| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
2. உய்யோஜனஸிக்கா²பத³வண்ணனா
2. Uyyojanasikkhāpadavaṇṇanā
274. து³தியஸிக்கா²பதே³ – படிக்கமனேபீதி ஆஸனஸாலாயம்பி. ப⁴த்தவிஸ்ஸக்³க³ந்தி ப⁴த்தகிச்சங். ந ஸம்பா⁴வேஸீதி ந பாபுணி.
274. Dutiyasikkhāpade – paṭikkamanepīti āsanasālāyampi. Bhattavissagganti bhattakiccaṃ. Na sambhāvesīti na pāpuṇi.
276. அனாசாரந்தி வுத்தாவஸேஸங் காயவசீத்³வாரவீதிக்கமங். த³ஸ்ஸனூபசாரங் வா ஸவனூபசாரங் வா விஜஹந்தஸ்ஸாதி எத்த² யதி³ டி²தோ வா நிஸின்னோ வா உய்யோஜேதி; யோ உய்யோஜிதோ, ஸோ விஜஹதி, தஸ்ஸ ச ஆபத்தி நாம நத்தி². தஸ்மிங் பன விஜஹந்தேபி அத்த²தோ இதரேன விஜஹிதமேவ ஹோதி. தஸ்மா யோ உய்யோஜேதி, தஸ்ஸேவாயங் ஆபத்தி. தத்த² ஸசே உபசாரப்³ப⁴ந்தரே ஏகோ பாதோ³ ஹோதி, து³க்கடங். ஸீமாதிக்கமே பாசித்தியங். எத்த² ச த³ஸ்ஸனூபசாரஸ்ஸ அப்³போ⁴காஸே த்³வாத³ஸஹத்த²ப்பமாணங், ததா² ஸவனூபசாரஸ்ஸ. ஸசே பன அந்தரா குட்டத்³வாரபாகாராத³யோ ஹொந்தி, தேஹி அந்தரிதபா⁴வோ த³ஸ்ஸனூபசாராதிக்கமோ, தஸ்ஸ வஸேன ஆபத்தி வேதி³தப்³பா³. ந அஞ்ஞோ கோசி பச்சயோ ஹோதீதி ட²பெத்வா வுத்தப்பகாரமனாசாரங் அஞ்ஞங் கிஞ்சி காரணங் ந ஹோதி.
276.Anācāranti vuttāvasesaṃ kāyavacīdvāravītikkamaṃ. Dassanūpacāraṃ vā savanūpacāraṃ vāvijahantassāti ettha yadi ṭhito vā nisinno vā uyyojeti; yo uyyojito, so vijahati, tassa ca āpatti nāma natthi. Tasmiṃ pana vijahantepi atthato itarena vijahitameva hoti. Tasmā yo uyyojeti, tassevāyaṃ āpatti. Tattha sace upacārabbhantare eko pādo hoti, dukkaṭaṃ. Sīmātikkame pācittiyaṃ. Ettha ca dassanūpacārassa abbhokāse dvādasahatthappamāṇaṃ, tathā savanūpacārassa. Sace pana antarā kuṭṭadvārapākārādayo honti, tehi antaritabhāvo dassanūpacārātikkamo, tassa vasena āpatti veditabbā. Na añño koci paccayo hotīti ṭhapetvā vuttappakāramanācāraṃ aññaṃ kiñci kāraṇaṃ na hoti.
277. கலிஸாஸனங் ஆரோபேதீதி ‘‘கலீ’’தி கோதோ⁴; தஸ்ஸ ஸாஸனங் ஆரோபேதி; கோத⁴ஸ்ஸ ஆணங் ஆரோபேதி; கோத⁴வஸேன டா²னநிஸஜ்ஜாதீ³ஸு தோ³ஸங் த³ஸ்ஸெத்வா ‘‘பஸ்ஸத² போ⁴ இமஸ்ஸ டா²னங், நிஸஜ்ஜங் ஆலோகிதங் விலோகிதங் கா²ணுகோ விய திட்ட²தி, ஸுனகோ² விய நிஸீத³தி, மக்கடோ விய இதோ சிதோ ச விலோகேதீ’’தி ஏவங் அமனாபவசனங் வத³தி ‘‘அப்பேவ நாம இமினாபி உப்³பா³ள்ஹோ பக்கமெய்யா’’தி. ஸேஸங் உத்தானமேவ.
277.Kalisāsanaṃ āropetīti ‘‘kalī’’ti kodho; tassa sāsanaṃ āropeti; kodhassa āṇaṃ āropeti; kodhavasena ṭhānanisajjādīsu dosaṃ dassetvā ‘‘passatha bho imassa ṭhānaṃ, nisajjaṃ ālokitaṃ vilokitaṃ khāṇuko viya tiṭṭhati, sunakho viya nisīdati, makkaṭo viya ito cito ca viloketī’’ti evaṃ amanāpavacanaṃ vadati ‘‘appeva nāma imināpi ubbāḷho pakkameyyā’’ti. Sesaṃ uttānameva.
திஸமுட்டா²னங் – காயசித்ததோ வாசாசித்ததோ காயவாசாசித்ததோ ச ஸமுட்டா²தி, கிரியங், ஸஞ்ஞாவிமொக்க²ங், ஸசித்தகங், லோகவஜ்ஜங், காயகம்மங், வசீகம்மங், அகுஸலசித்தங், திவேத³னந்தி.
Tisamuṭṭhānaṃ – kāyacittato vācācittato kāyavācācittato ca samuṭṭhāti, kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, tivedananti.
உய்யோஜனஸிக்கா²பத³ங் து³தியங்.
Uyyojanasikkhāpadaṃ dutiyaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 5. அசேலகவக்³கோ³ • 5. Acelakavaggo
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 2. உய்யோஜனஸிக்கா²பத³வண்ணனா • 2. Uyyojanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 2. உய்யோஜனஸிக்கா²பத³வண்ணனா • 2. Uyyojanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 2. உய்யோஜனஸிக்கா²பத³வண்ணனா • 2. Uyyojanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 2. உய்யோஜனஸிக்கா²பத³ங் • 2. Uyyojanasikkhāpadaṃ
