| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (ටීකා) • Aṅguttaranikāya (ṭīkā) |
5. උත්‌තියසුත්‌තවණ්‌ණනා
5. Uttiyasuttavaṇṇanā
95. පඤ්‌චමෙ පච්‌චන්‌තෙ භවං පච්‌චන්‌තිමං. පාකාරස්‌ස ථිරභාවං උද්‌ධමුද්‌ධං පාපෙතීති උද්‌ධාපං, පාකාරමූලං. ආදි-සද්‌දෙන පාකාරද්‌වාරබන්‌ධපරිඛාදීනං සඞ්‌ගහො වෙදිතබ්‌බො. පණ්‌ඩිතදොවාරිකට්‌ඨානියං කත්‌වා භගවා අත්‌තානං දස්‌සෙසීති දස්‌සෙන්‌තො ‘‘එකද්‌වාරන්‌ති කස්‌මා ආහා’’ති චොදනං සමුට්‌ඨාපෙසි. යස්‌සා පඤ්‌ඤාය වසෙන පුරිසො පණ්‌ඩිතොති වුච්‌චති, තං පණ්‌ඩිච්‌චන්‌ති ආහ ‘‘පණ්‌ඩිච්‌චෙන සමන්‌නාගතො’’ති. තංතංඉතිකත්‌තබ්‌බතාසු ඡෙකභාවො බ්‍යත්‌තභාවො වෙය්‍යත්‌තියං. මෙධති සම්‌මොහං හිංසති විධමතීති මෙධා, සා එතස්‌ස අත්‌ථීති මෙධාවී. ඨානෙ ඨානෙ උප්‌පත්‌ති එතිස්‌සා අත්‌ථීති ඨානුප්‌පත්‌තිකා, ඨානසො උප්‌පජ්‌ජනපඤ්‌ඤා. අනුපරියායන්‌ති එතෙනාති අනුපරියායො, සො එව පථොති අනුපරියායපථො, පරිතො පාකාරස්‌ස අනුසංයායනමග්‌ගො. පාකාරභාගා සන්‌ධාතබ්‌බා එත්‌ථාති පාකාරසන්‌ධි, පාකාරස්‌ස ඵුල්‌ලිතප්‌පදෙසො. සො පන හෙට්‌ඨිමන්‌තෙන ද්‌වින්‌නම්‌පි ඉට්‌ඨකානං විගමෙන එවං වුච්‌චතීති ආහ ‘‘ද්‌වින්‌නං ඉට්‌ඨකානං අපගතට්‌ඨාන’’න්‌ති. ඡින්‌නට්‌ඨානන්‌ති ඡින්‌නභින්‌නප්‌පදෙසො, ඡිද්‌දට්‌ඨානං වා. තඤ්‌හි විවරන්‌ති වුච්‌චති.
95. Pañcame paccante bhavaṃ paccantimaṃ. Pākārassa thirabhāvaṃ uddhamuddhaṃ pāpetīti uddhāpaṃ, pākāramūlaṃ. Ādi-saddena pākāradvārabandhaparikhādīnaṃ saṅgaho veditabbo. Paṇḍitadovārikaṭṭhāniyaṃ katvā bhagavā attānaṃ dassesīti dassento ‘‘ekadvāranti kasmā āhā’’ti codanaṃ samuṭṭhāpesi. Yassā paññāya vasena puriso paṇḍitoti vuccati, taṃ paṇḍiccanti āha ‘‘paṇḍiccena samannāgato’’ti. Taṃtaṃitikattabbatāsu chekabhāvo byattabhāvo veyyattiyaṃ. Medhati sammohaṃ hiṃsati vidhamatīti medhā, sā etassa atthīti medhāvī. Ṭhāne ṭhāne uppatti etissā atthīti ṭhānuppattikā, ṭhānaso uppajjanapaññā. Anupariyāyanti etenāti anupariyāyo, so eva pathoti anupariyāyapatho, parito pākārassa anusaṃyāyanamaggo. Pākārabhāgā sandhātabbā etthāti pākārasandhi, pākārassa phullitappadeso. So pana heṭṭhimantena dvinnampi iṭṭhakānaṃ vigamena evaṃ vuccatīti āha ‘‘dvinnaṃ iṭṭhakānaṃ apagataṭṭhāna’’nti. Chinnaṭṭhānanti chinnabhinnappadeso, chiddaṭṭhānaṃ vā. Tañhi vivaranti vuccati.
උත්‌තියසුත්‌තවණ්‌ණනා නිට්‌ඨිතා.
Uttiyasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 5. උත්‌තියසුත්‌තං • 5. Uttiyasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 5. උත්‌තියසුත්‌තවණ්‌ණනා • 5. Uttiyasuttavaṇṇanā
