| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
10. උත්‌තියසුත්‌තං
10. Uttiyasuttaṃ
30. සාවත්‌ථිනිදානං . අථ ඛො ආයස්‌මා උත්‌තියො යෙන භගවා තෙනුපසඞ්‌කමි…පෙ.… එකමන්‌තං නිසින්‌නො ඛො ආයස්‌මා උත්‌තියො භගවන්‌තං එතදවොච – ‘‘ඉධ මය්‌හං, භන්‌තෙ, රහොගතස්‌ස පටිසල්‌ලීනස්‌ස එවං චෙතසො පරිවිතක්‌කො උදපාදි – ‘පඤ්‌ච කාමගුණා වුත්‌තා භගවතා. කතමෙ නු ඛො පඤ්‌ච කාමගුණා වුත්‌තා භගවතා’’’ති? ‘‘සාධු සාධු, උත්‌තිය! පඤ්‌චිමෙ ඛො, උත්‌තිය, කාමගුණා වුත්‌තා මයා. කතමෙ පඤ්‌ච? චක්‌ඛුවිඤ්‌ඤෙය්‍යා රූපා ඉට්‌ඨා කන්‌තා මනාපා පියරූපා කාමූපසංහිතා රජනීයා, සොතවිඤ්‌ඤෙය්‍යා සද්‌දා…පෙ.… ඝානවිඤ්‌ඤෙය්‍යා ගන්‌ධා… ජිව්‌හාවිඤ්‌ඤෙය්‍යා රසා… කායවිඤ්‌ඤෙය්‍යා ඵොට්‌ඨබ්‌බා ඉට්‌ඨා කන්‌තා මනාපා පියරූපා කාමූපසංහිතා රජනීයා – ඉමෙ ඛො, උත්‌තිය, පඤ්‌ච කාමගුණා වුත්‌තා මයා. ඉමෙසං ඛො, උත්‌තිය, පඤ්‌චන්‌නං කාමගුණානං පහානාය අරියො අට්‌ඨඞ්‌ගිකො මග්‌ගො භාවෙතබ්‌බො. කතමො අරියො අට්‌ඨඞ්‌ගිකො මග්‌ගො? සෙය්‍යථිදං – සම්‌මාදිට්‌ඨි…පෙ.… සම්‌මාසමාධි. ඉමෙසං ඛො, උත්‌තිය, පඤ්‌චන්‌නං කාමගුණානං පහානාය අයං අරියො අට්‌ඨඞ්‌ගිකො මග්‌ගො භාවෙතබ්‌බො’’ති. දසමං.
30. Sāvatthinidānaṃ . Atha kho āyasmā uttiyo yena bhagavā tenupasaṅkami…pe… ekamantaṃ nisinno kho āyasmā uttiyo bhagavantaṃ etadavoca – ‘‘idha mayhaṃ, bhante, rahogatassa paṭisallīnassa evaṃ cetaso parivitakko udapādi – ‘pañca kāmaguṇā vuttā bhagavatā. Katame nu kho pañca kāmaguṇā vuttā bhagavatā’’’ti? ‘‘Sādhu sādhu, uttiya! Pañcime kho, uttiya, kāmaguṇā vuttā mayā. Katame pañca? Cakkhuviññeyyā rūpā iṭṭhā kantā manāpā piyarūpā kāmūpasaṃhitā rajanīyā, sotaviññeyyā saddā…pe… ghānaviññeyyā gandhā… jivhāviññeyyā rasā… kāyaviññeyyā phoṭṭhabbā iṭṭhā kantā manāpā piyarūpā kāmūpasaṃhitā rajanīyā – ime kho, uttiya, pañca kāmaguṇā vuttā mayā. Imesaṃ kho, uttiya, pañcannaṃ kāmaguṇānaṃ pahānāya ariyo aṭṭhaṅgiko maggo bhāvetabbo. Katamo ariyo aṭṭhaṅgiko maggo? Seyyathidaṃ – sammādiṭṭhi…pe… sammāsamādhi. Imesaṃ kho, uttiya, pañcannaṃ kāmaguṇānaṃ pahānāya ayaṃ ariyo aṭṭhaṅgiko maggo bhāvetabbo’’ti. Dasamaṃ.
මිච්‌ඡත්‌තවග්‌ගො තතියො.
Micchattavaggo tatiyo.
තස්‌සුද්‌දානං –
Tassuddānaṃ –
මිච්‌ඡත්‌තං අකුසලං ධම්‌මං, දුවෙ පටිපදාපි ච;
Micchattaṃ akusalaṃ dhammaṃ, duve paṭipadāpi ca;
අසප්‌පුරිසෙන ද්‌වෙ කුම්‌භො, සමාධි වෙදනුත්‌තියෙනාති.
Asappurisena dve kumbho, samādhi vedanuttiyenāti.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 3. මිච්‌ඡත්‌තවග්‌ගවණ්‌ණනා • 3. Micchattavaggavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 3. මිච්‌ඡත්‌තවග්‌ගවණ්‌ණනා • 3. Micchattavaggavaṇṇanā
