| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
9. உத்தரிகரணீயபஞ்ஹோ
9. Uttarikaraṇīyapañho
9. ‘‘ப⁴ந்தே நாக³ஸேன, தும்ஹே ப⁴ணத² ‘யங் கிஞ்சி கரணீயங் ததா²க³தஸ்ஸ, ஸப்³ப³ங் தங் போ³தி⁴யா யேவ மூலே பரினிட்டி²தங், நத்தி² ததா²க³தஸ்ஸ உத்தரிங் கரணீயங், கதஸ்ஸ வா பதிசயோ’தி, இத³ஞ்ச தேமாஸங் படிஸல்லானங் தி³ஸ்ஸதி. யதி³, ப⁴ந்தே நாக³ஸேன, யங் கிஞ்சி கரணீயங் ததா²க³தஸ்ஸ, ஸப்³ப³ங் தங் போ³தி⁴யா யேவ மூலே பரினிட்டி²தங், நத்தி² ததா²க³தஸ்ஸ உத்தரிங் கரணீயங், கதஸ்ஸ வா பதிசயோ, தேன ஹி ‘தேமாஸங் படிஸல்லீனோ’தி யங் வசனங், தங் மிச்சா². யதி³ தேமாஸங் படிஸல்லீனோ, தேன ஹி ‘யங் கிஞ்சி கரணீயங், ததா²க³தஸ்ஸ, ஸப்³ப³ங் தங் போ³தி⁴யா யேவ மூலே பரினிட்டி²த’ந்தி தம்பி வசனங் மிச்சா² . நத்தி² கதகரணீயஸ்ஸ படிஸல்லானங், ஸகரணீயஸ்ஸேவ படிஸல்லானங் யதா² நாம ப்³யாதி⁴தஸ்ஸேவ பே⁴ஸஜ்ஜேன கரணீயங் ஹோதி, அப்³யாதி⁴தஸ்ஸ கிங் பே⁴ஸஜ்ஜேன. சா²தஸ்ஸேவ போ⁴ஜனேன கரணீயங் ஹோதி, அசா²தஸ்ஸ கிங் போ⁴ஜனேன. ஏவமேவ கோ², ப⁴ந்தே நாக³ஸேன, நத்தி² கதகரணீயஸ்ஸ படிஸல்லானங், ஸகரணீயஸ்ஸேவ படிஸல்லானங். அயம்பி உப⁴தோ கோடிகோ பஞ்ஹோ தவானுப்பத்தோ, ஸோ தயா நிப்³பா³ஹிதப்³போ³’’தி.
9. ‘‘Bhante nāgasena, tumhe bhaṇatha ‘yaṃ kiñci karaṇīyaṃ tathāgatassa, sabbaṃ taṃ bodhiyā yeva mūle pariniṭṭhitaṃ, natthi tathāgatassa uttariṃ karaṇīyaṃ, katassa vā paticayo’ti, idañca temāsaṃ paṭisallānaṃ dissati. Yadi, bhante nāgasena, yaṃ kiñci karaṇīyaṃ tathāgatassa, sabbaṃ taṃ bodhiyā yeva mūle pariniṭṭhitaṃ, natthi tathāgatassa uttariṃ karaṇīyaṃ, katassa vā paticayo, tena hi ‘temāsaṃ paṭisallīno’ti yaṃ vacanaṃ, taṃ micchā. Yadi temāsaṃ paṭisallīno, tena hi ‘yaṃ kiñci karaṇīyaṃ, tathāgatassa, sabbaṃ taṃ bodhiyā yeva mūle pariniṭṭhita’nti tampi vacanaṃ micchā . Natthi katakaraṇīyassa paṭisallānaṃ, sakaraṇīyasseva paṭisallānaṃ yathā nāma byādhitasseva bhesajjena karaṇīyaṃ hoti, abyādhitassa kiṃ bhesajjena. Chātasseva bhojanena karaṇīyaṃ hoti, achātassa kiṃ bhojanena. Evameva kho, bhante nāgasena, natthi katakaraṇīyassa paṭisallānaṃ, sakaraṇīyasseva paṭisallānaṃ. Ayampi ubhato koṭiko pañho tavānuppatto, so tayā nibbāhitabbo’’ti.
‘‘யங் கிஞ்சி, மஹாராஜ, கரணீயங் ததா²க³தஸ்ஸ, ஸப்³ப³ங் தங் போ³தி⁴யா யேவ மூலே பரினிட்டி²தங், நத்தி² ததா²க³தஸ்ஸ உத்தரிங் கரணீயங், கதஸ்ஸ வா பதிசயோ, ப⁴க³வா ச தேமாஸங் படிஸல்லீனோ, படிஸல்லானங் கோ², மஹாராஜ, ப³ஹுகு³ணங், ஸப்³பே³பி ததா²க³தா படிஸல்லீயித்வா ஸப்³ப³ஞ்ஞுதங் பத்தா, தங் தே ஸுகதகு³ணமனுஸ்ஸரந்தா படிஸல்லானங் ஸேவந்தி. யதா², மஹாராஜ, புரிஸோ ரஞ்ஞோ ஸந்திகா லத்³த⁴வரோ படிலத்³த⁴போ⁴கோ³ தங் ஸுகதகு³ணமனுஸ்ஸரந்தோ அபராபரங் ரஞ்ஞோ உபட்டா²னங் ஏதி. ஏவமேவ கோ², மஹாராஜ, ஸப்³பே³பி ததா²க³தா படிஸல்லீயித்வா ஸப்³ப³ஞ்ஞுதங் பத்தா, தங் தே ஸுகதகு³ணமனுஸ்ஸரந்தா படிஸல்லானங் ஸேவந்தி.
‘‘Yaṃ kiñci, mahārāja, karaṇīyaṃ tathāgatassa, sabbaṃ taṃ bodhiyā yeva mūle pariniṭṭhitaṃ, natthi tathāgatassa uttariṃ karaṇīyaṃ, katassa vā paticayo, bhagavā ca temāsaṃ paṭisallīno, paṭisallānaṃ kho, mahārāja, bahuguṇaṃ, sabbepi tathāgatā paṭisallīyitvā sabbaññutaṃ pattā, taṃ te sukataguṇamanussarantā paṭisallānaṃ sevanti. Yathā, mahārāja, puriso rañño santikā laddhavaro paṭiladdhabhogo taṃ sukataguṇamanussaranto aparāparaṃ rañño upaṭṭhānaṃ eti. Evameva kho, mahārāja, sabbepi tathāgatā paṭisallīyitvā sabbaññutaṃ pattā, taṃ te sukataguṇamanussarantā paṭisallānaṃ sevanti.
‘‘யதா² வா பன, மஹாராஜ, புரிஸோ ஆதுரோ து³க்கி²தோ பா³ள்ஹகி³லானோ பி⁴ஸக்கமுபஸேவித்வா ஸொத்தி²மனுப்பத்தோ தங் ஸுகதகு³ணமனுஸ்ஸரந்தோ அபராபரங் பி⁴ஸக்கமுபஸேவதி. ஏவமேவ கோ², மஹாராஜ, ஸப்³பே³பி ததா²க³தா படிஸல்லீயித்வா ஸப்³ப³ஞ்ஞுதங் பத்தா, தங் தே ஸுகதகு³ணமனுஸ்ஸரந்தா படிஸல்லானங் ஸேவந்தி.
‘‘Yathā vā pana, mahārāja, puriso āturo dukkhito bāḷhagilāno bhisakkamupasevitvā sotthimanuppatto taṃ sukataguṇamanussaranto aparāparaṃ bhisakkamupasevati. Evameva kho, mahārāja, sabbepi tathāgatā paṭisallīyitvā sabbaññutaṃ pattā, taṃ te sukataguṇamanussarantā paṭisallānaṃ sevanti.
‘‘அட்ட²வீஸதி கோ² பனிமே, மஹாராஜ, படிஸல்லானகு³ணா, யே கு³ணே ஸமனுஸ்ஸரந்தா 1 ததா²க³தா படிஸல்லானங் ஸேவந்தி. கதமே அட்ட²வீஸதி? இத⁴, மஹாராஜ, படிஸல்லானங் படிஸல்லீயமானங் அத்தானங் ரக்க²தி, ஆயுங் வட்³டே⁴தி, ப³லங் தே³தி, வஜ்ஜங் பித³ஹதி, அயஸமபனேதி, யஸமுபனேதி, அரதிங் வினோதே³தி, ரதிமுபத³ஹதி, ப⁴யமபனேதி, வேஸாரஜ்ஜங் கரோதி, கோஸஜ்ஜமபனேதி, வீரியமபி⁴ஜனேதி, ராக³மபனேதி, தோ³ஸமபனேதி, மோஹமபனேதி, மானங் நிஹந்தி, விதக்கங் ப⁴ஞ்ஜதி, சித்தங் ஏகக்³க³ங் கரோதி, மானஸங் ஸ்னேஹயதி 2, ஹாஸங் ஜனேதி, க³ருகங் கரோதி, லாப⁴முப்பாத³யதி, நமஸ்ஸியங் கரோதி , பீதிங் பாபேதி, பாமோஜ்ஜங் கரோதி, ஸங்கா²ரானங் ஸபா⁴வங் த³ஸ்ஸயதி, ப⁴வப்படிஸந்தி⁴ங் உக்³கா⁴டேதி, ஸப்³ப³ஸாமஞ்ஞங் தே³தி. இமே கோ², மஹாராஜ, அட்ட²வீஸதி படிஸல்லானகு³ணா, யே கு³ணே ஸமனுஸ்ஸரந்தா ததா²க³தா படிஸல்லானங் ஸேவந்தி.
‘‘Aṭṭhavīsati kho panime, mahārāja, paṭisallānaguṇā, ye guṇe samanussarantā 3 tathāgatā paṭisallānaṃ sevanti. Katame aṭṭhavīsati? Idha, mahārāja, paṭisallānaṃ paṭisallīyamānaṃ attānaṃ rakkhati, āyuṃ vaḍḍheti, balaṃ deti, vajjaṃ pidahati, ayasamapaneti, yasamupaneti, aratiṃ vinodeti, ratimupadahati, bhayamapaneti, vesārajjaṃ karoti, kosajjamapaneti, vīriyamabhijaneti, rāgamapaneti, dosamapaneti, mohamapaneti, mānaṃ nihanti, vitakkaṃ bhañjati, cittaṃ ekaggaṃ karoti, mānasaṃ snehayati 4, hāsaṃ janeti, garukaṃ karoti, lābhamuppādayati, namassiyaṃ karoti , pītiṃ pāpeti, pāmojjaṃ karoti, saṅkhārānaṃ sabhāvaṃ dassayati, bhavappaṭisandhiṃ ugghāṭeti, sabbasāmaññaṃ deti. Ime kho, mahārāja, aṭṭhavīsati paṭisallānaguṇā, ye guṇe samanussarantā tathāgatā paṭisallānaṃ sevanti.
‘‘அபி ச கோ², மஹாராஜ, ததா²க³தா ஸந்தங் ஸுக²ங் ஸமாபத்திரதிங் அனுப⁴விதுகாமா படிஸல்லானங் ஸேவந்தி பரியோஸிதஸங்கப்பா. சதூஹி கோ², மஹாராஜ, காரணேஹி ததா²க³தா படிஸல்லானங் ஸேவந்தி. கதமேஹி சதூஹி? விஹாரபா²ஸுதாயபி, மஹாராஜ, ததா²க³தா படிஸல்லானங் ஸேவந்தி, அனவஜ்ஜகு³ணப³ஹுலதாயபி ததா²க³தா படிஸல்லானங் ஸேவந்தி, அஸேஸஅரியவீதி²தோபி ததா²க³தா படிஸல்லானங் ஸேவந்தி, ஸப்³ப³பு³த்³தா⁴னங் து²ததோ²மிதவண்ணிதபஸத்த²தோபி ததா²க³தா படிஸல்லானங் ஸேவந்தி. இமேஹி கோ², மஹாராஜ, சதூஹி காரணேஹி ததா²க³தா படிஸல்லானங் ஸேவந்தி. இதி கோ², மஹாராஜ, ததா²க³தா படிஸல்லானங் ஸேவந்தி ந ஸகரணீயதாய, ந கதஸ்ஸ வா பதிசயாய, அத² கோ² கு³ணவிஸேஸத³ஸ்ஸாவிதாய ததா²க³தா படிஸல்லானங் ஸேவந்தீ’’தி. ‘‘ஸாது⁴, ப⁴ந்தே நாக³ஸேன, ஏவமேதங் ததா² ஸம்படிச்சா²மீ’’தி.
‘‘Api ca kho, mahārāja, tathāgatā santaṃ sukhaṃ samāpattiratiṃ anubhavitukāmā paṭisallānaṃ sevanti pariyositasaṅkappā. Catūhi kho, mahārāja, kāraṇehi tathāgatā paṭisallānaṃ sevanti. Katamehi catūhi? Vihāraphāsutāyapi, mahārāja, tathāgatā paṭisallānaṃ sevanti, anavajjaguṇabahulatāyapi tathāgatā paṭisallānaṃ sevanti, asesaariyavīthitopi tathāgatā paṭisallānaṃ sevanti, sabbabuddhānaṃ thutathomitavaṇṇitapasatthatopi tathāgatā paṭisallānaṃ sevanti. Imehi kho, mahārāja, catūhi kāraṇehi tathāgatā paṭisallānaṃ sevanti. Iti kho, mahārāja, tathāgatā paṭisallānaṃ sevanti na sakaraṇīyatāya, na katassa vā paticayāya, atha kho guṇavisesadassāvitāya tathāgatā paṭisallānaṃ sevantī’’ti. ‘‘Sādhu, bhante nāgasena, evametaṃ tathā sampaṭicchāmī’’ti.
உத்தரிகரணீயபஞ்ஹோ நவமோ.
Uttarikaraṇīyapañho navamo.
Footnotes:
