| Library / Tipiṭaka / တိပိဋက • Tipiṭaka / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā |
၂. ဥယ္ယောဇနသိက္ခာပဒဝဏ္ဏနာ
2. Uyyojanasikkhāpadavaṇṇanā
၂၇၄. ဒုတိယသိက္ခာပဒေ – ပဋိက္ကမနေပီတိ အာသနသာလာယမ္ပိ။ ဘတ္တဝိသ္သဂ္ဂန္တိ ဘတ္တကိစ္စံ။ န သမ္ဘာဝေသီတိ န ပာပုဏိ။
274. Dutiyasikkhāpade – paṭikkamanepīti āsanasālāyampi. Bhattavissagganti bhattakiccaṃ. Na sambhāvesīti na pāpuṇi.
၂၇၆. အနာစာရန္တိ ဝုတ္တာဝသေသံ ကာယဝစီဒ္ဝာရဝီတိက္ကမံ။ ဒသ္သနူပစာရံ ဝာ သဝနူပစာရံ ဝာ ဝိဇဟန္တသ္သာတိ ဧတ္ထ ယဒိ ဌိတော ဝာ နိသိန္နော ဝာ ဥယ္ယောဇေတိ; ယော ဥယ္ယောဇိတော, သော ဝိဇဟတိ, တသ္သ စ အာပတ္တိ နာမ နတ္ထိ။ တသ္မိံ ပန ဝိဇဟန္တေပိ အတ္ထတော ဣတရေန ဝိဇဟိတမေဝ ဟောတိ။ တသ္မာ ယော ဥယ္ယောဇေတိ, တသ္သေဝာယံ အာပတ္တိ။ တတ္ထ သစေ ဥပစာရဗ္ဘန္တရေ ဧကော ပာဒော ဟောတိ, ဒုက္ကဋံ။ သီမာတိက္ကမေ ပာစိတ္တိယံ။ ဧတ္ထ စ ဒသ္သနူပစာရသ္သ အဗ္ဘောကာသေ ဒ္ဝာဒသဟတ္ထပ္ပမာဏံ, တထာ သဝနူပစာရသ္သ။ သစေ ပန အန္တရာ ကုဋ္ဋဒ္ဝာရပာကာရာဒယော ဟောန္တိ, တေဟိ အန္တရိတဘာဝော ဒသ္သနူပစာရာတိက္ကမော, တသ္သ ဝသေန အာပတ္တိ ဝေဒိတဗ္ဗာ။ န အညော ကောစိ ပစ္စယော ဟောတီတိ ဌပေတ္ဝာ ဝုတ္တပ္ပကာရမနာစာရံ အညံ ကိဉ္စိ ကာရဏံ န ဟောတိ။
276.Anācāranti vuttāvasesaṃ kāyavacīdvāravītikkamaṃ. Dassanūpacāraṃ vā savanūpacāraṃ vāvijahantassāti ettha yadi ṭhito vā nisinno vā uyyojeti; yo uyyojito, so vijahati, tassa ca āpatti nāma natthi. Tasmiṃ pana vijahantepi atthato itarena vijahitameva hoti. Tasmā yo uyyojeti, tassevāyaṃ āpatti. Tattha sace upacārabbhantare eko pādo hoti, dukkaṭaṃ. Sīmātikkame pācittiyaṃ. Ettha ca dassanūpacārassa abbhokāse dvādasahatthappamāṇaṃ, tathā savanūpacārassa. Sace pana antarā kuṭṭadvārapākārādayo honti, tehi antaritabhāvo dassanūpacārātikkamo, tassa vasena āpatti veditabbā. Na añño koci paccayo hotīti ṭhapetvā vuttappakāramanācāraṃ aññaṃ kiñci kāraṇaṃ na hoti.
၂၇၇. ကလိသာသနံ အာရောပေတီတိ ‘‘ကလီ’’တိ ကောဓော; တသ္သ သာသနံ အာရောပေတိ; ကောဓသ္သ အာဏံ အာရောပေတိ; ကောဓဝသေန ဌာနနိသဇ္ဇာဒီသု ဒောသံ ဒသ္သေတ္ဝာ ‘‘ပသ္သထ ဘော ဣမသ္သ ဌာနံ, နိသဇ္ဇံ အာလောကိတံ ဝိလောကိတံ ခာဏုကော ဝိယ တိဋ္ဌတိ, သုနခော ဝိယ နိသီဒတိ, မက္ကဋော ဝိယ ဣတော စိတော စ ဝိလောကေတီ’’တိ ဧဝံ အမနာပဝစနံ ဝဒတိ ‘‘အပ္ပေဝ နာမ ဣမိနာပိ ဥဗ္ဗာဠ္ဟော ပက္ကမေယ္ယာ’’တိ။ သေသံ ဥတ္တာနမေဝ။
277.Kalisāsanaṃ āropetīti ‘‘kalī’’ti kodho; tassa sāsanaṃ āropeti; kodhassa āṇaṃ āropeti; kodhavasena ṭhānanisajjādīsu dosaṃ dassetvā ‘‘passatha bho imassa ṭhānaṃ, nisajjaṃ ālokitaṃ vilokitaṃ khāṇuko viya tiṭṭhati, sunakho viya nisīdati, makkaṭo viya ito cito ca viloketī’’ti evaṃ amanāpavacanaṃ vadati ‘‘appeva nāma imināpi ubbāḷho pakkameyyā’’ti. Sesaṃ uttānameva.
တိသမုဋ္ဌာနံ – ကာယစိတ္တတော ဝာစာစိတ္တတော ကာယဝာစာစိတ္တတော စ သမုဋ္ဌာတိ, ကိရိယံ, သညာဝိမောက္ခံ, သစိတ္တကံ, လောကဝဇ္ဇံ, ကာယကမ္မံ, ဝစီကမ္မံ, အကုသလစိတ္တံ, တိဝေဒနန္တိ။
Tisamuṭṭhānaṃ – kāyacittato vācācittato kāyavācācittato ca samuṭṭhāti, kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, tivedananti.
ဥယ္ယောဇနသိက္ခာပဒံ ဒုတိယံ။
Uyyojanasikkhāpadaṃ dutiyaṃ.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝိဘင္ဂ • Mahāvibhaṅga / ၅. အစေလကဝဂ္ဂော • 5. Acelakavaggo
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၂. ဥယ္ယောဇနသိက္ခာပဒဝဏ္ဏနာ • 2. Uyyojanasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၂. ဥယ္ယောဇနသိက္ခာပဒဝဏ္ဏနာ • 2. Uyyojanasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၂. ဥယ္ယောဇနသိက္ခာပဒဝဏ္ဏနာ • 2. Uyyojanasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၂. ဥယ္ယောဇနသိက္ခာပဒံ • 2. Uyyojanasikkhāpadaṃ
