| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
8. உத்தியத்தே²ரஅபதா³னவண்ணனா
8. Uttiyattheraapadānavaṇṇanā
சந்த³பா⁴கா³னதீ³தீரேதிஆதி³கங் ஆயஸ்மதோ உத்தியத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ ஸித்³த⁴த்த²ஸ்ஸ ப⁴க³வதோ காலே சந்த³பா⁴கா³னதி³யங் ஸுஸுமாரோ ஹுத்வா நிப்³ப³த்தோ நதீ³தீரங் உபக³தங் ப⁴க³வந்தங் தி³ஸ்வா பஸன்னசித்தோ பாரங் நேதுகாமோ தீரஸமீபேயேவ நிபஜ்ஜி. ப⁴க³வா தஸ்ஸ அனுகம்பாய பிட்டி²யங் பாதே³ ட²பேஸி. ஸோ துட்டோ² உத³க்³கோ³ பீதிவேகே³ன மஹுஸ்ஸாஹோ ஹுத்வா ஸோதங் சி²ந்த³ந்தோ ஸீகே⁴ன ஜவேன ப⁴க³வந்தங் பரதீரங் நேஸி. ப⁴க³வா தஸ்ஸ சித்தப்பஸாத³ங் ஞத்வா ‘‘அயங் இதோ சுதோ தே³வலோகே நிப்³ப³த்திஸ்ஸதி , ததோ பட்டா²ய ஸுக³தீஸுயேவ ஸங்ஸரந்தோ இதோ சதுன்னவுதிகப்பே அமதங் பாபுணிஸ்ஸதீ’’தி ப்³யாகரித்வா பக்காமி.
Candabhāgānadītīretiādikaṃ āyasmato uttiyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle candabhāgānadiyaṃ susumāro hutvā nibbatto nadītīraṃ upagataṃ bhagavantaṃ disvā pasannacitto pāraṃ netukāmo tīrasamīpeyeva nipajji. Bhagavā tassa anukampāya piṭṭhiyaṃ pāde ṭhapesi. So tuṭṭho udaggo pītivegena mahussāho hutvā sotaṃ chindanto sīghena javena bhagavantaṃ paratīraṃ nesi. Bhagavā tassa cittappasādaṃ ñatvā ‘‘ayaṃ ito cuto devaloke nibbattissati , tato paṭṭhāya sugatīsuyeva saṃsaranto ito catunnavutikappe amataṃ pāpuṇissatī’’ti byākaritvā pakkāmi.
ஸோ ததா² ஸுக³தீஸுயேவ ஸங்ஸரந்தோ இமஸ்மிங் பு³த்³து⁴ப்பாதே³ ஸாவத்தி²யங் அஞ்ஞதரஸ்ஸ ப்³ராஹ்மணஸ்ஸ புத்தோ ஹுத்வா நிப்³ப³த்தி, உத்தியோதிஸ்ஸ நாமங் அகங்ஸு. ஸோ வயப்பத்தோ ‘‘அமதங் பரியேஸிஸ்ஸாமீ’’தி பரிப்³பா³ஜகோ ஹுத்வா ஏகதி³வஸங் ப⁴க³வந்தங் தி³ஸ்வா உபஸங்கமித்வா வந்தி³த்வா த⁴ம்மங் ஸுத்வா படிலத்³த⁴ஸத்³தோ⁴ ஹுத்வா ஸாஸனே பப்³ப³ஜித்வா ஸீலதி³ட்டீ²னங் அவிஸோதி⁴தத்தா விஸேஸங் நிப்³ப³த்தேதுங் அஸக்கொந்தோ அஞ்ஞங் பி⁴க்கு²ங் விஸேஸங் நிப்³ப³த்தெத்வா அஞ்ஞங் ப்³யாகரொந்தங் தி³ஸ்வா ஸத்தா²ரங் உபஸங்கமித்வா ஸங்கே²பேன ஓவாத³ங் யாசி. ஸத்தா²பி தஸ்ஸ , ‘‘தஸ்மாதிஹ த்வங், உத்திய, ஆதி³மேவ விஸோதே⁴ஹீ’’திஆதி³னா (ஸங்॰ நி॰ 5.382) ஸங்கே²பேனேவ ஓவாத³ங் அதா³ஸி. ஸோ ஸத்து² ஓவாதே³ ட²த்வா விபஸ்ஸனங் ஆரபி⁴. தஸ்ஸ ஆரத்³த⁴விபஸ்ஸகஸ்ஸ ஆபா³தோ⁴ உப்பஜ்ஜி. உப்பன்னே ஆபா³தே⁴ ஜாதஸங்வேகோ³ வீரியாரம்ப⁴வத்து²ங் ஞத்வா விபஸ்ஸனங் வட்³டெ⁴த்வா அரஹத்தங் பாபுணி.
So tathā sugatīsuyeva saṃsaranto imasmiṃ buddhuppāde sāvatthiyaṃ aññatarassa brāhmaṇassa putto hutvā nibbatti, uttiyotissa nāmaṃ akaṃsu. So vayappatto ‘‘amataṃ pariyesissāmī’’ti paribbājako hutvā ekadivasaṃ bhagavantaṃ disvā upasaṅkamitvā vanditvā dhammaṃ sutvā paṭiladdhasaddho hutvā sāsane pabbajitvā sīladiṭṭhīnaṃ avisodhitattā visesaṃ nibbattetuṃ asakkonto aññaṃ bhikkhuṃ visesaṃ nibbattetvā aññaṃ byākarontaṃ disvā satthāraṃ upasaṅkamitvā saṅkhepena ovādaṃ yāci. Satthāpi tassa , ‘‘tasmātiha tvaṃ, uttiya, ādimeva visodhehī’’tiādinā (saṃ. ni. 5.382) saṅkhepeneva ovādaṃ adāsi. So satthu ovāde ṭhatvā vipassanaṃ ārabhi. Tassa āraddhavipassakassa ābādho uppajji. Uppanne ābādhe jātasaṃvego vīriyārambhavatthuṃ ñatvā vipassanaṃ vaḍḍhetvā arahattaṃ pāpuṇi.
169. ஏவங் ஸோ கதஸம்பா⁴ரானுரூபேன பத்தஅரஹத்தப²லோ அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ சந்த³பா⁴கா³னதீ³தீரேதிஆதி³மாஹ. தத்த² சந்த³பா⁴கா³னதீ³தீரேதி பரிஸுத்³த⁴பண்ட³ரபுலினதலேஹி ச பபா⁴ஸம்பன்னபஸன்னமது⁴ரோத³கபரிபுண்ணதாய ச சந்த³ப்பபா⁴கிரணஸஸ்ஸிரீகாபா⁴ நத³மானா ஸத்³த³ங் குருமானா க³ச்ச²தீதி சந்த³பா⁴கா³னதீ³, தஸ்ஸா சந்த³பா⁴கா³னதி³யா தீரே ஸுஸுமாரோ அஹோஸிந்தி ஸம்ப³ந்தோ⁴. தத்த² ஸுஸுமாரோதி கு²த்³த³கமச்ச²கு³ம்பே³ க²ண்டா³க²ண்டி³கங் கரொந்தோ மாரேதீதி ஸுஸுமாரோ, சண்ட³மச்சோ² கும்பீ⁴லோதி அத்தோ². ஸபோ⁴ஜனபஸுதோஹந்தி அஹங் ஸபோ⁴ஜனே ஸககோ³சரே பஸுதோ ப்³யாவடோ. நதீ³தித்த²ங் அக³ச்ச²ஹந்தி ப⁴க³வதோ ஆக³மனகாலே அஹங் நதீ³தித்த²ங் அக³ச்சி²ங் பத்தொம்ஹி.
169. Evaṃ so katasambhārānurūpena pattaarahattaphalo attano pubbakammaṃ saritvā somanassajāto pubbacaritāpadānaṃ pakāsento candabhāgānadītīretiādimāha. Tattha candabhāgānadītīreti parisuddhapaṇḍarapulinatalehi ca pabhāsampannapasannamadhurodakaparipuṇṇatāya ca candappabhākiraṇasassirīkābhā nadamānā saddaṃ kurumānā gacchatīti candabhāgānadī, tassā candabhāgānadiyā tīre susumāro ahosinti sambandho. Tattha susumāroti khuddakamacchagumbe khaṇḍākhaṇḍikaṃ karonto māretīti susumāro, caṇḍamaccho kumbhīloti attho. Sabhojanapasutohanti ahaṃ sabhojane sakagocare pasuto byāvaṭo. Nadītitthaṃ agacchahanti bhagavato āgamanakāle ahaṃ nadītitthaṃ agacchiṃ pattomhi.
170. ஸித்³த⁴த்தோ² தம்ஹி ஸமயேதி தஸ்மிங் மம தித்த²க³மனகாலே ஸித்³த⁴த்தோ² ப⁴க³வா அக்³க³புக்³க³லோ ஸப்³ப³ஸத்தேஸு ஜெட்டோ² ஸெட்டோ² ஸயம்பூ⁴ ஸயமேவ பூ⁴தோ ஜாதோ பு³த்³த⁴பூ⁴தோ ஸோ ப⁴க³வா நதி³ங் தரிதுகாமோ நதீ³தீரங் உபாக³மி.
170.Siddhattho tamhi samayeti tasmiṃ mama titthagamanakāle siddhattho bhagavā aggapuggalo sabbasattesu jeṭṭho seṭṭho sayambhū sayameva bhūto jāto buddhabhūto so bhagavā nadiṃ taritukāmo nadītīraṃ upāgami.
172. பெத்திகங் விஸயங் மய்ஹந்தி மய்ஹங் பிதுபிதாமஹாதீ³ஹி பரம்பரானீதங், யதி³த³ங் ஸம்பத்தஸம்பத்தமஹானுபா⁴வானங் தரணந்தி அத்தோ².
172.Pettikaṃ visayaṃ mayhanti mayhaṃ pitupitāmahādīhi paramparānītaṃ, yadidaṃ sampattasampattamahānubhāvānaṃ taraṇanti attho.
173. மம உக்³க³ஜ்ஜனங் ஸுத்வாதி மய்ஹங் உக்³க³ஜ்ஜனங் ஆராத⁴னங் ஸுத்வா மஹாமுனி ப⁴க³வா அபி⁴ருஹீதி ஸம்ப³ந்தோ⁴. ஸேஸங் உத்தானத்த²மேவாதி.
173.Mamauggajjanaṃ sutvāti mayhaṃ uggajjanaṃ ārādhanaṃ sutvā mahāmuni bhagavā abhiruhīti sambandho. Sesaṃ uttānatthamevāti.
உத்தியத்தே²ரஅபதா³னவண்ணனா ஸமத்தா.
Uttiyattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 8. உத்தியத்தே²ரஅபதா³னங் • 8. Uttiyattheraapadānaṃ
