| Library / Tipiṭaka / তিপিটক • Tipiṭaka / মহাৰিভঙ্গ-অট্ঠকথা • Mahāvibhaṅga-aṭṭhakathā |
৮. উয্যুত্তসেনাসিক্খাপদৰণ্ণনা
8. Uyyuttasenāsikkhāpadavaṇṇanā
৩১১. অট্ঠমে – অব্ভুয্যাতোতি অভিউয্যাতো; পরসেনং অভিমুখো গমিস্সামীতি নগরতো নিগ্গতোতি অত্থো। উয্যুত্তন্তি কতউয্যোগং; গামতো নিক্খন্তন্তি অত্থো।
311. Aṭṭhame – abbhuyyātoti abhiuyyāto; parasenaṃ abhimukho gamissāmīti nagarato niggatoti attho. Uyyuttanti katauyyogaṃ; gāmato nikkhantanti attho.
৩১৪. দ্ৰাদসপুরিসো হত্থীতি চত্তারো আরোহকা একেকপাদরক্খকা দ্ৰে দ্ৰেতি এৰং দ্ৰাদসপুরিসো হোতি। তিপুরিসো অস্সোতি একো আরোহকো দ্ৰে পাদরক্খকাতি এৰং তিপুরিসো হোতি। চতুপুরিসো রথোতি একো সারথি একো যোধো দ্ৰে আণিরক্খকাতি এৰং চতুপুরিসো হোতি। চত্তারো পুরিসা সরহত্থাতি আৰুধহত্থা চত্তারো পুরিসাতি অযং পচ্ছিমকোটিযা চতুরঙ্গসমন্নাগতা সেনা নাম। ঈদিসং সেনং দস্সনায গচ্ছতো পদে পদে দুক্কটং। দস্সনূপচারং ৰিজহিত্ৰাতি কেনচি অন্তরিতা ৰা নিন্নং ওরুল়্হা ৰা ন দিস্সতি; ইধ ঠত্ৰা ন সক্কা দট্ঠুন্তি অঞ্ঞং ঠানং গন্ত্ৰা পস্সতো পযোগে পযোগে পাচিত্তিযন্তি অত্থো।
314.Dvādasapuriso hatthīti cattāro ārohakā ekekapādarakkhakā dve dveti evaṃ dvādasapuriso hoti. Tipuriso assoti eko ārohako dve pādarakkhakāti evaṃ tipuriso hoti. Catupuriso rathoti eko sārathi eko yodho dve āṇirakkhakāti evaṃ catupuriso hoti. Cattāro purisā sarahatthāti āvudhahatthā cattāro purisāti ayaṃ pacchimakoṭiyā caturaṅgasamannāgatā senā nāma. Īdisaṃ senaṃ dassanāya gacchato pade pade dukkaṭaṃ. Dassanūpacāraṃ vijahitvāti kenaci antaritā vā ninnaṃ oruḷhā vā na dissati; idha ṭhatvā na sakkā daṭṭhunti aññaṃ ṭhānaṃ gantvā passato payoge payoge pācittiyanti attho.
৩১৫. একমেকন্তি হত্থিআদীসু চতূসু অঙ্গেসু একমেকং; অন্তমসো একপুরিসারুল়্হকহত্থিম্পি একম্পি সরহত্থং পুরিসং। অনুয্যুত্তা নাম রাজা উয্যানং ৰা নদিং ৰা গচ্ছতি; এৰং অনুয্যুত্তা হোতি।
315.Ekamekanti hatthiādīsu catūsu aṅgesu ekamekaṃ; antamaso ekapurisāruḷhakahatthimpi ekampi sarahatthaṃ purisaṃ. Anuyyuttā nāma rājā uyyānaṃ vā nadiṃ vā gacchati; evaṃ anuyyuttā hoti.
৩১৬. আপদাসূতি জীৰিতব্রহ্মচরিযন্তরাযেসু সতি এত্থ গতো মুঞ্চিস্সামীতি গচ্ছতো অনাপত্তি। সেসমেত্থ উত্তানমেৰ। এল়কলোমসমুট্ঠানং – কিরিযং, নোসঞ্ঞাৰিমোক্খং, অচিত্তকং, লোকৰজ্জং, কাযকম্মং, অকুসলচিত্তং, তিৰেদনন্তি।
316.Āpadāsūti jīvitabrahmacariyantarāyesu sati ettha gato muñcissāmīti gacchato anāpatti. Sesamettha uttānameva. Eḷakalomasamuṭṭhānaṃ – kiriyaṃ, nosaññāvimokkhaṃ, acittakaṃ, lokavajjaṃ, kāyakammaṃ, akusalacittaṃ, tivedananti.
উয্যুত্তসেনাসিক্খাপদং অট্ঠমং।
Uyyuttasenāsikkhāpadaṃ aṭṭhamaṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৫. অচেলকৰগ্গো • 5. Acelakavaggo
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৮. উয্যুত্তসেনাসিক্খাপদৰণ্ণনা • 8. Uyyuttasenāsikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৮. উয্যুত্তসেনাসিক্খাপদৰণ্ণনা • 8. Uyyuttasenāsikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৮. উয্যুত্তসেনাসিক্খাপদৰণ্ণনা • 8. Uyyuttasenāsikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৮. উয্যুত্তসেনাসিক্খাপদং • 8. Uyyuttasenāsikkhāpadaṃ
