8. உய்யுத்தஸேனாஸிக்கா²பத³வண்ணனா

311. அட்ட²மே – அப்³பு⁴ய்யாதோதி அபி⁴உய்யாதோ; பரஸேனங் அபி⁴முகோ² க³மிஸ்ஸாமீதி நக³ரதோ நிக்³க³தோதி அத்தோ². உய்யுத்தந்தி கதஉய்யோக³ங்; கா³மதோ நிக்க²ந்தந்தி அத்தோ².

314. த்³வாத³ஸபுரிஸோ ஹத்தீ²தி சத்தாரோ ஆரோஹகா ஏகேகபாத³ரக்க²கா த்³வே த்³வேதி ஏவங் த்³வாத³ஸபுரிஸோ ஹோதி. திபுரிஸோ அஸ்ஸோதி ஏகோ ஆரோஹகோ த்³வே பாத³ரக்க²காதி ஏவங் திபுரிஸோ ஹோதி. சதுபுரிஸோ ரதோ²தி ஏகோ ஸாரதி² ஏகோ யோதோ⁴ த்³வே ஆணிரக்க²காதி ஏவங் சதுபுரிஸோ ஹோதி. சத்தாரோ புரிஸா ஸரஹத்தா²தி ஆவுத⁴ஹத்தா² சத்தாரோ புரிஸாதி அயங் பச்சி²மகோடியா சதுரங்க³ஸமன்னாக³தா ஸேனா நாம. ஈதி³ஸங் ஸேனங் த³ஸ்ஸனாய க³ச்ச²தோ பதே³ பதே³ து³க்கடங். த³ஸ்ஸனூபசாரங் விஜஹித்வாதி கேனசி அந்தரிதா வா நின்னங் ஓருள்ஹா வா ந தி³ஸ்ஸதி; இத⁴ ட²த்வா ந ஸக்கா த³ட்டு²ந்தி அஞ்ஞங் டா²னங் க³ந்த்வா பஸ்ஸதோ பயோகே³ பயோகே³ பாசித்தியந்தி அத்தோ².

315. ஏகமேகந்தி ஹத்தி²ஆதீ³ஸு சதூஸு அங்கே³ஸு ஏகமேகங்; அந்தமஸோ ஏகபுரிஸாருள்ஹகஹத்தி²ம்பி ஏகம்பி ஸரஹத்த²ங் புரிஸங். அனுய்யுத்தா நாம ராஜா உய்யானங் வா நதி³ங் வா க³ச்ச²தி; ஏவங் அனுய்யுத்தா ஹோதி.

316. ஆபதா³ஸூதி ஜீவிதப்³ரஹ்மசரியந்தராயேஸு ஸதி எத்த² க³தோ முஞ்சிஸ்ஸாமீதி க³ச்ச²தோ அனாபத்தி. ஸேஸமெத்த² உத்தானமேவ. ஏளகலோமஸமுட்டா²னங் – கிரியங், நோஸஞ்ஞாவிமொக்க²ங், அசித்தகங், லோகவஜ்ஜங், காயகம்மங், அகுஸலசித்தங், திவேத³னந்தி.

உய்யுத்தஸேனாஸிக்கா²பத³ங் அட்ட²மங்.