| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
5. உத்தியஸுத்தவண்ணனா
5. Uttiyasuttavaṇṇanā
95. பஞ்சமே பச்சந்தே ப⁴வங் பச்சந்திமங். பாகாரஸ்ஸ தி²ரபா⁴வங் உத்³த⁴முத்³த⁴ங் பாபேதீதி உத்³தா⁴பங், பாகாரமூலங். ஆதி³-ஸத்³தே³ன பாகாரத்³வாரப³ந்த⁴பரிகா²தீ³னங் ஸங்க³ஹோ வேதி³தப்³போ³. பண்டி³ததோ³வாரிகட்டா²னியங் கத்வா ப⁴க³வா அத்தானங் த³ஸ்ஸேஸீதி த³ஸ்ஸெந்தோ ‘‘ஏகத்³வாரந்தி கஸ்மா ஆஹா’’தி சோத³னங் ஸமுட்டா²பேஸி. யஸ்ஸா பஞ்ஞாய வஸேன புரிஸோ பண்டி³தோதி வுச்சதி, தங் பண்டி³ச்சந்தி ஆஹ ‘‘பண்டி³ச்சேன ஸமன்னாக³தோ’’தி. தங்தங்இதிகத்தப்³ப³தாஸு சே²கபா⁴வோ ப்³யத்தபா⁴வோ வெய்யத்தியங். மேத⁴தி ஸம்மோஹங் ஹிங்ஸதி வித⁴மதீதி மேதா⁴, ஸா ஏதஸ்ஸ அத்தீ²தி மேதா⁴வீ. டா²னே டா²னே உப்பத்தி ஏதிஸ்ஸா அத்தீ²தி டா²னுப்பத்திகா, டா²னஸோ உப்பஜ்ஜனபஞ்ஞா. அனுபரியாயந்தி ஏதேனாதி அனுபரியாயோ, ஸோ ஏவ பதோ²தி அனுபரியாயபதோ², பரிதோ பாகாரஸ்ஸ அனுஸங்யாயனமக்³கோ³. பாகாரபா⁴கா³ ஸந்தா⁴தப்³பா³ எத்தா²தி பாகாரஸந்தி⁴, பாகாரஸ்ஸ பு²ல்லிதப்பதே³ஸோ. ஸோ பன ஹெட்டி²மந்தேன த்³வின்னம்பி இட்ட²கானங் விக³மேன ஏவங் வுச்சதீதி ஆஹ ‘‘த்³வின்னங் இட்ட²கானங் அபக³தட்டா²ன’’ந்தி. சி²ன்னட்டா²னந்தி சி²ன்னபி⁴ன்னப்பதே³ஸோ, சி²த்³த³ட்டா²னங் வா. தஞ்ஹி விவரந்தி வுச்சதி.
95. Pañcame paccante bhavaṃ paccantimaṃ. Pākārassa thirabhāvaṃ uddhamuddhaṃ pāpetīti uddhāpaṃ, pākāramūlaṃ. Ādi-saddena pākāradvārabandhaparikhādīnaṃ saṅgaho veditabbo. Paṇḍitadovārikaṭṭhāniyaṃ katvā bhagavā attānaṃ dassesīti dassento ‘‘ekadvāranti kasmā āhā’’ti codanaṃ samuṭṭhāpesi. Yassā paññāya vasena puriso paṇḍitoti vuccati, taṃ paṇḍiccanti āha ‘‘paṇḍiccena samannāgato’’ti. Taṃtaṃitikattabbatāsu chekabhāvo byattabhāvo veyyattiyaṃ. Medhati sammohaṃ hiṃsati vidhamatīti medhā, sā etassa atthīti medhāvī. Ṭhāne ṭhāne uppatti etissā atthīti ṭhānuppattikā, ṭhānaso uppajjanapaññā. Anupariyāyanti etenāti anupariyāyo, so eva pathoti anupariyāyapatho, parito pākārassa anusaṃyāyanamaggo. Pākārabhāgā sandhātabbā etthāti pākārasandhi, pākārassa phullitappadeso. So pana heṭṭhimantena dvinnampi iṭṭhakānaṃ vigamena evaṃ vuccatīti āha ‘‘dvinnaṃ iṭṭhakānaṃ apagataṭṭhāna’’nti. Chinnaṭṭhānanti chinnabhinnappadeso, chiddaṭṭhānaṃ vā. Tañhi vivaranti vuccati.
உத்தியஸுத்தவண்ணனா நிட்டி²தா.
Uttiyasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 5. உத்தியஸுத்தங் • 5. Uttiyasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 5. உத்தியஸுத்தவண்ணனா • 5. Uttiyasuttavaṇṇanā
