| Library / Tipiṭaka / திபிடக • Tipiṭaka / தே²ரகா³தா²-அட்ட²கதா² • Theragāthā-aṭṭhakathā |
10. உத்தியத்தே²ரகா³தா²வண்ணனா
10. Uttiyattheragāthāvaṇṇanā
ஆபா³தே⁴ மே ஸமுப்பன்னேதி ஆயஸ்மதோ உத்தியத்தே²ரஸ்ஸ கா³தா². கா உப்பத்தி? ஸோ கிர புரிமபு³த்³தே⁴ஸு கதாதி⁴காரோ தத்த² தத்த² விவட்டூபனிஸ்ஸயங் புஞ்ஞங் உபசினந்தோ இதோ சதுனவுதே கப்பே ஸித்³த⁴த்த²ஸ்ஸ ப⁴க³வதோ காலே சந்த³பா⁴கா³ய நதி³யா மஹாரூபோ ஸுஸுமாரோ ஹுத்வா நிப்³ப³த்தோ. ஸோ பாரங் க³ந்துங் நதி³யா தீரங் உபக³தங் ப⁴க³வந்தங் தி³ஸ்வா பஸன்னசித்தோ பாரங் நேதுகாமோ தீரஸமீபே நிபஜ்ஜி. ப⁴க³வா தஸ்ஸ அனுகம்பாய பிட்டி²யங் பாதே³ ட²பேஸி. ஸோ ஹட்டோ² உத³க்³கோ³ பீதிவேகே³ன தி³கு³ணுஸ்ஸாஹோ ஹுத்வா ஸோதங் சி²ந்த³ந்தோ ஸீகே⁴ன ஜவேன ப⁴க³வந்தங் பரதீரங் நேஸி. ப⁴க³வா தஸ்ஸ சித்தப்பஸாத³ங் ஓலோகெத்வா ‘‘அயங் இதோ சுதோ தே³வலோகே நிப்³ப³த்தித்வா ததோ பட்டா²ய ஸுக³தீஸுயேவ ஸங்ஸரந்தோ இதோ சதுனவுதே கப்பே அமதங் பாபுணிஸ்ஸதீ’’தி ப்³யாகரித்வா பக்காமி.
Ābādhe me samuppanneti āyasmato uttiyattherassa gāthā. Kā uppatti? So kira purimabuddhesu katādhikāro tattha tattha vivaṭṭūpanissayaṃ puññaṃ upacinanto ito catunavute kappe siddhatthassa bhagavato kāle candabhāgāya nadiyā mahārūpo susumāro hutvā nibbatto. So pāraṃ gantuṃ nadiyā tīraṃ upagataṃ bhagavantaṃ disvā pasannacitto pāraṃ netukāmo tīrasamīpe nipajji. Bhagavā tassa anukampāya piṭṭhiyaṃ pāde ṭhapesi. So haṭṭho udaggo pītivegena diguṇussāho hutvā sotaṃ chindanto sīghena javena bhagavantaṃ paratīraṃ nesi. Bhagavā tassa cittappasādaṃ oloketvā ‘‘ayaṃ ito cuto devaloke nibbattitvā tato paṭṭhāya sugatīsuyeva saṃsaranto ito catunavute kappe amataṃ pāpuṇissatī’’ti byākaritvā pakkāmi.
ஸோ ததா² ஸுக³தீஸுயேவ பரிப்³ப⁴மந்தோ இமஸ்மிங் பு³த்³து⁴ப்பாதே³ ஸாவத்தி²யங் அஞ்ஞதரஸ்ஸ ப்³ராஹ்மணஸ்ஸ புத்தோ ஹுத்வா நிப்³ப³த்தி உத்தியோ நாம நாமேன. ஸோ வயப்பத்தோ ‘‘அமதங் பரியேஸிஸ்ஸாமீ’’தி பரிப்³பா³ஜகோ ஹுத்வா விசரந்தோ ஏகதி³வஸங் ப⁴க³வந்தங் உபஸங்கமித்வா த⁴ம்மங் ஸுத்வா ஸாஸனே பப்³ப³ஜித்வாபி ஸீலாதீ³னங் அவிஸோதி⁴தத்தா விஸேஸங் நிப்³ப³த்தேதுங் அஸக்கொந்தோ அஞ்ஞே பி⁴க்கூ² விஸேஸங் நிப்³ப³த்தெத்வா அஞ்ஞங் ப்³யாகரொந்தே தி³ஸ்வா ஸத்தா²ரங் உபஸங்கமித்வா ஸங்கே²பேனேவ ஓவாத³ங் யாசி. ஸத்தா²பி தஸ்ஸ ‘‘தஸ்மாதிஹ த்வங், உத்திய, ஆதி³மேவ விஸோதே⁴ஹீ’’திஆதி³னா (ஸங்॰ நி॰ 5.369) ஸங்கே²பேனேவ ஓவாத³ங் அதா³ஸி. ஸோ தஸ்ஸ ஓவாதே³ ட²த்வா விபஸ்ஸனங் ஆரபி⁴. தஸ்ஸ ஆரத்³த⁴விபஸ்ஸனஸ்ஸ ஆபா³தோ⁴ உப்பஜ்ஜி. உப்பன்னே பன ஆபா³தே⁴ ஸஞ்ஜாதஸங்வேகோ³ வீரியாரம்ப⁴வத்து²ங் கத்வா விபஸ்ஸனாய கம்மங் கரொந்தோ விபஸ்ஸனங் உஸ்ஸுக்காபெத்வா அரஹத்தங் பாபுணி. தேன வுத்தங் அபதா³னே (அப॰ தே²ர 1.3.169-179) –
So tathā sugatīsuyeva paribbhamanto imasmiṃ buddhuppāde sāvatthiyaṃ aññatarassa brāhmaṇassa putto hutvā nibbatti uttiyo nāma nāmena. So vayappatto ‘‘amataṃ pariyesissāmī’’ti paribbājako hutvā vicaranto ekadivasaṃ bhagavantaṃ upasaṅkamitvā dhammaṃ sutvā sāsane pabbajitvāpi sīlādīnaṃ avisodhitattā visesaṃ nibbattetuṃ asakkonto aññe bhikkhū visesaṃ nibbattetvā aññaṃ byākaronte disvā satthāraṃ upasaṅkamitvā saṅkhepeneva ovādaṃ yāci. Satthāpi tassa ‘‘tasmātiha tvaṃ, uttiya, ādimeva visodhehī’’tiādinā (saṃ. ni. 5.369) saṅkhepeneva ovādaṃ adāsi. So tassa ovāde ṭhatvā vipassanaṃ ārabhi. Tassa āraddhavipassanassa ābādho uppajji. Uppanne pana ābādhe sañjātasaṃvego vīriyārambhavatthuṃ katvā vipassanāya kammaṃ karonto vipassanaṃ ussukkāpetvā arahattaṃ pāpuṇi. Tena vuttaṃ apadāne (apa. thera 1.3.169-179) –
‘‘சந்த³பா⁴கா³னதீ³தீரே, ஸுஸுமாரோ அஹங் ததா³;
‘‘Candabhāgānadītīre, susumāro ahaṃ tadā;
ஸகோ³சரபஸுதோஹங், நதி³தித்த²ங் அக³ச்ச²ஹங்.
Sagocarapasutohaṃ, nadititthaṃ agacchahaṃ.
‘‘ஸித்³த⁴த்தோ² தம்ஹி ஸமயே, ஸயம்பூ⁴ அக்³க³புக்³க³லோ;
‘‘Siddhattho tamhi samaye, sayambhū aggapuggalo;
நதி³ங் தரிதுகாமோ ஸோ, நதி³தித்த²ங் உபாக³மி.
Nadiṃ taritukāmo so, nadititthaṃ upāgami.
‘‘உபக³தே ச ஸம்பு³த்³தே⁴, அஹம்பி தத்து²பாக³மிங்;
‘‘Upagate ca sambuddhe, ahampi tatthupāgamiṃ;
உபக³ந்த்வான ஸம்பு³த்³த⁴ங், இமங் வாசங் உதீ³ரயிங்.
Upagantvāna sambuddhaṃ, imaṃ vācaṃ udīrayiṃ.
‘‘அபி⁴ரூஹ மஹாவீர, தாரெஸ்ஸாமி அஹங் துவங்;
‘‘Abhirūha mahāvīra, tāressāmi ahaṃ tuvaṃ;
பெத்திகங் விஸயங் மய்ஹங், அனுகம்ப மஹாமுனி.
Pettikaṃ visayaṃ mayhaṃ, anukampa mahāmuni.
‘‘மம உக்³க³ஜ்ஜனங் ஸுத்வா, அபி⁴ரூஹி மஹாமுனி;
‘‘Mama uggajjanaṃ sutvā, abhirūhi mahāmuni;
ஹட்டோ² ஹட்டே²ன சித்தேன, தாரேஸிங் லோகனாயகங்.
Haṭṭho haṭṭhena cittena, tāresiṃ lokanāyakaṃ.
‘‘நதி³யா பாரிமே தீரே, ஸித்³த⁴த்தோ² லோகனாயகோ;
‘‘Nadiyā pārime tīre, siddhattho lokanāyako;
அஸ்ஸாஸேஸி மமங் தத்த², அமதங் பாபுணிஸ்ஸதி.
Assāsesi mamaṃ tattha, amataṃ pāpuṇissati.
‘‘தம்ஹா காயா சவித்வான, தே³வலோகங் அக³ச்ச²ஹங்;
‘‘Tamhā kāyā cavitvāna, devalokaṃ agacchahaṃ;
தி³ப்³ப³ஸுக²ங் அனுப⁴விங், அச்ச²ராஹி புரக்க²தோ.
Dibbasukhaṃ anubhaviṃ, accharāhi purakkhato.
‘‘ஸத்தக்க²த்துஞ்ச தே³விந்தோ³, தே³வரஜ்ஜமகாஸஹங்;
‘‘Sattakkhattuñca devindo, devarajjamakāsahaṃ;
தீணிக்க²த்துங் சக்கவத்தீ, மஹியா இஸ்ஸரோ அஹுங்.
Tīṇikkhattuṃ cakkavattī, mahiyā issaro ahuṃ.
‘‘விவேகமனுயுத்தோஹங் , நிபகோ ச ஸுஸங்வுதோ;
‘‘Vivekamanuyuttohaṃ , nipako ca susaṃvuto;
தா⁴ரேமி அந்திமங் தே³ஹங், ஸம்மாஸம்பு³த்³த⁴ஸாஸனே.
Dhāremi antimaṃ dehaṃ, sammāsambuddhasāsane.
‘‘சதுன்னவுதிதோ கப்பே, தாரேஸிங் யங் நராஸப⁴ங்;
‘‘Catunnavutito kappe, tāresiṃ yaṃ narāsabhaṃ;
து³க்³க³திங் நாபி⁴ஜானாமி, தரணாய இத³ங் ப²லங்.
Duggatiṃ nābhijānāmi, taraṇāya idaṃ phalaṃ.
‘‘கிலேஸா ஜா²பிதா மய்ஹங்…பே॰… கதங் பு³த்³த⁴ஸ்ஸ ஸாஸன’’ந்தி.
‘‘Kilesā jhāpitā mayhaṃ…pe… kataṃ buddhassa sāsana’’nti.
அரஹத்தங் பன பத்வா அத்தனோ ஸம்மா படிபத்தியா பரிபுண்ணாகாரவிபா⁴வனமுகே²ன அஞ்ஞங் ப்³யாகரொந்தோ ‘‘ஆபா³தே⁴ மே ஸமுப்பன்னே’’தி கா³த²ங் அபா⁴ஸி.
Arahattaṃ pana patvā attano sammā paṭipattiyā paripuṇṇākāravibhāvanamukhena aññaṃ byākaronto ‘‘ābādhe me samuppanne’’ti gāthaṃ abhāsi.
30. தத்த² ஆபா³தே⁴ மே ஸமுப்பன்னேதி ஸரீரஸ்ஸ ஆபா³த⁴னதோ ‘‘ஆபா³தோ⁴’’தி லத்³த⁴னாமே விஸபா⁴க³தா⁴துக்கோ²ப⁴ஹேதுகே ரோகே³ மய்ஹங் ஸஞ்ஜாதே. ஸதி மே உத³பஜ்ஜதா²தி ‘‘உப்பன்னோ கோ² மே ஆபா³தோ⁴, டா²னங் கோ² பனேதங் விஜ்ஜதி, யதி³த³ங் ஆபா³தோ⁴ வட்³டெ⁴ய்ய. யாவ பனாயங் ஆபா³தோ⁴ ந வட்³ட⁴தி, ஹந்தா³ஹங் வீரியங் ஆரபா⁴மி ‘அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாயா’’’தி வீரியாரம்ப⁴வத்து²பூ⁴தா ஸதி தஸ்ஸேவ ஆபா³த⁴ஸ்ஸ வஸேன து³க்கா²ய வேத³னாய பீளியமானஸ்ஸ மய்ஹங் உத³பாதி³. தேனாஹ ‘‘ஆபோ³தோ⁴ மே ஸமுப்பன்னோ, காலோ மே நப்பமஜ்ஜிது’’ந்தி. ஏவங் உப்பன்னஞ்ஹி ஸதிங் அங்குஸங் கத்வா அயங் தே²ரோ அரஹத்தங் பத்தோதி.
30. Tattha ābādhe me samuppanneti sarīrassa ābādhanato ‘‘ābādho’’ti laddhanāme visabhāgadhātukkhobhahetuke roge mayhaṃ sañjāte. Sati me udapajjathāti ‘‘uppanno kho me ābādho, ṭhānaṃ kho panetaṃ vijjati, yadidaṃ ābādho vaḍḍheyya. Yāva panāyaṃ ābādho na vaḍḍhati, handāhaṃ vīriyaṃ ārabhāmi ‘appattassa pattiyā anadhigatassa adhigamāya asacchikatassa sacchikiriyāyā’’’ti vīriyārambhavatthubhūtā sati tasseva ābādhassa vasena dukkhāya vedanāya pīḷiyamānassa mayhaṃ udapādi. Tenāha ‘‘ābodho me samuppanno, kālo me nappamajjitu’’nti. Evaṃ uppannañhi satiṃ aṅkusaṃ katvā ayaṃ thero arahattaṃ pattoti.
உத்தியத்தே²ரகா³தா²வண்ணனா நிட்டி²தா.
Uttiyattheragāthāvaṇṇanā niṭṭhitā.
ததியவக்³க³வண்ணனா நிட்டி²தா.
Tatiyavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / தே²ரகா³தா²பாளி • Theragāthāpāḷi / 10. உத்தியத்தே²ரகா³தா² • 10. Uttiyattheragāthā
