| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༨. ཨུཏྟརཝིཔཏྟིསུཏྟཾ
8. Uttaravipattisuttaṃ
༨. ཨེཀཾ སམཡཾ ཨཱཡསྨཱ ཨུཏྟརོ མཧིསཝཏྠུསྨིཾ ཝིཧརཏི སངྑེཡྻཀེ པབྦཏེ ཝཊཛཱལིཀཱཡཾ 1། ཏཏྲ ཁོ ཨཱཡསྨཱ ཨུཏྟརོ བྷིཀྑཱུ ཨཱམནྟེསི – ‘‘སཱདྷཱཝུསོ, བྷིཀྑུ ཀཱལེན ཀཱལཾ ཨཏྟཝིཔཏྟིཾ པཙྩཝེཀྑིཏཱ ཧོཏི། སཱདྷཱཝུསོ, བྷིཀྑུ ཀཱལེན ཀཱལཾ པརཝིཔཏྟིཾ པཙྩཝེཀྑིཏཱ ཧོཏི། སཱདྷཱཝུསོ, བྷིཀྑུ ཀཱལེན ཀཱལཾ ཨཏྟསམྤཏྟིཾ པཙྩཝེཀྑིཏཱ ཧོཏི། སཱདྷཱཝུསོ, བྷིཀྑུ ཀཱལེན ཀཱལཾ པརསམྤཏྟིཾ པཙྩཝེཀྑིཏཱ ཧོཏཱི’’ཏི།
8. Ekaṃ samayaṃ āyasmā uttaro mahisavatthusmiṃ viharati saṅkheyyake pabbate vaṭajālikāyaṃ 2. Tatra kho āyasmā uttaro bhikkhū āmantesi – ‘‘sādhāvuso, bhikkhu kālena kālaṃ attavipattiṃ paccavekkhitā hoti. Sādhāvuso, bhikkhu kālena kālaṃ paravipattiṃ paccavekkhitā hoti. Sādhāvuso, bhikkhu kālena kālaṃ attasampattiṃ paccavekkhitā hoti. Sādhāvuso, bhikkhu kālena kālaṃ parasampattiṃ paccavekkhitā hotī’’ti.
ཏེན ཁོ པན སམཡེན ཝེསྶཝཎོ མཧཱརཱཛཱ ཨུཏྟརཱཡ དིསཱཡ དཀྑིཎཾ དིསཾ གཙྪཏི ཀེནཙིདེཝ ཀརཎཱིཡེན། ཨསྶོསི ཁོ ཝེསྶཝཎོ མཧཱརཱཛཱ ཨཱཡསྨཏོ ཨུཏྟརསྶ མཧིསཝཏྠུསྨིཾ སངྑེཡྻཀེ པབྦཏེ ཝཊཛཱལིཀཱཡཾ བྷིཀྑཱུནཾ ཨེཝཾ དྷམྨཾ དེསེནྟསྶ – ‘‘སཱདྷཱཝུསོ, བྷིཀྑུ ཀཱལེན ཀཱལཾ ཨཏྟཝིཔཏྟིཾ པཙྩཝེཀྑིཏཱ ཧོཏི། སཱདྷཱཝུསོ, བྷིཀྑུ ཀཱལེན ཀཱལཾ པརཝིཔཏྟིཾ པཙྩཝེཀྑིཏཱ ཧོཏི། སཱདྷཱཝུསོ, བྷིཀྑུ ཀཱལེན ཀཱལཾ ཨཏྟསམྤཏྟིཾ པཙྩཝེཀྑིཏཱ ཧོཏི། སཱདྷཱཝུསོ, བྷིཀྑུ ཀཱལེན ཀཱལཾ པརསམྤཏྟིཾ པཙྩཝེཀྑིཏཱ ཧོཏཱི’’ཏི།
Tena kho pana samayena vessavaṇo mahārājā uttarāya disāya dakkhiṇaṃ disaṃ gacchati kenacideva karaṇīyena. Assosi kho vessavaṇo mahārājā āyasmato uttarassa mahisavatthusmiṃ saṅkheyyake pabbate vaṭajālikāyaṃ bhikkhūnaṃ evaṃ dhammaṃ desentassa – ‘‘sādhāvuso, bhikkhu kālena kālaṃ attavipattiṃ paccavekkhitā hoti. Sādhāvuso, bhikkhu kālena kālaṃ paravipattiṃ paccavekkhitā hoti. Sādhāvuso, bhikkhu kālena kālaṃ attasampattiṃ paccavekkhitā hoti. Sādhāvuso, bhikkhu kālena kālaṃ parasampattiṃ paccavekkhitā hotī’’ti.
ཨཐ ཁོ ཝེསྶཝཎྞོ མཧཱརཱཛཱ – སེཡྻཐཱཔི ནཱམ བལཝཱ པུརིསོ སམིཉྫིཏཾ 3 ཝཱ བཱཧཾ པསཱརེཡྻ, པསཱརིཏཾ ཝཱ བཱཧཾ སམིཉྫེཡྻ 4, ཨེཝམེཝཾ མཧིསཝཏྠུསྨིཾ སངྑེཡྻཀེ པབྦཏེ ཝཊཛཱལིཀཱཡཾ ཨནྟརཧིཏོ དེཝེསུ ཏཱཝཏིཾསེསུ པཱཏུརཧོསི། ཨཐ ཁོ ཝེསྶཝཎྞོ མཧཱརཱཛཱ ཡེན སཀྐོ དེཝཱནམིནྡོ ཏེནུཔསངྐམི; ཨུཔསངྐམིཏྭཱ སཀྐཾ དེཝཱནམིནྡཾ ཨེཏདཝོཙ – ‘‘ཡགྒྷེ མཱརིས, ཛཱནེཡྻཱསི! ཨེསོ ཨཱཡསྨཱ ཨུཏྟརོ མཧིསཝཏྠུསྨིཾ སངྑེཡྻཀེ པབྦཏེ ཝཊཛཱལིཀཱཡཾ བྷིཀྑཱུནཾ ཨེཝཾ དྷམྨཾ དེསེཏི – ‘སཱདྷཱཝུསོ, བྷིཀྑུ ཀཱལེན ཀཱལཾ ཨཏྟཝིཔཏྟིཾ པཙྩཝེཀྑིཏཱ ཧོཏི ། སཱདྷཱཝུསོ, བྷིཀྑུ ཀཱལེན ཀཱལཾ པརཝིཔཏྟིཾ…པེ॰… ཨཏྟསམྤཏྟིཾ… པརསམྤཏྟིཾ པཙྩཝེཀྑིཏཱ ཧོཏཱི’’’ཏི།
Atha kho vessavaṇṇo mahārājā – seyyathāpi nāma balavā puriso samiñjitaṃ 5 vā bāhaṃ pasāreyya, pasāritaṃ vā bāhaṃ samiñjeyya 6, evamevaṃ mahisavatthusmiṃ saṅkheyyake pabbate vaṭajālikāyaṃ antarahito devesu tāvatiṃsesu pāturahosi. Atha kho vessavaṇṇo mahārājā yena sakko devānamindo tenupasaṅkami; upasaṅkamitvā sakkaṃ devānamindaṃ etadavoca – ‘‘yagghe mārisa, jāneyyāsi! Eso āyasmā uttaro mahisavatthusmiṃ saṅkheyyake pabbate vaṭajālikāyaṃ bhikkhūnaṃ evaṃ dhammaṃ deseti – ‘sādhāvuso, bhikkhu kālena kālaṃ attavipattiṃ paccavekkhitā hoti . Sādhāvuso, bhikkhu kālena kālaṃ paravipattiṃ…pe… attasampattiṃ… parasampattiṃ paccavekkhitā hotī’’’ti.
ཨཐ ཁོ སཀྐོ དེཝཱནམིནྡོ སེཡྻཐཱཔི ནཱམ བལཝཱ པུརིསོ སམིཉྫིཏཾ ཝཱ བཱཧཾ པསཱརེཡྻ, པསཱརིཏཾ ཝཱ བཱཧཾ སམིཉྫེཡྻ, ཨེཝམེཝཾ དེཝེསུ ཏཱཝཏིཾསེསུ ཨནྟརཧིཏོ མཧིསཝཏྠུསྨིཾ སངྑེཡྻཀེ པབྦཏེ ཝཊཛཱལིཀཱཡཾ ཨཱཡསྨཏོ ཨུཏྟརསྶ སམྨུཁེ པཱཏུརཧོསི། ཨཐ ཁོ སཀྐོ དེཝཱནམིནྡོ ཡེནཱཡསྨཱ ཨུཏྟརོ ཏེནུཔསངྐམི; ཨུཔསངྐམིཏྭཱ ཨཱཡསྨནྟཾ ཨུཏྟརཾ ཨབྷིཝཱདེཏྭཱ ཨེཀམནྟཾ ཨཊྛཱསི། ཨེཀམནྟཾ ཋིཏོ ཁོ སཀྐོ དེཝཱནམིནྡོ ཨཱཡསྨནྟཾ ཨུཏྟརཾ ཨེཏདཝོཙ –
Atha kho sakko devānamindo seyyathāpi nāma balavā puriso samiñjitaṃ vā bāhaṃ pasāreyya, pasāritaṃ vā bāhaṃ samiñjeyya, evamevaṃ devesu tāvatiṃsesu antarahito mahisavatthusmiṃ saṅkheyyake pabbate vaṭajālikāyaṃ āyasmato uttarassa sammukhe pāturahosi. Atha kho sakko devānamindo yenāyasmā uttaro tenupasaṅkami; upasaṅkamitvā āyasmantaṃ uttaraṃ abhivādetvā ekamantaṃ aṭṭhāsi. Ekamantaṃ ṭhito kho sakko devānamindo āyasmantaṃ uttaraṃ etadavoca –
‘‘སཙྩཾ ཀིར, བྷནྟེ, ཨཱཡསྨཱ ཨུཏྟརོ བྷིཀྑཱུནཾ ཨེཝཾ དྷམྨཾ དེསེསི – ‘སཱདྷཱཝུསོ, བྷིཀྑུ ཀཱལེན ཀཱལཾ ཨཏྟཝིཔཏྟིཾ པཙྩཝེཀྑིཏཱ ཧོཏི, སཱདྷཱཝུསོ, བྷིཀྑུ ཀཱལེན ཀཱལཾ པརཝིཔཏྟིཾ…པེ॰… ཨཏྟསམྤཏྟིཾ… པརསམྤཏྟིཾ པཙྩཝེཀྑིཏཱ ཧོཏཱི’’’ ཏི? ‘‘ཨེཝཾ, དེཝཱནམིནྡཱ’’ཏི། ‘‘ཀིཾ པནིདཾ 7, བྷནྟེ, ཨཱཡསྨཏོ ཨུཏྟརསྶ སཀཾ པཊིབྷཱནཾ 8, ཨུདཱཧུ ཏསྶ བྷགཝཏོ ཝཙནཾ ཨརཧཏོ སམྨཱསམྦུདྡྷསྶཱ’’ཏི? ‘‘ཏེན ཧི, དེཝཱནམིནྡ, ཨུཔམཾ ཏེ ཀརིསྶཱམི། ཨུཔམཱཡ མིདྷེཀཙྩེ ཝིཉྙཱུ པུརིསཱ བྷཱསིཏསྶ ཨཏྠཾ ཨཱཛཱན’’ནྟི།
‘‘Saccaṃ kira, bhante, āyasmā uttaro bhikkhūnaṃ evaṃ dhammaṃ desesi – ‘sādhāvuso, bhikkhu kālena kālaṃ attavipattiṃ paccavekkhitā hoti, sādhāvuso, bhikkhu kālena kālaṃ paravipattiṃ…pe… attasampattiṃ… parasampattiṃ paccavekkhitā hotī’’’ ti? ‘‘Evaṃ, devānamindā’’ti. ‘‘Kiṃ panidaṃ 9, bhante, āyasmato uttarassa sakaṃ paṭibhānaṃ 10, udāhu tassa bhagavato vacanaṃ arahato sammāsambuddhassā’’ti? ‘‘Tena hi, devānaminda, upamaṃ te karissāmi. Upamāya midhekacce viññū purisā bhāsitassa atthaṃ ājāna’’nti.
‘‘སེཡྻཐཱཔི, དེཝཱནམིནྡ, གཱམསྶ ཝཱ ནིགམསྶ ཝཱ ཨཝིདཱུརེ མཧཱདྷཉྙརཱསི། ཏཏོ མཧཱཛནཀཱཡོ དྷཉྙཾ ཨཱཧརེཡྻ – ཀཱཛེཧིཔི པིཊཀེཧིཔི ཨུཙྪངྒེཧིཔི ཨཉྫལཱིཧིཔི ། ཡོ ནུ ཁོ, དེཝཱནམིནྡ, ཏཾ མཧཱཛནཀཱཡཾ ཨུཔསངྐམིཏྭཱ ཨེཝཾ པུཙྪེཡྻ – ‘ཀུཏོ ཨིམཾ དྷཉྙཾ ཨཱཧརཐཱ’ཏི, ཀཐཾ བྱཱཀརམཱནོ ནུ ཁོ, དེཝཱནམིནྡ, སོ མཧཱཛནཀཱཡོ སམྨཱ བྱཱཀརམཱནོ བྱཱཀརེཡྻཱ’’ཏི? ‘‘‘ཨམུམྷཱ མཧཱདྷཉྙརཱསིམྷཱ ཨཱཧརཱམཱ’ཏི ཁོ, བྷནྟེ, སོ མཧཱཛནཀཱཡོ སམྨཱ བྱཱཀརམཱནོ བྱཱཀརེཡྻཱ’’ཏི། ‘‘ཨེཝམེཝཾ ཁོ, དེཝཱནམིནྡ, ཡཾ ཀིཉྩི སུབྷཱསིཏཾ སབྦཾ ཏཾ ཏསྶ བྷགཝཏོ ཝཙནཾ ཨརཧཏོ སམྨཱསམྦུདྡྷསྶ། ཏཏོ ཨུཔཱདཱཡུཔཱདཱཡ མཡཾ ཙཉྙེ ཙ བྷཎཱམཱ’’ཏི།
‘‘Seyyathāpi, devānaminda, gāmassa vā nigamassa vā avidūre mahādhaññarāsi. Tato mahājanakāyo dhaññaṃ āhareyya – kājehipi piṭakehipi ucchaṅgehipi añjalīhipi . Yo nu kho, devānaminda, taṃ mahājanakāyaṃ upasaṅkamitvā evaṃ puccheyya – ‘kuto imaṃ dhaññaṃ āharathā’ti, kathaṃ byākaramāno nu kho, devānaminda, so mahājanakāyo sammā byākaramāno byākareyyā’’ti? ‘‘‘Amumhā mahādhaññarāsimhā āharāmā’ti kho, bhante, so mahājanakāyo sammā byākaramāno byākareyyā’’ti. ‘‘Evamevaṃ kho, devānaminda, yaṃ kiñci subhāsitaṃ sabbaṃ taṃ tassa bhagavato vacanaṃ arahato sammāsambuddhassa. Tato upādāyupādāya mayaṃ caññe ca bhaṇāmā’’ti.
‘‘ཨཙྪརིཡཾ, བྷནྟེ, ཨབྦྷུཏཾ བྷནྟེ! ཡཱཝ སུབྷཱསིཏཾ ཙིདཾ ཨཱཡསྨཏཱ ཨུཏྟརེན – ‘ཡཾ ཀིཉྩི སུབྷཱསིཏཾ སབྦཾ ཏཾ ཏསྶ བྷགཝཏོ ཝཙནཾ ཨརཧཏོ སམྨཱསམྦུདྡྷསྶ ། ཏཏོ ཨུཔཱདཱཡུཔཱདཱཡ མཡཾ ཙཉྙེ ཙ བྷཎཱམཱ’ཏི། ཨེཀམིདཾ, བྷནྟེ ཨུཏྟར, སམཡཾ བྷགཝཱ རཱཛགཧེ ཝིཧརཏི གིཛ྄ཛྷཀཱུཊེ པབྦཏེ ཨཙིརཔཀྐནྟེ དེཝདཏྟེ། ཏཏྲ ཁོ བྷགཝཱ དེཝདཏྟཾ ཨཱརབྦྷ བྷིཀྑཱུ ཨཱམནྟེསི –
‘‘Acchariyaṃ, bhante, abbhutaṃ bhante! Yāva subhāsitaṃ cidaṃ āyasmatā uttarena – ‘yaṃ kiñci subhāsitaṃ sabbaṃ taṃ tassa bhagavato vacanaṃ arahato sammāsambuddhassa . Tato upādāyupādāya mayaṃ caññe ca bhaṇāmā’ti. Ekamidaṃ, bhante uttara, samayaṃ bhagavā rājagahe viharati gijjhakūṭe pabbate acirapakkante devadatte. Tatra kho bhagavā devadattaṃ ārabbha bhikkhū āmantesi –
‘‘སཱདྷུ, བྷིཀྑཝེ, བྷིཀྑུ ཀཱལེན ཀཱལཾ ཨཏྟཝིཔཏྟིཾ པཙྩཝེཀྑིཏཱ ཧོཏི། སཱདྷུ, བྷིཀྑཝེ, བྷིཀྑུ ཀཱལེན ཀཱལཾ པརཝིཔཏྟིཾ…པེ॰… ཨཏྟསམྤཏྟིཾ… པརསམྤཏྟིཾ པཙྩཝེཀྑིཏཱ ཧོཏི། ཨཊྛཧི, བྷིཀྑཝེ, ཨསདྡྷམྨེཧི ཨབྷིབྷཱུཏོ པརིཡཱདིནྣཙིཏྟོ དེཝདཏྟོ ཨཱཔཱཡིཀོ ནེརཡིཀོ ཀཔྤཊྛོ ཨཏེཀིཙྪོ། ཀཏམེཧི ཨཊྛཧི? ལཱབྷེན ཧི, བྷིཀྑཝེ, ཨབྷིབྷཱུཏོ པརིཡཱདིནྣཙིཏྟོ དེཝདཏྟོ ཨཱཔཱཡིཀོ ནེརཡིཀོ ཀཔྤཊྛོ ཨཏེཀིཙྪོ; ཨལཱབྷེན, བྷིཀྑཝེ…པེ॰… ཡསེན, བྷིཀྑཝེ … ཨཡསེན, བྷིཀྑཝེ… སཀྐཱརེན, བྷིཀྑཝེ… ཨསཀྐཱརེན, བྷིཀྑཝེ… པཱཔིཙྪཏཱཡ, བྷིཀྑཝེ… པཱཔམིཏྟཏཱཡ , བྷིཀྑཝེ, ཨབྷིབྷཱུཏོ པརིཡཱདིནྣཙིཏྟོ དེཝདཏྟོ ཨཱཔཱཡིཀོ ནེརཡིཀོ ཀཔྤཊྛོ ཨཏེཀིཙྪོ། ཨིམེཧི ཁོ, བྷིཀྑཝེ, ཨཊྛཧི ཨསདྡྷམྨེཧི ཨབྷིབྷཱུཏོ པརིཡཱདིནྣཙིཏྟོ དེཝདཏྟོ ཨཱཔཱཡིཀོ ནེརཡིཀོ ཀཔྤཊྛོ ཨཏེཀིཙྪོ།
‘‘Sādhu, bhikkhave, bhikkhu kālena kālaṃ attavipattiṃ paccavekkhitā hoti. Sādhu, bhikkhave, bhikkhu kālena kālaṃ paravipattiṃ…pe… attasampattiṃ… parasampattiṃ paccavekkhitā hoti. Aṭṭhahi, bhikkhave, asaddhammehi abhibhūto pariyādinnacitto devadatto āpāyiko nerayiko kappaṭṭho atekiccho. Katamehi aṭṭhahi? Lābhena hi, bhikkhave, abhibhūto pariyādinnacitto devadatto āpāyiko nerayiko kappaṭṭho atekiccho; alābhena, bhikkhave…pe… yasena, bhikkhave … ayasena, bhikkhave… sakkārena, bhikkhave… asakkārena, bhikkhave… pāpicchatāya, bhikkhave… pāpamittatāya , bhikkhave, abhibhūto pariyādinnacitto devadatto āpāyiko nerayiko kappaṭṭho atekiccho. Imehi kho, bhikkhave, aṭṭhahi asaddhammehi abhibhūto pariyādinnacitto devadatto āpāyiko nerayiko kappaṭṭho atekiccho.
‘‘སཱདྷུ, བྷིཀྑཝེ, བྷིཀྑུ ཨུཔྤནྣཾ ལཱབྷཾ ཨབྷིབྷུཡྻ ཨབྷིབྷུཡྻ ཝིཧརེཡྻ; ཨུཔྤནྣཾ ཨལཱབྷཾ…པེ॰… ཨུཔྤནྣཾ ཡསཾ… ཨུཔྤནྣཾ ཨཡསཾ… ཨུཔྤནྣཾ སཀྐཱརཾ… ཨུཔྤནྣཾ ཨསཀྐཱརཾ… ཨུཔྤནྣཾ པཱཔིཙྪཏཾ… ཨུཔྤནྣཾ པཱཔམིཏྟཏཾ ཨབྷིབྷུཡྻ ཨབྷིབྷུཡྻ ཝིཧརེཡྻ།
‘‘Sādhu, bhikkhave, bhikkhu uppannaṃ lābhaṃ abhibhuyya abhibhuyya vihareyya; uppannaṃ alābhaṃ…pe… uppannaṃ yasaṃ… uppannaṃ ayasaṃ… uppannaṃ sakkāraṃ… uppannaṃ asakkāraṃ… uppannaṃ pāpicchataṃ… uppannaṃ pāpamittataṃ abhibhuyya abhibhuyya vihareyya.
‘‘ཀིཉྩ, བྷིཀྑཝེ, བྷིཀྑུ ཨཏྠཝསཾ པཊིཙྩ ཨུཔྤནྣཾ ལཱབྷཾ ཨབྷིབྷུཡྻ ཨབྷིབྷུཡྻ ཝིཧརེཡྻ; ཨུཔྤནྣཾ ཨལཱབྷཾ…པེ॰… ཨུཔྤནྣཾ ཡསཾ… ཨུཔྤནྣཾ ཨཡསཾ… ཨུཔྤནྣཾ སཀྐཱརཾ… ཨུཔྤནྣཾ ཨསཀྐཱརཾ… ཨུཔྤནྣཾ པཱཔིཙྪཏཾ… ཨུཔྤནྣཾ པཱཔམིཏྟཏཾ ཨབྷིབྷུཡྻ ཨབྷིབྷུཡྻ ཝིཧརེཡྻ?
‘‘Kiñca, bhikkhave, bhikkhu atthavasaṃ paṭicca uppannaṃ lābhaṃ abhibhuyya abhibhuyya vihareyya; uppannaṃ alābhaṃ…pe… uppannaṃ yasaṃ… uppannaṃ ayasaṃ… uppannaṃ sakkāraṃ… uppannaṃ asakkāraṃ… uppannaṃ pāpicchataṃ… uppannaṃ pāpamittataṃ abhibhuyya abhibhuyya vihareyya?
‘‘ཡཾ ཧིསྶ, བྷིཀྑཝེ, ཨུཔྤནྣཾ ལཱབྷཾ ཨནབྷིབྷུཡྻ ཝིཧརཏོ ཨུཔྤཛྫེཡྻུཾ ཨཱསཝཱ ཝིགྷཱཏཔརིལཱ༹ཧཱ, ཨུཔྤནྣཾ ལཱབྷཾ ཨབྷིབྷུཡྻ ཝིཧརཏོ ཨེཝཾས ཏེ ཨཱསཝཱ ཝིགྷཱཏཔརིལཱ༹ཧཱ ན ཧོནྟི། ཡཾ ཧིསྶ, བྷིཀྑཝེ, ཨུཔྤནྣཾ ཨལཱབྷཾ…པེ॰… ཨུཔྤནྣཾ ཡསཾ… ཨུཔྤནྣཾ ཨཡསཾ… ཨུཔྤནྣཾ སཀྐཱརཾ… ཨུཔྤནྣཾ ཨསཀྐཱརཾ… ཨུཔྤནྣཾ པཱཔིཙྪཏཾ… ཨུཔྤནྣཾ པཱཔམིཏྟཏཾ ཨནབྷིབྷུཡྻ ཝིཧརཏོ ཨུཔྤཛྫེཡྻུཾ ཨཱསཝཱ ཝིགྷཱཏཔརིལཱ༹ཧཱ, ཨུཔྤནྣཾ པཱཔམིཏྟཏཾ ཨབྷིབྷུཡྻ ཝིཧརཏོ ཨེཝཾས ཏེ ཨཱསཝཱ ཝིགྷཱཏཔརིལཱ༹ཧཱ ན ཧོནྟི། ཨིདཾ ཁོ, བྷིཀྑཝེ, བྷིཀྑུ ཨཏྠཝསཾ པཊིཙྩ ཨུཔྤནྣཾ ལཱབྷཾ ཨབྷིབྷུཡྻ ཨབྷིབྷུཡྻ ཝིཧརེཡྻ; ཨུཔྤནྣཾ ཨལཱབྷཾ…པེ॰… ཨུཔྤནྣཾ ཡསཾ… ཨུཔྤནྣཾ ཨཡསཾ… ཨུཔྤནྣཾ སཀྐཱརཾ… ཨུཔྤནྣཾ ཨསཀྐཱརཾ… ཨུཔྤནྣཾ པཱཔིཙྪཏཾ … ཨུཔྤནྣཾ པཱཔམིཏྟཏཾ ཨབྷིབྷུཡྻ ཨབྷིབྷུཡྻ ཝིཧརེཡྻ།
‘‘Yaṃ hissa, bhikkhave, uppannaṃ lābhaṃ anabhibhuyya viharato uppajjeyyuṃ āsavā vighātapariḷāhā, uppannaṃ lābhaṃ abhibhuyya viharato evaṃsa te āsavā vighātapariḷāhā na honti. Yaṃ hissa, bhikkhave, uppannaṃ alābhaṃ…pe… uppannaṃ yasaṃ… uppannaṃ ayasaṃ… uppannaṃ sakkāraṃ… uppannaṃ asakkāraṃ… uppannaṃ pāpicchataṃ… uppannaṃ pāpamittataṃ anabhibhuyya viharato uppajjeyyuṃ āsavā vighātapariḷāhā, uppannaṃ pāpamittataṃ abhibhuyya viharato evaṃsa te āsavā vighātapariḷāhā na honti. Idaṃ kho, bhikkhave, bhikkhu atthavasaṃ paṭicca uppannaṃ lābhaṃ abhibhuyya abhibhuyya vihareyya; uppannaṃ alābhaṃ…pe… uppannaṃ yasaṃ… uppannaṃ ayasaṃ… uppannaṃ sakkāraṃ… uppannaṃ asakkāraṃ… uppannaṃ pāpicchataṃ … uppannaṃ pāpamittataṃ abhibhuyya abhibhuyya vihareyya.
‘‘ཏསྨཱཏིཧ, བྷིཀྑཝེ, ཨེཝཾ སིཀྑིཏབྦཾ – ཨུཔྤནྣཾ ལཱབྷཾ ཨབྷིབྷུཡྻ ཨབྷིབྷུཡྻ ཝིཧརིསྶཱམ, ཨུཔྤནྣཾ ཨལཱབྷཾ…པེ॰… ཨུཔྤནྣཾ ཡསཾ… ཨུཔྤནྣཾ ཨཡསཾ… ཨུཔྤནྣཾ སཀྐཱརཾ… ཨུཔྤནྣཾ ཨསཀྐཱརཾ… ཨུཔྤནྣཾ པཱཔིཙྪཏཾ… ཨུཔྤནྣཾ པཱཔམིཏྟཏཾ ཨབྷིབྷུཡྻ ཨབྷིབྷུཡྻ ཝིཧརིསྶཱམཱཏི། ཨེཝཉྷི ཝོ, བྷིཀྑཝེ, སིཀྑིཏབྦ’’ནྟི།
‘‘Tasmātiha, bhikkhave, evaṃ sikkhitabbaṃ – uppannaṃ lābhaṃ abhibhuyya abhibhuyya viharissāma, uppannaṃ alābhaṃ…pe… uppannaṃ yasaṃ… uppannaṃ ayasaṃ… uppannaṃ sakkāraṃ… uppannaṃ asakkāraṃ… uppannaṃ pāpicchataṃ… uppannaṃ pāpamittataṃ abhibhuyya abhibhuyya viharissāmāti. Evañhi vo, bhikkhave, sikkhitabba’’nti.
‘‘ཨེཏྟཱཝཏཱ, བྷནྟེ ཨུཏྟར, མནུསྶེསུ ཙཏསྶོ པརིསཱ – བྷིཀྑཱུ, བྷིཀྑུནིཡོ, ཨུཔཱསཀཱ, ཨུཔཱསིཀཱཡོ། ནཱཡཾ དྷམྨཔརིཡཱཡོ ཀིསྨིཉྩི ཨུཔཊྛིཏོ 11། ཨུགྒཎྷཏུ, བྷནྟེ, ཨཱཡསྨཱ ཨུཏྟརོ ཨིམཾ དྷམྨཔརིཡཱཡཾ། པརིཡཱཔུཎཱཏུ, བྷནྟེ, ཨཱཡསྨཱ ཨུཏྟརོ ཨིམཾ དྷམྨཔརིཡཱཡཾ། དྷཱརེཏུ, བྷནྟེ, ཨཱཡསྨཱ ཨུཏྟརོ ཨིམཾ དྷམྨཔརིཡཱཡཾ། ཨཏྠསཾཧིཏོ ཨཡཾ, བྷནྟེ, དྷམྨཔརིཡཱཡོ ཨཱདིབྲཧྨཙརིཡཀོ’’ཏི 12། ཨཊྛམཾ།
‘‘Ettāvatā, bhante uttara, manussesu catasso parisā – bhikkhū, bhikkhuniyo, upāsakā, upāsikāyo. Nāyaṃ dhammapariyāyo kismiñci upaṭṭhito 13. Uggaṇhatu, bhante, āyasmā uttaro imaṃ dhammapariyāyaṃ. Pariyāpuṇātu, bhante, āyasmā uttaro imaṃ dhammapariyāyaṃ. Dhāretu, bhante, āyasmā uttaro imaṃ dhammapariyāyaṃ. Atthasaṃhito ayaṃ, bhante, dhammapariyāyo ādibrahmacariyako’’ti 14. Aṭṭhamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༨. ཨུཏྟརཝིཔཏྟིསུཏྟཝཎྞནཱ • 8. Uttaravipattisuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༦-༨. དུཏིཡལོཀདྷམྨསུཏྟཱདིཝཎྞནཱ • 6-8. Dutiyalokadhammasuttādivaṇṇanā
