун̣н̣о т̇зрам̣ д̣̇исваава гасим̣ табзд̇ваа бан̃жабад̇идтид̇зна т̇зрам̣ ванд̣̇ид̇ваа ‘‘д̣̇анд̇агадтзна ад̇т̇о бхависсад̇ий’’д̇и д̣̇анд̇агадтам̣ габбияам̣ гад̇ваа ад̣̇ааси. ат̇асса т̇зро бад̇д̇ан̃жа бариссааванан̃жа нийхарид̇ваа ад̣̇ааси. со ‘‘баанийязна ад̇т̇о бхависсад̇ий’’д̇и д̇ам̣ аад̣̇ааяа баанийяам̣ бариссаавзд̇ваа ад̣̇ааси.
Sāriputtattheropi sattāhaṃ nirodhasamāpanno tato vuṭṭhāya ‘‘kassa nu kho ajja mayā saṅgahaṃ kātuṃ vaṭṭatī’’ti olokento puṇṇaṃ attano ñāṇajālassa anto paviṭṭhaṃ disvā ‘‘saddho nu kho esa, sakkhissati vā me saṅgahaṃ kātu’’nti olokento tassa saddhabhāvañca saṅgahaṃ kātuṃ samatthabhāvañca tappaccayā ca tassa mahāsampattipaṭilābhaṃ ñatvā pattacīvaraṃ ādāya tassa kasanaṭṭhānaṃ gantvā āvāṭatīre ekaṃ gumbaṃ olokento aṭṭhāsi. Puṇṇo theraṃ disvāva kasiṃ ṭhapetvā pañcapatiṭṭhitena theraṃ vanditvā ‘‘dantakaṭṭhena attho bhavissatī’’ti dantakaṭṭhaṃ kappiyaṃ katvā adāsi. Athassa thero pattañca parissāvanañca nīharitvā adāsi. So ‘‘pānīyena attho bhavissatī’’ti taṃ ādāya pānīyaṃ parissāvetvā adāsi.
т̇зро жинд̇зси ‘‘аяам̣ барзсам̣ бажчимаг̇зхз васад̇и, сажасса г̇зхад̣̇ваарам̣ г̇амиссаами, имасса бхарияаа мам̣ д̣̇адтум̣ на сагкиссад̇и, яаавасса бхарияаа бхад̇д̇ам̣ аад̣̇ааяа маг̇г̇ам̣ бадибаж̇ж̇ад̇и, д̇аава ид̇хзва бхависсаамий’’д̇и. со д̇ад̇т̇зва т̇огам̣ вийд̇инаамзд̇ваа д̇ассаа маг̇г̇аарул̣хабхаавам̣ н̃ад̇ваа анд̇онаг̇араабхимуко бааяааси. саа анд̇араамаг̇г̇з т̇зрам̣ д̣̇исваа жинд̇зси ‘‘аббзгад̣̇аахам̣ д̣̇зяяад̇хаммз сад̇и аяяам̣ на бассаами, аббзгад̣̇аа мз аяяам̣ бассанд̇ияаа д̣̇зяяад̇хаммо на ход̇и, аж̇ж̇а бана мз аяяо жа д̣̇идто, д̣̇зяяад̇хаммо жааяам̣ ад̇т̇и, гариссад̇и ну ко мз сан̇г̇аха’’нд̇и. саа бхад̇д̇абхааж̇анам̣ од̇аарзд̇ваа т̇зрам̣ бан̃жабад̇идтид̇зна ванд̣̇ид̇ваа ‘‘бханд̇з, ид̣̇ам̣ луукам̣ ваа бан̣ийд̇ам̣ ваад̇и ажинд̇зд̇ваа д̣̇аасасса во сан̇г̇ахам̣ гарот̇аа’’д̇и ааха. ат̇а т̇зро бад̇д̇ам̣ убанаамзд̇ваа д̇ааяа згзна хад̇т̇зна бхааж̇анам̣ д̇хаарзд̇ваа згзна хад̇т̇зна д̇ад̇о бхад̇д̇ам̣ д̣̇ад̣̇амаанааяа убад̣дхабхад̇д̇з д̣̇иннз ‘‘ала’’нд̇и хад̇т̇зна бад̇д̇ам̣ бид̣̇ахи. саа ‘‘бханд̇з, згова бадивийсо, на саггаа д̣̇вид̇хаа гаад̇ум̣, д̇умхаагам̣ д̣̇аасасса ид̇халогасан̇г̇ахам̣ агад̇ваа баралогасан̇г̇ахам̣ гарот̇а, ниравасзсамзва д̣̇аад̇угаамаамхий’’д̇и вад̇ваа саб̣б̣амзвасса бад̇д̇з бад̇идтаабзд̇ваа ‘‘д̇умхзхи д̣̇идтад̇хаммасса бхааг̇иний асса’’нд̇и бад̇т̇анам̣ агааси. т̇зро ‘‘звам̣ ход̇уу’’д̇и вад̇ваа тид̇агова анумод̣̇анам̣ гад̇ваа згасмим̣ уд̣̇агапаасугадтаанз нисийд̣̇ид̇ваа бхад̇д̇агижжам̣ агааси. сааби бадинивад̇д̇ид̇ваа д̇ан̣д̣улз бариязсид̇ваа бхад̇д̇ам̣ бажи.
Thero cintesi ‘‘ayaṃ paresaṃ pacchimagehe vasati, sacassa gehadvāraṃ gamissāmi, imassa bhariyā maṃ daṭṭhuṃ na sakkhissati, yāvassa bhariyā bhattaṃ ādāya maggaṃ paṭipajjati, tāva idheva bhavissāmī’’ti. So tattheva thokaṃ vītināmetvā tassā maggāruḷhabhāvaṃ ñatvā antonagarābhimukho pāyāsi. Sā antarāmagge theraṃ disvā cintesi ‘‘appekadāhaṃ deyyadhamme sati ayyaṃ na passāmi, appekadā me ayyaṃ passantiyā deyyadhammo na hoti, ajja pana me ayyo ca diṭṭho, deyyadhammo cāyaṃ atthi, karissati nu kho me saṅgaha’’nti. Sā bhattabhājanaṃ otāretvā theraṃ pañcapatiṭṭhitena vanditvā ‘‘bhante, idaṃ lūkhaṃ vā paṇītaṃ vāti acintetvā dāsassa vo saṅgahaṃ karothā’’ti āha. Atha thero pattaṃ upanāmetvā tāya ekena hatthena bhājanaṃ dhāretvā ekena hatthena tato bhattaṃ dadamānāya upaḍḍhabhatte dinne ‘‘ala’’nti hatthena pattaṃ pidahi. Sā ‘‘bhante, ekova paṭivīso, na sakkā dvidhā kātuṃ, tumhākaṃ dāsassa idhalokasaṅgahaṃ akatvā paralokasaṅgahaṃ karotha, niravasesameva dātukāmāmhī’’ti vatvā sabbamevassa patte patiṭṭhāpetvā ‘‘tumhehi diṭṭhadhammassa bhāginī assa’’nti patthanaṃ akāsi. Thero ‘‘evaṃ hotū’’ti vatvā ṭhitakova anumodanaṃ katvā ekasmiṃ udakaphāsukaṭṭhāne nisīditvā bhattakiccaṃ akāsi. Sāpi paṭinivattitvā taṇḍule pariyesitvā bhattaṃ paci.
бун̣н̣оби ад̣дхагарийсамад̇д̇ам̣ таанам̣ гасид̇ваа ж̇игхажчам̣ сахид̇ум̣ асаггонд̇о г̇он̣з виссаж̇ж̇зд̇ваа згам̣ ругкачааяам̣ бависид̇ваа маг̇г̇ам̣ ологзнд̇о нисийд̣̇и. ат̇асса бхарияаа бхад̇д̇амаад̣̇ааяа г̇ажчамаанаа д̇ам̣ д̣̇исваава ‘‘зса ж̇игхажчаабийл̣ид̇о мам̣ ологзнд̇о нисинно, сажз мам̣ ‘ад̇ивияа жирааяий’д̇и д̇аж̇ж̇зд̇ваа бад̇од̣̇аладтияаа бахариссад̇и, маяаа гад̇агаммам̣ нирад̇т̇агам̣ бхависсад̇и, бадигажжзвасса аарожзссаамий’’д̇и жинд̇зд̇ваа звамааха ‘‘саами, аж̇ж̇згад̣̇ивасам̣ жид̇д̇ам̣ басаад̣̇зхи, маа маяаа гад̇агаммам̣ нирад̇т̇агам̣ гари, ахам̣ баад̇ова д̇з бхад̇д̇ам̣ аахаранд̇ий анд̇араамаг̇г̇з д̇хаммасзнаабад̇им̣ д̣̇исваа д̇ава бхад̇д̇ам̣ д̇асса д̣̇ад̇ваа буна г̇зхам̣ г̇анд̇ваа бхад̇д̇ам̣ бажид̇ваа ааг̇ад̇аа, басаад̣̇зхи, саами, жид̇д̇а’’нд̇и. со ‘‘гим̣ вад̣̇зси, бхад̣̇д̣̇з’’д̇и бужчид̇ваа буна д̇амад̇т̇ам̣ суд̇ваа ‘‘бхад̣̇д̣̇з , саад̇ху вад̇а д̇з гад̇ам̣ мама бхад̇д̇ам̣ аяяасса д̣̇ад̣̇амаанааяа, маяаабисса аж̇ж̇а баад̇ова д̣̇анд̇агадтан̃жа мукод̣̇аган̃жа д̣̇инна’’нд̇и басаннамаанасо д̇ам̣ важанам̣ абхинанд̣̇ид̇ваа уссуурз лад̣̇д̇хабхад̇д̇ад̇ааяа гиланд̇агааяо д̇ассаа ан̇гз сийсам̣ гад̇ваа нид̣̇д̣̇ам̣ оггами.
Puṇṇopi aḍḍhakarīsamattaṃ ṭhānaṃ kasitvā jighacchaṃ sahituṃ asakkonto goṇe vissajjetvā ekaṃ rukkhachāyaṃ pavisitvā maggaṃ olokento nisīdi. Athassa bhariyā bhattamādāya gacchamānā taṃ disvāva ‘‘esa jighacchāpīḷito maṃ olokento nisinno, sace maṃ ‘ativiya cirāyī’ti tajjetvā patodalaṭṭhiyā paharissati, mayā katakammaṃ niratthakaṃ bhavissati, paṭikaccevassa ārocessāmī’’ti cintetvā evamāha ‘‘sāmi, ajjekadivasaṃ cittaṃ pasādehi, mā mayā katakammaṃ niratthakaṃ kari, ahaṃ pātova te bhattaṃ āharantī antarāmagge dhammasenāpatiṃ disvā tava bhattaṃ tassa datvā puna gehaṃ gantvā bhattaṃ pacitvā āgatā, pasādehi, sāmi, citta’’nti. So ‘‘kiṃ vadesi, bhadde’’ti pucchitvā puna tamatthaṃ sutvā ‘‘bhadde , sādhu vata te kataṃ mama bhattaṃ ayyassa dadamānāya, mayāpissa ajja pātova dantakaṭṭhañca mukhodakañca dinna’’nti pasannamānaso taṃ vacanaṃ abhinanditvā ussūre laddhabhattatāya kilantakāyo tassā aṅke sīsaṃ katvā niddaṃ okkami.
ат̇асса баад̇ова гасид̇адтаанам̣ бам̣сужун̣н̣ам̣ убаад̣̇ааяа саб̣б̣ам̣ рад̇д̇асуван̣н̣ам̣ худ̇ваа ган̣игаарабубпарааси вияа собхамаанам̣ адтааси. со баб̣уд̣̇д̇хо ологзд̇ваа бхарияам̣ ааха ‘‘бхад̣̇д̣̇з, зд̇ам̣ маяаа гасид̇адтаанам̣ саб̣б̣ам̣ мама суван̣н̣ам̣ худ̇ваа бан̃н̃ааяад̇и, гим̣ ну ко мз ад̇иуссуурз лад̣̇д̇хабхад̇д̇ад̇ааяа агкийни бхаманд̇ий’’д̇и. ‘‘саами, маяхамби звамзва бан̃н̃ааяад̇ий’’д̇и. со удтааяа д̇ад̇т̇а г̇анд̇ваа згам̣ бин̣д̣ам̣ г̇ахзд̇ваа нан̇г̇аласийсз бахарид̇ваа суван̣н̣абхаавам̣ н̃ад̇ваа ‘‘ахо аяяасса д̇хаммасзнаабад̇исса д̣̇иннад̣̇аанз аж̇ж̇зва вибааго д̣̇ассид̇о, на ко бана саггаа зд̇д̇агам̣ д̇ханам̣ бадижчаад̣̇зд̇ваа барибхун̃ж̇ид̇у’’нд̇и бхарияааяа аабхад̇ам̣ бхад̇д̇абаад̇им̣ суван̣н̣асса буурзд̇ваа рааж̇агулам̣ г̇анд̇ваа ран̃н̃аа гад̇огаасо бависид̇ваа рааж̇аанам̣ абхиваад̣̇зд̇ваа ‘‘гим̣ д̇аад̇аа’’д̇и вуд̇д̇з ‘‘д̣̇зва, аж̇ж̇а маяаа гасид̇адтаанам̣ саб̣б̣ам̣ суван̣н̣араасимзва худ̇ваа тид̇ам̣, суван̣н̣ам̣ аахараабзд̇ум̣ ваддад̇ий’’д̇и ааха. ‘‘госи д̇ва’’нд̇и? ‘‘бун̣н̣о наамааха’’нд̇и. ‘‘гим̣ бана д̇з аж̇ж̇а гад̇а’’нд̇и? ‘‘д̇хаммасзнаабад̇исса мз баад̇ова д̣̇анд̇агадтан̃жа мукод̣̇аган̃жа д̣̇иннам̣, бхарияааяаби мз маяхам̣ аахадабхад̇д̇ам̣ д̇ассзва д̣̇инна’’нд̇и.
Athassa pātova kasitaṭṭhānaṃ paṃsucuṇṇaṃ upādāya sabbaṃ rattasuvaṇṇaṃ hutvā kaṇikārapuppharāsi viya sobhamānaṃ aṭṭhāsi. So pabuddho oloketvā bhariyaṃ āha ‘‘bhadde, etaṃ mayā kasitaṭṭhānaṃ sabbaṃ mama suvaṇṇaṃ hutvā paññāyati, kiṃ nu kho me atiussūre laddhabhattatāya akkhīni bhamantī’’ti. ‘‘Sāmi, mayhampi evameva paññāyatī’’ti. So uṭṭhāya tattha gantvā ekaṃ piṇḍaṃ gahetvā naṅgalasīse paharitvā suvaṇṇabhāvaṃ ñatvā ‘‘aho ayyassa dhammasenāpatissa dinnadāne ajjeva vipāko dassito, na kho pana sakkā ettakaṃ dhanaṃ paṭicchādetvā paribhuñjitu’’nti bhariyāya ābhataṃ bhattapātiṃ suvaṇṇassa pūretvā rājakulaṃ gantvā raññā katokāso pavisitvā rājānaṃ abhivādetvā ‘‘kiṃ tātā’’ti vutte ‘‘deva, ajja mayā kasitaṭṭhānaṃ sabbaṃ suvaṇṇarāsimeva hutvā ṭhitaṃ, suvaṇṇaṃ āharāpetuṃ vaṭṭatī’’ti āha. ‘‘Kosi tva’’nti? ‘‘Puṇṇo nāmāha’’nti. ‘‘Kiṃ pana te ajja kata’’nti? ‘‘Dhammasenāpatissa me pātova dantakaṭṭhañca mukhodakañca dinnaṃ, bhariyāyapi me mayhaṃ āhaṭabhattaṃ tasseva dinna’’nti.
д̇ам̣ суд̇ваа рааж̇аа ‘‘аж̇ж̇зва гира бхо д̇хаммасзнаабад̇исса д̣̇иннад̣̇аанз вибааго д̣̇ассид̇о’’д̇и вад̇ваа ‘‘д̇аад̇а, гим̣ гаромий’’д̇и бужчи. ‘‘б̣ахууни сагадасахассаани бахин̣ид̇ваа суван̣н̣ам̣ аахараабзт̇аа’’д̇и. рааж̇аа сагадаани бахин̣и. рааж̇абурисзсу ‘‘ран̃н̃о санд̇ага’’нд̇и г̇ан̣ханд̇зсу г̇ахид̇ам̣ г̇ахид̇ам̣ мад̇д̇игаава ход̇и. д̇зхи г̇анд̇ваа ран̃н̃о аарожид̇з ‘‘д̇аад̇аа, д̇умхзхи гинд̇и вад̇ваа г̇ахид̇а’’нд̇и буаа ‘‘д̇умхаагам̣ санд̇ага’’нд̇и аахам̣су. д̇зна хи, д̇аад̇аа, буна г̇ажчат̇а, ‘‘бун̣н̣асса санд̇ага’’нд̇и вад̇ваа г̇ан̣хат̇аад̇и. д̇з д̇ат̇аа гарим̣су г̇ахид̇ам̣ г̇ахид̇ам̣ суван̣н̣амзва ахоси. д̇ам̣ саб̣б̣ам̣ аахарид̇ваа рааж̇ан̇г̇ан̣з раасим̣ агам̣су, асийд̇ихад̇т̇уб̣б̣зд̇хо рааси ахоси. рааж̇аа нааг̇арз саннибаад̇аабзд̇ваа ааха ‘‘имасмим̣ наг̇арз ад̇т̇и гассажи зд̇д̇агам̣ суван̣н̣а’’нд̇и? ‘‘над̇т̇и, д̣̇зваа’’д̇и. ‘‘гим̣ банасса д̣̇аад̇ум̣ ваддад̇ий’’д̇и? ‘‘сздтижчад̇д̇ам̣, д̣̇зваа’’д̇и. рааж̇аа ‘‘б̣ахуд̇ханасздти наама ход̇уу’’д̇и маханд̇зна бхог̇зна сад̣̇д̇хим̣ д̇асса сздтижчад̇д̇ам̣ ад̣̇ааси.
Taṃ sutvā rājā ‘‘ajjeva kira bho dhammasenāpatissa dinnadāne vipāko dassito’’ti vatvā ‘‘tāta, kiṃ karomī’’ti pucchi. ‘‘Bahūni sakaṭasahassāni pahiṇitvā suvaṇṇaṃ āharāpethā’’ti. Rājā sakaṭāni pahiṇi. Rājapurisesu ‘‘rañño santaka’’nti gaṇhantesu gahitaṃ gahitaṃ mattikāva hoti. Tehi gantvā rañño ārocite ‘‘tātā, tumhehi kinti vatvā gahita’’nti puā ‘‘tumhākaṃ santaka’’nti āhaṃsu. Tena hi, tātā, puna gacchatha, ‘‘puṇṇassa santaka’’nti vatvā gaṇhathāti. Te tathā kariṃsu gahitaṃ gahitaṃ suvaṇṇameva ahosi. Taṃ sabbaṃ āharitvā rājaṅgaṇe rāsiṃ akaṃsu, asītihatthubbedho rāsi ahosi. Rājā nāgare sannipātāpetvā āha ‘‘imasmiṃ nagare atthi kassaci ettakaṃ suvaṇṇa’’nti? ‘‘Natthi, devā’’ti. ‘‘Kiṃ panassa dātuṃ vaṭṭatī’’ti? ‘‘Seṭṭhicchattaṃ, devā’’ti. Rājā ‘‘bahudhanaseṭṭhi nāma hotū’’ti mahantena bhogena saddhiṃ tassa seṭṭhicchattaṃ adāsi.
ат̇а нам̣ со ааха ‘‘маяам̣, д̣̇зва, зд̇д̇агам̣ гаалам̣ барагулз васимхаа, васанадтаанам̣ но д̣̇зт̇аа’’д̇и. д̇зна хи басса, зса г̇умб̣о бан̃н̃ааяад̇и, зд̇ам̣ хараабзд̇ваа г̇зхам̣ гаарзхийд̇и бураан̣асздтисса г̇зхадтаанам̣ аажигки. со д̇асмим̣ таанз гад̇ибаахзнзва г̇зхам̣ гаараабзд̇ваа г̇зхабавзсанаман̇г̇алан̃жа чад̇д̇аман̇г̇алан̃жа згад̇ова гаронд̇о сад̇д̇аахам̣ б̣уд̣̇д̇хаббамукасса бхигкусан̇гхасса д̣̇аанам̣ ад̣̇ааси. ат̇асса сад̇т̇аа д̣̇аанаанумод̣̇анам̣ гаронд̇о анубуб̣б̣им̣ гат̇ам̣ гат̇зси. д̇хаммагат̇аавасаанз бун̣н̣асздти жа бхарияаа жасса д̇хийд̇аа жа уд̇д̇араад̇и д̇аяоби ж̇анаа сод̇аабаннаа ахзсум̣.
Atha naṃ so āha ‘‘mayaṃ, deva, ettakaṃ kālaṃ parakule vasimhā, vasanaṭṭhānaṃ no dethā’’ti. Tena hi passa, esa gumbo paññāyati, etaṃ harāpetvā gehaṃ kārehīti purāṇaseṭṭhissa gehaṭṭhānaṃ ācikkhi. So tasmiṃ ṭhāne katipāheneva gehaṃ kārāpetvā gehapavesanamaṅgalañca chattamaṅgalañca ekatova karonto sattāhaṃ buddhappamukhassa bhikkhusaṅghassa dānaṃ adāsi. Athassa satthā dānānumodanaṃ karonto anupubbiṃ kathaṃ kathesi. Dhammakathāvasāne puṇṇaseṭṭhi ca bhariyā cassa dhītā ca uttarāti tayopi janā sotāpannā ahesuṃ.
абарабхааг̇з рааж̇аг̇ахасздти бун̣н̣асздтино д̇хийд̇арам̣ ад̇д̇ано буд̇д̇асса ваарзси. со ‘‘наахам̣ д̣̇ассаамий’’д̇и вуд̇д̇о ‘‘маа звам̣ гарод̇у, зд̇д̇агам̣ гаалам̣ амхз ниссааяа васанд̇знзва д̇з самбад̇д̇и лад̣̇д̇хаа, д̣̇зд̇у мз буд̇д̇асса д̇з д̇хийд̇ара’’нд̇и ааха. со ‘‘мижчаад̣̇идтигаа д̇умхз, мама д̇хийд̇аа д̇ийхи рад̇анзхи винаа васид̇ум̣ на саггод̇и, нзвасса д̇хийд̇арам̣ д̣̇ассаамий’’д̇и ааха. ат̇а нам̣ б̣ахуу сздтиг̇ахабад̇игаад̣̇аяо гулабуд̇д̇аа ‘‘маа д̇зна сад̣̇д̇хим̣ виссаасам̣ бхинд̣̇и, д̣̇зхисса д̇хийд̇ара’’нд̇и яаажим̣су. со д̇зсам̣ важанам̣ самбадижчид̇ваа аасаал̣хибун̣н̣амааяа д̇хийд̇арам̣ ад̣̇ааси. саа бад̇игулам̣ г̇ад̇агаалад̇о бадтааяа бхигкум̣ ваа бхигкуним̣ ваа убасан̇гамид̇ум̣ д̣̇аанам̣ ваа д̣̇аад̇ум̣ д̇хаммам̣ ваа сод̇ум̣ наалад̇т̇а, звам̣ ад̣дхад̇иязсу маасзсу вийд̇ивад̇д̇зсу ад̇д̇ано санд̇игз тид̇з барижааригз бужчи ‘‘ид̣̇аани гид̇д̇агам̣ анд̇овассам̣ авасидта’’нд̇и? ‘‘ад̣дхамаасо, аяяз’’д̇и. саа маад̇аабид̇уунам̣ саасанам̣ бахин̣и ‘‘гасмаа мам̣ зваруубз б̣анд̇ханааг̇аарз багкибим̣су, варам̣ д̇умхзхи мам̣ лагкан̣аахад̇ам̣ гад̇ваа барзсам̣ д̣̇аасим̣ саавзд̇ум̣, на зваруубасса мижчаад̣̇идтигасса гуласса д̣̇аад̇ум̣, ааг̇ад̇агаалад̇о бадтааяа бхигкуд̣̇ассанаад̣̇ийсу згамби бун̃н̃ам̣ гаад̇ум̣ на лабхаамий’’д̇и. ат̇ассаа бид̇аа ‘‘д̣̇угкид̇аа вад̇а мз д̇хийд̇аа’’д̇и анад̇д̇аманад̇ам̣ бавзд̣̇зд̇ваа бан̃жад̣̇аса гахаабан̣асахассаани бзсзси, ‘‘имасмим̣ наг̇арз сиримаа наама г̇ан̣игаа ад̇т̇и, д̣̇звасигам̣ сахассам̣ г̇ан̣хаад̇и, имзхи гахаабан̣зхи д̇ам̣ аанзд̇ваа саамигасса нияяаад̣̇зд̇ваа саяам̣ яат̇ааружи бун̃н̃аани гарод̇уу’’д̇и саасанан̃жа бахин̣и. уд̇д̇араа д̇ат̇аа гад̇ваа саамигзна сиримам̣ д̣̇исваа ‘‘гимид̣̇а’’нд̇и вуд̇д̇з ‘‘саами, имам̣ ад̣дхамаасам̣ мама сахааяигаа д̇умхз барижарад̇у, ахам̣ бана имам̣ ад̣дхамаасам̣ д̣̇аанан̃жзва д̣̇аад̇угаамаа д̇хамман̃жа сод̇угаамаа’’д̇и ааха. со д̇ам̣ абхируубам̣ ид̇т̇им̣ д̣̇исваа уббаннасинзхо ‘‘саад̇хуу’’д̇и самбадижчи.
Aparabhāge rājagahaseṭṭhi puṇṇaseṭṭhino dhītaraṃ attano puttassa vāresi. So ‘‘nāhaṃ dassāmī’’ti vutto ‘‘mā evaṃ karotu, ettakaṃ kālaṃ amhe nissāya vasanteneva te sampatti laddhā, detu me puttassa te dhītara’’nti āha. So ‘‘micchādiṭṭhikā tumhe, mama dhītā tīhi ratanehi vinā vasituṃ na sakkoti, nevassa dhītaraṃ dassāmī’’ti āha. Atha naṃ bahū seṭṭhigahapatikādayo kulaputtā ‘‘mā tena saddhiṃ vissāsaṃ bhindi, dehissa dhītara’’nti yāciṃsu. So tesaṃ vacanaṃ sampaṭicchitvā āsāḷhipuṇṇamāya dhītaraṃ adāsi. Sā patikulaṃ gatakālato paṭṭhāya bhikkhuṃ vā bhikkhuniṃ vā upasaṅkamituṃ dānaṃ vā dātuṃ dhammaṃ vā sotuṃ nālattha, evaṃ aḍḍhatiyesu māsesu vītivattesu attano santike ṭhite paricārike pucchi ‘‘idāni kittakaṃ antovassaṃ avasiṭṭha’’nti? ‘‘Aḍḍhamāso, ayye’’ti. Sā mātāpitūnaṃ sāsanaṃ pahiṇi ‘‘kasmā maṃ evarūpe bandhanāgāre pakkhipiṃsu, varaṃ tumhehi maṃ lakkhaṇāhataṃ katvā paresaṃ dāsiṃ sāvetuṃ, na evarūpassa micchādiṭṭhikassa kulassa dātuṃ, āgatakālato paṭṭhāya bhikkhudassanādīsu ekampi puññaṃ kātuṃ na labhāmī’’ti. Athassā pitā ‘‘dukkhitā vata me dhītā’’ti anattamanataṃ pavedetvā pañcadasa kahāpaṇasahassāni pesesi, ‘‘imasmiṃ nagare sirimā nāma gaṇikā atthi, devasikaṃ sahassaṃ gaṇhāti, imehi kahāpaṇehi taṃ ānetvā sāmikassa niyyādetvā sayaṃ yathāruci puññāni karotū’’ti sāsanañca pahiṇi. Uttarā tathā katvā sāmikena sirimaṃ disvā ‘‘kimida’’nti vutte ‘‘sāmi, imaṃ aḍḍhamāsaṃ mama sahāyikā tumhe paricaratu, ahaṃ pana imaṃ aḍḍhamāsaṃ dānañceva dātukāmā dhammañca sotukāmā’’ti āha. So taṃ abhirūpaṃ itthiṃ disvā uppannasineho ‘‘sādhū’’ti sampaṭicchi.
уд̇д̇арааби ко б̣уд̣̇д̇хаббамукам̣ бхигкусан̇гхам̣ ниманд̇зд̇ваа ‘‘бханд̇з, имам̣ ад̣дхамаасам̣ ан̃н̃ад̇т̇а аг̇анд̇ваа ид̇хзва бхигкаа г̇ахзд̇аб̣б̣аа’’д̇и сад̇т̇у бадин̃н̃ам̣ г̇ахзд̇ваа ‘‘ид̇о д̣̇аани бадтааяа яаава махаабавааран̣аа, д̇аава сад̇т̇аарам̣ убадтаад̇ум̣ д̇хамман̃жа сод̇ум̣ лабхиссаамий’’д̇и д̇удтамаанасаа ‘‘звам̣ яааг̇ум̣ бажат̇а, звам̣ бхад̇д̇ам̣ бажат̇а, звам̣ буувам̣ бажат̇аа’’д̇и махаанасз саб̣б̣агижжаани сам̣вид̣̇аханд̇ий вижарад̇и. ат̇ассаа саамиго ‘‘свз махаабавааран̣аа бхависсад̇ий’’д̇и махаанасаабхимуко ваад̇абаанз тад̇ваа ‘‘гим̣ ну ко гаронд̇ий саа анд̇хаб̣аалаа вижарад̇ий’’д̇и ологзд̇ваа д̇ам̣ сзд̣̇агилиннам̣ чааригааяа огин̣н̣ам̣ ан̇г̇аарамасимагкид̇ам̣ д̇ат̇аа сам̣вид̣̇ахид̇ваа вижарамаанам̣ д̣̇исваа ‘‘ахо анд̇хаб̣аалаа зваруубз таанз имам̣ сирисамбад̇д̇им̣ наанубхавад̇и, ‘‘мун̣д̣агасаман̣з убадтахиссаамий’д̇и д̇удтажид̇д̇аа вижарад̇ий’’д̇и хасид̇ваа абаг̇ан̃чи.
Uttarāpi kho buddhappamukhaṃ bhikkhusaṅghaṃ nimantetvā ‘‘bhante, imaṃ aḍḍhamāsaṃ aññattha agantvā idheva bhikkhā gahetabbā’’ti satthu paṭiññaṃ gahetvā ‘‘ito dāni paṭṭhāya yāva mahāpavāraṇā, tāva satthāraṃ upaṭṭhātuṃ dhammañca sotuṃ labhissāmī’’ti tuṭṭhamānasā ‘‘evaṃ yāguṃ pacatha, evaṃ bhattaṃ pacatha, evaṃ pūvaṃ pacathā’’ti mahānase sabbakiccāni saṃvidahantī vicarati. Athassā sāmiko ‘‘sve mahāpavāraṇā bhavissatī’’ti mahānasābhimukho vātapāne ṭhatvā ‘‘kiṃ nu kho karontī sā andhabālā vicaratī’’ti oloketvā taṃ sedakilinnaṃ chārikāya okiṇṇaṃ aṅgāramasimakkhitaṃ tathā saṃvidahitvā vicaramānaṃ disvā ‘‘aho andhabālā evarūpe ṭhāne imaṃ sirisampattiṃ nānubhavati, ‘‘muṇḍakasamaṇe upaṭṭhahissāmī’ti tuṭṭhacittā vicaratī’’ti hasitvā apagañchi.
д̇асмим̣ абаг̇ад̇з д̇асса санд̇игз тид̇аа сиримаа ‘‘гим̣ ну ко ологзд̇ваа зса хасад̇ий’’д̇и д̇знзва ваад̇абаанзна ологзнд̇ий уд̇д̇арам̣ д̣̇исваа ‘‘имам̣ ологзд̇ваа иминаа хасид̇ам̣, ад̣̇д̇хаа имасса зд̇ааяа сад̣̇д̇хим̣ сант̇аво ад̇т̇ий’’д̇и жинд̇зси. саа гира ад̣дхамаасам̣ д̇асмим̣ г̇зхз б̣аахирагаид̇т̇ий худ̇ваа васамаанааби д̇ам̣ самбад̇д̇им̣ анубхавамаанаа ад̇д̇ано б̣аахирагаид̇т̇ибхаавам̣ аж̇аанид̇ваа ‘‘ахам̣ гхарасааминий’’д̇и сан̃н̃амагааси. саа уд̇д̇арааяа аагхаад̇ам̣ б̣анд̇хид̇ваа ‘‘д̣̇угкамассаа уббаад̣̇зссаамий’’д̇и баасаад̣̇аа оруяха махаанасам̣ бависид̇ваа буувабажанадтаанз баггут̇ид̇ам̣ саббим̣ гадажчунаа аад̣̇ааяа уд̇д̇араабхимукам̣ бааяааси. уд̇д̇араа д̇ам̣ ааг̇ажчанд̇им̣ д̣̇исваа ‘‘мама сахааяигааяа маяхам̣ убагааро гад̇о, жаггаваал̣ам̣ ад̇исамб̣аад̇хам̣, б̣рахмалого ад̇инийжаго, мама бана сахааяигааяа г̇ун̣ова маханд̇о, ахамби зд̇ам̣ ниссааяа д̣̇аанан̃жа д̣̇аад̇ум̣ д̇хамман̃жа сод̇ум̣ лабхим̣, сажз мама зд̇иссааяа убари год̇хо ад̇т̇и, ид̣̇ам̣ сабби мам̣ д̣̇ахад̇у, сажз над̇т̇и, маа мам̣ д̣̇ахад̇уу’’д̇и д̇ам̣ мзд̇д̇ааяа пари. д̇ааяа д̇ассаа мад̇т̇агз аасин̃жид̇амби баггут̇ид̇асабби сийд̇од̣̇агам̣ вияа ахоси. ат̇а нам̣ ‘‘ид̣̇ам̣ сийд̇алам̣ бхависсад̇ий’’д̇и буна гадажчугам̣ буурзд̇ваа аад̣̇ааяа ааг̇ажчанд̇им̣ уд̇д̇арааяа д̣̇аасияо д̣̇исваа ‘‘арз д̣̇уб̣б̣инийд̇з на д̇вам̣ амхаагам̣ аяяааяа убари баггасаббим̣ аасин̃жид̇ум̣ анужчавигаа’’д̇и санд̇аж̇ж̇знд̇ияо ид̇о жид̇о жа удтааяа хад̇т̇зхи жа баад̣̇зхи жа бот̇зд̇ваа бхуумияам̣ баад̇зсум̣, уд̇д̇араа ваарзнд̇ийби ваарзд̇ум̣ наасагки. ат̇а саа убари тад̇ваа саб̣б̣аа д̣̇аасияо бадиб̣аахид̇ваа ‘‘гисса д̇з зваруубам̣ бхаарияам̣ гаммам̣ гад̇а’’нд̇и сиримам̣ овад̣̇ид̇ваа ун̣ход̣̇агзна нхаабзд̇ваа сад̇абаагад̇злзна аб̣бхан̃ж̇и.
Tasmiṃ apagate tassa santike ṭhitā sirimā ‘‘kiṃ nu kho oloketvā esa hasatī’’ti teneva vātapānena olokentī uttaraṃ disvā ‘‘imaṃ oloketvā iminā hasitaṃ, addhā imassa etāya saddhiṃ santhavo atthī’’ti cintesi. Sā kira aḍḍhamāsaṃ tasmiṃ gehe bāhirakaitthī hutvā vasamānāpi taṃ sampattiṃ anubhavamānā attano bāhirakaitthibhāvaṃ ajānitvā ‘‘ahaṃ gharasāminī’’ti saññamakāsi. Sā uttarāya āghātaṃ bandhitvā ‘‘dukkhamassā uppādessāmī’’ti pāsādā oruyha mahānasaṃ pavisitvā pūvapacanaṭṭhāne pakkuthitaṃ sappiṃ kaṭacchunā ādāya uttarābhimukhaṃ pāyāsi. Uttarā taṃ āgacchantiṃ disvā ‘‘mama sahāyikāya mayhaṃ upakāro kato, cakkavāḷaṃ atisambādhaṃ, brahmaloko atinīcako, mama pana sahāyikāya guṇova mahanto, ahampi etaṃ nissāya dānañca dātuṃ dhammañca sotuṃ labhiṃ, sace mama etissāya upari kodho atthi, idaṃ sappi maṃ dahatu, sace natthi, mā maṃ dahatū’’ti taṃ mettāya phari. Tāya tassā matthake āsiñcitampi pakkuthitasappi sītodakaṃ viya ahosi. Atha naṃ ‘‘idaṃ sītalaṃ bhavissatī’’ti puna kaṭacchukaṃ pūretvā ādāya āgacchantiṃ uttarāya dāsiyo disvā ‘‘are dubbinīte na tvaṃ amhākaṃ ayyāya upari pakkasappiṃ āsiñcituṃ anucchavikā’’ti santajjentiyo ito cito ca uṭṭhāya hatthehi ca pādehi ca pothetvā bhūmiyaṃ pātesuṃ, uttarā vārentīpi vāretuṃ nāsakkhi. Atha sā upari ṭhatvā sabbā dāsiyo paṭibāhitvā ‘‘kissa te evarūpaṃ bhāriyaṃ kammaṃ kata’’nti sirimaṃ ovaditvā uṇhodakena nhāpetvā satapākatelena abbhañji.
д̇асмим̣ кан̣з саа ад̇д̇ано б̣аахирагид̇т̇ибхаавам̣ н̃ад̇ваа жинд̇зси ‘‘маяаа бхаарияам̣ гаммам̣ гад̇ам̣ саамигасса хасид̇амад̇д̇агааран̣аа имиссаа убари баггасаббим̣ аасин̃жанд̇ияаа, аяам̣ ‘г̇ан̣хат̇а на’нд̇и д̣̇аасияо на аан̣аабзд̇ваа мам̣ вихзтанагаалзби саб̣б̣аа д̣̇аасияо бадиб̣аахид̇ваа маяхам̣ гад̇д̇аб̣б̣амзва агааси. сажаахам̣ имам̣ на камаабзссаами, муд̣̇д̇хаа мз сад̇д̇ад̇хаа палзяяаа’’д̇и д̇ассаа баад̣̇амуулз нибаж̇ж̇ид̇ваа ‘‘аяяз, камаахи мз д̣̇оса’’нд̇и ааха. ‘‘ахам̣ саббид̇игаа д̇хийд̇аа, бид̇ари мз камаабид̇з камиссаамий’’д̇и. ‘‘ход̇у, аяяз, бид̇арамби д̇з бун̣н̣асздтим̣ камаабзссаамий’’д̇и. ‘‘бун̣н̣о мама ваддз ж̇анагабид̇аа, виваддз ж̇анагабид̇ари камаабид̇з бана ахам̣ камиссаамий’’д̇и. ‘‘го бана д̇з виваддз ж̇анагабид̇аа’’д̇и? ‘‘саммаасамб̣уд̣̇д̇хо’’д̇и. ‘‘маяхам̣ д̇зна сад̣̇д̇хим̣ виссаасо над̇т̇и, ахам̣ гим̣ гариссаамий’’д̇и? ‘‘сад̇т̇аа свз бхигкусан̇гхам̣ аад̣̇ааяа ид̇хааг̇амиссад̇и, д̇вам̣ яат̇аалад̣̇д̇хам̣ саггаарам̣ г̇ахзд̇ваа ид̇хзва ааг̇анд̇ваа д̇ам̣ камаабзхий’’д̇и. саа ‘‘саад̇ху, аяяз’’д̇и удтааяа ад̇д̇ано г̇зхам̣ г̇анд̇ваа бан̃жасад̇абарижааригид̇т̇ияо аан̣аабзд̇ваа наанаавид̇хаани каад̣̇анийяабхож̇анийяаани жзва суубзяяаани жа самбаад̣̇зд̇ваа бунад̣̇ивасз д̇ам̣ саггаарам̣ аад̣̇ааяа уд̇д̇арааяа г̇зхам̣ ааг̇анд̇ваа б̣уд̣̇д̇хаббамукасса бхигкусан̇гхасса бад̇д̇з бад̇идтаабзд̇ум̣ ависаханд̇ий адтааси, д̇ам̣ саб̣б̣ам̣ г̇ахзд̇ваа уд̇д̇араава сам̣вид̣̇ахи.
Tasmiṃ khaṇe sā attano bāhirakitthibhāvaṃ ñatvā cintesi ‘‘mayā bhāriyaṃ kammaṃ kataṃ sāmikassa hasitamattakāraṇā imissā upari pakkasappiṃ āsiñcantiyā, ayaṃ ‘gaṇhatha na’nti dāsiyo na āṇāpetvā maṃ viheṭhanakālepi sabbā dāsiyo paṭibāhitvā mayhaṃ kattabbameva akāsi. Sacāhaṃ imaṃ na khamāpessāmi, muddhā me sattadhā phaleyyā’’ti tassā pādamūle nipajjitvā ‘‘ayye, khamāhi me dosa’’nti āha. ‘‘Ahaṃ sappitikā dhītā, pitari me khamāpite khamissāmī’’ti. ‘‘Hotu, ayye, pitarampi te puṇṇaseṭṭhiṃ khamāpessāmī’’ti. ‘‘Puṇṇo mama vaṭṭe janakapitā, vivaṭṭe janakapitari khamāpite pana ahaṃ khamissāmī’’ti. ‘‘Ko pana te vivaṭṭe janakapitā’’ti? ‘‘Sammāsambuddho’’ti. ‘‘Mayhaṃ tena saddhiṃ vissāso natthi, ahaṃ kiṃ karissāmī’’ti? ‘‘Satthā sve bhikkhusaṅghaṃ ādāya idhāgamissati, tvaṃ yathāladdhaṃ sakkāraṃ gahetvā idheva āgantvā taṃ khamāpehī’’ti. Sā ‘‘sādhu, ayye’’ti uṭṭhāya attano gehaṃ gantvā pañcasataparicārikitthiyo āṇāpetvā nānāvidhāni khādanīyabhojanīyāni ceva sūpeyyāni ca sampādetvā punadivase taṃ sakkāraṃ ādāya uttarāya gehaṃ āgantvā buddhappamukhassa bhikkhusaṅghassa patte patiṭṭhāpetuṃ avisahantī aṭṭhāsi, taṃ sabbaṃ gahetvā uttarāva saṃvidahi.
сиримааби сад̇т̇у бхад̇д̇агижжаавасаанз сад̣̇д̇хим̣ бариваарзна сад̇т̇у баад̣̇амуулз нибаж̇ж̇и. ат̇а нам̣ сад̇т̇аа бужчи ‘‘го д̇з абараад̇хо’’д̇и. ‘‘бханд̇з маяаа хияяо ид̣̇ам̣ наама гад̇ам̣, ат̇а мз сахааяигаа мам̣ вихзтаяамаанаа д̣̇аасияо ниваарзд̇ваа маяхам̣ убагаарамзва агааси. саахам̣ имиссаа г̇ун̣ам̣ ж̇аанид̇ваа имам̣ камаабзсим̣, ат̇а мам̣ зсаа ‘д̇умхзсу камаабид̇зсу камиссаамий’д̇и аахаа’’д̇и. ‘‘звам̣ гира уд̇д̇арз’’д̇и. ‘‘аама, бханд̇з, сийсз мз сахааяигааяа баггасабби аасид̇д̇а’’нд̇и. ‘‘ат̇а д̇аяаа гим̣ жинд̇ид̇а’’нд̇и? ‘‘жаггаваал̣ам̣ ад̇исамб̣аад̇хам̣, б̣рахмалого ад̇инийжаго, мама сахааяигааяа г̇ун̣ова маханд̇о, ахан̃хи зд̇ам̣ ниссааяа д̣̇аанан̃жа д̣̇аад̇ум̣ д̇хамман̃жа сод̇ум̣ алад̇т̇ам̣, сажз мз имиссаа убари год̇хо ад̇т̇и, ид̣̇ам̣ мам̣ д̣̇ахад̇у, но жз, маа д̣̇ахад̇уу’’д̇и звам̣ жинд̇зд̇ваа имам̣ мзд̇д̇ааяа парим̣, бханд̇зд̇и. сад̇т̇аа ‘‘саад̇ху саад̇ху, уд̇д̇арз, звам̣ год̇хам̣ ж̇инид̇ум̣ ваддад̇и. год̇хано хи наама аггод̇хзна, аггосаго анаггосанд̇зна, барибхаасаго абарибхаасанд̇зна , т̇ад̣̇д̇хамажчарий ад̇д̇ано санд̇агасса д̣̇аанзна, мусааваад̣̇ий сажжаважанзна ж̇инид̇аб̣б̣о’’д̇и имамад̇т̇ам̣ д̣̇ассзнд̇о –
Sirimāpi satthu bhattakiccāvasāne saddhiṃ parivārena satthu pādamūle nipajji. Atha naṃ satthā pucchi ‘‘ko te aparādho’’ti. ‘‘Bhante mayā hiyyo idaṃ nāma kataṃ, atha me sahāyikā maṃ viheṭhayamānā dāsiyo nivāretvā mayhaṃ upakārameva akāsi. Sāhaṃ imissā guṇaṃ jānitvā imaṃ khamāpesiṃ, atha maṃ esā ‘tumhesu khamāpitesu khamissāmī’ti āhā’’ti. ‘‘Evaṃ kira uttare’’ti. ‘‘Āma, bhante, sīse me sahāyikāya pakkasappi āsitta’’nti. ‘‘Atha tayā kiṃ cintita’’nti? ‘‘Cakkavāḷaṃ atisambādhaṃ, brahmaloko atinīcako, mama sahāyikāya guṇova mahanto, ahañhi etaṃ nissāya dānañca dātuṃ dhammañca sotuṃ alatthaṃ, sace me imissā upari kodho atthi, idaṃ maṃ dahatu, no ce, mā dahatū’’ti evaṃ cintetvā imaṃ mettāya phariṃ, bhanteti. Satthā ‘‘sādhu sādhu, uttare, evaṃ kodhaṃ jinituṃ vaṭṭati. Kodhano hi nāma akkodhena, akkosako anakkosantena, paribhāsako aparibhāsantena , thaddhamaccharī attano santakassa dānena, musāvādī saccavacanena jinitabbo’’ti imamatthaṃ dassento –
‘‘аггод̇хзна ж̇инз год̇хам̣, асаад̇хум̣ саад̇хунаа ж̇инз;
‘‘Akkodhena jine kodhaṃ, asādhuṃ sādhunā jine;
ж̇инз гад̣̇арияам̣ д̣̇аанзна, сажжзнаалигаваад̣̇ина’’нд̇и. (д̇ха. ба. 223) –
Jine kadariyaṃ dānena, saccenālikavādina’’nti. (dha. pa. 223) –
имам̣ г̇аат̇ам̣ вад̇ваа г̇аат̇аабарияосаанз жад̇усажжагат̇ам̣ абхааси. сажжабарияосаанз уд̇д̇араа сагад̣̇ааг̇аамипалз бад̇идтахи, саамиго жа сасуро жа сассу жа сод̇аабад̇д̇ипалам̣ сажчигарим̣су, сиримааби бан̃жасад̇абариваараа сод̇аабаннаа ахоси. абарабхааг̇з уд̇д̇араа гаалам̣ гад̇ваа д̇аавад̇им̣сабхаванз уббаж̇ж̇и. ат̇ааяасмаа махаамог̇г̇аллаано хздтаа вуд̇д̇анаязнзва д̣̇зважааригам̣ жаранд̇о уд̇д̇арам̣ д̣̇звад̇хийд̇арам̣ д̣̇исваа –
Imaṃ gāthaṃ vatvā gāthāpariyosāne catusaccakathaṃ abhāsi. Saccapariyosāne uttarā sakadāgāmiphale patiṭṭhahi, sāmiko ca sasuro ca sassu ca sotāpattiphalaṃ sacchikariṃsu, sirimāpi pañcasataparivārā sotāpannā ahosi. Aparabhāge uttarā kālaṃ katvā tāvatiṃsabhavane uppajji. Athāyasmā mahāmoggallāno heṭṭhā vuttanayeneva devacārikaṃ caranto uttaraṃ devadhītaraṃ disvā –
124.
124.
‘‘абхигганд̇зна ван̣н̣зна, яаа д̇вам̣ д̇идтаси д̣̇звад̇з;
‘‘Abhikkantena vaṇṇena, yā tvaṃ tiṭṭhasi devate;
обхаасзнд̇ий д̣̇исаа саб̣б̣аа, осад̇хий вияа д̇аарагаа.
Obhāsentī disā sabbā, osadhī viya tārakā.
125.
125.
‘‘гзна д̇зд̇аад̣̇исо ван̣н̣о, гзна д̇з ид̇ха миж̇жхад̇и;
‘‘Kena tetādiso vaṇṇo, kena te idha mijjhati;
уббаж̇ж̇анд̇и жа д̇з бхог̇аа, яз гзжи манасо бияаа.
Uppajjanti ca te bhogā, ye keci manaso piyā.
126.
126.
‘‘бужчаами д̇ам̣ д̣̇зви махаанубхаавз,
‘‘Pucchāmi taṃ devi mahānubhāve,
мануссабхууд̇аа гимагааси бун̃н̃ам̣;
Manussabhūtā kimakāsi puññaṃ;
гзнааси звам̣ ж̇алид̇аанубхааваа,
Kenāsi evaṃ jalitānubhāvā,
ван̣н̣о жа д̇з саб̣б̣ад̣̇исаа бабхаасад̇ий’’д̇и. – бадибужчи;
Vaṇṇo ca te sabbadisā pabhāsatī’’ti. – paṭipucchi;
127.
127.
‘‘саа д̣̇звад̇аа ад̇д̇аманаа, мог̇г̇аллаанзна бужчид̇аа;
‘‘Sā devatā attamanā, moggallānena pucchitā;
бан̃хам̣ будтаа вияаагааси, яасса гаммассид̣̇ам̣ палам̣’’.
Pañhaṃ puṭṭhā viyākāsi, yassa kammassidaṃ phalaṃ’’.
128.
128.
‘‘иссаа жа мажчзрамат̇о бал̣аасо, наахоси маяхам̣ гхарамаавасанд̇ияаа;
‘‘Issā ca maccheramatho paḷāso, nāhosi mayhaṃ gharamāvasantiyā;
аггод̇ханаа бхад̇д̇у васаанувад̇д̇иний, убосат̇з нижжахамаббамад̇д̇аа.
Akkodhanā bhattu vasānuvattinī, uposathe niccahamappamattā.
129.
129.
‘‘жаад̇уд̣̇д̣̇асим̣ бан̃жад̣̇асим̣, яаа жа багкасса адтамий;
‘‘Cātuddasiṃ pañcadasiṃ, yā ca pakkhassa aṭṭhamī;
баадихаарияабагкан̃жа, адтан̇г̇асусамааг̇ад̇ам̣.
Pāṭihāriyapakkhañca, aṭṭhaṅgasusamāgataṃ.
130.
130.
‘‘убосат̇ам̣ убавасиссам̣, сад̣̇аа сийлзсу сам̣вуд̇аа;
‘‘Uposathaṃ upavasissaṃ, sadā sīlesu saṃvutā;
сан̃н̃амаа сам̣вибхааг̇аа жа, вимаанам̣ аавасаамахам̣.
Saññamā saṃvibhāgā ca, vimānaṃ āvasāmahaṃ.
131.
131.
‘‘баан̣аад̇ибаад̇аа вирад̇аа, мусааваад̣̇аа жа сан̃н̃ад̇аа;
‘‘Pāṇātipātā viratā, musāvādā ca saññatā;
т̇зяяаа жа ад̇ижаараа жа, маж̇ж̇абаанаа жа аарагаа.
Theyyā ca aticārā ca, majjapānā ca ārakā.
132.
132.
‘‘бан̃жасигкаабад̣̇з рад̇аа, арияасажжаана говид̣̇аа;
‘‘Pañcasikkhāpade ratā, ariyasaccāna kovidā;
убаасигаа жагкумад̇о, г̇од̇амасса яасассино.
Upāsikā cakkhumato, gotamassa yasassino.
133.
133.
‘‘саахам̣ сагзна сийлзна, яасасаа жа яасассиний;
‘‘Sāhaṃ sakena sīlena, yasasā ca yasassinī;
анубхоми сагам̣ бун̃н̃ам̣, сукид̇аа жамхинаамаяаа.
Anubhomi sakaṃ puññaṃ, sukhitā camhināmayā.
134.
134.
‘‘д̇зна мзд̇аад̣̇исо ван̣н̣о, д̇зна мз ид̇ха миж̇жхад̇и;
‘‘Tena metādiso vaṇṇo, tena me idha mijjhati;
уббаж̇ж̇анд̇и жа мз бхог̇аа, яз гзжи манасо бияаа.
Uppajjanti ca me bhogā, ye keci manaso piyā.
135.
135.
‘‘агкаами д̇з бхигку махаанубхаава, мануссабхууд̇аа яамахам̣ агаасим̣;
‘‘Akkhāmi te bhikkhu mahānubhāva, manussabhūtā yamahaṃ akāsiṃ;
д̇знамхи звам̣ ж̇алид̇аанубхааваа, ван̣н̣о жа мз саб̣б̣ад̣̇исаа бабхаасад̇ий’’д̇и. –
Tenamhi evaṃ jalitānubhāvā, vaṇṇo ca me sabbadisā pabhāsatī’’ti. –
д̣̇звад̇аабисса виссаж̇ж̇зси.
Devatāpissa vissajjesi.
126. мама жа, бханд̇з, важанзна бхаг̇авад̇о баад̣̇з сирасаа ванд̣̇зяяааси ‘‘уд̇д̇араа наама бханд̇з, убаасигаа бхаг̇авад̇о баад̣̇з сирасаа ванд̣̇ад̇ий’’д̇и. анажчарияам̣ ко банзд̇ам̣, бханд̇з, яам̣ мам̣ бхаг̇аваа ан̃н̃ад̇арасмим̣ сааман̃н̃апалз б̣яаагарзяяа, д̇ам̣ бхаг̇аваа сагад̣̇ааг̇аамипалз б̣яаагаасийд̇и.
126. Mama ca, bhante, vacanena bhagavato pāde sirasā vandeyyāsi ‘‘uttarā nāma bhante, upāsikā bhagavato pāde sirasā vandatī’’ti. Anacchariyaṃ kho panetaṃ, bhante, yaṃ maṃ bhagavā aññatarasmiṃ sāmaññaphale byākareyya, taṃ bhagavā sakadāgāmiphale byākāsīti.
128. д̇ад̇т̇а иссаа жа мажчзрамат̇о бал̣аасо, наахоси маяхам̣ гхарамаавасанд̇ияаад̇и яаа жа аг̇аарамаж̇жхз васанд̇ийнам̣ ан̃н̃аасам̣ ид̇т̇ийнам̣ самбад̇д̇иаад̣̇ивисаяаа барасамбад̇д̇иусууяаналагкан̣аа иссаа, яан̃жа д̇аавагаалигаад̣̇ивасзнааби гин̃жи яаажанд̇аанам̣ ад̣̇аад̇угаамад̇ааяа ад̇д̇асамбад̇д̇иниг̇ууханалагкан̣ам̣ мажчарияам̣ , яо жа гулабад̣̇зсаад̣̇инаа барзхи яуг̇аг̇г̇аахалагкан̣о бал̣аасо уббаж̇ж̇ад̇и, со д̇ивид̇хоби баабад̇хаммо г̇зхз тид̇ааяа маяхам̣ сад̇иби бажжаяасамавааяз наахоси на уббаж̇ж̇и. аггод̇ханаад̇и канд̇имзд̇д̇аануд̣̇д̣̇аяасамбаннад̇ааяа агуж̇жханасабхааваа. бхад̇д̇у васаанувад̇д̇инийд̇и буб̣б̣удтаанабажчаанибаад̇анаад̣̇инаа саамигасса анугуулабхаавзна васз вад̇д̇анасийлаа, манаабажааринийд̇и ад̇т̇о. убосат̇з нижжахамаббамад̇д̇аад̇и ахам̣ убосат̇асийларагкан̣з нижжам̣ аббамад̇д̇аа аббамаад̣̇авихаариний.
128. Tattha issā ca maccheramatho paḷāso, nāhosi mayhaṃ gharamāvasantiyāti yā ca agāramajjhe vasantīnaṃ aññāsaṃ itthīnaṃ sampattiādivisayā parasampattiusūyanalakkhaṇā issā, yañca tāvakālikādivasenāpi kiñci yācantānaṃ adātukāmatāya attasampattinigūhanalakkhaṇaṃ macchariyaṃ , yo ca kulapadesādinā parehi yugaggāhalakkhaṇo paḷāso uppajjati, so tividhopi pāpadhammo gehe ṭhitāya mayhaṃ satipi paccayasamavāye nāhosi na uppajji. Akkodhanāti khantimettānuddayasampannatāya akujjhanasabhāvā. Bhattu vasānuvattinīti pubbuṭṭhānapacchānipātanādinā sāmikassa anukūlabhāvena vase vattanasīlā, manāpacārinīti attho. Uposathe niccahamappamattāti ahaṃ uposathasīlarakkhaṇe niccaṃ appamattā appamādavihārinī.
129. д̇амзва убосат̇з аббамаад̣̇ам̣ д̣̇ассзнд̇ий язсу д̣̇ивасзсу д̇ам̣ рагкид̇аб̣б̣ам̣, яаад̣̇исам̣ яат̇аа жа рагкид̇аб̣б̣ам̣, д̇ам̣ д̣̇ассзд̇ум̣ ‘‘жаад̇уд̣̇д̣̇аси’’нд̇иаад̣̇имааха. д̇ад̇т̇а жаад̇уд̣̇д̣̇асим̣ бан̃жад̣̇асинд̇и багкассаад̇и самб̣анд̇хо, ажжанд̇асам̣яог̇з жзд̇ам̣ убаяог̇аважанам̣. яаа жа багкасса адтамийд̇и зд̇т̇а жаад̇и важанасзсо. баадихаарияабагкан̃жаад̇и бадихаран̣агабагкан̃жа, жаад̇уд̣̇д̣̇асийбан̃жад̣̇асийадтамийнам̣ яат̇ааггамам̣ аад̣̇ид̇о анд̇ад̇о жаад̇и бавзсананигкаманавасзна убосат̇асийласса бадихарид̇аб̣б̣ам̣ багкан̃жа , д̇зрасий баадибад̣̇аа сад̇д̇амий навамий жаад̇и ад̇т̇о. адтан̇г̇асусамааг̇ад̇анд̇и баан̣аад̇ибаад̇аавзраман̣ийаад̣̇ийхи адтахан̇г̇зхи зва судту самааг̇ад̇ам̣ саманнааг̇ад̇ам̣.
129. Tameva uposathe appamādaṃ dassentī yesu divasesu taṃ rakkhitabbaṃ, yādisaṃ yathā ca rakkhitabbaṃ, taṃ dassetuṃ ‘‘cātuddasi’’ntiādimāha. Tattha cātuddasiṃ pañcadasinti pakkhassāti sambandho, accantasaṃyoge cetaṃ upayogavacanaṃ. Yā ca pakkhassa aṭṭhamīti ettha cāti vacanaseso. Pāṭihāriyapakkhañcāti paṭiharaṇakapakkhañca, cātuddasīpañcadasīaṭṭhamīnaṃ yathākkamaṃ ādito antato cāti pavesananikkhamanavasena uposathasīlassa paṭiharitabbaṃ pakkhañca , terasī pāṭipadā sattamī navamī cāti attho. Aṭṭhaṅgasusamāgatanti pāṇātipātāveramaṇīādīhi aṭṭhahaṅgehi eva suṭṭhu samāgataṃ samannāgataṃ.
130. убавасиссанд̇и убавасим̣. ад̇ийд̇ад̇т̇з хи ид̣̇ам̣ анааг̇ад̇аважанам̣. гзжи бана ‘‘убавасим̣’’ижжзва батанд̇и. сад̣̇аад̇и саббадихааригзсу саб̣б̣зсу убосат̇ад̣̇ивасзсу. сийлзсууд̇и убосат̇асийлзсу саад̇хзд̇аб̣б̣зсу. нибпаад̣̇зд̇аб̣б̣з хи ид̣̇ам̣ бхуммам̣. сам̣вуд̇аад̇и гааяаваажаажид̇д̇зхи сам̣вуд̇аа. сад̣̇аад̇и ваа саб̣б̣агаалам̣. сийлзсууд̇и нижжасийлзсу. сам̣вуд̇аад̇и гааяаваажаахи сам̣вуд̇аа.
130.Upavasissanti upavasiṃ. Atītatthe hi idaṃ anāgatavacanaṃ. Keci pana ‘‘upavasiṃ’’icceva paṭhanti. Sadāti sappaṭihārikesu sabbesu uposathadivasesu. Sīlesūti uposathasīlesu sādhetabbesu. Nipphādetabbe hi idaṃ bhummaṃ. Saṃvutāti kāyavācācittehi saṃvutā. Sadāti vā sabbakālaṃ. Sīlesūti niccasīlesu. Saṃvutāti kāyavācāhi saṃvutā.
131. ид̣̇аани д̇ам̣ нижжасийлам̣ д̣̇ассзд̇ум̣ ‘‘баан̣аад̇ибаад̇аа вирад̇аа’’д̇иаад̣̇и вуд̇д̇ам̣. д̇ад̇т̇а баан̣од̇и вохаарад̇о сад̇д̇о, барамад̇т̇ад̇о ж̇ийвид̇инд̣̇рияам̣. баан̣асса ад̇ибаад̇о баан̣авад̇хо баан̣агхаад̇о баан̣аад̇ибаад̇о, ад̇т̇ад̇о баан̣з баан̣асан̃н̃ино ж̇ийвид̇инд̣̇рияубажчзд̣̇агаубаггамасамудтаабигаа гааяаважийд̣̇ваараанам̣ ан̃н̃ад̇арад̣̇ваарабавад̇д̇аа вад̇хагажзд̇анаа. д̇ад̇о баан̣аад̇ибаад̇аа. вирад̇аад̇и орад̇аа, нивад̇д̇аад̇и ад̇т̇о.
131. Idāni taṃ niccasīlaṃ dassetuṃ ‘‘pāṇātipātā viratā’’tiādi vuttaṃ. Tattha pāṇoti vohārato satto, paramatthato jīvitindriyaṃ. Pāṇassa atipāto pāṇavadho pāṇaghāto pāṇātipāto, atthato pāṇe pāṇasaññino jīvitindriyupacchedakaupakkamasamuṭṭhāpikā kāyavacīdvārānaṃ aññataradvārapavattā vadhakacetanā. Tato pāṇātipātā. Viratāti oratā, nivattāti attho.
мусааваад̣̇аад̇и мусаа наама висам̣ваад̣̇анабурзгкаарасса ад̇т̇абхан̃ж̇анаго важийбаяог̇о ваа гааяабаяог̇о ваа, висам̣ваад̣̇анаад̇хиббааязна барасса висам̣ваад̣̇агагааяаважийбаяог̇асамудтаабигаа жзд̇анаа мусааваад̣̇о. ат̇а ваа мусаад̇и абхууд̇ам̣ ад̇ажчам̣ вад̇т̇у, ваад̣̇од̇и д̇асса бхууд̇ад̇о д̇ажчад̇о вин̃н̃аабзд̇угаамасса д̇ат̇аа вин̃н̃ад̇д̇исамудтаабигаа жзд̇анаа. д̇ад̇о мусааваад̣̇аа сан̃н̃ад̇аа орад̇аа, вирад̇аад̇и ад̇т̇о. жа-сад̣̇д̣̇о самбин̣д̣анад̇т̇о.
Musāvādāti musā nāma visaṃvādanapurekkhārassa atthabhañjanako vacīpayogo vā kāyapayogo vā, visaṃvādanādhippāyena parassa visaṃvādakakāyavacīpayogasamuṭṭhāpikā cetanā musāvādo. Atha vā musāti abhūtaṃ atacchaṃ vatthu, vādoti tassa bhūtato tacchato viññāpetukāmassa tathā viññattisamuṭṭhāpikā cetanā. Tato musāvādā saññatā oratā, viratāti attho. Ca-saddo sampiṇḍanattho.
т̇зяяаад̇и т̇зяяам̣ вужжад̇и т̇знабхааво, жоригааяа барассахаран̣анд̇и ад̇т̇о. ад̇т̇ад̇о барабариг̇г̇ахид̇з барабариг̇г̇ахид̇асан̃н̃ино д̇ад̣̇аад̣̇ааяагаубаггамасамудтаабигаа т̇зяяажзд̇анаа т̇зяяам̣. д̇ад̇о т̇зяяаа сан̃н̃ад̇аа, аарагаад̇и ваа самб̣анд̇хо.
Theyyāti theyyaṃ vuccati thenabhāvo, corikāya parassaharaṇanti attho. Atthato parapariggahite parapariggahitasaññino tadādāyakaupakkamasamuṭṭhāpikā theyyacetanā theyyaṃ. Tato theyyā saññatā, ārakāti vā sambandho.
ад̇ижаараад̇и ад̇ижжа жааро ад̇ижааро, логамарияаад̣̇ам̣ ад̇иггамид̇ваа аг̇аманийяадтаанз гаамавасзна жааро мижчаажаарод̇и ад̇т̇о. аг̇аманийяадтаанам̣ наама – бурисаанам̣ маад̇урагкид̇аа бид̇урагкид̇аа маад̇аабид̇урагкид̇аа бхаад̇урагкид̇аа бхаг̇инирагкид̇аа н̃аад̇ирагкид̇аа г̇од̇д̇арагкид̇аа д̇хаммарагкид̇аа саарагкаа сабарид̣̇ан̣д̣аад̇и д̣̇аса, д̇ханаггийд̇аа чанд̣̇аваасиний бхог̇аваасиний бадаваасиний од̣̇абад̇д̇агиний обхадажумб̣адаа д̣̇аасий жа бхарияаа гаммагаарий жа бхарияаа д̇хаж̇аахадаа мухуд̇д̇игаад̇и д̣̇асаад̇и вийсад̇и ид̇т̇ияо. ид̇т̇ийсу бана д̣̇виннам̣ саарагкасабарид̣̇ан̣д̣аанам̣ д̣̇асаннан̃жа д̇ханаггийд̇аад̣̇ийнанд̇и д̣̇ваад̣̇асаннам̣ ан̃н̃абурисаа аг̇аманийяадтаанам̣, ид̣̇амзва ид̇ха ад̇хиббзд̇ам̣. лагкан̣ад̇о бана асад̣̇д̇хаммаад̇хиббааязна гааяад̣̇ваарабавад̇д̇аа аг̇аманийяадтаанавийд̇иггамажзд̇анаа ад̇ижааро. д̇асмаа ад̇ижаараа.
Aticārāti aticca cāro aticāro, lokamariyādaṃ atikkamitvā agamanīyaṭṭhāne kāmavasena cāro micchācāroti attho. Agamanīyaṭṭhānaṃ nāma – purisānaṃ māturakkhitā piturakkhitā mātāpiturakkhitā bhāturakkhitā bhaginirakkhitā ñātirakkhitā gottarakkhitā dhammarakkhitā sārakkhā saparidaṇḍāti dasa, dhanakkītā chandavāsinī bhogavāsinī paṭavāsinī odapattakinī obhaṭacumbaṭā dāsī ca bhariyā kammakārī ca bhariyā dhajāhaṭā muhuttikāti dasāti vīsati itthiyo. Itthīsu pana dvinnaṃ sārakkhasaparidaṇḍānaṃ dasannañca dhanakkītādīnanti dvādasannaṃ aññapurisā agamanīyaṭṭhānaṃ, idameva idha adhippetaṃ. Lakkhaṇato pana asaddhammādhippāyena kāyadvārapavattā agamanīyaṭṭhānavītikkamacetanā aticāro. Tasmā aticārā.
маж̇ж̇абаанаад̇и маж̇ж̇ам̣ вужжад̇имад̣̇анийяадтзна сураа жа мзраяан̃жа, биванд̇и д̇знаад̇и баанам̣, маж̇ж̇асса баанам̣ маж̇ж̇абаанам̣. яааяа д̣̇уссийляажзд̇анааяа маж̇ж̇асан̇каад̇ам̣ бидтасураа, буувасураа, од̣̇анияасураа, гин̣н̣абагкид̇д̇аа, самбхаарасам̣яуд̇д̇аад̇и бан̃жабхзд̣̇ам̣ сурам̣ ваа, бубпаасаво, палаасаво, мад̇хваасаво, г̇ул̣аасаво, самбхаарасам̣яуд̇д̇од̇и бан̃жабхзд̣̇ам̣ мзраяам̣ ваа б̣ийж̇ад̇о бадтааяа гусаг̇г̇знааби бивад̇и, саа жзд̇анаа маж̇ж̇абаанам̣. д̇асмаа маж̇ж̇абаанаа аарагаа вирад̇аа.
Majjapānāti majjaṃ vuccatimadanīyaṭṭhena surā ca merayañca, pivanti tenāti pānaṃ, majjassa pānaṃ majjapānaṃ. Yāya dussīlyacetanāya majjasaṅkhātaṃ piṭṭhasurā, pūvasurā, odaniyasurā, kiṇṇapakkhittā, sambhārasaṃyuttāti pañcabhedaṃ suraṃ vā, pupphāsavo, phalāsavo, madhvāsavo, guḷāsavo, sambhārasaṃyuttoti pañcabhedaṃ merayaṃ vā bījato paṭṭhāya kusaggenāpi pivati, sā cetanā majjapānaṃ. Tasmā majjapānā ārakā viratā.
132. звам̣ ‘‘баан̣аад̇ибаад̇аа вирад̇аа’’д̇иаад̣̇инаа бахаад̇аб̣б̣ад̇хаммавасзна вибхаж̇ид̇ваа д̣̇ассид̇ам̣ нижжасийлам̣ буна самаад̣̇аад̇аб̣б̣ад̇аавасзна згад̇о гад̇ваа д̣̇ассзнд̇ий ‘‘бан̃жасигкаабад̣̇з рад̇аа’’д̇и ааха. д̇ад̇т̇а сигкаабад̣̇анд̇и сигкид̇аб̣б̣абад̣̇ам̣, сигкаагодтаасзд̇и ад̇т̇о. ат̇а ваа жхаанаад̣̇аяо саб̣б̣зби гусалаа д̇хаммаа сигкид̇аб̣б̣ад̇о сигкаа, бан̃жасу бана сийлан̇г̇зсу яам̣гин̃жи ан̇г̇ам̣ д̇аасам̣ сигкаанам̣ бад̇идтаанадтзна бад̣̇анд̇и сигкаанам̣ бад̣̇ад̇д̇аа сигкаабад̣̇ам̣, бан̃жа сийлан̇г̇аани. д̇асмим̣ бан̃жавид̇хз сигкаабад̣̇з рад̇аа абхирад̇аад̇и бан̃жасигкаабад̣̇з рад̇аа. арияасажжаана говид̣̇аад̇и барин̃н̃аабахаанасажчигирияаабхааванаабхисамаяавасзна д̣̇угкасамуд̣̇аяанирод̇хамаг̇г̇асан̇каад̇зсу жад̇уусу арияасажжзсу гусалаа нибун̣аа, бадивид̣̇д̇хажад̇усажжаад̇и ад̇т̇о. г̇од̇амассаад̇и бхаг̇аванд̇ам̣ г̇од̇д̇зна гид̇д̇зд̇и. яасассинод̇и гид̇д̇имад̇о, баривааравад̇о ваа.
132. Evaṃ ‘‘pāṇātipātā viratā’’tiādinā pahātabbadhammavasena vibhajitvā dassitaṃ niccasīlaṃ puna samādātabbatāvasena ekato katvā dassentī ‘‘pañcasikkhāpade ratā’’ti āha. Tattha sikkhāpadanti sikkhitabbapadaṃ, sikkhākoṭṭhāseti attho. Atha vā jhānādayo sabbepi kusalā dhammā sikkhitabbato sikkhā, pañcasu pana sīlaṅgesu yaṃkiñci aṅgaṃ tāsaṃ sikkhānaṃ patiṭṭhānaṭṭhena padanti sikkhānaṃ padattā sikkhāpadaṃ, pañca sīlaṅgāni. Tasmiṃ pañcavidhe sikkhāpade ratā abhiratāti pañcasikkhāpade ratā. Ariyasaccāna kovidāti pariññāpahānasacchikiriyābhāvanābhisamayavasena dukkhasamudayanirodhamaggasaṅkhātesu catūsu ariyasaccesu kusalā nipuṇā, paṭividdhacatusaccāti attho. Gotamassāti bhagavantaṃ gottena kitteti. Yasassinoti kittimato, parivāravato vā.
133. сааханд̇и саа яат̇аавуд̇д̇аг̇ун̣аа ахам̣. сагзна сийлзнаад̇и ануссугид̇аад̣̇инаа ад̇д̇ано сабхаавасийлзна жа убосат̇асийлаад̣̇исамаад̣̇аанасийлзна жа гааран̣абхууд̇зна. д̇ан̃хи сад̇д̇аанам̣ гаммассагад̇ааяа хид̇асукаавахад̇ааяа жа висзсад̇о ‘‘сага’’нд̇и вужжад̇и. д̇знзвааха –
133.Sāhanti sā yathāvuttaguṇā ahaṃ. Sakena sīlenāti anussukitādinā attano sabhāvasīlena ca uposathasīlādisamādānasīlena ca kāraṇabhūtena. Tañhi sattānaṃ kammassakatāya hitasukhāvahatāya ca visesato ‘‘saka’’nti vuccati. Tenevāha –
‘‘д̇ан̃хи д̇асса сагам̣ ход̇и, д̇ан̃жа аад̣̇ааяа г̇ажчад̇и;
‘‘Tañhi tassa sakaṃ hoti, tañca ādāya gacchati;
д̇ан̃жасса ануг̇ам̣ ход̇и, чааяаава анабааяиний’’д̇и. (сам̣. ни. 1.115);
Tañcassa anugaṃ hoti, chāyāva anapāyinī’’ti. (saṃ. ni. 1.115);
яасасаа жа яасассинийд̇и ‘‘уд̇д̇араа убаасигаа сийлаажаарасамбаннаа ануссугий амажчарий аггод̇ханаа’’д̇иаад̣̇инаа ‘‘ааг̇ад̇апалаа вин̃н̃аад̇асаасанаа’’д̇иаад̣̇инаа жа яат̇аабхууд̇аг̇ун̣аад̇хиг̇ад̇зна ж̇алад̇алз д̇злзна вияа саманд̇ад̇о бад̇т̇адзна гид̇д̇исад̣̇д̣̇зна яасассиний гид̇д̇имад̇ий, д̇зна ваа сийлаг̇ун̣зна ид̇ха ад̇хиг̇ад̇зна яасабариваарзна яасассиний самбаннабариваараа. анубхоми сагам̣ бун̃н̃анд̇и яат̇уубажид̇ам̣ ад̇д̇ано бун̃н̃ам̣ бажжанубхоми. яасса хи бун̃н̃апалам̣ анубхууяад̇и, палуубажаарзна д̇ам̣ бун̃н̃амби анубхууяад̇ийд̇и вужжад̇и. ат̇а ваа бут̇уж̇ж̇анабхаавад̇о сужарид̇апаламби ‘‘бун̃н̃а’’нд̇и вужжад̇и. яат̇ааха ‘‘гусалаанам̣, бхигкавз, д̇хаммаанам̣ самаад̣̇аанахзд̇у звамид̣̇ам̣ бун̃н̃ам̣ бавад̣дхад̇ий’’д̇и. сукид̇аа жамхинаамаяаад̇и д̣̇иб̣б̣асукзна жа паласукзна жа сукид̇аа жамхи бхаваами, гааяигажзд̇асигад̣̇угкаабхаавад̇о анаамаяаа арог̇аа.
Yasasā ca yasassinīti ‘‘uttarā upāsikā sīlācārasampannā anussukī amaccharī akkodhanā’’tiādinā ‘‘āgataphalā viññātasāsanā’’tiādinā ca yathābhūtaguṇādhigatena jalatale telena viya samantato patthaṭena kittisaddena yasassinī kittimatī, tena vā sīlaguṇena idha adhigatena yasaparivārena yasassinī sampannaparivārā. Anubhomi sakaṃ puññanti yathūpacitaṃ attano puññaṃ paccanubhomi. Yassa hi puññaphalaṃ anubhūyati, phalūpacārena taṃ puññampi anubhūyatīti vuccati. Atha vā puthujjanabhāvato sucaritaphalampi ‘‘puñña’’nti vuccati. Yathāha ‘‘kusalānaṃ, bhikkhave, dhammānaṃ samādānahetu evamidaṃ puññaṃ pavaḍḍhatī’’ti. Sukhitā camhināmayāti dibbasukhena ca phalasukhena ca sukhitā camhi bhavāmi, kāyikacetasikadukkhābhāvato anāmayā arogā.
136. мама жаад̇и жа-сад̣̇д̣̇о самужжаяад̇т̇о. д̇зна ‘‘мама важанзна жа ванд̣̇зяяааси, на д̇ава сабхаавзнзваа’’д̇и ванд̣̇анам̣ самужжинод̇и. анажчарияанд̇иаад̣̇инаа ад̇д̇ано арияасаавигаабхаавасса баагадабхаавам̣ д̣̇ассзд̇и. д̇ам̣ бхаг̇аваад̇иаад̣̇и сан̇г̇ийд̇игаараважанам̣. сзсам̣ вуд̇д̇анаяамзваад̇и.
136.Mama cāti ca-saddo samuccayattho. Tena ‘‘mama vacanena ca vandeyyāsi, na tava sabhāvenevā’’ti vandanaṃ samuccinoti. Anacchariyantiādinā attano ariyasāvikābhāvassa pākaṭabhāvaṃ dasseti. Taṃ bhagavātiādi saṅgītikāravacanaṃ. Sesaṃ vuttanayamevāti.
уд̇д̇араавимаанаван̣н̣анаа нидтид̇аа.
Uttarāvimānavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / вимаанавад̇т̇убаал̣и • Vimānavatthupāḷi / 15. уд̇д̇араавимаанавад̇т̇у • 15. Uttarāvimānavatthu
