| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) |
੫. ਉਤ੍ਤਿਯਸੁਤ੍ਤવਣ੍ਣਨਾ
5. Uttiyasuttavaṇṇanā
੯੫. ਪਞ੍ਚਮੇ ਤੁਣ੍ਹੀ ਅਹੋਸੀਤਿ ਸਤ੍ਤੂਪਲਦ੍ਧਿਯਂ ਠਤ੍વਾ ਅਪੁਚ੍ਛਂ ਪੁਚ੍ਛਤੀਤਿ ਤੁਣ੍ਹੀ ਅਹੋਸਿ। ਸਬ੍ਬਸਾਮੁਕ੍ਕਂਸਿਕਂ વਤ ਮੇਤਿ ਮਯਾ ਸਬ੍ਬਪੁਚ੍ਛਾਨਂ ਉਤ੍ਤਮਪੁਚ੍ਛਂ ਪੁਚ੍ਛਿਤੋ ਸਮਣੋ ਗੋਤਮੋ ਸਂਸਾਦੇਤਿ ਨੋ વਿਸ੍ਸਜ੍ਜੇਤਿ, ਨੂਨ ਨ વਿਸਹਤਿ ਨ ਸਕ੍ਕੋਤਿ વਿਸ੍ਸਜ੍ਜੇਤੁਨ੍ਤਿ ਏવਂ ਪਾਪਿਕਂ ਦਿਟ੍ਠਿਂ ਮਾ ਪਟਿਲਭੀਤਿ। ਤਦਸ੍ਸਾਤਿ ਤਂ ਏવਂ ਉਪ੍ਪਨ੍ਨਂ ਦਿਟ੍ਠਿਗਤਂ ਭવੇਯ੍ਯ। ਪਚ੍ਚਨ੍ਤਿਮਨ੍ਤਿ ਯਸ੍ਮਾ ਮਜ੍ਝਿਮਦੇਸੇ ਨਗਰਸ੍ਸ ਉਦ੍ਧਾਪਾਦੀਨਿ ਥਿਰਾਨਿ વਾ ਹੋਨ੍ਤੁ ਦੁਬ੍ਬਲਾਨਿ વਾ, ਸਬ੍ਬਸੋ વਾ ਪਨ ਮਾ ਹੋਨ੍ਤੁ, ਚੋਰਾਸਙ੍ਕਾ ਨ ਹੋਤਿ। ਤਸ੍ਮਾ ਤਂ ਅਗ੍ਗਹੇਤ੍વਾ ‘‘ਪਚ੍ਚਨ੍ਤਿਮਂ ਨਗਰ’’ਨ੍ਤਿ ਆਹ। ਦਲ਼੍ਹੁਦ੍ਧਾਪਨ੍ਤਿ ਥਿਰਪਾਕਾਰਪਾਦਂ। ਦਲ਼੍ਹਪਾਕਾਰਤੋਰਣਨ੍ਤਿ ਥਿਰਪਾਕਾਰਞ੍ਚੇવ ਥਿਰਪਿਟ੍ਠਿਸਙ੍ਘਾਟਞ੍ਚ। ਏਕਦ੍વਾਰਨ੍ਤਿ ਕਸ੍ਮਾ ਆਹ? ਬਹੁਦ੍વਾਰਸ੍ਮਿਞ੍ਹਿ ਨਗਰੇ ਬਹੂਹਿ ਪਣ੍ਡਿਤਦੋવਾਰਿਕੇਹਿ ਭવਿਤਬ੍ਬਂ, ਏਕਦ੍વਾਰੇ ਏਕੋવ વਟ੍ਟਤਿ। ਤਥਾਗਤਸ੍ਸ ਚ ਪਞ੍ਞਾਯ ਅਞ੍ਞੋ ਸਦਿਸੋ ਨਤ੍ਥਿ। ਤਸ੍ਮਾ ਸਤ੍ਥੁ ਪਣ੍ਡਿਤਭਾવਸ੍ਸ ਓਪਮ੍ਮਤ੍ਥਂ ਏਕਂਯੇવ ਦੋવਾਰਿਕਂ ਦਸ੍ਸੇਤੁਂ ‘‘ਏਕਦ੍વਾਰ’’ਨ੍ਤਿ ਆਹ। ਪਣ੍ਡਿਤੋਤਿ ਪਣ੍ਡਿਚ੍ਚੇਨ ਸਮਨ੍ਨਾਗਤੋ। ਬ੍ਯਤ੍ਤੋਤਿ વੇਯ੍ਯਤ੍ਤਿਯੇਨ ਸਮਨ੍ਨਾਗਤੋ। ਮੇਧਾવੀਤਿ ਠਾਨੁਪ੍ਪਤ੍ਤਿਯਪਞ੍ਞਾਸਙ੍ਖਾਤਾਯ ਮੇਧਾਯ ਸਮਨ੍ਨਾਗਤੋ। ਅਨੁਪਰਿਯਾਯਪਥਨ੍ਤਿ ਅਨੁਪਰਿਯਾਯਨਾਮਕਂ ਮਗ੍ਗਂ। ਪਾਕਾਰਸਨ੍ਧਿਨ੍ਤਿ ਦ੍વਿਨ੍ਨਂ ਇਟ੍ਠਕਾਨਂ ਅਪਗਤਟ੍ਠਾਨਂ। ਪਾਕਾਰવਿવਰਨ੍ਤਿ ਪਾਕਾਰਸ੍ਸ ਛਿਨ੍ਨਟ੍ਠਾਨਂ। ਤਦੇવੇਤਂ ਪਞ੍ਹਨ੍ਤਿ ਤਂਯੇવ ‘‘ਸਸ੍ਸਤੋ ਲੋਕੋ’’ਤਿਆਦਿਨਾ ਨਯੇਨ ਪੁਟ੍ਠਂ ਠਪਨੀਯਪਞ੍ਹਂ ਪੁਨਪਿ ਪੁਚ੍ਛਿ। ਸਬ੍ਬੋ ਚ ਤੇਨ ਲੋਕੋਤਿ ਸਤ੍ਤੂਪਲਦ੍ਧਿਯਂਯੇવ ਠਤ੍વਾ ਅਞ੍ਞੇਨਾਕਾਰੇਨ ਪੁਚ੍ਛਤੀਤਿ ਦਸ੍ਸੇਤਿ।
95. Pañcame tuṇhī ahosīti sattūpaladdhiyaṃ ṭhatvā apucchaṃ pucchatīti tuṇhī ahosi. Sabbasāmukkaṃsikaṃ vata meti mayā sabbapucchānaṃ uttamapucchaṃ pucchito samaṇo gotamo saṃsādeti no vissajjeti, nūna na visahati na sakkoti vissajjetunti evaṃ pāpikaṃ diṭṭhiṃ mā paṭilabhīti. Tadassāti taṃ evaṃ uppannaṃ diṭṭhigataṃ bhaveyya. Paccantimanti yasmā majjhimadese nagarassa uddhāpādīni thirāni vā hontu dubbalāni vā, sabbaso vā pana mā hontu, corāsaṅkā na hoti. Tasmā taṃ aggahetvā ‘‘paccantimaṃ nagara’’nti āha. Daḷhuddhāpanti thirapākārapādaṃ. Daḷhapākāratoraṇanti thirapākārañceva thirapiṭṭhisaṅghāṭañca. Ekadvāranti kasmā āha? Bahudvārasmiñhi nagare bahūhi paṇḍitadovārikehi bhavitabbaṃ, ekadvāre ekova vaṭṭati. Tathāgatassa ca paññāya añño sadiso natthi. Tasmā satthu paṇḍitabhāvassa opammatthaṃ ekaṃyeva dovārikaṃ dassetuṃ ‘‘ekadvāra’’nti āha. Paṇḍitoti paṇḍiccena samannāgato. Byattoti veyyattiyena samannāgato. Medhāvīti ṭhānuppattiyapaññāsaṅkhātāya medhāya samannāgato. Anupariyāyapathanti anupariyāyanāmakaṃ maggaṃ. Pākārasandhinti dvinnaṃ iṭṭhakānaṃ apagataṭṭhānaṃ. Pākāravivaranti pākārassa chinnaṭṭhānaṃ. Tadevetaṃ pañhanti taṃyeva ‘‘sassato loko’’tiādinā nayena puṭṭhaṃ ṭhapanīyapañhaṃ punapi pucchi. Sabbo ca tena lokoti sattūpaladdhiyaṃyeva ṭhatvā aññenākārena pucchatīti dasseti.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya / ੫. ਉਤ੍ਤਿਯਸੁਤ੍ਤਂ • 5. Uttiyasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) / ੫. ਉਤ੍ਤਿਯਸੁਤ੍ਤવਣ੍ਣਨਾ • 5. Uttiyasuttavaṇṇanā
