| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
10. உத்தியஸுத்தங்
10. Uttiyasuttaṃ
30. ஸாவத்தி²னிதா³னங் . அத² கோ² ஆயஸ்மா உத்தியோ யேன ப⁴க³வா தேனுபஸங்கமி…பே॰… ஏகமந்தங் நிஸின்னோ கோ² ஆயஸ்மா உத்தியோ ப⁴க³வந்தங் ஏதத³வோச – ‘‘இத⁴ மய்ஹங், ப⁴ந்தே, ரஹோக³தஸ்ஸ படிஸல்லீனஸ்ஸ ஏவங் சேதஸோ பரிவிதக்கோ உத³பாதி³ – ‘பஞ்ச காமகு³ணா வுத்தா ப⁴க³வதா. கதமே நு கோ² பஞ்ச காமகு³ணா வுத்தா ப⁴க³வதா’’’தி? ‘‘ஸாது⁴ ஸாது⁴, உத்திய! பஞ்சிமே கோ², உத்திய, காமகு³ணா வுத்தா மயா. கதமே பஞ்ச? சக்கு²விஞ்ஞெய்யா ரூபா இட்டா² கந்தா மனாபா பியரூபா காமூபஸங்ஹிதா ரஜனீயா, ஸோதவிஞ்ஞெய்யா ஸத்³தா³…பே॰… கா⁴னவிஞ்ஞெய்யா க³ந்தா⁴… ஜிவ்ஹாவிஞ்ஞெய்யா ரஸா… காயவிஞ்ஞெய்யா பொ²ட்ட²ப்³பா³ இட்டா² கந்தா மனாபா பியரூபா காமூபஸங்ஹிதா ரஜனீயா – இமே கோ², உத்திய, பஞ்ச காமகு³ணா வுத்தா மயா. இமேஸங் கோ², உத்திய, பஞ்சன்னங் காமகு³ணானங் பஹானாய அரியோ அட்ட²ங்கி³கோ மக்³கோ³ பா⁴வேதப்³போ³. கதமோ அரியோ அட்ட²ங்கி³கோ மக்³கோ³? ஸெய்யதி²த³ங் – ஸம்மாதி³ட்டி²…பே॰… ஸம்மாஸமாதி⁴. இமேஸங் கோ², உத்திய, பஞ்சன்னங் காமகு³ணானங் பஹானாய அயங் அரியோ அட்ட²ங்கி³கோ மக்³கோ³ பா⁴வேதப்³போ³’’தி. த³ஸமங்.
30. Sāvatthinidānaṃ . Atha kho āyasmā uttiyo yena bhagavā tenupasaṅkami…pe… ekamantaṃ nisinno kho āyasmā uttiyo bhagavantaṃ etadavoca – ‘‘idha mayhaṃ, bhante, rahogatassa paṭisallīnassa evaṃ cetaso parivitakko udapādi – ‘pañca kāmaguṇā vuttā bhagavatā. Katame nu kho pañca kāmaguṇā vuttā bhagavatā’’’ti? ‘‘Sādhu sādhu, uttiya! Pañcime kho, uttiya, kāmaguṇā vuttā mayā. Katame pañca? Cakkhuviññeyyā rūpā iṭṭhā kantā manāpā piyarūpā kāmūpasaṃhitā rajanīyā, sotaviññeyyā saddā…pe… ghānaviññeyyā gandhā… jivhāviññeyyā rasā… kāyaviññeyyā phoṭṭhabbā iṭṭhā kantā manāpā piyarūpā kāmūpasaṃhitā rajanīyā – ime kho, uttiya, pañca kāmaguṇā vuttā mayā. Imesaṃ kho, uttiya, pañcannaṃ kāmaguṇānaṃ pahānāya ariyo aṭṭhaṅgiko maggo bhāvetabbo. Katamo ariyo aṭṭhaṅgiko maggo? Seyyathidaṃ – sammādiṭṭhi…pe… sammāsamādhi. Imesaṃ kho, uttiya, pañcannaṃ kāmaguṇānaṃ pahānāya ayaṃ ariyo aṭṭhaṅgiko maggo bhāvetabbo’’ti. Dasamaṃ.
மிச்ச²த்தவக்³கோ³ ததியோ.
Micchattavaggo tatiyo.
தஸ்ஸுத்³தா³னங் –
Tassuddānaṃ –
மிச்ச²த்தங் அகுஸலங் த⁴ம்மங், து³வே படிபதா³பி ச;
Micchattaṃ akusalaṃ dhammaṃ, duve paṭipadāpi ca;
அஸப்புரிஸேன த்³வே கும்போ⁴, ஸமாதி⁴ வேத³னுத்தியேனாதி.
Asappurisena dve kumbho, samādhi vedanuttiyenāti.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3. மிச்ச²த்தவக்³க³வண்ணனா • 3. Micchattavaggavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. மிச்ச²த்தவக்³க³வண்ணனா • 3. Micchattavaggavaṇṇanā
