| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৮. উত্তরৰিপত্তিসুত্তং
8. Uttaravipattisuttaṃ
৮. একং সমযং আযস্মা উত্তরো মহিসৰত্থুস্মিং ৰিহরতি সঙ্খেয্যকে পব্বতে ৰটজালিকাযং 1। তত্র খো আযস্মা উত্তরো ভিক্খূ আমন্তেসি – ‘‘সাধাৰুসো, ভিক্খু কালেন কালং অত্তৰিপত্তিং পচ্চৰেক্খিতা হোতি। সাধাৰুসো, ভিক্খু কালেন কালং পরৰিপত্তিং পচ্চৰেক্খিতা হোতি। সাধাৰুসো, ভিক্খু কালেন কালং অত্তসম্পত্তিং পচ্চৰেক্খিতা হোতি। সাধাৰুসো, ভিক্খু কালেন কালং পরসম্পত্তিং পচ্চৰেক্খিতা হোতী’’তি।
8. Ekaṃ samayaṃ āyasmā uttaro mahisavatthusmiṃ viharati saṅkheyyake pabbate vaṭajālikāyaṃ 2. Tatra kho āyasmā uttaro bhikkhū āmantesi – ‘‘sādhāvuso, bhikkhu kālena kālaṃ attavipattiṃ paccavekkhitā hoti. Sādhāvuso, bhikkhu kālena kālaṃ paravipattiṃ paccavekkhitā hoti. Sādhāvuso, bhikkhu kālena kālaṃ attasampattiṃ paccavekkhitā hoti. Sādhāvuso, bhikkhu kālena kālaṃ parasampattiṃ paccavekkhitā hotī’’ti.
তেন খো পন সমযেন ৰেস্সৰণো মহারাজা উত্তরায দিসায দক্খিণং দিসং গচ্ছতি কেনচিদেৰ করণীযেন। অস্সোসি খো ৰেস্সৰণো মহারাজা আযস্মতো উত্তরস্স মহিসৰত্থুস্মিং সঙ্খেয্যকে পব্বতে ৰটজালিকাযং ভিক্খূনং এৰং ধম্মং দেসেন্তস্স – ‘‘সাধাৰুসো, ভিক্খু কালেন কালং অত্তৰিপত্তিং পচ্চৰেক্খিতা হোতি। সাধাৰুসো, ভিক্খু কালেন কালং পরৰিপত্তিং পচ্চৰেক্খিতা হোতি। সাধাৰুসো, ভিক্খু কালেন কালং অত্তসম্পত্তিং পচ্চৰেক্খিতা হোতি। সাধাৰুসো, ভিক্খু কালেন কালং পরসম্পত্তিং পচ্চৰেক্খিতা হোতী’’তি।
Tena kho pana samayena vessavaṇo mahārājā uttarāya disāya dakkhiṇaṃ disaṃ gacchati kenacideva karaṇīyena. Assosi kho vessavaṇo mahārājā āyasmato uttarassa mahisavatthusmiṃ saṅkheyyake pabbate vaṭajālikāyaṃ bhikkhūnaṃ evaṃ dhammaṃ desentassa – ‘‘sādhāvuso, bhikkhu kālena kālaṃ attavipattiṃ paccavekkhitā hoti. Sādhāvuso, bhikkhu kālena kālaṃ paravipattiṃ paccavekkhitā hoti. Sādhāvuso, bhikkhu kālena kālaṃ attasampattiṃ paccavekkhitā hoti. Sādhāvuso, bhikkhu kālena kālaṃ parasampattiṃ paccavekkhitā hotī’’ti.
অথ খো ৰেস্সৰণ্ণো মহারাজা – সেয্যথাপি নাম বলৰা পুরিসো সমিঞ্জিতং 3 ৰা বাহং পসারেয্য, পসারিতং ৰা বাহং সমিঞ্জেয্য 4, এৰমেৰং মহিসৰত্থুস্মিং সঙ্খেয্যকে পব্বতে ৰটজালিকাযং অন্তরহিতো দেৰেসু তাৰতিংসেসু পাতুরহোসি। অথ খো ৰেস্সৰণ্ণো মহারাজা যেন সক্কো দেৰানমিন্দো তেনুপসঙ্কমি; উপসঙ্কমিত্ৰা সক্কং দেৰানমিন্দং এতদৰোচ – ‘‘যগ্ঘে মারিস, জানেয্যাসি! এসো আযস্মা উত্তরো মহিসৰত্থুস্মিং সঙ্খেয্যকে পব্বতে ৰটজালিকাযং ভিক্খূনং এৰং ধম্মং দেসেতি – ‘সাধাৰুসো, ভিক্খু কালেন কালং অত্তৰিপত্তিং পচ্চৰেক্খিতা হোতি । সাধাৰুসো, ভিক্খু কালেন কালং পরৰিপত্তিং…পে॰… অত্তসম্পত্তিং… পরসম্পত্তিং পচ্চৰেক্খিতা হোতী’’’তি।
Atha kho vessavaṇṇo mahārājā – seyyathāpi nāma balavā puriso samiñjitaṃ 5 vā bāhaṃ pasāreyya, pasāritaṃ vā bāhaṃ samiñjeyya 6, evamevaṃ mahisavatthusmiṃ saṅkheyyake pabbate vaṭajālikāyaṃ antarahito devesu tāvatiṃsesu pāturahosi. Atha kho vessavaṇṇo mahārājā yena sakko devānamindo tenupasaṅkami; upasaṅkamitvā sakkaṃ devānamindaṃ etadavoca – ‘‘yagghe mārisa, jāneyyāsi! Eso āyasmā uttaro mahisavatthusmiṃ saṅkheyyake pabbate vaṭajālikāyaṃ bhikkhūnaṃ evaṃ dhammaṃ deseti – ‘sādhāvuso, bhikkhu kālena kālaṃ attavipattiṃ paccavekkhitā hoti . Sādhāvuso, bhikkhu kālena kālaṃ paravipattiṃ…pe… attasampattiṃ… parasampattiṃ paccavekkhitā hotī’’’ti.
অথ খো সক্কো দেৰানমিন্দো সেয্যথাপি নাম বলৰা পুরিসো সমিঞ্জিতং ৰা বাহং পসারেয্য, পসারিতং ৰা বাহং সমিঞ্জেয্য, এৰমেৰং দেৰেসু তাৰতিংসেসু অন্তরহিতো মহিসৰত্থুস্মিং সঙ্খেয্যকে পব্বতে ৰটজালিকাযং আযস্মতো উত্তরস্স সম্মুখে পাতুরহোসি। অথ খো সক্কো দেৰানমিন্দো যেনাযস্মা উত্তরো তেনুপসঙ্কমি; উপসঙ্কমিত্ৰা আযস্মন্তং উত্তরং অভিৰাদেত্ৰা একমন্তং অট্ঠাসি। একমন্তং ঠিতো খো সক্কো দেৰানমিন্দো আযস্মন্তং উত্তরং এতদৰোচ –
Atha kho sakko devānamindo seyyathāpi nāma balavā puriso samiñjitaṃ vā bāhaṃ pasāreyya, pasāritaṃ vā bāhaṃ samiñjeyya, evamevaṃ devesu tāvatiṃsesu antarahito mahisavatthusmiṃ saṅkheyyake pabbate vaṭajālikāyaṃ āyasmato uttarassa sammukhe pāturahosi. Atha kho sakko devānamindo yenāyasmā uttaro tenupasaṅkami; upasaṅkamitvā āyasmantaṃ uttaraṃ abhivādetvā ekamantaṃ aṭṭhāsi. Ekamantaṃ ṭhito kho sakko devānamindo āyasmantaṃ uttaraṃ etadavoca –
‘‘সচ্চং কির, ভন্তে, আযস্মা উত্তরো ভিক্খূনং এৰং ধম্মং দেসেসি – ‘সাধাৰুসো, ভিক্খু কালেন কালং অত্তৰিপত্তিং পচ্চৰেক্খিতা হোতি, সাধাৰুসো, ভিক্খু কালেন কালং পরৰিপত্তিং…পে॰… অত্তসম্পত্তিং… পরসম্পত্তিং পচ্চৰেক্খিতা হোতী’’’ তি? ‘‘এৰং, দেৰানমিন্দা’’তি। ‘‘কিং পনিদং 7, ভন্তে, আযস্মতো উত্তরস্স সকং পটিভানং 8, উদাহু তস্স ভগৰতো ৰচনং অরহতো সম্মাসম্বুদ্ধস্সা’’তি? ‘‘তেন হি, দেৰানমিন্দ, উপমং তে করিস্সামি। উপমায মিধেকচ্চে ৰিঞ্ঞূ পুরিসা ভাসিতস্স অত্থং আজান’’ন্তি।
‘‘Saccaṃ kira, bhante, āyasmā uttaro bhikkhūnaṃ evaṃ dhammaṃ desesi – ‘sādhāvuso, bhikkhu kālena kālaṃ attavipattiṃ paccavekkhitā hoti, sādhāvuso, bhikkhu kālena kālaṃ paravipattiṃ…pe… attasampattiṃ… parasampattiṃ paccavekkhitā hotī’’’ ti? ‘‘Evaṃ, devānamindā’’ti. ‘‘Kiṃ panidaṃ 9, bhante, āyasmato uttarassa sakaṃ paṭibhānaṃ 10, udāhu tassa bhagavato vacanaṃ arahato sammāsambuddhassā’’ti? ‘‘Tena hi, devānaminda, upamaṃ te karissāmi. Upamāya midhekacce viññū purisā bhāsitassa atthaṃ ājāna’’nti.
‘‘সেয্যথাপি, দেৰানমিন্দ, গামস্স ৰা নিগমস্স ৰা অৰিদূরে মহাধঞ্ঞরাসি। ততো মহাজনকাযো ধঞ্ঞং আহরেয্য – কাজেহিপি পিটকেহিপি উচ্ছঙ্গেহিপি অঞ্জলীহিপি । যো নু খো, দেৰানমিন্দ, তং মহাজনকাযং উপসঙ্কমিত্ৰা এৰং পুচ্ছেয্য – ‘কুতো ইমং ধঞ্ঞং আহরথা’তি, কথং ব্যাকরমানো নু খো, দেৰানমিন্দ, সো মহাজনকাযো সম্মা ব্যাকরমানো ব্যাকরেয্যা’’তি? ‘‘‘অমুম্হা মহাধঞ্ঞরাসিম্হা আহরামা’তি খো, ভন্তে, সো মহাজনকাযো সম্মা ব্যাকরমানো ব্যাকরেয্যা’’তি। ‘‘এৰমেৰং খো, দেৰানমিন্দ, যং কিঞ্চি সুভাসিতং সব্বং তং তস্স ভগৰতো ৰচনং অরহতো সম্মাসম্বুদ্ধস্স। ততো উপাদাযুপাদায মযং চঞ্ঞে চ ভণামা’’তি।
‘‘Seyyathāpi, devānaminda, gāmassa vā nigamassa vā avidūre mahādhaññarāsi. Tato mahājanakāyo dhaññaṃ āhareyya – kājehipi piṭakehipi ucchaṅgehipi añjalīhipi . Yo nu kho, devānaminda, taṃ mahājanakāyaṃ upasaṅkamitvā evaṃ puccheyya – ‘kuto imaṃ dhaññaṃ āharathā’ti, kathaṃ byākaramāno nu kho, devānaminda, so mahājanakāyo sammā byākaramāno byākareyyā’’ti? ‘‘‘Amumhā mahādhaññarāsimhā āharāmā’ti kho, bhante, so mahājanakāyo sammā byākaramāno byākareyyā’’ti. ‘‘Evamevaṃ kho, devānaminda, yaṃ kiñci subhāsitaṃ sabbaṃ taṃ tassa bhagavato vacanaṃ arahato sammāsambuddhassa. Tato upādāyupādāya mayaṃ caññe ca bhaṇāmā’’ti.
‘‘অচ্ছরিযং, ভন্তে, অব্ভুতং ভন্তে! যাৰ সুভাসিতং চিদং আযস্মতা উত্তরেন – ‘যং কিঞ্চি সুভাসিতং সব্বং তং তস্স ভগৰতো ৰচনং অরহতো সম্মাসম্বুদ্ধস্স । ততো উপাদাযুপাদায মযং চঞ্ঞে চ ভণামা’তি। একমিদং, ভন্তে উত্তর, সমযং ভগৰা রাজগহে ৰিহরতি গিজ্ঝকূটে পব্বতে অচিরপক্কন্তে দেৰদত্তে। তত্র খো ভগৰা দেৰদত্তং আরব্ভ ভিক্খূ আমন্তেসি –
‘‘Acchariyaṃ, bhante, abbhutaṃ bhante! Yāva subhāsitaṃ cidaṃ āyasmatā uttarena – ‘yaṃ kiñci subhāsitaṃ sabbaṃ taṃ tassa bhagavato vacanaṃ arahato sammāsambuddhassa . Tato upādāyupādāya mayaṃ caññe ca bhaṇāmā’ti. Ekamidaṃ, bhante uttara, samayaṃ bhagavā rājagahe viharati gijjhakūṭe pabbate acirapakkante devadatte. Tatra kho bhagavā devadattaṃ ārabbha bhikkhū āmantesi –
‘‘সাধু, ভিক্খৰে, ভিক্খু কালেন কালং অত্তৰিপত্তিং পচ্চৰেক্খিতা হোতি। সাধু, ভিক্খৰে, ভিক্খু কালেন কালং পরৰিপত্তিং…পে॰… অত্তসম্পত্তিং… পরসম্পত্তিং পচ্চৰেক্খিতা হোতি। অট্ঠহি, ভিক্খৰে, অসদ্ধম্মেহি অভিভূতো পরিযাদিন্নচিত্তো দেৰদত্তো আপাযিকো নেরযিকো কপ্পট্ঠো অতেকিচ্ছো। কতমেহি অট্ঠহি? লাভেন হি, ভিক্খৰে, অভিভূতো পরিযাদিন্নচিত্তো দেৰদত্তো আপাযিকো নেরযিকো কপ্পট্ঠো অতেকিচ্ছো; অলাভেন, ভিক্খৰে…পে॰… যসেন, ভিক্খৰে … অযসেন, ভিক্খৰে… সক্কারেন, ভিক্খৰে… অসক্কারেন, ভিক্খৰে… পাপিচ্ছতায, ভিক্খৰে… পাপমিত্ততায , ভিক্খৰে, অভিভূতো পরিযাদিন্নচিত্তো দেৰদত্তো আপাযিকো নেরযিকো কপ্পট্ঠো অতেকিচ্ছো। ইমেহি খো, ভিক্খৰে, অট্ঠহি অসদ্ধম্মেহি অভিভূতো পরিযাদিন্নচিত্তো দেৰদত্তো আপাযিকো নেরযিকো কপ্পট্ঠো অতেকিচ্ছো।
‘‘Sādhu, bhikkhave, bhikkhu kālena kālaṃ attavipattiṃ paccavekkhitā hoti. Sādhu, bhikkhave, bhikkhu kālena kālaṃ paravipattiṃ…pe… attasampattiṃ… parasampattiṃ paccavekkhitā hoti. Aṭṭhahi, bhikkhave, asaddhammehi abhibhūto pariyādinnacitto devadatto āpāyiko nerayiko kappaṭṭho atekiccho. Katamehi aṭṭhahi? Lābhena hi, bhikkhave, abhibhūto pariyādinnacitto devadatto āpāyiko nerayiko kappaṭṭho atekiccho; alābhena, bhikkhave…pe… yasena, bhikkhave … ayasena, bhikkhave… sakkārena, bhikkhave… asakkārena, bhikkhave… pāpicchatāya, bhikkhave… pāpamittatāya , bhikkhave, abhibhūto pariyādinnacitto devadatto āpāyiko nerayiko kappaṭṭho atekiccho. Imehi kho, bhikkhave, aṭṭhahi asaddhammehi abhibhūto pariyādinnacitto devadatto āpāyiko nerayiko kappaṭṭho atekiccho.
‘‘সাধু, ভিক্খৰে, ভিক্খু উপ্পন্নং লাভং অভিভুয্য অভিভুয্য ৰিহরেয্য; উপ্পন্নং অলাভং…পে॰… উপ্পন্নং যসং… উপ্পন্নং অযসং… উপ্পন্নং সক্কারং… উপ্পন্নং অসক্কারং… উপ্পন্নং পাপিচ্ছতং… উপ্পন্নং পাপমিত্ততং অভিভুয্য অভিভুয্য ৰিহরেয্য।
‘‘Sādhu, bhikkhave, bhikkhu uppannaṃ lābhaṃ abhibhuyya abhibhuyya vihareyya; uppannaṃ alābhaṃ…pe… uppannaṃ yasaṃ… uppannaṃ ayasaṃ… uppannaṃ sakkāraṃ… uppannaṃ asakkāraṃ… uppannaṃ pāpicchataṃ… uppannaṃ pāpamittataṃ abhibhuyya abhibhuyya vihareyya.
‘‘কিঞ্চ, ভিক্খৰে, ভিক্খু অত্থৰসং পটিচ্চ উপ্পন্নং লাভং অভিভুয্য অভিভুয্য ৰিহরেয্য; উপ্পন্নং অলাভং…পে॰… উপ্পন্নং যসং… উপ্পন্নং অযসং… উপ্পন্নং সক্কারং… উপ্পন্নং অসক্কারং… উপ্পন্নং পাপিচ্ছতং… উপ্পন্নং পাপমিত্ততং অভিভুয্য অভিভুয্য ৰিহরেয্য?
‘‘Kiñca, bhikkhave, bhikkhu atthavasaṃ paṭicca uppannaṃ lābhaṃ abhibhuyya abhibhuyya vihareyya; uppannaṃ alābhaṃ…pe… uppannaṃ yasaṃ… uppannaṃ ayasaṃ… uppannaṃ sakkāraṃ… uppannaṃ asakkāraṃ… uppannaṃ pāpicchataṃ… uppannaṃ pāpamittataṃ abhibhuyya abhibhuyya vihareyya?
‘‘যং হিস্স, ভিক্খৰে, উপ্পন্নং লাভং অনভিভুয্য ৰিহরতো উপ্পজ্জেয্যুং আসৰা ৰিঘাতপরিল়াহা, উপ্পন্নং লাভং অভিভুয্য ৰিহরতো এৰংস তে আসৰা ৰিঘাতপরিল়াহা ন হোন্তি। যং হিস্স, ভিক্খৰে, উপ্পন্নং অলাভং…পে॰… উপ্পন্নং যসং… উপ্পন্নং অযসং… উপ্পন্নং সক্কারং… উপ্পন্নং অসক্কারং… উপ্পন্নং পাপিচ্ছতং… উপ্পন্নং পাপমিত্ততং অনভিভুয্য ৰিহরতো উপ্পজ্জেয্যুং আসৰা ৰিঘাতপরিল়াহা, উপ্পন্নং পাপমিত্ততং অভিভুয্য ৰিহরতো এৰংস তে আসৰা ৰিঘাতপরিল়াহা ন হোন্তি। ইদং খো, ভিক্খৰে, ভিক্খু অত্থৰসং পটিচ্চ উপ্পন্নং লাভং অভিভুয্য অভিভুয্য ৰিহরেয্য; উপ্পন্নং অলাভং…পে॰… উপ্পন্নং যসং… উপ্পন্নং অযসং… উপ্পন্নং সক্কারং… উপ্পন্নং অসক্কারং… উপ্পন্নং পাপিচ্ছতং … উপ্পন্নং পাপমিত্ততং অভিভুয্য অভিভুয্য ৰিহরেয্য।
‘‘Yaṃ hissa, bhikkhave, uppannaṃ lābhaṃ anabhibhuyya viharato uppajjeyyuṃ āsavā vighātapariḷāhā, uppannaṃ lābhaṃ abhibhuyya viharato evaṃsa te āsavā vighātapariḷāhā na honti. Yaṃ hissa, bhikkhave, uppannaṃ alābhaṃ…pe… uppannaṃ yasaṃ… uppannaṃ ayasaṃ… uppannaṃ sakkāraṃ… uppannaṃ asakkāraṃ… uppannaṃ pāpicchataṃ… uppannaṃ pāpamittataṃ anabhibhuyya viharato uppajjeyyuṃ āsavā vighātapariḷāhā, uppannaṃ pāpamittataṃ abhibhuyya viharato evaṃsa te āsavā vighātapariḷāhā na honti. Idaṃ kho, bhikkhave, bhikkhu atthavasaṃ paṭicca uppannaṃ lābhaṃ abhibhuyya abhibhuyya vihareyya; uppannaṃ alābhaṃ…pe… uppannaṃ yasaṃ… uppannaṃ ayasaṃ… uppannaṃ sakkāraṃ… uppannaṃ asakkāraṃ… uppannaṃ pāpicchataṃ … uppannaṃ pāpamittataṃ abhibhuyya abhibhuyya vihareyya.
‘‘তস্মাতিহ, ভিক্খৰে, এৰং সিক্খিতব্বং – উপ্পন্নং লাভং অভিভুয্য অভিভুয্য ৰিহরিস্সাম, উপ্পন্নং অলাভং…পে॰… উপ্পন্নং যসং… উপ্পন্নং অযসং… উপ্পন্নং সক্কারং… উপ্পন্নং অসক্কারং… উপ্পন্নং পাপিচ্ছতং… উপ্পন্নং পাপমিত্ততং অভিভুয্য অভিভুয্য ৰিহরিস্সামাতি। এৰঞ্হি ৰো, ভিক্খৰে, সিক্খিতব্ব’’ন্তি।
‘‘Tasmātiha, bhikkhave, evaṃ sikkhitabbaṃ – uppannaṃ lābhaṃ abhibhuyya abhibhuyya viharissāma, uppannaṃ alābhaṃ…pe… uppannaṃ yasaṃ… uppannaṃ ayasaṃ… uppannaṃ sakkāraṃ… uppannaṃ asakkāraṃ… uppannaṃ pāpicchataṃ… uppannaṃ pāpamittataṃ abhibhuyya abhibhuyya viharissāmāti. Evañhi vo, bhikkhave, sikkhitabba’’nti.
‘‘এত্তাৰতা, ভন্তে উত্তর, মনুস্সেসু চতস্সো পরিসা – ভিক্খূ, ভিক্খুনিযো, উপাসকা, উপাসিকাযো। নাযং ধম্মপরিযাযো কিস্মিঞ্চি উপট্ঠিতো 11। উগ্গণ্হতু, ভন্তে, আযস্মা উত্তরো ইমং ধম্মপরিযাযং। পরিযাপুণাতু, ভন্তে, আযস্মা উত্তরো ইমং ধম্মপরিযাযং। ধারেতু, ভন্তে, আযস্মা উত্তরো ইমং ধম্মপরিযাযং। অত্থসংহিতো অযং, ভন্তে, ধম্মপরিযাযো আদিব্রহ্মচরিযকো’’তি 12। অট্ঠমং।
‘‘Ettāvatā, bhante uttara, manussesu catasso parisā – bhikkhū, bhikkhuniyo, upāsakā, upāsikāyo. Nāyaṃ dhammapariyāyo kismiñci upaṭṭhito 13. Uggaṇhatu, bhante, āyasmā uttaro imaṃ dhammapariyāyaṃ. Pariyāpuṇātu, bhante, āyasmā uttaro imaṃ dhammapariyāyaṃ. Dhāretu, bhante, āyasmā uttaro imaṃ dhammapariyāyaṃ. Atthasaṃhito ayaṃ, bhante, dhammapariyāyo ādibrahmacariyako’’ti 14. Aṭṭhamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৮. উত্তরৰিপত্তিসুত্তৰণ্ণনা • 8. Uttaravipattisuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৬-৮. দুতিযলোকধম্মসুত্তাদিৰণ্ণনা • 6-8. Dutiyalokadhammasuttādivaṇṇanā
