| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
১০. উত্তিযসুত্তং
10. Uttiyasuttaṃ
৩০. সাৰত্থিনিদানং । অথ খো আযস্মা উত্তিযো যেন ভগৰা তেনুপসঙ্কমি…পে॰… একমন্তং নিসিন্নো খো আযস্মা উত্তিযো ভগৰন্তং এতদৰোচ – ‘‘ইধ ময্হং, ভন্তে, রহোগতস্স পটিসল্লীনস্স এৰং চেতসো পরিৰিতক্কো উদপাদি – ‘পঞ্চ কামগুণা ৰুত্তা ভগৰতা। কতমে নু খো পঞ্চ কামগুণা ৰুত্তা ভগৰতা’’’তি? ‘‘সাধু সাধু, উত্তিয! পঞ্চিমে খো, উত্তিয, কামগুণা ৰুত্তা মযা। কতমে পঞ্চ? চক্খুৰিঞ্ঞেয্যা রূপা ইট্ঠা কন্তা মনাপা পিযরূপা কামূপসংহিতা রজনীযা, সোতৰিঞ্ঞেয্যা সদ্দা…পে॰… ঘানৰিঞ্ঞেয্যা গন্ধা… জিৰ্হাৰিঞ্ঞেয্যা রসা… কাযৰিঞ্ঞেয্যা ফোট্ঠব্বা ইট্ঠা কন্তা মনাপা পিযরূপা কামূপসংহিতা রজনীযা – ইমে খো, উত্তিয, পঞ্চ কামগুণা ৰুত্তা মযা। ইমেসং খো, উত্তিয, পঞ্চন্নং কামগুণানং পহানায অরিযো অট্ঠঙ্গিকো মগ্গো ভাৰেতব্বো। কতমো অরিযো অট্ঠঙ্গিকো মগ্গো? সেয্যথিদং – সম্মাদিট্ঠি…পে॰… সম্মাসমাধি। ইমেসং খো, উত্তিয, পঞ্চন্নং কামগুণানং পহানায অযং অরিযো অট্ঠঙ্গিকো মগ্গো ভাৰেতব্বো’’তি। দসমং।
30. Sāvatthinidānaṃ . Atha kho āyasmā uttiyo yena bhagavā tenupasaṅkami…pe… ekamantaṃ nisinno kho āyasmā uttiyo bhagavantaṃ etadavoca – ‘‘idha mayhaṃ, bhante, rahogatassa paṭisallīnassa evaṃ cetaso parivitakko udapādi – ‘pañca kāmaguṇā vuttā bhagavatā. Katame nu kho pañca kāmaguṇā vuttā bhagavatā’’’ti? ‘‘Sādhu sādhu, uttiya! Pañcime kho, uttiya, kāmaguṇā vuttā mayā. Katame pañca? Cakkhuviññeyyā rūpā iṭṭhā kantā manāpā piyarūpā kāmūpasaṃhitā rajanīyā, sotaviññeyyā saddā…pe… ghānaviññeyyā gandhā… jivhāviññeyyā rasā… kāyaviññeyyā phoṭṭhabbā iṭṭhā kantā manāpā piyarūpā kāmūpasaṃhitā rajanīyā – ime kho, uttiya, pañca kāmaguṇā vuttā mayā. Imesaṃ kho, uttiya, pañcannaṃ kāmaguṇānaṃ pahānāya ariyo aṭṭhaṅgiko maggo bhāvetabbo. Katamo ariyo aṭṭhaṅgiko maggo? Seyyathidaṃ – sammādiṭṭhi…pe… sammāsamādhi. Imesaṃ kho, uttiya, pañcannaṃ kāmaguṇānaṃ pahānāya ayaṃ ariyo aṭṭhaṅgiko maggo bhāvetabbo’’ti. Dasamaṃ.
মিচ্ছত্তৰগ্গো ততিযো।
Micchattavaggo tatiyo.
তস্সুদ্দানং –
Tassuddānaṃ –
মিচ্ছত্তং অকুসলং ধম্মং, দুৰে পটিপদাপি চ।
Micchattaṃ akusalaṃ dhammaṃ, duve paṭipadāpi ca;
অসপ্পুরিসেন দ্ৰে কুম্ভো, সমাধি ৰেদনুত্তিযেনাতি॥
Asappurisena dve kumbho, samādhi vedanuttiyenāti.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৩. মিচ্ছত্তৰগ্গৰণ্ণনা • 3. Micchattavaggavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৩. মিচ্ছত্তৰগ্গৰণ্ণনা • 3. Micchattavaggavaṇṇanā
