| Library / Tipiṭaka / තිපිටක • Tipiṭaka / මහාවිභඞ්‌ග-අට්‌ඨකථා • Mahāvibhaṅga-aṭṭhakathā |
8. උය්‍යුත්‌තසෙනාසික්‌ඛාපදවණ්‌ණනා
8. Uyyuttasenāsikkhāpadavaṇṇanā
311. අට්‌ඨමෙ – අබ්‌භුය්‍යාතොති අභිඋය්‍යාතො; පරසෙනං අභිමුඛො ගමිස්‌සාමීති නගරතො නිග්‌ගතොති අත්‌ථො. උය්‍යුත්‌තන්‌ති කතඋය්‍යොගං; ගාමතො නික්‌ඛන්‌තන්‌ති අත්‌ථො.
311. Aṭṭhame – abbhuyyātoti abhiuyyāto; parasenaṃ abhimukho gamissāmīti nagarato niggatoti attho. Uyyuttanti katauyyogaṃ; gāmato nikkhantanti attho.
314. ද්‌වාදසපුරිසො හත්‌ථීති චත්‌තාරො ආරොහකා එකෙකපාදරක්‌ඛකා ද්‌වෙ ද්‌වෙති එවං ද්‌වාදසපුරිසො හොති. තිපුරිසො අස්‌සොති එකො ආරොහකො ද්‌වෙ පාදරක්‌ඛකාති එවං තිපුරිසො හොති. චතුපුරිසො රථොති එකො සාරථි එකො යොධො ද්‌වෙ ආණිරක්‌ඛකාති එවං චතුපුරිසො හොති. චත්‌තාරො පුරිසා සරහත්‌ථාති ආවුධහත්‌ථා චත්‌තාරො පුරිසාති අයං පච්‌ඡිමකොටියා චතුරඞ්‌ගසමන්‌නාගතා සෙනා නාම. ඊදිසං සෙනං දස්‌සනාය ගච්‌ඡතො පදෙ පදෙ දුක්‌කටං. දස්‌සනූපචාරං විජහිත්‌වාති කෙනචි අන්‌තරිතා වා නින්‌නං ඔරුළ්‌හා වා න දිස්‌සති; ඉධ ඨත්‌වා න සක්‌කා දට්‌ඨුන්‌ති අඤ්‌ඤං ඨානං ගන්‌ත්‌වා පස්‌සතො පයොගෙ පයොගෙ පාචිත්‌තියන්‌ති අත්‌ථො.
314.Dvādasapuriso hatthīti cattāro ārohakā ekekapādarakkhakā dve dveti evaṃ dvādasapuriso hoti. Tipuriso assoti eko ārohako dve pādarakkhakāti evaṃ tipuriso hoti. Catupuriso rathoti eko sārathi eko yodho dve āṇirakkhakāti evaṃ catupuriso hoti. Cattāro purisā sarahatthāti āvudhahatthā cattāro purisāti ayaṃ pacchimakoṭiyā caturaṅgasamannāgatā senā nāma. Īdisaṃ senaṃ dassanāya gacchato pade pade dukkaṭaṃ. Dassanūpacāraṃ vijahitvāti kenaci antaritā vā ninnaṃ oruḷhā vā na dissati; idha ṭhatvā na sakkā daṭṭhunti aññaṃ ṭhānaṃ gantvā passato payoge payoge pācittiyanti attho.
315. එකමෙකන්‌ති හත්‌ථිආදීසු චතූසු අඞ්‌ගෙසු එකමෙකං; අන්‌තමසො එකපුරිසාරුළ්‌හකහත්‌ථිම්‌පි එකම්‌පි සරහත්‌ථං පුරිසං. අනුය්‍යුත්‌තා නාම රාජා උය්‍යානං වා නදිං වා ගච්‌ඡති; එවං අනුය්‍යුත්‌තා හොති.
315.Ekamekanti hatthiādīsu catūsu aṅgesu ekamekaṃ; antamaso ekapurisāruḷhakahatthimpi ekampi sarahatthaṃ purisaṃ. Anuyyuttā nāma rājā uyyānaṃ vā nadiṃ vā gacchati; evaṃ anuyyuttā hoti.
316. ආපදාසූති ජීවිතබ්‍රහ්‌මචරියන්‌තරායෙසු සති එත්‌ථ ගතො මුඤ්‌චිස්‌සාමීති ගච්‌ඡතො අනාපත්‌ති. සෙසමෙත්‌ථ උත්‌තානමෙව. එළකලොමසමුට්‌ඨානං – කිරියං, නොසඤ්‌ඤාවිමොක්‌ඛං, අචිත්‌තකං, ලොකවජ්‌ජං, කායකම්‌මං, අකුසලචිත්‌තං, තිවෙදනන්‌ති.
316.Āpadāsūti jīvitabrahmacariyantarāyesu sati ettha gato muñcissāmīti gacchato anāpatti. Sesamettha uttānameva. Eḷakalomasamuṭṭhānaṃ – kiriyaṃ, nosaññāvimokkhaṃ, acittakaṃ, lokavajjaṃ, kāyakammaṃ, akusalacittaṃ, tivedananti.
උය්‍යුත්‌තසෙනාසික්‌ඛාපදං අට්‌ඨමං.
Uyyuttasenāsikkhāpadaṃ aṭṭhamaṃ.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවිභඞ්‌ග • Mahāvibhaṅga / 5. අචෙලකවග්‌ගො • 5. Acelakavaggo
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 8. උය්‍යුත්‌තසෙනාසික්‌ඛාපදවණ්‌ණනා • 8. Uyyuttasenāsikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 8. උය්‍යුත්‌තසෙනාසික්‌ඛාපදවණ්‌ණනා • 8. Uyyuttasenāsikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 8. උය්‍යුත්‌තසෙනාසික්‌ඛාපදවණ්‌ණනා • 8. Uyyuttasenāsikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 8. උය්‍යුත්‌තසෙනාසික්‌ඛාපදං • 8. Uyyuttasenāsikkhāpadaṃ
