| Library / Tipiṭaka / तिपिटक • Tipiṭaka / खुद्दसिक्खा-मूलसिक्खा • Khuddasikkhā-mūlasikkhā |
१६. वच्चपस्सावट्ठानिकनिद्देसवण्णना
16. Vaccapassāvaṭṭhānikaniddesavaṇṇanā
१५६. वच्चपस्सावट्ठानिकन्ति ठानम्हि ठाने वा भवं वच्चपस्सावट्ठानिकं। यथावुड्ढं वच्चं न करेय्याति सम्बन्धो। ये ये वुड्ढा यथावुड्ढं, आगतप्पटिपाटिं हित्वा वुड्ढप्पटिपाटियाति अत्थो। वच्चन्ति उपलक्खणमत्तं, पस्सावञ्च नहानञ्च न करेय्याति अधिप्पायो। तदेव समत्थेति ‘‘यातानुपुब्बिया’’तिआदिना। यातानुपुब्बियाति यातानं गतानं अनुपुब्बि अनुक्कमो यातानुपुब्बि, ताय। वच्च…पे॰… तित्थञ्चाति एतं तयं लब्भतीति अत्थो, भिक्खुनाति विञ्ञायति।
156.Vaccapassāvaṭṭhānikanti ṭhānamhi ṭhāne vā bhavaṃ vaccapassāvaṭṭhānikaṃ. Yathāvuḍḍhaṃ vaccaṃ na kareyyāti sambandho. Ye ye vuḍḍhā yathāvuḍḍhaṃ, āgatappaṭipāṭiṃ hitvā vuḍḍhappaṭipāṭiyāti attho. Vaccanti upalakkhaṇamattaṃ, passāvañca nahānañca na kareyyāti adhippāyo. Tadeva samattheti ‘‘yātānupubbiyā’’tiādinā. Yātānupubbiyāti yātānaṃ gatānaṃ anupubbi anukkamo yātānupubbi, tāya. Vacca…pe… titthañcāti etaṃ tayaṃ labbhatīti attho, bhikkhunāti viññāyati.
१५७. उब्भजित्वा च सहसा च नो पविसेय्याति सम्बन्धो। उब्भजित्वाति चीवरं दूरतोव उक्खिपित्वा। सहसाति सीघं। उक्कासित्वा पविसेय्याति योजना।
157. Ubbhajitvā ca sahasā ca no paviseyyāti sambandho. Ubbhajitvāti cīvaraṃ dūratova ukkhipitvā. Sahasāti sīghaṃ. Ukkāsitvā paviseyyāti yojanā.
१५८. वच्चपस्सावदोणीनं बहीति सम्बन्धो। उभयन्ति वच्चम्पि पस्सावम्पि।
158. Vaccapassāvadoṇīnaṃ bahīti sambandho. Ubhayanti vaccampi passāvampi.
१५९. कूपेति वच्चावाटे। कट्ठन्ति अवलेखनकट्ठं। फरुसेनाति खरेन अवलेखनकट्ठेन। उहतञ्चापीति अत्तना वा परेन वा उहतञ्चापि वच्चमक्खितञ्चापीति अत्थो। धोवयेति सति उदके, उदके असति कट्ठेनपि सोधेय्य।
159.Kūpeti vaccāvāṭe. Kaṭṭhanti avalekhanakaṭṭhaṃ. Pharusenāti kharena avalekhanakaṭṭhena. Uhatañcāpīti attanā vā parena vā uhatañcāpi vaccamakkhitañcāpīti attho. Dhovayeti sati udake, udake asati kaṭṭhenapi sodheyya.
१६०. न निक्खमेति न निक्खमेय्य। चपु चपूति अनुकरणं, विच्छायं द्वित्ते चपु चपु कत्वाति किरियाविसेसनं। नाचमेय्याति न धोवेय्य। सति पन उदके आचमितब्बं, असति येन केनचि पुञ्छित्वा गन्तब्बं, सब्बसाधारणट्ठाने च आचमनकुम्भिया उदकं न सेसेतब्बं। उक्लापन्ति कचवरं। विसोधयेति विहारसोधने विय वच्चपस्सावकुटियो, परिवेणकोट्ठके च सम्मज्जेय्य। सब्बत्थेव च पन वत्तभेदे दुक्कटं।
160.Na nikkhameti na nikkhameyya. Capu capūti anukaraṇaṃ, vicchāyaṃ dvitte capu capu katvāti kiriyāvisesanaṃ. Nācameyyāti na dhoveyya. Sati pana udake ācamitabbaṃ, asati yena kenaci puñchitvā gantabbaṃ, sabbasādhāraṇaṭṭhāne ca ācamanakumbhiyā udakaṃ na sesetabbaṃ. Uklāpanti kacavaraṃ. Visodhayeti vihārasodhane viya vaccapassāvakuṭiyo, pariveṇakoṭṭhake ca sammajjeyya. Sabbattheva ca pana vattabhede dukkaṭaṃ.
वच्चपस्सावट्ठानिकनिद्देसवण्णना निट्ठिता।
Vaccapassāvaṭṭhānikaniddesavaṇṇanā niṭṭhitā.
