| Library / Tipiṭaka / ติปิฎก • Tipiṭaka / ขุทฺทสิกฺขา-มูลสิกฺขา • Khuddasikkhā-mūlasikkhā |
๑๖. วจฺจปสฺสาวฎฺฐานิกนิเทฺทสวณฺณนา
16. Vaccapassāvaṭṭhānikaniddesavaṇṇanā
๑๕๖. วจฺจปสฺสาวฎฺฐานิกนฺติ ฐานมฺหิ ฐาเน วา ภวํ วจฺจปสฺสาวฎฺฐานิกํฯ ยถาวุฑฺฒํ วจฺจํ น กเรยฺยาติ สมฺพโนฺธฯ เย เย วุฑฺฒา ยถาวุฑฺฒํ, อาคตปฺปฎิปาฎิํ หิตฺวา วุฑฺฒปฺปฎิปาฎิยาติ อโตฺถฯ วจฺจนฺติ อุปลกฺขณมตฺตํ, ปสฺสาวญฺจ นหานญฺจ น กเรยฺยาติ อธิปฺปาโยฯ ตเทว สมเตฺถติ ‘‘ยาตานุปุพฺพิยา’’ติอาทินาฯ ยาตานุปุพฺพิยาติ ยาตานํ คตานํ อนุปุพฺพิ อนุกฺกโม ยาตานุปุพฺพิ, ตายฯ วจฺจ…เป.… ติตฺถญฺจาติ เอตํ ตยํ ลพฺภตีติ อโตฺถ, ภิกฺขุนาติ วิญฺญายติฯ
156.Vaccapassāvaṭṭhānikanti ṭhānamhi ṭhāne vā bhavaṃ vaccapassāvaṭṭhānikaṃ. Yathāvuḍḍhaṃ vaccaṃ na kareyyāti sambandho. Ye ye vuḍḍhā yathāvuḍḍhaṃ, āgatappaṭipāṭiṃ hitvā vuḍḍhappaṭipāṭiyāti attho. Vaccanti upalakkhaṇamattaṃ, passāvañca nahānañca na kareyyāti adhippāyo. Tadeva samattheti ‘‘yātānupubbiyā’’tiādinā. Yātānupubbiyāti yātānaṃ gatānaṃ anupubbi anukkamo yātānupubbi, tāya. Vacca…pe… titthañcāti etaṃ tayaṃ labbhatīti attho, bhikkhunāti viññāyati.
๑๕๗. อุพฺภชิตฺวา จ สหสา จ โน ปวิเสยฺยาติ สมฺพโนฺธฯ อุพฺภชิตฺวาติ จีวรํ ทูรโตว อุกฺขิปิตฺวาฯ สหสาติ สีฆํฯ อุกฺกาสิตฺวา ปวิเสยฺยาติ โยชนาฯ
157. Ubbhajitvā ca sahasā ca no paviseyyāti sambandho. Ubbhajitvāti cīvaraṃ dūratova ukkhipitvā. Sahasāti sīghaṃ. Ukkāsitvā paviseyyāti yojanā.
๑๕๘. วจฺจปสฺสาวโทณีนํ พหีติ สมฺพโนฺธฯ อุภยนฺติ วจฺจมฺปิ ปสฺสาวมฺปิฯ
158. Vaccapassāvadoṇīnaṃ bahīti sambandho. Ubhayanti vaccampi passāvampi.
๑๕๙. กูเปติ วจฺจาวาเฎฯ กฎฺฐนฺติ อวเลขนกฎฺฐํฯ ผรุเสนาติ ขเรน อวเลขนกเฎฺฐนฯ อุหตญฺจาปีติ อตฺตนา วา ปเรน วา อุหตญฺจาปิ วจฺจมกฺขิตญฺจาปีติ อโตฺถฯ โธวเยติ สติ อุทเก, อุทเก อสติ กเฎฺฐนปิ โสเธยฺยฯ
159.Kūpeti vaccāvāṭe. Kaṭṭhanti avalekhanakaṭṭhaṃ. Pharusenāti kharena avalekhanakaṭṭhena. Uhatañcāpīti attanā vā parena vā uhatañcāpi vaccamakkhitañcāpīti attho. Dhovayeti sati udake, udake asati kaṭṭhenapi sodheyya.
๑๖๐. น นิกฺขเมติ น นิกฺขเมยฺยฯ จปุ จปูติ อนุกรณํ, วิจฺฉายํ ทฺวิเตฺต จปุ จปุ กตฺวาติ กิริยาวิเสสนํฯ นาจเมยฺยาติ น โธเวยฺยฯ สติ ปน อุทเก อาจมิตพฺพํ, อสติ เยน เกนจิ ปุญฺฉิตฺวา คนฺตพฺพํ, สพฺพสาธารณฎฺฐาเน จ อาจมนกุมฺภิยา อุทกํ น เสเสตพฺพํฯ อุกฺลาปนฺติ กจวรํฯ วิโสธเยติ วิหารโสธเน วิย วจฺจปสฺสาวกุฎิโย, ปริเวณโกฎฺฐเก จ สมฺมเชฺชยฺยฯ สพฺพเตฺถว จ ปน วตฺตเภเท ทุกฺกฎํฯ
160.Na nikkhameti na nikkhameyya. Capu capūti anukaraṇaṃ, vicchāyaṃ dvitte capu capu katvāti kiriyāvisesanaṃ. Nācameyyāti na dhoveyya. Sati pana udake ācamitabbaṃ, asati yena kenaci puñchitvā gantabbaṃ, sabbasādhāraṇaṭṭhāne ca ācamanakumbhiyā udakaṃ na sesetabbaṃ. Uklāpanti kacavaraṃ. Visodhayeti vihārasodhane viya vaccapassāvakuṭiyo, pariveṇakoṭṭhake ca sammajjeyya. Sabbattheva ca pana vattabhede dukkaṭaṃ.
วจฺจปสฺสาวฎฺฐานิกนิเทฺทสวณฺณนา นิฎฺฐิตาฯ
Vaccapassāvaṭṭhānikaniddesavaṇṇanā niṭṭhitā.
