| Library / Tipiṭaka / তিপিটক • Tipiṭaka / মহাৰিভঙ্গ-অট্ঠকথা • Mahāvibhaṅga-aṭṭhakathā |
২. উয্যোজনসিক্খাপদৰণ্ণনা
2. Uyyojanasikkhāpadavaṇṇanā
২৭৪. দুতিযসিক্খাপদে – পটিক্কমনেপীতি আসনসালাযম্পি। ভত্তৰিস্সগ্গন্তি ভত্তকিচ্চং। ন সম্ভাৰেসীতি ন পাপুণি।
274. Dutiyasikkhāpade – paṭikkamanepīti āsanasālāyampi. Bhattavissagganti bhattakiccaṃ. Na sambhāvesīti na pāpuṇi.
২৭৬. অনাচারন্তি ৰুত্তাৰসেসং কাযৰচীদ্ৰারৰীতিক্কমং। দস্সনূপচারং ৰা সৰনূপচারং ৰা ৰিজহন্তস্সাতি এত্থ যদি ঠিতো ৰা নিসিন্নো ৰা উয্যোজেতি; যো উয্যোজিতো, সো ৰিজহতি, তস্স চ আপত্তি নাম নত্থি। তস্মিং পন ৰিজহন্তেপি অত্থতো ইতরেন ৰিজহিতমেৰ হোতি। তস্মা যো উয্যোজেতি, তস্সেৰাযং আপত্তি। তত্থ সচে উপচারব্ভন্তরে একো পাদো হোতি, দুক্কটং। সীমাতিক্কমে পাচিত্তিযং। এত্থ চ দস্সনূপচারস্স অব্ভোকাসে দ্ৰাদসহত্থপ্পমাণং, তথা সৰনূপচারস্স। সচে পন অন্তরা কুট্টদ্ৰারপাকারাদযো হোন্তি, তেহি অন্তরিতভাৰো দস্সনূপচারাতিক্কমো, তস্স ৰসেন আপত্তি ৰেদিতব্বা। ন অঞ্ঞো কোচি পচ্চযো হোতীতি ঠপেত্ৰা ৰুত্তপ্পকারমনাচারং অঞ্ঞং কিঞ্চি কারণং ন হোতি।
276.Anācāranti vuttāvasesaṃ kāyavacīdvāravītikkamaṃ. Dassanūpacāraṃ vā savanūpacāraṃ vāvijahantassāti ettha yadi ṭhito vā nisinno vā uyyojeti; yo uyyojito, so vijahati, tassa ca āpatti nāma natthi. Tasmiṃ pana vijahantepi atthato itarena vijahitameva hoti. Tasmā yo uyyojeti, tassevāyaṃ āpatti. Tattha sace upacārabbhantare eko pādo hoti, dukkaṭaṃ. Sīmātikkame pācittiyaṃ. Ettha ca dassanūpacārassa abbhokāse dvādasahatthappamāṇaṃ, tathā savanūpacārassa. Sace pana antarā kuṭṭadvārapākārādayo honti, tehi antaritabhāvo dassanūpacārātikkamo, tassa vasena āpatti veditabbā. Na añño koci paccayo hotīti ṭhapetvā vuttappakāramanācāraṃ aññaṃ kiñci kāraṇaṃ na hoti.
২৭৭. কলিসাসনং আরোপেতীতি ‘‘কলী’’তি কোধো; তস্স সাসনং আরোপেতি; কোধস্স আণং আরোপেতি; কোধৰসেন ঠাননিসজ্জাদীসু দোসং দস্সেত্ৰা ‘‘পস্সথ ভো ইমস্স ঠানং, নিসজ্জং আলোকিতং ৰিলোকিতং খাণুকো ৰিয তিট্ঠতি, সুনখো ৰিয নিসীদতি, মক্কটো ৰিয ইতো চিতো চ ৰিলোকেতী’’তি এৰং অমনাপৰচনং ৰদতি ‘‘অপ্পেৰ নাম ইমিনাপি উব্বাল়্হো পক্কমেয্যা’’তি। সেসং উত্তানমেৰ।
277.Kalisāsanaṃ āropetīti ‘‘kalī’’ti kodho; tassa sāsanaṃ āropeti; kodhassa āṇaṃ āropeti; kodhavasena ṭhānanisajjādīsu dosaṃ dassetvā ‘‘passatha bho imassa ṭhānaṃ, nisajjaṃ ālokitaṃ vilokitaṃ khāṇuko viya tiṭṭhati, sunakho viya nisīdati, makkaṭo viya ito cito ca viloketī’’ti evaṃ amanāpavacanaṃ vadati ‘‘appeva nāma imināpi ubbāḷho pakkameyyā’’ti. Sesaṃ uttānameva.
তিসমুট্ঠানং – কাযচিত্ততো ৰাচাচিত্ততো কাযৰাচাচিত্ততো চ সমুট্ঠাতি, কিরিযং, সঞ্ঞাৰিমোক্খং, সচিত্তকং, লোকৰজ্জং, কাযকম্মং, ৰচীকম্মং, অকুসলচিত্তং, তিৰেদনন্তি।
Tisamuṭṭhānaṃ – kāyacittato vācācittato kāyavācācittato ca samuṭṭhāti, kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, tivedananti.
উয্যোজনসিক্খাপদং দুতিযং।
Uyyojanasikkhāpadaṃ dutiyaṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৫. অচেলকৰগ্গো • 5. Acelakavaggo
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ২. উয্যোজনসিক্খাপদৰণ্ণনা • 2. Uyyojanasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ২. উয্যোজনসিক্খাপদৰণ্ণনা • 2. Uyyojanasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ২. উয্যোজনসিক্খাপদৰণ্ণনা • 2. Uyyojanasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ২. উয্যোজনসিক্খাপদং • 2. Uyyojanasikkhāpadaṃ
