| Library / Tipiṭaka / තිපිටක • Tipiṭaka / මහාවිභඞ්‌ග-අට්‌ඨකථා • Mahāvibhaṅga-aṭṭhakathā |
2. උය්‍යොජනසික්‌ඛාපදවණ්‌ණනා
2. Uyyojanasikkhāpadavaṇṇanā
274. දුතියසික්‌ඛාපදෙ – පටික්‌කමනෙපීති ආසනසාලායම්‌පි. භත්‌තවිස්‌සග්‌ගන්‌ති භත්‌තකිච්‌චං. න සම්‌භාවෙසීති න පාපුණි.
274. Dutiyasikkhāpade – paṭikkamanepīti āsanasālāyampi. Bhattavissagganti bhattakiccaṃ. Na sambhāvesīti na pāpuṇi.
276. අනාචාරන්‌ති වුත්‌තාවසෙසං කායවචීද්‌වාරවීතික්‌කමං. දස්‌සනූපචාරං වා සවනූපචාරං වා විජහන්‌තස්‌සාති එත්‌ථ යදි ඨිතො වා නිසින්‌නො වා උය්‍යොජෙති; යො උය්‍යොජිතො, සො විජහති, තස්‌ස ච ආපත්‌ති නාම නත්‌ථි. තස්‌මිං පන විජහන්‌තෙපි අත්‌ථතො ඉතරෙන විජහිතමෙව හොති. තස්‌මා යො උය්‍යොජෙති, තස්‌සෙවායං ආපත්‌ති. තත්‌ථ සචෙ උපචාරබ්‌භන්‌තරෙ එකො පාදො හොති, දුක්‌කටං. සීමාතික්‌කමෙ පාචිත්‌තියං. එත්‌ථ ච දස්‌සනූපචාරස්‌ස අබ්‌භොකාසෙ ද්‌වාදසහත්‌ථප්‌පමාණං, තථා සවනූපචාරස්‌ස. සචෙ පන අන්‌තරා කුට්‌ටද්‌වාරපාකාරාදයො හොන්‌ති, තෙහි අන්‌තරිතභාවො දස්‌සනූපචාරාතික්‌කමො, තස්‌ස වසෙන ආපත්‌ති වෙදිතබ්‌බා. න අඤ්‌ඤො කොචි පච්‌චයො හොතීති ඨපෙත්‌වා වුත්‌තප්‌පකාරමනාචාරං අඤ්‌ඤං කිඤ්‌චි කාරණං න හොති.
276.Anācāranti vuttāvasesaṃ kāyavacīdvāravītikkamaṃ. Dassanūpacāraṃ vā savanūpacāraṃ vāvijahantassāti ettha yadi ṭhito vā nisinno vā uyyojeti; yo uyyojito, so vijahati, tassa ca āpatti nāma natthi. Tasmiṃ pana vijahantepi atthato itarena vijahitameva hoti. Tasmā yo uyyojeti, tassevāyaṃ āpatti. Tattha sace upacārabbhantare eko pādo hoti, dukkaṭaṃ. Sīmātikkame pācittiyaṃ. Ettha ca dassanūpacārassa abbhokāse dvādasahatthappamāṇaṃ, tathā savanūpacārassa. Sace pana antarā kuṭṭadvārapākārādayo honti, tehi antaritabhāvo dassanūpacārātikkamo, tassa vasena āpatti veditabbā. Na añño koci paccayo hotīti ṭhapetvā vuttappakāramanācāraṃ aññaṃ kiñci kāraṇaṃ na hoti.
277. කලිසාසනං ආරොපෙතීති ‘‘කලී’’ති කොධො; තස්‌ස සාසනං ආරොපෙති; කොධස්‌ස ආණං ආරොපෙති; කොධවසෙන ඨානනිසජ්‌ජාදීසු දොසං දස්‌සෙත්‌වා ‘‘පස්‌සථ භො ඉමස්‌ස ඨානං, නිසජ්‌ජං ආලොකිතං විලොකිතං ඛාණුකො විය තිට්‌ඨති, සුනඛො විය නිසීදති, මක්‌කටො විය ඉතො චිතො ච විලොකෙතී’’ති එවං අමනාපවචනං වදති ‘‘අප්‌පෙව නාම ඉමිනාපි උබ්‌බාළ්‌හො පක්‌කමෙය්‍යා’’ති. සෙසං උත්‌තානමෙව.
277.Kalisāsanaṃ āropetīti ‘‘kalī’’ti kodho; tassa sāsanaṃ āropeti; kodhassa āṇaṃ āropeti; kodhavasena ṭhānanisajjādīsu dosaṃ dassetvā ‘‘passatha bho imassa ṭhānaṃ, nisajjaṃ ālokitaṃ vilokitaṃ khāṇuko viya tiṭṭhati, sunakho viya nisīdati, makkaṭo viya ito cito ca viloketī’’ti evaṃ amanāpavacanaṃ vadati ‘‘appeva nāma imināpi ubbāḷho pakkameyyā’’ti. Sesaṃ uttānameva.
තිසමුට්‌ඨානං – කායචිත්‌තතො වාචාචිත්‌තතො කායවාචාචිත්‌තතො ච සමුට්‌ඨාති, කිරියං, සඤ්‌ඤාවිමොක්‌ඛං, සචිත්‌තකං, ලොකවජ්‌ජං, කායකම්‌මං, වචීකම්‌මං, අකුසලචිත්‌තං, තිවෙදනන්‌ති.
Tisamuṭṭhānaṃ – kāyacittato vācācittato kāyavācācittato ca samuṭṭhāti, kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, tivedananti.
උය්‍යොජනසික්‌ඛාපදං දුතියං.
Uyyojanasikkhāpadaṃ dutiyaṃ.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවිභඞ්‌ග • Mahāvibhaṅga / 5. අචෙලකවග්‌ගො • 5. Acelakavaggo
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 2. උය්‍යොජනසික්‌ඛාපදවණ්‌ණනා • 2. Uyyojanasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 2. උය්‍යොජනසික්‌ඛාපදවණ්‌ණනා • 2. Uyyojanasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 2. උය්‍යොජනසික්‌ඛාපදවණ්‌ණනා • 2. Uyyojanasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 2. උය්‍යොජනසික්‌ඛාපදං • 2. Uyyojanasikkhāpadaṃ
