| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
2. உய்யோஜனஸிக்கா²பத³வண்ணனா
2. Uyyojanasikkhāpadavaṇṇanā
கா³மங் வா நிக³மங் வாதி எத்த² நக³ரம்பி கா³மக்³க³ஹணேனேவ க³ஹிதந்தி த³ட்ட²ப்³ப³ங். பவிஸிஸ்ஸாமாதி எத்த² க³ஹெத்வா ‘‘க³ந்த்வா’’தி பாட²ஸேஸோ, அஸமன்னாஹாரோ வா தஸ்ஸா இத்தி²யா தஸ்மிங் கா³மே ஸன்னிஹிதபா⁴வங் அஜானந்தோ வா ‘‘ஏஹாவுஸோ, கா³மங் வா நிக³மங் வா பிண்டா³ய பவிஸிஸ்ஸாமா’’தி பி⁴க்கு²ங் க³ஹெத்வா க³ந்த்வாதி அத்தோ². யங் கிஞ்சி ஆமிஸந்தி யாகு³ஆதி³கங் யங் கிஞ்சி ஆமிஸங். உய்யோஜெய்யாதி அத்தனோ கீளானுரூபங் இத்தி²ங் தி³ஸ்வா உய்யோஜெய்ய பஹிணெய்ய. தேனாஹ ‘‘மாதுகா³மேன ஸத்³தி⁴’’ந்திஆதி³. ஆதி³ஸத்³தே³ன வுத்தாவஸேஸங் காயவசீத்³வாரவீதிக்கமங் ஸங்க³ண்ஹாதி. ‘‘க³ச்சா²’’திஆதீ³னி வத்வாதி ‘‘க³ச்சா²வுஸோ, ந மே தயா ஸத்³தி⁴ங் கதா² வா நிஸஜ்ஜா வா பா²ஸு ஹோதி, ஏககஸ்ஸ மே கதா² வா நிஸஜ்ஜா வா பா²ஸு ஹோதீ’’தி (பாசி॰ 275) வத்வா. ஏதங் அனாசாரமேவாதி ஏதங் யதா²வுத்தங் ஹஸனாதி³அனாசாரமேவ. ந அஞ்ஞங் பதிரூபங் காரணந்தி ட²பெத்வா வுத்தப்பகாரங் அனாசாரங் உபி⁴ன்னங் ஏகதோ ந யாபனாதி³ங் அஞ்ஞங் பதிரூபகாரணங் பச்சயங் கரித்வா ந ஹோதீதி அத்தோ². அஸ்ஸாதி உய்யோஜகஸ்ஸ. ஸோதி யோ உய்யோஜிதோ, ஸோ.
Gāmaṃ vā nigamaṃ vāti ettha nagarampi gāmaggahaṇeneva gahitanti daṭṭhabbaṃ. Pavisissāmāti ettha gahetvā ‘‘gantvā’’ti pāṭhaseso, asamannāhāro vā tassā itthiyā tasmiṃ gāme sannihitabhāvaṃ ajānanto vā ‘‘ehāvuso, gāmaṃ vā nigamaṃ vā piṇḍāya pavisissāmā’’ti bhikkhuṃ gahetvā gantvāti attho. Yaṃ kiñci āmisanti yāguādikaṃ yaṃ kiñci āmisaṃ. Uyyojeyyāti attano kīḷānurūpaṃ itthiṃ disvā uyyojeyya pahiṇeyya. Tenāha ‘‘mātugāmena saddhi’’ntiādi. Ādisaddena vuttāvasesaṃ kāyavacīdvāravītikkamaṃ saṅgaṇhāti. ‘‘Gacchā’’tiādīni vatvāti ‘‘gacchāvuso, na me tayā saddhiṃ kathā vā nisajjā vā phāsu hoti, ekakassa me kathā vā nisajjā vā phāsu hotī’’ti (pāci. 275) vatvā. Etaṃ anācāramevāti etaṃ yathāvuttaṃ hasanādianācārameva. Na aññaṃ patirūpaṃ kāraṇanti ṭhapetvā vuttappakāraṃ anācāraṃ ubhinnaṃ ekato na yāpanādiṃ aññaṃ patirūpakāraṇaṃ paccayaṃ karitvā na hotīti attho. Assāti uyyojakassa. Soti yo uyyojito, so.
அனுபஸம்பன்னேதி ஸாமணேரே. ஸோவ இத⁴ அனுபஸம்பன்னோதி அதி⁴ப்பேதோதி வத³ந்தி. உபி⁴ன்னம்பீதி உபஸம்பன்னஸ்ஸ வா அனுபஸம்பன்னஸ்ஸ வாதி த்³வின்னம்பி. கலிஸாஸனாரோபனேதி (பாசி॰ அட்ட²॰ 277) கலீதி கோதோ⁴, தஸ்ஸ ஸாஸனங் ஆணங் கலிஸாஸனங் , தஸ்ஸாரோபனேதி அத்தோ², ‘‘அப்பேவ நாம இமினாபி உப்³பா³ள்ஹோ பக்கமெய்யா’’தி கோத⁴வஸேன டா²னநிஸஜ்ஜாதீ³ஸு தோ³ஸங் த³ஸ்ஸெத்வா ‘‘பஸ்ஸத² போ⁴ இமஸ்ஸ டா²னங் நிஸஜ்ஜங் ஆலோகிதங் விலோகிதங், கா²ணு விய திட்ட²தி, ஸுனகோ² விய நிஸீத³தி, மக்கடோ விய இதோ சிதோ ச விலோகேதீ’’தி ஏவங் அமனாபவசனஸ்ஸ ப⁴ணனேதி வுத்தங் ஹோதி. ஸுத்³த⁴சித்தேன பனேவங் ப⁴ணனே தோ³ஸோ நத்தி². ஏவமாதீ³ஹீதி எத்த² ஆதி³ஸத்³தே³ன ‘‘மஹக்³க⁴ங் ப⁴ண்ட³ங் பஸ்ஸித்வா லோப⁴த⁴ம்மங் உப்பாதெ³ஸ்ஸதீ’’தி உய்யோஜேதி, ‘‘மாதுகா³மங் பஸ்ஸித்வா அனபி⁴ரதிங் உப்பாதெ³ஸ்ஸதீ’’தி உய்யோஜேதி, ‘‘கி³லானஸ்ஸ வா ஓஹிய்யகஸ்ஸ வா விஹாரபாலஸ்ஸ வா யாகு³ங் வா ப⁴த்தங் வா கா²த³னீயங் வா நீஹரா’’தி உய்யோஜேதி, ‘‘ந அனாசாரங் ஆசரிதுகாமோ ஸதி கரணீயே உய்யோஜேதீ’’தி (பாசி॰ 278) ஏதேஸங் க³ஹணங்.
Anupasampanneti sāmaṇere. Sova idha anupasampannoti adhippetoti vadanti. Ubhinnampīti upasampannassa vā anupasampannassa vāti dvinnampi. Kalisāsanāropaneti (pāci. aṭṭha. 277) kalīti kodho, tassa sāsanaṃ āṇaṃ kalisāsanaṃ, tassāropaneti attho, ‘‘appeva nāma imināpi ubbāḷho pakkameyyā’’ti kodhavasena ṭhānanisajjādīsu dosaṃ dassetvā ‘‘passatha bho imassa ṭhānaṃ nisajjaṃ ālokitaṃ vilokitaṃ, khāṇu viya tiṭṭhati, sunakho viya nisīdati, makkaṭo viya ito cito ca viloketī’’ti evaṃ amanāpavacanassa bhaṇaneti vuttaṃ hoti. Suddhacittena panevaṃ bhaṇane doso natthi. Evamādīhīti ettha ādisaddena ‘‘mahagghaṃ bhaṇḍaṃ passitvā lobhadhammaṃ uppādessatī’’ti uyyojeti, ‘‘mātugāmaṃ passitvā anabhiratiṃ uppādessatī’’ti uyyojeti, ‘‘gilānassa vā ohiyyakassa vā vihārapālassa vā yāguṃ vā bhattaṃ vā khādanīyaṃ vā nīharā’’ti uyyojeti, ‘‘na anācāraṃ ācaritukāmo sati karaṇīye uyyojetī’’ti (pāci. 278) etesaṃ gahaṇaṃ.
உய்யோஜனஸிக்கா²பத³வண்ணனா நிட்டி²தா.
Uyyojanasikkhāpadavaṇṇanā niṭṭhitā.
